NJAGAI KEGELUHEN ANAK
(Nande si megenggeng nampati anak)
TUJUN: Gelah Moria:
- Ngidah erbage bage kejahaten si lit i bas kegeluhenna.
- Megenggeng i bas njagai kegeluhen anak.
METODE PA: Ndaftarken erbage-bage sumber kejahaten si seh man anak.
Yehezkiel/Esekiel 33: 7 – 9
33:7 Dan engkau anak manusia, Aku menetapkan engkau menjadi penjaga bagi kaum Israel. Bilamana engkau mendengar sesuatu firman dari pada-Ku, peringatkanlah mereka demi nama-Ku.
33:8 Kalau Aku berfirman kepada orang jahat: Hai orang jahat, engkau pasti mati! dan engkau tidak berkata apa-apa untuk memperingatkan orang jahat itu supaya bertobat dari hidupnya, orang jahat itu akan mati dalam kesalahannya, tetapi Aku akan menuntut pertanggungan jawab atas nyawanya dari padamu.
33:9 Tetapi jikalau engkau memperingatkan orang jahat itu supaya ia bertobat dari hidupnya, tetapi ia tidak mau bertobat, ia akan mati dalam kesalahannya, tetapi engkau telah menyelamatkan nyawamu.33:7 Dage, o manusia si ermasap-masap, Kuangkat kam jadi si erjaga i bas bangsa Israel. La banci lang isehkenndu man bana kata pertenget si Kubereken arah kam.
33:8 Adi Kupebetehken man kalak jahat maka mate me ia, tapi la ipersingetindu ia gelah iperobahina lagu langkahna maka ia terkelin, jenari mate ia i bas dosana, kam arus ertanggung jawab kerna kematenna.
33:9 Tapi adi ipersingetindu, janah la ingadikenna erbahan dosa, mate me ia i bas dosana, tapi kam terkelin.”
Kata Penaruh.
Teptep orangtua pasti ngarapken si mehulina jadi nandangi anak-anakna. Erbage-bage usaha sinilakoken menaken kitik-kitik nari seh enggo mbelin. Kinijuah-juahen anak jadi da kemalemen ate dingen kesuksesen man orangtua. Mehaga dingen megah kalniakap adi kegeluhen anak lebih asa kegeluhen orangtua. Umpamana i bas bidang pendidiken banci ikataken kune orangtua tamat SD, niarapken anak tamat SMP si meterukna, adi orangtua tamat SMP anak tamat SMA si meterukna, adi orangtua tamat SMA niarapken anak banci tamat D3 entah S1 ras sidebanna. Kerina kinilatihen dingen belinna biaya-biaya si pedarat ndube tergalari arah kesuksesen anak e. Bage ka pe i bas bidang sidebanna umpamana i bas bidang sosial, ekonomi ras kiniteken.
Kinata si terjadi lit ka deba orangtua si enggo rusaha, erpala-pala gelah anak e jadi (sukses), tapi si jadi peterbil ras sinisuraken. Bagi anding- andingen si rusur ibelasken eme bagi anak lagan, si ertina nggilingi, janah la terjeng sie dung nggiling nuktuki. Kegeluhen anak mekatep erbahanca ceda pusuh orangtua (nggilingi pusuh) tambah sie mekatep nuktuki pusuh seh maka mekatep orangtua sakit erkiteken lagu langkah anak si la mehuli. Anak si bage encedai la terjeng pusuh orang tua tapi pe rikut ras keluarga. Jadina la sitik anak e isirangi dingen tempa jadi surindan ku bas kegeluhen.
Mpebagesi Pengangkan Kerna Ogen.
Esekiel ertina “Dibata si mpegegehisa”. Ia sekalak nabi sekaligus imam. Bapana gelarna Busi i Kasdim nari (Esek. 1:3). Ialokenna pendilo Dibata i bas paksa ia itaban ku Babel. I bas masa pelayanen Esekiel Kata Dibata si mekatep isehkenna eme kerna ukumen Dibata nandangi Juda ras Jerusalem si enggo nilah i bas Dibata nari. La terjeng sie nabi Esekiel pe isuruh mpegegehi kinteken bangsa Israel oelah tetap setia. I bas ogenta enda iturken kerna bagin tugas i bas nabi Esekiel si iandingken bagi sekalak penjaga kuta Israel I bas bangsa Israel penjaga kuta basana tedis i datas tembok kuta guna ngawasi kuta ras sekitarna kune lit musuh reh i dauh-dauh nari iidah penjaga, maka penjaga ertanggungjabap ngelaporkenca entahpe nehken berita e alu erbahan tanda bahaya man anak kuta. Emaka la banci lang penjaga enda arus tetap metenget dingen megermet ngenehen sekelewetna (memperhatikan dengan sungguh sungguh. Bd. Jes. 21:6-7). Aturen sinipake eme kune lit bahaya nangdangi jadi ibahan tanda bahaya, tapi kune la diate anak kuta tanda bahaya e maka anak kuta e jine nanggung kesalahenna. Bagekape kune lidah penjaga e kerna musuh tapi la ilaporkenna man anak kuta, maka penjaga kuta e si ertanggungjabap i bas kematen entahpe kecedan kuta e Bagenda me tanggungjabap penjaga kuta.
Esekiel ilebuh Dibata jadi penjaga man bangsa Israel. (Esek 3:18), tugas enda pe enggo pernah isehken Dibata man Esekiel, janah Dibata mulini netapken maka Esekiel arus jadi nabi si setia guna mpersingeti bangsa Israel gelah robah i bas dosa-dosana dingen ngaloken keselamaten i bas Dibata nari. Bangsa Israel nggeluh i bas dosa si meluat: nembah man dibata-dibata sideban/gana-gana (Esekiel 16:16-22), ngelakoken perbahanen si la adil, kekejamen, meganjang ukur (Esekiel 7:10-13), erbahan perjanjin ras bangsa sideban guna ngaloken penampat seh maka nundalken Tuhan jadi penampatna (Esekiel 16:28-43). Mekateppe ikataken maka i bas paksa pelayanen Esekiel eme paksa kegelapen si jadi i bas kegeluhen bangsa Israel. Emaka Esekiel itugasken jadi penjaga guna nehken kata pertenget man bangsa Israel, kata pertenget sini sehken e me kata si rehna i bas Dibata nari (bd. Jer. 1:7), janah kata sinibelasken e la banci kurangi entah i lebih-lebihken (bd. Jer. 26:2), Tangkas maka keselamaten bangsa e mbelin kal ngaruh i bas penjaga nari, emaka la banci lang dahin enda arus itutusi dingen dem i bas kesabaren.
Pengkenaina
Tema-nta i bas PA-nta wari enda eme “Njagai Kegeluhen Anak”, lit piga-piga si jadi renungenta selaku penjaga eme:
- Jagai anak alu Kata Dibata.
Tuhu melala kal anak-anak si ndabuh ku bas pinakit sosial (judi, narkoba, pergaulen bebas ras sidebanna). Situasi enda labo si arapken i bas geluhta, tapi adi kune e enggo jadi maka kai banci si bahan? Tetaplah palasi pengajaren ras kata persinget si isehken el bas Kata Dibata nari. Adi bage la banci lang kata Dibata e enggo min leben nggeluh i bas kita segelah i bas ngajarken dingen persingetisa banci si sehken sue ras Kata Dibata. Alu kata sideban mari setia i bas ngorati kata Dibata segelah kata e jadi gelementa dingen mereken gegeh man banta i bas ngarak-ngarak kegeluhen si nusurta. - Metenget dingen dem i bas kesabaren.
Lingkungen si la sehat banci jadi mereken ngaruh ku bas kegeluhen, emaka mari metenget ngidah perubahen-perubahen si jadi i bas anak – anakta. Tuhu enggo melala kal dahin si arus idahiken ngelitken keperlun jabu, ngaturken kegeluhen jabu, dahin Gereja bagepe dahin peradaten. Kerina dahin enda banci erbahanca lupa kita mperdiateken kerna pergaulen anak. Tapi, kita selaku nande isuruh jadi penjaga kegeluhen anak, arus pentar i bas makeken waktu dingen tetap metenget, dem i bas kesabaren ngidah kegeluhen anak segelah kegeluhenna tetap banci erdalan i bas terang. Kune lit anak si nggo lalar i bas kegeluhen (terjerumus ku bas narkoba, pergaulen bebas ras sidebanna) niarapken alu dem kesabaren tetap si bimbing ia seh maka sada paksa robah ia i bas kerina perbahanenna. Tetaplah jadiken ia jadi teman, janah teklah maka kata Dibata si isuanken kita i bas kegeluhenna, sada paksa pagi turah dingen erbuah. Pebelin pengarapenta, paksa e seh me. Banci jadi langa genduari, tapi pasti turah sada paksa aminna pe langga si eteh ndigan waktuna.
Ndaftarken erbage-bage sumber kejahaten siseh man anak.
- Perdiateken janah tulisken kai-kai saja ulu kejahaten si turah i bas
kegeluhen enda:
- Tulisken kai si banci silakoken guna mpekitik entahpe mbeneken
kejahaten si lite?
Pdt. Rosanni br Sembiring, S.Th
