(Pentingna komunikasi antara bapa ras anak i bas keluarga)
Ogen : Jakup 1:19 – 21.
Tema : Metinggel, La Minter Ngerana.
Tujun : Gelah Mamre :
- Ngasup metinggel la minter ngerana.
- Ngasup ngelitken waktu erkomunikasi guna mendidik anak gelah terarah i bas kemajuan informasi teknologi.
1:19 Hai saudara-saudara yang kukasihi, ingatlah hal ini: setiap orang hendaklah cepat untuk mendengar, tetapi lambat untuk berkata-kata, dan juga lambat untuk marah; 1:20 sebab amarah manusia tidak mengerjakan kebenaran di hadapan Allah. 1:21 Sebab itu buanglah segala sesuatu yang kotor dan kejahatan yang begitu banyak itu dan terimalah dengan lemah lembut firman yang tertanam di dalam hatimu, yang berkuasa menyelamatkan jiwamu.
KATA PENARUH
Adi sinen secara fungsi indra maka bas takalta lit 2 cuping, rikut 1 babah. Tentu alu bage sepakat kita maka bas makeken fungsi organ si lit 2x cuping harus lebih ipakeken asangken 1 babah. Tapi realitasna mekatep banci leben babah ngerana anem gia langa erkedungen cuping metinggel/erpemegi. Ulihna banci terjadi salah faham, entah pe melenceng percakapen, la seh tujun. Lang pe pedah orangtua siadi ngataken, sik-sik lebe maka tindes.
Bas masa pandemi covid-19 i ja kita erdahin rumah nari, erlajar rumah nari, ibadah rumah nari si dominan ngisi kegeluhenta e me makeken media Informasi Teknologi (IT). Rikut usaha pendahin, pencarin nggo menda dominan make IT. Anak-anakta, adi metenget kita, medak nari seh tunduh lanai pulah bas ia cell-phone. Adi siorati entah silarang nina sangana ngerjaken tugas sekolah nari. Memang maun entah kai alasenna, PR ikirim guruna jam 19.00 karaben, sementara normalna pe sekolah jam 08.00-14.00 ngenca. Emaka situkur cell-phone, gelah amin kita ndauh entah ndiher tetap terhubung rikut terkoneksi, justru bas kenyataan cell-phone banci erbahanca kita putus hubungen ras anak jabuta amin pe pedempak. Enda situasi Simbaru, janah perlu kita menyesuaiken diri bas orat nggeluh simbaru enda (new normal). lja la lit kerelaan guna mbuka rikut mbere ruang komunikasi bas kiniteruken rukur rikut perayaken guna siangkaan maka simenguat e me factor saling
menyalahkan.
URAIAN TEKS/TAFSIREN
Sada ulih erkiniteken e me kengasupen guna mabai perdamen, kekelengen, perkuah ate, enda imaknai bas litna wujud kesadaran rohani/spiritual. Singasup nehken sienda e me kalak sienggo tuntas ras dirina i bas iketen doni enda, subuk erta, kuasa, egoisme (bdk.. Titus 2:2-6). Mengekang nafsu kedagingen rikut ngelebeken perayaken pertendin. Bas kita kalak Kristen enda si idah i bas pengendesen Jesus i das kayu persilang si sederhana nuduhken perdamen Dibata nandangi doni enda, bagepe perdamen ras sapih-sapih jelma. Enda jadi erkiteken la mpersilahan ba-Na guna majekken peraten Dibata Bapa. Anem la juru-uru, iciduri, ipek-pek. ipesega-sega, icambuk seh isalibken tapi kesempurnaan kuasa Kristus tersimpulken bas kata,”Alemi ia Bapa sebab la iangkana kai si ibahanna !” (bdk.. Luk. 3:34 bd. Ay 20) Jakub ngingetken kalak Kristen maka bas litna erbage-bage rupa pengajaren rikut perbeben siseh man bana harus ia metinggel rikut metenget gelah ula papak ras salah faham kerna kai si isehken kalak bana ngaburken pengertinna kerna erkiniteken si payo alu tetap ncikep pengajaren sibenar.
Pusuh simekeng silanga ipelimbarui i bas biak-biak simelket ras lagu langkah sijahat labo ngasup ngaloken kebenaren Kata Dibata. Kiniluaten enda ncurnaken kegeluhen ras kiniteken bas kegeluhen (Ef. 4:22, 25, 31; Kol. 3:8; I Ptr. 2:1). Pustaka si Badía erguna nuriken man banta peraten Dibata kerna geluh bas kebadian. Emaka ula sempat lit dalanna simbabai dosa ras keliamen bengket ku pusuh ras seisi jabu, rikut pengajaren Pustaka si Badia jadi cikepen ngalaken erbage rupa-rupa pengajaren rikut kebiaken si lit isekelewet kalak Kristen.
Pusuh si ermeteruk ukur e me palas guna banci turah kata si isuanken Dibata, mbere pengertin ku lagu langkah kegeluhen simbaru. Janah e mabai kegeluhen situtus erkiniteken, ngukuri Kata Dibata suari ras berngi seh ndalankenca bas kegeluhenna sitep-tep wari (22). Kata Dibata si isuanken, bagi urat sindeher lau anak, tetap turah, erbuah seh kukedungen sinasa lit janah sibengketi keselamaten situhu-tuhu (Msm. 1:3; Mt. 13:3-23)
APLIKASI
Erbage-bage rupa pengajaren simpengaruhi perukuren seh ku lagu langkah bagi galumbang lawit nderpa kegeluhen seisi jabuta arah media IT. Terlebih man anak-anakta adi la lit pengawasen rikut pengarahan bas kita Mamre maka banci ia ndempar seh bene erkiteken pengaruh IT enda, Alu litna komunikasi nuate banci siangkaan anak jabu guna seh kutujun perjabun simabai keriahen, kesehaten, kebayaken secara doni rikut pertendin. Bas sienda tentu siharapken e me membangun hubungen komunikasi baik lisan entah pe verbal, rikut bas litna siangkaan maka lit rusur perubahen kuarah simehulina i tengah jabu erpalasken perenungen Pustaka si Badia si igerakken Mamre.
Orat nggeluh simbaru membutuhken komitmen bersama. Bagi protocol kesehatan wajib ipatuhi gelah kerina selamat, bage me pe protokol komunikasi ras pengertin perlu ibangun Mamre i tengah keluarga gelah kerina tantangen, perbeben sosial, ekonomi, budaya seh pertendin banci radu ras ndatken solusi, rikut muat bagin gelah teraloken kesangapen rikut kesempabun jabu. Mamre harus sadar peran selaku mercusuar nandangi kapal tengah lawit siergalumbang bas kegeluhen anak
jabu ngalaken erbage tantangen rikut kompetisi kegeluhen si lit, segelah idahna rusur dalan mulih, rikut dalan keselamaten i tengah samudera gonjang-ganjing doni enda. Selaku Imam, Kepala Keluarga kesepakaten ras kesepahamen jam kebersamaan keluarga, subuk cakap-cakap, saat teduh, entah bermain permainen sederhana simenghadirken semangat kebersamaan, kehangatan keluarga perlu rusur silitken.
DISKUSI
- Uga terbagesen pengangkaita ngelebeken metinggel asa minter ngerana, terlebih ula sukah merawa ibandingken kenyataan sirusur si idah bas kenyataanna?
- Kai dage kesepakaten jabu siateta disiplin siterapken gelah lit waktu kebersamaan mbukaken ruang komunikasi erpalasken kata Dibata dingen kemeteruken ukur i tengah jabuta?
USULEN ENDEN ENDEN
- KEE GBKP No. 348:1,7
- KEE GBKP No. 299:1,2
- KEE GBKP No. 316:1.3
- KEE GBKP No. 317:1,2
Pdt. Imanuel Kemenangan Ginting, STh