(Pemakaian TI menjadi berkat)
Ogen : 1 Korinti 6:12; 10: 23-24
Tema : Kebebasen Si Ertanggungjabab
Tujun : Gelah Mamre:
- Meteh pengajaren Paulus kerna kebebasen selaku kalak Kristen I bas muat keputusen ras erlagu langkah simehuli
- Ngasup mereken prinsip-prinsip si payo man anak i bas makeken teknologi Informasi
6:12 Segala sesuatu halal bagiku, tetapi bukan semuanya berguna. Segala sesuatu halal bagiku, tetapi aku tidak membiarkan diriku diperhamba oleh suatu apapun.
10:23 “Segala sesuatu diperbolehkan.” Benar, tetapi bukan segala sesuatu berguna. “Segala sesuatu diperbolehkan.” Benar, tetapi bukan segala sesuatu membangun.
10:24 Jangan seorangpun yang mencari keuntungannya sendiri, tetapi hendaklah tiap-tiap orang mencari keuntungan orang lain
KATA PENARUH
Kebebasen e me salah sada arapen nggeluh manusia. I bas kebebasen sekalak jelma erbahanca banci ia ngelakoken erbage-bage hal alu la nggejapken keterpaksaan ntah pe tertekan, lit perasan dame ras leluasa ia i bas ndalani geluhna. I bas kenyatan nggeluh ermasyarakat ras ernegara bage pe erkiniteken, kebebasen labo iertiken sebage perbahanen se bebas-bebasna la erbatas, banci rate-ate, tapi kebebasen e ikaitken ras aturen-aturen sijadi ntahpe norma-norma kegeluhen si ipake. I bas kita ernegara, kebebasen sekalak jelma I jamin negara rikutken hukum ntah pe undang-undang. Tentu kebebasen e arus sendalanen ras norma-norma hukum la ertentangen ntah pe ngelawan hukum tapi ngelindungi hakta sebage warga negara. Tentu kita bebas i bas koridor hukum, tapi adi kita ndarat bas si itetapken pasti lit tindaken silakoken. Secara kiniteken pe kita enggo i tebus ntah pe i bebasken i bas dosa nari si maba kematen ras keterikaten nandangi perbahanen si melket. Dibata mereken kebebasen man banta. Tentu kebebasen e sialoken bas Dibata nari. Maka kita bebas ngelakoken perbahanen kai pe rikutken si ngena ate Dibata. Emaka ula kebebasen si ibereken Dibata e sipake erbahan dosa, padahal i bas dosa nari kita nggo i bebasken Dibata. Jadi i bas kegeluhen banci sikataken maka kebebasen e lit bas batas-batas si enggo i tetapken,
URAIAN TEKS/TAFSIREN
I bas 1 Korinti 6: 12; ras 1 Korinti 10: 23-24 Paulus nuriken pandangenna kerna kai kin kebebasen janah uga arusna kalak Kristen nggeluh selaku kalak si bebas janah seh ja batasen kebebasen e. Kota Korinti e me kota si cukup terkenal i Junani, banci ikataken kota enda kota Metropolitan si cukup maju, sebage pusat perdagangan ras kota industri kususna industri keramik, emaka melala jelma alu erbage-bage budaya reh ku kota enda. Kota Korintus jadi pusat penembahen dewa penyembuhen (Asklepisu) ras dewi cinta (Afrodite) si salah sada ritual penembahenna ngelakoken hubungen seksual, tentu saja enda ngeruntuhken moralitas kota e, megati pe ikataken i bas kuil penembahen e terjadi ije persundalan suci. Si enda kerina i kombinasiken ras cara nggeluh kalak Junani si umumna ngena atena erfilsafat janah ukuren kebaiken lebih ku arah kai si menyenangkan bas kegeluhen erbanca situasi perpulungen i ja Paulus ngirim surat enda cukup rumit.
I bas 1 Korinti 6:12 Paulus ngalaken situasi ija masalah erlua-lua (seks bebas) jadi hal si biasa i tengah-tengah masyarakat. Arah ayat enda Paulus ncidahken maka hubungen seksual situhuna labo hal si haram. Sabab manusia itepa Dibata secara sempurna subuk kula rikut pe ras sura-sura daging kerincuhen seks i bas dirina.
Tentu saja keinginan seksual e arus ilakoken alu ertanggungjabab sue ras peraten Dibata, janah ilakoken i bas konteks perjabun. Paulus ngataken: “… bebas kap aku segala sesuatu halal ngaloken kai pe”, i bas bahasa Indonesia i pake kalimat “segala sesuatu halal bagiku”. Jelas sinimaksudken Paulus e me prilaku seksual e. Kata “bebas” ntah pe “Halal” i bas cakap Junani i pake kata exestin. Kata enda lit piga piga antusenna: pantas, layak, kuasa entah pe hak, lit kuasa guna ngelakoken, ras bebas ngelakoken. Terbagesen kata enda banci iertiken sebage perbahanen si secara bebas banci ilakoken erkiteken memang memungkinken sabab lit kesempaten janah la lit halangen guna ngelakokensa. Tapi ikataken Paulus maka “..labo kerina erguna.” Kata “erguna” i bas cakap Junani i pake kata symphero si ertina keuntungen ntah pe menguntungken. Jadi Paulus pe ngukurken cara rukur masyarakat perdagangan si ngidah kerinana arah sudut pandang untung-rugi. Janah ikataken Paulus maka perbahanen erlua-lua e, aminna e mereken kenikmaten doni (hedonisme) tapi ulihna e me kerugin si mbelin man kegeluhenna. Kerugin e me sada hal si paling i hindari ras jadi kebiaren man perbinaga. Sebalikna banci sikataken maka sada keuntungen man banta adi banci kita ndauh bas prilaku si melket e. Jenari nina Paulus maka: “…la ku pelepas kai pe ngkuasai aku”. Kata “ngkuasai aku'” ibas cakap Junani e me exousiatesomai, sendalanen ras kata exestin ndai. Enda ertina “berkuasa” ntah pe “erkuasa kerna dirina jine”. I jenda banci siidah pemahamen Paulus kerna kebebasen si nekanken maka kerina banci si lakoken (katakenlah hubungen seksual; keinginen seksual) tapi ula keinginen e si ngkuasai kita, bicara silakoken pe dem alu kesadaren, I bas tanggungjabab, janah maba keuntungen ntah pe kiniulin ku tengah-tengah kegeluhen. I bas kebebasenna Paulus nekanken pengendalian diri jadi si utama janah sie hanci jadi adi Dibata si ngkuasai ia. Paulus secara sadar mbalengi bana gelah kebebasen si ibereken Dibata tuhu-tuhu maba keselamaten man bana.
I bas 1 Korinti 10: 23-24 (i terusken seh ku ayat 33), si idah maka lit persoalen i tengah-tengah perpulungen kerna pangan. Kepeken i Korintus lit kebiasaan maka kerina rubia-rubia si dagingna idayaken i tiga janah enggo leben ipersembahken man dewa-dewa ntah pe berhala. Emaka lit penungkunen: banci nge ndia si pan daging si nggo leben i persembahken man dibata sideban? Paulus nuriken pemahamenna nandangi persoalen enda. Pemena Paulus erpengakap maka daging e banci saja i pan, palas e me kerina si lit i bas doni enda e me sikerajangen Dibata, janah Paulus jine la tek man berhala-berhala ntah pe dewa-dewa, jadi bicara ipan pe, Paulus yakin maka labo lit ngaruhna man bana. Tapi si paling penting Paulus mperdiateken teman si isekelewetna, nggit ia mansa adi idahna ngasup kalak ngalokenca kai si ibahanna e. Si peduaken Paulus ngataken maka pangan ula ipan adi lit temanta si lateralokenna si e. Paulus nghormati kalak si beda pandangen ras ia janah ia erupaya maka banci ngelakoken perbahanen si maba kiniulin man jelma sisekelewetna. I jenda si idah sikap Paulus kerna ngertiken kebebasen. Adi i bas bagin sebelumna kebebasen e arus maba kiniulin man kegeluhennta, adi bas perikop si peduaken maka kebebasene me mereken si mehuli man kerina jelma.
APLIKASI
Erpalasken penjelasen i datas maka kebebasen si ibereken Dibata man banta arus sidalanken alu ertangungjabab maka kebebasen e la encedai tapi maba kiniulin si mbelin kempak kegeluhennta bage pe doni enda ras kerina isina. Secara khusus adi ngerana kita kerna kemajun teknologi informasi, si kataken saja e me media sosial si lit i bas kita, perlu kita metenget i bas makekenca. Adi situkur handphone tentu bebas kita makesa. Banci nge kita er-HP katawari pe, sanga man, medem, maba motor, sanga santai rsd. Tapi perlu si inget si kataken Paulus maka kerina banci ilakoken adi maba kiniulin ntah pe keuntungen man banta? Janah ikataken Paulus maka la kubere e kerina ngkuasai aku. Jadi teknologi arus sikendaliken, banci kita makekensa guna kiniulin geluhta ras si eteh katawari si pake. Kerna media social misalna Facebook, tweeter, instagram rsd, tentu enda pe jadi media terbuka man banta ras man kalak si deban. Arah medsos pe kita bebas berekspresi, kai pe banci si tulisken, sipostingken ntah pe sicidahken, saja si perlu si ukuri e me: maba kiniulin nge ndia si kutulisken, si kupostingken enda man kalak sideban, ma tambah nge kiniteken jelma sinterem? Mpersadaken nge ndia ntah mperubatken? Mpeterangi nge ndia ntah mpegelapken? Tentu kerina si ilakoken kita arus erguna man banta ras kalak sideban. Tentu kita Mamre si arahken anak-anakta makeken teknologi informasi enda alu ertanggungjabab gelah maba kiniulin man bana ras kerina jelma, kita pe banci jadi usihen arah caranta make HP ntah kita ermedsos. Kedungenna kerina si ibereken Dibata man banta, kebebasen erteknologi enda guna kemulian Dibata.
DISKUSI
- Uga nge pemahamenta kerna kebebasen siertanggung jabab erpalasken bahan ogenta sendah? Diskusiken alu mbages
- Turikenlah arah pengalamenndu, i bas ermedsos, hal-hal kai nge si erguna man bandu (mehuli, positif) postingen-postingen si lit ibas medsos si megati idahndu, janah apai ka postingen-postingen si la erguna akapndu ntah pe merugiken i bas medsos!
USULEN ENDEN-ENDEN
- KEE GBKP No. 249
- KEE GBKP No. 338
- KEE GBKP No. 255
- KEE GBKP No. 323
Pdt. Vicardo Ananda Ginting M.Th
081362439302
| CATATAN Minggu, Tanggal, 27 Juni- 03 Juli 2021 eme PA Minggu keluarga. Ibas minggu e ilakoken PA bersama Mamre, Moria, Permata, KAKR, Saitun. Ngarap kami gelah silakoken PA gabungen enda… |