RUNGGU
Nehemia 5:6-7
(Musyawarah Warga Sidi Runggun)
PERSIKAPEN
- Pengurus PJJ ngaturken perdalanen PJJ subuk kune ilakoken I bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen ras pertoton syafaat Adi i bas sektor entah jabu kepkepen perdalanen PJJ ibabai Pt Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
- Kerina perdalinenna rikutken situasi janah banci iubah (imodifikasi).
- Sope benaken PJJ banci kita rende Lagu KAKR Puji-Pujin (ibabai Anak)
Senang ukurku Jumpa ras Yesus senang ukurku Haleluya
Rasa lalap ateku ras IA senang jumpa ras Yesus Tuhanku
Haleluya Glory, Haleluya Glory ersurak surak puji Tuhan
Haleluya Glory, Haleluya Glory puji Yesus rasa lalap
Rende: KEE No. 209: 1 (iulihi 2 x) ibabai Anak
Perpulungen ersadalah ngikutken pedahNa
Bas kiniteken tetaplah man Tuhan Dibata
Bas si mehuli ayaklah si sampat-sampaten
Bage kap pedah Dibata sikeleng kelengen
Ertoto: (ibabai Pengurus PJJ/Nande)
Rende: KEE No 468:1-2 (ibabai Anak)
Tuhan demi aku salu KesahNdu, Tuhan demi aku salu KesahNdu
Pusuhku bagi tambe kubaba ku pancurNdu
Tuhan demi aku salu KesahNdu
Tuhan demi aku salu kataNdu, Tuhan demi aku salu KataNdu
Pusuhku bagi tambe kubaba ku pancurNdu
Tuhan demi aku salu kataNdu
Ngoge Pustaka : Nehemia 5:6-7 (Simada Jabu/Bapa)
5:6 Maka sangat marahlah aku, ketika kudengar keluhan mereka dan berita-berita itu. 5:7 Setelah berpikir masak-masak, aku menggugat para pemuka dan para penguasa. Kataku kepada mereka: “Masing-masing kamu telah makan riba dari saudara-saudaramu!” Lalu kuadakan terhadap mereka suatu sidang jemaah yang besar.
Runggu eme sada kegiaten siilakoken manusia guna ercakap, ngerencanaken, ngaturken sada-sada dahin termasuk ndungi kune lit ije persoalen. I bas Pustaka Si Badia, tua-tua Israel megati erbahan runggu, emaka lit nge isikapken ingan runggu i gerbang kota (Kej. 23:10, Jos. 20:4, Rut 4:1). Musa ngerunggui perubaten siturah i bas sapih-sapih kalak Israel (Kel.18:13); Daud pe ngelakoken runggu ras pemimpin-pemimpin pasuken (1 Kro. 13:1); Boas pe reh ku gerbang kota gelah irungguken kerna keluarga ras erta Elimelek perbulangen Naomi (Rut 4:1-); Pemimpin agama Kayapas, ras teman-temanna pe runggu ncakapken persoalen (Joh. 11:47); Paulus pe ngataken maka runggu jadi sada kesepakaten I bas erbage dampar geluh (Gal. 3:15). I bas budayanta suku Karo pe runggu enda enggo nai-nai nari jadi sada metode guna ncakapken erbage hal i bas kegeluhen. Kerina dahin iputusken alu runggu, kerja meriah ukur ntah pe ceda ate termasuk mbagiken tading-tadingen siirunggui anak beru. Tentuna singerunggui e arus kalak si bujur seh maka keputusen si idatken mabai kiniulin ras keriahen ukur bage pe ngerakut kiniersadan jabu ras sangkep nggeluh.
Renungenta i bas paksa enda nuriken sada situasi kalak Jahudi si enggo mulih i pembuangen nari. Nehemia ndatken tugas ras tanggungjabab raja Persia guna mbangun tembok Jerusalem mulihken. Rikut erbahan pembaharun i bas kegeluhen bangsa e i bas masyarakat bage pe i bas keagaman. Renungenta enda nuriken kegeluhen i bas masyarakat ras keagamaan si lanai bujur. I bas perjuangen pembangunen tembok, la sitik kalak siasak-asak bana guna ncukupken keperlun geluh. Sabab mulai me kinilaadilen, kelabujuren turah seh maka tentuna si musil me sijadi korban. Ija sebagin masyarakat lanai ndayaken bana jadi budak man bangsa si deban tapi enggo man temanna sebangsa. Megi sie tentuna Nehemia merawa sabab usaha ras perjuangenna selaku pemimpin tuhu-tuhu luar biasa guna nehi kesejahteran bangsa alu pembangunen tembok (fisik) si mbelin tantangenna bage pe pembangunen kesejahteraan bangsa e alu keadilen ras kebujuren. Emaka ibuatna sada tindaken guna ndungi persoalen e, itembehina pengulu ras pegawai kerna kejadin e janah ipepulungna jelma sinterem guna ncakapkenca. Ertina selaku pemimpin la ibuatna sada keputusen siarus ilakoken tapi alu mpepulung para pemimpin, pembuat ras pelaksana kebijaken e. Sabab arah pulung, ercakap, ngangkai persoalen seh maka ndatken kesedaren kerna situasi erbahan kerinana banci rukur ras ndalanken simehuli ndungi persoalen-persoalen si lit. Kedungenna adi sioge teks enda seh dung maka dat sada kesepakaten guna kegeluhen bangsa siadil ras bujur dingen si sampat-sampaten. Runggu mabai kita meteh situasi, subuk persoalen, tujun, cara ndatken kiniulin i bas jabu, masyarakat, bangsa ras gereja.
I bas gerejanta, ingan ngawan perpulungen lako encidahken kedewasan kiniteken alu nehken partisipasi mereken sumbangen pikiren ras usul eme Musyawarah Ngawan/sidi. Musyawarah Ngawan/sidi enggo iaturken i bas Tata Gereja Bab XXXIX pasal 164 khusus i bas poin 6 ituriken ija adi runggun alu jumlah 100 kepala keluarga menggunaken sistem langsung ija kerina ngawan iundang tapi si lebih 100 keluarga metodena iwakili perpulungen subuk arah PJJ, pengurus kategorial ras serayan. I bas Musyawarah Ngawan/Sidi kerina dinamika kegeluhen perpulungen subuk laporen perkembangen ras arapen ku lebe icakapken, siertina kerina ngangkai kegeluhen perpulungen sabab kerina anggota arus ngangkai kegeluhen organisasi alu bage kerina banci muat bagin guna ersada, ngelai ras naksiken keleng ate Dibata. Sabab labo lit sada pe numpang dingen jadi objek pelayanen tapi kerina jadi subjek pelayanen, kerina jadi ngawan si dewasa. Arah percakapen e kerina usulen ibaba ku sidang runggun guna iputusken ras idalanken. Kerina materi i bas musyawarah ngawan enda min jadi pasu-pasu i bas kegeluhen, subuk masyarakat ras gereja bage pe secara kiniteken, ekonomi, kegeluhen sosial si naksiken kebenaren, kebujuren ras keadilen.
Nuriken Penggejapen: Pengurus PJJ, Moria, Mamre ras Permata
(iselingi Rende)
Diskusi (ibabai Pengurus PJJ)
1. Turiken ras evaluasilah pelaksanaan Musyawarah Warga Sidi Runggun silakoken kita kidekah enda!
2. Selaku ngawan ni perpulungen, kuga keikutsertanta i bas proses Musyawarah Sidi e, subuk mereken usulen, mengevaluasi pelayanen ras ndalanken pelayanen e?
Kesimpulen (irakut serayan)
Tekad (Responsoria) ibabai Pertua ntah Diaken
L Ipasu-pasu kegeluhenta, kita nggeluh i bas jabu, masyarakat, perpulungen, i bas sie kita arus mbangun kegeluhen si sempabu
P Guna kegeluhen sisempabu enda, kita arus ercakap, mereken perukuren, dingen ndalanken simehuli
L Mari i bas musyawarah ngawan tahun enda, sibuat baginta I bas perukuren, kreativitas simehuli guna mbangun perpulungen
P Kubere diringku guna mbangun kegeluhen si sempabu i bas Tuhan
Rende KEE No. 343:1 (Mpepulung Persembahen) (ibabai Anak)
Pasu-pasu bas Tuhan nari, gejabken kami teptep wari
Bas paksa paksa geluh kami, Kam me tetap singkawali
Pasu-pasu bas Tuhan nari jadi, pergegeh tendi kami
Guna ndalani wari-wari, si rehna bas Kam Tuhan nari
Pasu-pasu dage o Tuhan, persembahen kami anakNdu
Labo kapen enda metunggung, persembahen singgo pepulung
AjariNdu min kami gelah min tetap ngasup mere man Tuhan
Pertoton Persembahen, Sapaat ras Pertoton Tuhan
(Topik Pertoton Sapaat iaturken i bas jabu ntah sektorta) ibabai Pertua ntah Diaken/ Bapa ntah Nande
Pdt. Suenita br Sinulingga, M.Th.