BIMBINGEN PA MAMRE
Tanggal 21 – 27 Pebruari 2021
(Anak si nguda jadi Pasu-Pasu)
Ogen : Masmur 144: 1-2, 12
Tema : Anak Si Megegeh Dingen Mejile
Tujun : Gelah Mamre:
- Meteh perluna njadiken anak ernalem man Dibata
- Mereken pengajaren ras usihen gelah anak jadi kalak si megegeh ras mejile
Nyanyian syukur raja
144:1 Dari Daud. Terpujilah TUHAN, gunung batuku, yang mengajar tanganku untuk bertempur, dan jari-jariku untuk berperang;
144:2 yang menjadi tempat perlindunganku dan kubu pertahananku, kota bentengku dan penyelamatku, perisaiku dan tempat aku berlindung, yang menundukkan bangsa-bangsa ke bawah kuasaku!
144:12 Semoga anak-anak lelaki kita seperti tanam-tanaman yang tumbuh menjadi besar pada waktu mudanya; dan anak-anak perempuan kita seperti tiang-tiang penjuru, yang dipahat untuk bangunan istana!
KATA PENARUH
Ibas tahun enda melala kita ngerana kerna anak singuda erkiteken tema pelayanenta e me “Anak si nguda jadi pasu-pasu”. Nikapken anak jadi pasu-pasu e labo menukah, labo i bas waktu si kentisik, entah pe la banci meros. Si e ibenaken i bas tengah jabu nari alu palas kata Dibata, mereken
pengajaren alu palas si paguh. Desken majekken sada bangunen, si pemena palasna arus nge paguh, adi nggo paguh palasna maka kai pe si nderpasa lanai banci mobah sabab palas bangunen e megegeh. Lit pe tantangen si mesangat si reh nderpasa tetap ia megegeh erkiteken palas si megegeh enggo lit ibassa. E maka melala nge kalak si mbangun gedung-gedung si meganjang ikalina lebe palas si mbages bahkan anti gempa, gelah bicara reh topan bangunen si megah e tetap pajek alu paguh. Bage me pe selaku orangtua, perlu kel sisuanken pengajaren kata Dibata man anakta menaken kitik nari, maka bicara i ja pe ia ringan ras kai pe si man alankenna i bas geluhna ngasup ia ngasamken gegeh Tuhan segedang geluhna dingen ernalem ia man Dibata.
URAIAN TEKS/TAFSIREN
Daud selaku pemasmur nggejapken uga belinna pemasu-masun Tuhan si enggo ialokenna bas geluhna. E maka ngataken bujur ia man Tuhan arah bentuk ende-enden. Igejapkenna maka Dibata e me “pengawal dingen pembelangku, inganku cilinggem si engkelini aku, ampang-ampang inganku cicio”. Enda sada penggejapen kerna Dibata ulu kegeluhen si nelamatken kegeluhenna. Si enda nuduhken bedana keagungen Dibata ras keadan manusia si labo lit ergana si erbahansa pemasmur nehken pujin man Dibata.
Tapi Dibata mperdiateken anak manusia si la meherga enda ras nelamatkenca i bas erbage-bage perbeben ras tantangen si man alankenna. Enda me si erbahanca pemasmur ngataken bujur man Tuhan arah ende-enden si mbaru. Arah kai si isaksiken Daud i bas ngalaken perbeben si mesangat bage pe kerina e la erbahanca la surut. Kerina e erbahanca la reh paguhna (ind: tangguh). E maka alu kiniteruken ukur Daud mindo penampat I bas Dibata nari sebab enggo igejapkenna Tuhan si mereken kermenangen i bas peperangen (ay. 10)
Adi nggeluh i bas kiniteken lit sada keyakinenta, anem gia reh percuban si mesangat si banci mperehken bahaya ras kekoten tapi i bas Tuhan erbahanca kita reh gegehna. La kita fokus ku bas galangna masalah si nderpa geluhta tapi natap kempak tan Tuhan si mehaga si tetap it i bas pihakta bag pengakun Daud “aminna erdalan arah kelbung si gelap, la aku mbiar jumpa cilaka sabab Kam kap ras aku” (Masmur 23: 4). Tantangen i bas geluhta labo erbahanca kita kote tapi erbahanca kita reh paguhna ‘semakin tangguh’. Bage me penandai Daud kerna Dibata selaku sekawal si nikapken ia i bas peperangen, subuk perang rohani bagepe perang i bas doni enda.
Ayat 12, ‘Adi Dibata nggo mereken kemenangen, ikawali Tuhan Daud i bas kerina musuh-musuhna nari e maka jadi me kondisi aman sejahtra”, i bas situasi si bage me lit arapenna kerna anak dilaki desken batang kayu si turah alu megegeh ras anak diberu desken tíang si ihias i bas suki-suki istana. Enda nandaken bage me idealna kerna kegeluhen keluarga si er-Dibataken TUHAN (bdk. ay 15)
Anakna si dilaki mbestang dingen mehaga, paguh dingen pang. anakna si diberu mejile dingen melala pasu-pasu sinialokenna. Anak dilaki selaku keturunen andalan masa depan, tenaga i bas peperangen banci turah bagí sinuan si paguh (12a) janah anakna si diberu mejile, ras kinijilenna e banci jadi hiasen istana raja (12b)
Dage, pemasmur tek maka keleng ate Dibata erbahanca ia ngasup ermeriah ukur dingen ngataken bujur i bas kerina dampar kegeluhenna. Radu ras sie e malem atena erkiteken anak-anakna mehaga dingen mejile, jadi rudang rudang si erbahanca turah kesangapen i bas kegeluhenna.
APLIKASI
Proses njadiken anak-anak i bas tengah jabu jadi pasu-pasu labo proses si menukah, perlu kel ije teladan kiniteken ras teladan uga gelah anak-anak e megenggeng i bas ngalaken perbeben geluhna. Perlu si pepayo anak-anakta genduari, ngasup nge anakta megenggeng i bas ngalaken perbeben ras tantangen? Entah minter ia kote, putus asa adi reh perbeben ras kegagalen. Minter ia akapna si meterukna, “sial” nina erkata bana bas pusuhna. Entahsa anak-anakta genduari enda minter kote adi lit kegagalen bas geluhna, subuk i sekolah, pendahin, pergaulen la ia megenggeng. La kinlah enda pe salah sada buah i bas didikenta, la si persikapen anak-anakta pang “erperang” gelah tangguh.
Mari sigargari dirinta selaku orangtua. Megati mbiar kel kita anakta ngalaken perbeben e maka si alaken lebe perbeben e, la kel kita nyaman ngidah anakta teriluh adi inanamina perbeben ras kegagalen i bas kegeluhenna, pangen siakap kita ngalaken perbeben e asangken ngidah anakta ngalakenca. Banci jadi erkiteken si e maka anak-anakta genduari enda nggo kurang megenggengna ngalaken tantangen, peperangen i bas kegeluhenna. Melala pe murah kel putus asa, ugal-ugalen tupung ialakenna kegagalen sabab la si persiapken ia ngalaken perbeben si mberat i bas geluhna. Perlu pe siajarken maka kegagalan e me langkah awal kesuksesen man anak-anakta.
Pertoton Jendral Douglas Mac Arthur “Aku mohon, janganlah pimpin putraku di jalan yang mudah dan lunak, namun tuntunlah dia di jalan yang penuh hambatan dan godaan, kesulitan dan tantangan dan senantiasa belajar untuk mengasihi yang tidak berdaya”. Enda pertoton sekalak bapa kerna anakna, selaku sekalak Jenderal enggo iidahna maka perbeben, tantangen ras masalah si ni hadapi anak-anakna enda erbahanca anakna paguh ngalaken perbeben si mberat.
I bas sada buku Psikologi keluarga pernah ituliskenna i je maka nina: “Jiwa kepemimpinan anak itu akan muncul dari kedekatan anak itu dengan bapanya.” Jadi, adi ateta anakta e jadi pemimpin lit min lah kedekaten bapa ras anak-anakna i bas tengah jabu.
Nuanken kebenaren kata Dibata menaken i bas jabunta nandangi anak-anakta, la terjeng tugas nande, tapi tugas orangtua, dingen bapa ras nande banci jadi role model (usihen/teladan) man anak-anakta. Adi nggo mbages tersuan man anakta palas kata Dibata e ibas kegeluhena e maka kai pe tantangen ras perbeben e si man alankenna tetap ia menang i bas peperangen ndai. Adi ateta anakta e jadi pasu-pasu, kita pe arus ka min jadi pasu-pasu man anak-anakta e lebe, e maka man kalak si deban pe seh maka kai pengajaren sisuanken kita e, si e ka nge sisuankenna man anak-anakna ka pagin.
DISKUSI
- Menurutndu, kai nge siniarapken Daud arah anak-anakna sidilaki ras sidiberu erpalasken Masmur 144: 12 enda? Diskusiken alu mbages
- Pengajaren si kuga nge si perlu si peseh man anak-anakta gelah anak-anakta e banci jadi pasu-pasu man kalak sideban?
USULEN ENDE ENDEN
- KEE GBKP No : 354:1-2
- KEE GBKP No: 374 : 1,3
- KEE GBKP No : 420:1-2
- KEE GBKP No: 457:1-2
Pdt. Natallidna Tarigan M.Th