PERJUMPAN RAS JESUS MPETURAH PERUBAHEN
Lukas 19:1-10
Zakheus
19:1 Yesus masuk ke kota Yerikho dan berjalan terus melintasi kota itu.
19:2 Di situ ada seorang bernama Zakheus, kepala pemungut cukai, dan ia seorang yang kaya.
19:3 Ia berusaha untuk melihat orang apakah Yesus itu, tetapi ia tidak berhasil karena orang banyak, sebab badannya pendek.
19:4 Maka berlarilah ia mendahului orang banyak, lalu memanjat pohon ara untuk melihat Yesus, yang akan lewat di situ.
19:5 Ketika Yesus sampai ke tempat itu, Ia melihat ke atas dan berkata: “Zakheus, segeralah turun, sebab hari ini Aku harus menumpang di rumahmu.”
19:6 Lalu Zakheus segera turun dan menerima Yesus dengan sukacita.
19:7 Tetapi semua orang yang melihat hal itu bersungut-sungut, katanya: “Ia menumpang di rumah orang berdosa.”
19:8 Tetapi Zakheus berdiri dan berkata kepada Tuhan: “Tuhan, setengah dari milikku akan kuberikan kepada orang miskin dan sekiranya ada sesuatu yang kuperas dari seseorang akan kukembalikan empat kali lipat.”
19:9 Kata Yesus kepadanya: “Hari ini telah terjadi keselamatan kepada rumah ini, karena orang inipun anak Abraham.
19:10 Sebab Anak Manusia datang untuk mencari dan menyelamatkan yang hilang.”Jesus ras Sakeus
19:1 Jesus bengket ku kuta Jeriho janah terus IA erdalan mentasi kota e.
19:2 I bas kota e lit me sekalak kepala pengalo cuke, gelarna Sakeus. Ia bayak.
19:3 IA merincuh kal ngidah ise kin Jesus e. Tapi la idahna perbahan nterem kal jelma arah lebena dingen ia pe gendek ka.
19:4 E maka kiam ia ngelebei jelma si nterem e, jenari inangkihna batang kayu, guna ngenehen Jesus si mentas arah dalan e.
19:5 Asum Jesus seh i bas ingan e, itatap Jesus ku datas janah nina man Sakeus, “O Sakeus pedasken nusurken! Sabap sendah kesilang ateKu i rumahndu.”
19:6 Minter nusur Sakeus janah ialo-alona Jesus alu ermeriah ukur.
19:7 Tapi jungut-jungut kalak si nterem ngidah si e nina, “Kesilang IA i rumah kalak perdosa.”
19:8 Tapi tedis Sakeus janah nina man Tuhan, “Setengah i bas erta-ertangku kubereken man kalak musil; janah adi lit kalak enggo kutipu, kuulihken man bana empat kali lipat.”
19:9 Ngaloi Jesus nina, “I bas wari enda enggo reh keselamaten man isi jabu enda. Kam pe kesusuren Abraham kap.
19:10 Sabap Anak Manusia si isuruh Dibata reh guna nelamatken kalak si papak.”
TUJUN: Gelah Moria:
- Ngidah perubahen (aktualisasi diri) Sakeus kenca jumpa ras Jesus.
- Ncidahkеn perubahen cara nggeluh i bas kerina dampar geluhna.
METODE PA: Meditasi Ras Studi Karakter, Nobar
Kata Penaruh.
Lit kuan-kuan ngatakenca maka labo lit kai pe si tetap i bas kegeluhen enda seakatan perubahen, janah perubahen eme sada perayaken, tetap lit upaya ras pengarapen gelah kegeluhen banci berubah ku si terulin. Perubahen e arus mentasi erbage-bage proses (tantangen) arus erjuang, latih, mesui ras perlu pengorbanen bage pe kesabaren. Gelah terjadi perubahen sikap geluh si terulin la banci lang arus lit ketedehen ate jumpa ras Tuhan si ngasup ngubahken kegeluhenta. Tapi melala runggana si ngambati kita banci jadi i bas dirinta nari erkiteken keterbatasenta, banci ka nge i darat dirinta nari. Emaka uga kita erjuang ngalaken rungga-rungga si lit mahanca kita reh ngasupna jadi dirinta jine, si ndube tujun geluhta eme doni enda, tapi kenca jumpa ras Tuhan tujun geluhta eme nggeluh bagi si ngena ateNa. Arah bahan PA-nta sendah, kita iajuk ngusih semangat ras ketedehen ate Sakeus guna nandai ras njumpai Tuhan Jesus dingen ngusih perubahen si mehuli si lit i bas IA.
Mpebagesi Pengangkan Kerna Ogen.
Lukas 19:1-10, nuriken kerna ketedehen ate Sakeus guna jumpa ras Tuhan Jesus. Kenca jumpa ras Jesus lit perubahen i bas dirina. Kota Jeriho sada kota si cukup makmur. Mbue erbagena barang-barang si man dayanken reh ras ndarat bas kota e nari. Erdandanken sie pemerintahen Romawi paksa si e majekken pos guna mindo cuke si jadi ulu pemasuken guna pemerintah. Emaka pos e ikontrakken man kalak si ngasup nggalarisa asa si enggo itetapken pemerintah. Si ngontrak rusaha ningkatken bea cuke gelah banci melala ialokenna. Enda me alasen maka kalak si pemungut cuke ikataken kalak perdosa sabap ianggap penipu, pemeras, la erkiniteken, janah ianggap erpihak man pemerintah si njajah labo erpihak man rakyat. Sakeus eme kepala pemungut cuke si nggo jad kepala i bas pendahinna. Ia bayak, tapi kebayakenna labo erbanca atena malem, kelungenen nge la sabap kerina kalak rate nembeh man bana. Lanai ise pe nggit jadi temanna. I bas sada wari ibegi Sakeus Jesus reh ku Kota Jeriho, merincuh ia ngidahsa, erkiteken ietehna arah kalak sideban kerna Jesus, si mediate ras nampati kalak si i bas perbeben, ibegi Sakeus kuga Jesus mperdiateken kalak perdosa. Tapi guna nehken sura-surana e lit tantangen erkiteken keterbatasen fisikna, ia sekalak si gendek emaka la ia ngasup ngidah Jesus. Sakeus la putus asa, ia tetap semangat.
Ketedehen atena naluken tantangen si lit, emaka “kiam ia ngelebei ” kalak si enterem, la saja ngelebei kalak tapi “inangkihina batang ara” alu arapen gelah idahna Jesus. Teridah uga perjuangen ras usaha si mbelin gelah idahna Jesus. Kalak si metedeh ate jumpa ras Jesus maka lebih asa si arapkenna ibereken Jesus. Kenca Jesus seh i bas ingan e, itatap Jesus ku das, nina “O Sakeus pedasken nusurken, sabap sendah kesilang ateku i rumahndu.” “Pedasken…, nuduhken perluna pedas muat keputusen, la tertaren-taren, emaka minter Sakeus patuh. Minter ia nusur, mis ikutkenna kai si kataken Jesus. “Kesilang ateku i rumahndu”…, ertina singgah kentisik, janah ngaloken si iperlukenna, tupung i je tek Sakeus maka kerehen Jesus ku rumahna pasti maba pasu-pasu. Ialo-alona Jesus alu meriah ukur, sabap ndai iarapkenna guna ngidah Jesus saja tapi lebih asa sie Jesus reh jadi temuena. Anem mbue pe kalak rate segat man bana tapi Jesus nggit erteman ras kesilang ku rumahna. I jem keriahen si tuhu – tuhu igejabken Sakeus (ay. 6). I bas ayat 7, teridah litna tantangen arah jelma si nterem si mandang Jesus reh ku rumah Sakeus kalak perdosa.
Cakap jelma si nterem kerna Sakeus ngalo-ngalo Jesus, sabap perjumpanna ras Jesus erbanca itandaina dirina. Sedekah enda ia nggo erdosa janah genduari nggo itehna kai si penting si arus ilakokenna. Perjumpan Sakeus ras Jesus tuhu-tuhu maba perubahen si mbaru i bas geluhna. Teridah arah ia ngasup ngakui kesalahenna, alu encidanken pertobatenna nehken perbahanen kekelengen. Tedis Sakeus nina “setengah i bas erta-ertangku” kubereken man kalak musil, adi lit kalak ku tipu “empat kali lipat” ku ulinken man bana.” Enda me bukti pertobaten Sakeus, ope denga jumpa ras Jesus ia penipu, pemeras, doni jadi tujun geluhna, tapi kenca jumpa ras Jesus ia nggo jadi kalak si ermediate, erbagi, ertanggungjabab kerna perbahanenna janah kenca bage ibuatna sada keputusen ngikutken pendilo Jesus.
Jesus ngidah maka pengakun ras perubahen sikap geluh Sakeus e labo pekulah-kulah tapi pengakun i bas pusuh si mbages nari erpalasken kiniteken. Ibereken Jesus status si mbaru eme keselamaten nggo seh man seisi jabuna. Janah ia pe atan ikataken anak Abraham (Bapa kalak si erkiniteken). Jesus mpelimbarui pengidah jelma si enterem, maka kerehenNa guna kerina kalak si ertedeh ate jumpa ras ngaloken IA, labo ngenen perbahanenna i bas paksa si enggo lewat, sabap Anak Manusia si isuruh Dibata reh guna nelamatken si papak (ay. 10).
Pengkenaina.
Kerina manusia rusaha gelah banci seh ku bas kegeluhen si terulin, janah i bas nehisa megati ngelakoken erbage cara alu la mperdiateken kepentingen kalak sideban, ersaing la sehat, mpebelang berita si la payo, kerina sie la maba kemalemen ate erkiteken labo sue ras si ngena ate Tuhan. Kemajun teknologi jaman enda erbanca geluh manusia reh mesukahna ngelakoken kerina aktifitas. Tahun enda pe prioritas program Gerejanta GBKP eme ningkatken kengasupen ngkelola ras makeken TI (Teknologi Informasi). Kita arus metenget erkiteken kerehenna banci maba dua dampak man banta, banci kita babaina ku si terulin (jumpa ras Tuhan) tapi banci ka reh genjengna (sirang ras Tuhan). Kurangna kengasupenta makeken TI kedungenna ngerugiken banta ras kalak si deban. Umpamana sipakeken guna nakiti pusuh kalak, ncidanken rawa, nuriken berita si la payo seh maka banci maba perubaten (bagi sikap geluh Sakeus ope jumpa ras Jesus lit i bas biak geluh egois). Adi si renungken piga kali kita nehken berita arah “medsos’ta si erbahan kitik ukur kalak, bage pe munuh karakter kalak sideban (bagi biak si enterem mandang Sakeus kalak perdosa ras Jesus ianggap “kompromi” ras kalak perdosa). Emaka arah bahan PA-nta enda iajuk kita makeken kinibeluhen i bas penggunan TI gelah mabai kita reh deherna ras Tuhan. Si pake jadi alat pelayanen, ngapuli, mpegegehi teman, mereken serpang pulah, mua enterem teman arah media sosial (bagi Sakeus kenca megi informasi kerna Jesus si mehuli ras hebat, mis ia ertedeh ate ras berupaya guna jumpa ra Jesus). Alu bage arah ngasupna kita makeken Teknologi Informasi alu mehuli, reh buena kalak nggejapken perjumpan ras Tuhan. Janah kitap reh pentarna ndalanken kegeluhen ras reh ngasupna ncidahkеn sikap geluh si mbaru. Penandaita kerna Jesus mpepaguhi kinitekenta dingen mpelimbarui geluhta.
Meditasi Ras Studi Karakter.
Sekalak Moria ersikap guna mabai meditasi ras sekalak si jadi song leader Rende No 207 – I Uruk Golgota : 1 (iendeken 2 x).
Tupung ertoto song leader tetap ngendeken KEE No. 207 alu setengah sora. Si “pemandu” mabai Moría nginget pengalamenna si erbahan ia erkitik ukur. Alu perkatan tah perbahanen subuk bas keluarga, Gereja tah i bas pendahin. Tupung si gejapken kita si sada la lit sekalak pe si mbela kita. Ihina bagi kalak si terbuang, pusuhta getem la lit si ngapulisa, situriken pe ateta situhu lanai lit kalak si tek. Lanai si angka ku ja ingan nurikenca….. Emaka kerina Moria erpaksa teneng, dingen notoken pengalamenna si pagit e, gelah banci terdungi i bas pusuh……
Rende 207:5 (tetap iendeken song leader alu setengah sora).
Sengaja ntah lang megati ka nge kitik ukur kalak si ban, arah pengerana ntah perbahanenta, si darami dalan njuruken ia, ncakapken kekurangenna man kalak sideban, gelah kalak si deban erpihak man banta. Mpembarken berita si la tuhu kerna kalak subuk arah “medsos” ntah pe arah cakap ku cakap, si erbahan ate kalak mesui…. mari si renungken janah ertoto mindo pengalemi i bas Tuhan nari,…. bahan tekadndu guna mperobahi sikap si la mehuli e alu mindo penampat man Tuhan. Jeralah janah tuduhken kinijeranndu arah nehken kekelengen man temanndu. Sabap kalak si jumpa ras Jesus ngasup encidanken perubahen. Nembeh ate jadi engkelengi, numpahi jadi pasu-pasu, njuruken jadi notoken, nebu-nebu, nggit mere. Lakokenlah…..
Rende no 207 : 5. Idungi alu pertoton si babai Pemandu Meditasi.
Judul Video motivasi jadilah diri sendiri
https://www.youtube.com/watch?v=M-Rec71nD8C
Studi Karakter.
Tulisken biak-biak kai saja si lit i bas kegeluhenta ope lenga kita jumpa entah pe kenca enggo jumpa ras Jesus, perukuren ras perbahanen ras pengerana subuk i bas kinata kegeluhen ntah pe i bas pemaken Teknologi Informasi arah “medsos” selaku nande, ndehara ntah anak i bas pendahin ras keluarga.
| NO | Ope Jumpa ras Jesus | Kenca Jumpa ras Jesus |
| 1 | …………… | …………… |
| 2 | …………… | …………… |
| 3 | …………… | …………… |
| 4 | …………… | …………… |
| 5 | …………… | …………… |