Ogen : Kejadin 35:1-4.
Tema : Sirangilah Kuasa Si Gelap (Okultisme )
Tujun : Gelah Mamre
- Meteh maka okultisme petembil ras Dibata
- Ngasup Nirangi erbage-bage curak okultisme
Metode: Diskusi
35:1 Allah berfirman kepada Yakub: “Bersiaplah, pergilah ke Betel, tinggallah di situ, dan buatlah di situ mezbah bagi Allah, yang telah menampakkan diri kepadamu, ketika engkau lari dari Esau, kakakmu.” 35:2 Lalu berkatalah Yakub kepada seisi rumahnya dan kepada semua orang yang bersama-sama dengan dia: “Jauhkanlah dewa-dewa asing yang ada di tengah-tengah kamu, tahirkanlah dirimu dan tukarlah pakaianmu. 35:3 Marilah kita bersiap dan pergi ke Betel; aku akan membuat mezbah di situ bagi Allah, yang telah menjawab aku pada masa kesesakanku dan yang telah menyertai aku di jalan yang kutempuh.” 35:4 Mereka menyerahkan kepada Yakub segala dewa asing yang dipunyai mereka dan anting-anting yang ada pada telinga mereka, lalu Yakub menanamnya di bawah pohon besar yang dekat Sikhem.
BIMBINGEN
Manusia itepa Dibata la sempurna, tapi dem alu keterbatasen, subuk i bas gegeh, kengasupen rukur, kuasa ras umurna, tuhu-tuhu terbatas. Jadi keterbatasen e enggo jadi kodrat (curak kegeluhen) i bas manusia. Engkai maka iciptaken Dibata manusia e terbatas? Enda erpalas kubas ate keleng, ate ngena ras ate jadi bas Dibata nari man manusia. Gelah manusia tergantung dingen la sirang ras manusia. lbas kiniersadan e Dibata me singkuhi (melengkapi) keterbatasen manusia ndai.
Tapi erkiteken manusia la setia, jenari mberontak man Dibata, ndabuh ku dosa, ipelawesi Peken Eden nari, sirang ras Dibata. Je manusia kebenen ulu gegeh ras penampat man dirina. Enda me pengertin agama ibas erti luas, maka lit sada ketedehen ate bas setiap manusia (muas) nandangi sada kuasa i luar dirina nari, sibanci nampati ia ibas keterbatasena ndai. Usaha ndarami penampat e, eme kegiaten agama. Erkiteken Dibata enggo ndauh (enggo ndabuh kudosa) lanai ieteh manusia ndai ulu penampat situhu-tuhu, piah ku kuasa-kuasa sideban ia mindo penampat. I je me turahna dibata-dibata, berhala, ocultisme (tek maka lit kuasai bas benda-benda tertentu), jenari banci pe ijadiken manusia jadi ulu penampat man bana. Janah kinatana je nari la pernah idatsa penampat situhu-tuhu. Kerina mengecewaken, erkiteken kerina lit tumbalna. I bas sada-sada kinigurun, jimat tah berhala tertentu, tempa kita iberena penampat 3 erbage, tapi iutangina kita 5 erbage. Tempa banci kita isampatina ibas 5 hal, kepe iutangina kita ibas 5 hal. Kuasa, sideban iluar Dibata, la pernah masu-masu kita. Keadaan sibage me si la ngasup Dibata natap kita manusia.
lbenaken ibas keleng ate Dibata nari, irencanakenNa guna nelamatken doni sienggo ndabuh ku dosa ras bene. Rencana e ibenaken alu mbentuk sada bangsa pilihenNa i doni enda, gelah arah e pagi iberekenNa sekalak Raja Penampat. Ibenaken alu ndilo Abram, nini kalak lsrael. Anakna Isak, janah anak Isak e me Jakup, jenari anak Jakup lit 12 dilaki, e me jadi 12 merga (suku) kalak Israel.
Ibas bahan PA-nta enda, ituriken kerna Jakup, e me uruten peteluken ibas Bapa Leluhur bangsa Israel. la ilibatken Tuhan bas dahin rencana penyelamaten e, janah geluhna labo pulah ibas erbage-bage perbeben, bagi manusia nggeluh pada umumna. Tapi kiniseran sihadapina, labo erbahansa ia surut ibas pendilo Dibata siseh man bana. Terlebih bagi sitersingeti bas perikop enda, ia idilo guna pindah ka ku ingan Simbaru, e me Betel, sindube pernah ia medem i je, tupung ia kiam ibas kakana si Esau nari, erkiteken enggo itipuna radu ras bapana pe, si bas paksae bapana lanai erpengidah. lbas nipi iidah Jakup maka bas ingan e lit redan (tangga) seh ku langit, janah malekat nangkih ku teruh i je. Janah yakin Jakup maka bas ingan merupaken gerbang dalanku Surga, itamana ije batu jadi tandana, igelarina pe ingan e Betel (Kej. 28:11-17). Janah Tuhan ersura-sura gelah Jakup tading ije, jenari ibahanna pe ije sada batar-batar ingan ersembah ras nehken persembahen man Tuhan.
I bas njawab pendilo Tuhan e, luar biasa jawaben Jakub, la terjeng erpengue saja, tapi ersikap ia ras kerina isi jabuna, guna ndahiken dahin e. lajukna kerina isi jabu lako mbersihken diri alu ngambekken kerina dibata-dibata/berhala-berhala si deban, masing-masing ngurasi bana maka bersih kerina kegeluhen ras makeken uis si bersih I bas menjawab pendilo Tuhan. Meriah ukur Jakup ndalanken pendilo e, jenari majekken sada batar-batar ingan ersembah man Tuhan, gelah i je ia mensyukuri kerina kiniulin Tuhan lako ngarak-ngarak ras mulahi ia i bas erbage-bage perbeben nari.
Bagi cara Jakup enda me situhuna cara erkiniteken sipayo selaku kalak Kristen. Sisadari maka penampat situhu-tuhu ibas keberdosanta, e me arah perkuah ate Dibata e ngenca, e me i bas pengorbanenTuhanYesus sijadi korban pengganti man banta. Upah dosa e me maut. Tapi man kalak sierkiniteken man Tuhan Yesus, maka la menggonggantikenca i bas ngaloken maut ndai. Alu bage ulanai lit Mamre make okultisme guna ndatken penampat, sebab adi kune bage, kita enggo membatalken penampat situhu-tuhu si bas bena-benana nari pe enggo kin ipadanken bage. Jenari tole pe kita enggo ngundang kutuk ku bas geluhta. Malah seh pe pagi ku kesusurenta si pe-3-ken, pe-4-ken seh akibatna si la mehuli. E maka mari dage ersikap kita ngaloken pendilo Tuhan guna keselamaten, sibersihken dirinta, jabunta ibas okultisme nari, jenari siikutken pendilo Tuhan, sibangun batar-batar penembahenta man baNa, alu dem pengataken bujur.
DISKUSI
- Turiken pengertinta kerna pendilo Tuhan ibas nadingken iketen okultisme nari sue ogenta.
- Cuba situriken pengalamen ras pengidahta kerna ulih make okultisme (kuasa gelap) i bas kegeluhen enda
USULEN ENDE-ENDEN
- KEE GBKP No. 202:1, 4
- KEE GBKP No. 187: 1, 3
- KEE GBKP No. 80: 1, 5, 6
- KEE GBKP No. 212:2, 3
Pdt. Kongsi Kaban, S.Th
KABID MARTURIA MODERAMEN
HP. 08126587327