Mazmur 119: 9 – 16
119:9 Dengan apakah seorang muda mempertahankan kelakuannya bersih? Dengan menjaganya sesuai dengan firman-Mu.
119:10 Dengan segenap hatiku aku mencari Engkau, janganlah biarkan aku menyimpang dari perintah-perintah-Mu.
119:11 Dalam hatiku aku menyimpan janji-Mu, supaya aku jangan berdosa terhadap Engkau.
119:12 Terpujilah Engkau, ya TUHAN; ajarkanlah ketetapan-ketetapan-Mu kepadaku.
119:13 Dengan bibirku aku menceritakan segala hukum yang Kauucapkan.
119:14 Atas petunjuk peringatan-peringatan-Mu aku bergembira, seperti atas segala harta.
119:15 Aku hendak merenungkan titah-titah-Mu dan mengamat-amati jalan-jalan-Mu.
119:16 Aku akan bergemar dalam ketetapan-ketetapan-Mu; firman-Mu tidak akan kulupakan.Kepatuhen nandangi undang-undang TUHAN
119:9 Kuga banci anak perana njagai geluhna maka la erpandangen? E me alu ngikutken kataNdu.
119:10 Alu bulat ukurku kucubaken ndarami Kam, ola pediat aku nilah i bas kataNdu nari.
119:11 Undang-undangNdu kubuniken i bas ukurku, gelah ola aku erdosa man baNdu.
119:12 Kupuji Kam, o TUHAN, ajari aku peraturen-peraturenNdu.
119:13 Usur ateku melaskenca kerina undang-undang si enggo iberekenNdu.
119:14 I bas ndalanken perentah-perentahNdu meriah kuakap, riahen asangken ndatken erta-erta si melala.
119:15 Kerina keputusenNdu ku kusur-kusur i bas pusuhku, kupergermetken pelajaren si iberekenNdu.
119:16 Meriah ateku i bas ndalanken undang-undangNdu, kataNdu la kulupaken.
NGEPKEP KEGELUHEN PERMATA
TUJUN: Gelah Moria:
• Meteh uga sekalak anak perana njagai geluhna arah ngikutken Kata Dibata.
• Nggit mereken dirina lako ngepkep Permata i bas pemaken TI si payo.
HUT PERMATA GBKP KE-72
METODE PA: Sharing Pengalamen ras Permata
Kata Penaruh.
Adi nuri-nuri kita kerna anakta si Permata tentuna mbue dampar si banci si turiken janah la erbaleng kerna perkembangenna subuk i bas pendidiken, pergaulen, aktivitasna ras sidebanna. Janah i bas percakapen percakapen pe la ka sitik kita si kelsehen natap anak-anakta tupung paksa ngudana e. Sabap enggo deba ndabuh ku bas pergaulen si ncedai masa depanna, erdahin mekisat, erlajar pe kisat, nampati pe la merhat, dahinna kahe kolu saja dingen lit si main game saja pirasatna. Pulsana man isin, mulih ate – atena perpan ntabeh atena rusur ras sidebanna. La ka bo sitik anak-anakta si tuhu-tuhu erbahan megah iakap orangtuana, subuk arah prestasina, kiniulinna, keleng ate ras kehamatenna, bagepe erbage-bage perukuren, arapen ras cita-cita si isurakenna. I bas kerina e tentuna la kita banci ngadi ntah leja guna ngepkep kegeluhen anak-anakta e. HUT si pe-72 tahunken enda tole si renungken, si gargari dingen sikepkep ia alu pedah ras usihen si banci si lakoken.
Mpebagesi Pengangkan Kerna Ogen.
Masmur 119 enda, eme pasal si gedangna i bas Pustaka Si Badia. Lit 176 ayat dingen 22 perikop, si isina kerna undang-undang Tuhan i bas geluh kalak si tek. Pemasmur nuriken kuga erti ras kegunan undang-undang e i bas geluh kalak si tek. Janah si jadi bagin bahan PA enda ibabai kita ku bas kepatuhen anak-anakta si nguda. Undang-undang, Kata Dibata secara umum nuriken kerna diri Dibata si teridah arah perentahNa. Avat 9 ibenaken alu penungkunen, kuga banci anak perana (anak) njagai geluhna la erpandangen (bersih, badia)? Penungkunen enda ijabab alu piga-piga point si banci si gargari:
- Alu ngikutken Kata Dibata (ay.9), enggo ibereken pedah ras undang – undang e, la terjeng ioge tapi iikutken ras idalanken. Jadi ‘pelaku’ labo ‘pendengar ntah pembaca’ si mehuli saja.
- Ndarami Tuhan i bas pertoton (ay.10), kalak si tek ndarami, ndahi ras njumpai Dibata. La terjeng ngoge Kata tapi i bas pertoton, tetaplah ertoto, ndeher ras ersada ras Dibata.
- Ngoge ras muniken Kata Dibata (ay.1:), Pemasmur ngataken maka Kata Dibata iogena suari ras berngi dingen ibuniken i bas pusuh, jadi erta si meherga sitep-tep paksa ersada ras kita dingen ‘ngerana’ dikune la sue si ilakoken kita e ras kebenaren Dibata.
- Nggit iajari (ibimbing) kerna Kata Dibata (ay.12) maka banci geluh la erpandangen, nggit iajari, dikune sempat nilah ras la patuh, nggit megiken pengajaren dingen mulih ku bas kebenaren.
- Terbuka nandangi kebenaren Dibata (ay.13) rusur atena nuriken kebenaren dingen sura-sura Dibata.
- Ermeriah ukur i bas Kata Dibata (ay.14) ibandingkenna antara ndalanken Kata Dibata e, riahen asangken ndatken erta si melala. Sabap Kata Dibata e erta si maba ras mereken kegeluhen.
- Mpergermetken Kata Dibata (ay.15) ngukuri ras ngkusur-kusur kata e i bas pusuh alu bage ngasup mpergermetken kerina si jadi i bas doni enda dingen ndatken pelajaren si meherja.
- La ngelupaken kata kebenaren Dibata (ay.16), alu bage e si jadi gelemen i bas erbage kecibal geluhna. I bas erbage godan ntah pe tantangen si man alanken, Kata Dibata si jadi gelemen.
Bageme Pemasmur nuriken kuga carana gelah kegeluhen anak si nguda tetap mehuli, la erpandangen. Kata kurcina nggelem ras ndalanken aturen, undang-undang ras Pedah Dibata. Tentuna si enda la saja man anak si nguda, man kerina kalak si tek termasuk si ngepkep anak si nguda arus lebe makeken kata e maka banci e ilumbakenna man anak si nguda. Mereken usihen uga njagai dirina sue ras ras kebenaren Kata Dibata gelah banci nggeluh la ercinengga.
Pengkenaina.
I bas kegeluhen masyarakat, budaya ras Gerejanta, anak Permata eme si langa erjabu, usiana menuju dewasa, si statusna anak i bas jabu ntah pe masyarakat. Alu bage masyarakat si enggɔ dewasa ntah orangtua arus ngepkep ia i bas kegeluhenna. Adi kataken ngepkep ertina: Moria arus lebih ngangkai kegeluhen anak Permata sabap Moria pernah nguda dingen mentasi paksa-paksa si inanami anak-anakta e aminna la seri situasi, kondisi ras tantangen si man alankenta. Anak-anakta Permata genduari enda lit i bas generasi Z menurut Wikipedia, si tubuh i bas tahun 1995. I ja generasi enda eme generasi peralihen Y (milenial) si tubuh i bas tahun 1980-2000 i ja teknologi reh majuna dingen nggo mulai rukur “instant”. Geluhna tergantung kal man teknologi e, popularitas i bas media sosial, invidual ras ramah teknologi, anem gia carana lebih terbuka, lebih wirausahawan dingen pedas ku dunia kerja. Sedangken kita orangtua, Moria si anakna lit genduari Permata umumna i bas generasi X, si tubuh tahun 1961-1980. I ja nina menurut ciri-cirina generasi enda ngasup ngalaken resiko dingen cukup matang erbahan keputusen. Sabap paksa -paksa geluhna dem alu perjuangen dingen erbage “konflik” ras perbeben.
Enggo mulai kita terbuka nandangi kritiken ras saran, kususna guna memaksimalken dahin si beda ras generasi “baby boomer” (tubuh tahun 1946-1964) si langa siap ikritik dingen patuh man budayana. Dingen perayakenna erdahin guna nggeluh labo nggeluh guna erdahin. Mbelin kal pengaruh lanai banci si kataken “kami nai labo bage”, “ugalah gutulna e”, “la mediate” ras kata sidebanna si nuduhken tuhu mbelin arapenta kerna ia. Enggo sambar jamanna, kita arusna ngasup ngikuti ras garak-ngaraksa.
Moria arus tetap erlajar, kususna kerna pola asuh anak (parenting) gelah banci ngepkep, mabai, erbahan usihen ras ngarak – ngarak anak-anakta i bas jaman enda i ja anak-anakta si tubuh i bas tahun 2010 ku das enggo ka igelari generasi alpha, i ja teknologi enggo berkembang pesat janah mulai kin i bas bertin pe ia enggo ‘terpapar teknologi e. Amin bage gia perkembangen doni enda ras generasi-generasi anak-anakta si jelas tetap min maka Kata Dibata si jadi tendang ras ulu pengajaren. Tetap denga nge Kata Dibata e ‘uptodate’ seh jaman enda. Kata e gelementa si ngepkep anak anakta bagepe anakta si man kepkepen. Ula matah kata, sikepkep anak Permatanta, perlu kal gelemen man pendampingen gelah la ia salah arah i bas ndalani geluhna.
Sharing:
- Undang Permata i bas PA.
- Ercakap-cakap kita ras anakta Permata gelah sendalanen ras sepengodak sepengole kita si ngepkep ras si man kepkepen. Kai-kai saja arapen anakta Permata ras arapenta Moria.
Pdt. Suenita Sinulingga, MTh.