ERLUMBALAH ASA GEGEHNDU
(Pentingnya SDM Jemaat)
1 Timotius 6: 11 – 14
Pesan penutup
6:11 Tetapi engkau hai manusia Allah, jauhilah semuanya itu, kejarlah keadilan, ibadah, kesetiaan, kasih, kesabaran dan kelembutan.
6:12 Bertandinglah dalam pertandingan iman yang benar dan rebutlah hidup yang kekal. Untuk itulah engkau telah dipanggil dan telah engkau ikrarkan ikrar yang benar di depan banyak saksi.
6:13 Di hadapan Allah yang memberikan hidup kepada segala sesuatu dan di hadapan Kristus Yesus yang telah mengikrarkan ikrar yang benar itu juga di muka Pontius Pilatus, kuserukan kepadamu:
6:14 Turutilah perintah ini, dengan tidak bercacat dan tidak bercela, hingga pada saat Tuhan kita Yesus Kristus menyatakan diri-Nya,Pedah-pedah man Timotius
6:11 Tapi kam, o suruh-suruhen Dibata, tadingkenlah si enda ndai kerina. Usahakenlah ndalanken si ngena ate Dibata, tutus ersembah man baNa, tetap ernalem ku IA, cidahken keleng atendu, megenggeng dingen lemah lembut!
6:12 Erlumbalah asa gegehndu i bas perlumban kiniteken, guna ndatken kegeluhen si tuhu-tuhu man gunandu. Sabap guna kegeluhen si e me maka ipilih Dibata kam asum iakukenndu kinitekenndu i lebe-lebe nterem saksi.
6:13 I lebe-lebe Dibata, si mereken kegeluhen man si nasa lit bage pe i lebe-lebe Kristus Jesus, si erbahan pengakun si tuhu-tuhu i lebe-lebe Pontius Pilatus, kukataken man bandu gelah
6:14 ikutkenlah pedah-pedah e dingen jagalah gelah tetap bersih dingen la ceda, seh ku warina Tuhanta Jesus Kristus reh peduakaliken.
Kita sipulung enda mungkin pernah ngikuti sada perlumban. Perlumban eme sada kegiaten si lit ije man perayaken eme kemenangan ras hadiah. Guna banci menang tentuna arus berlatih asa gegeh, arus mejelimet nandangi tantangen ras ancamen. Sekalak pelatih biasana mereken pedah pedah mperlengkapi pemainna gelah erlumba asa gegeh, arus metenget nandangi tantangen ras ancamen si banci mabai pemainna la fokus ku tujun, Bagi sekalak pelatih mperlengkapi pemain guna ngikuti sada perlumban bage me Paulus nandangi Timotius selaku anak rohanina, iperlengkapina Timotius selaku suruh-suruhen Dibata alu tujun gelah Timotius tetap i bas pengajaren si tuhu-tuhu erpalasken kata Tuhan Jesus Kristus. Erkiteken paksa si e itengah – tengah perpulungen lit pengajaren si la tuhu, lit kalak singajarken kiniteken si deban si la sue ras kata Tuhan Jesus Kristus. Ikataken Paulus kalak si bage petua-tuaken dingen pebeluh beluhken kap ia. Kai pe labo ietehna, Sura-surana la mehuli. Nggit sisimbaken; janah si enda erbanca turah cian ate, perubaten, cekurak, sangka – sangkan si la mehuli, bage pe perubaten si la erngadi-ngadi ras kalak si la pinter ukurna dingen si lanai lit i bas ia kebujuren. Iakapna agama dalan ncari kebayaken. Tentuna tantangen si bage rupana labo mesukah guna ialaken Timotius i bas ndahiken dahin pelayanen. Pedah pedah Paulus man Timotius e me :
- Tapi kam, o suruh-suruhen Dibata, tadingkenlah si enda kerina. Kata Paulus man Timotius selaku suruh-suruhen Dibata i bas ndahiken dahin pelayanen arus nadingken (bhs. Indonesia: jauhilah semuanya itu). Ertina Timotius arus ndauh i bas pengajaren si la tuhu, la ngelakoken pengajaren si la tuhu guna ndarami duit. Jadi suruh-suruhen Dibata labo guna ndarami
kebayaken. - Usahakenlah ndalanken si ngena ate Dibata, tutus ersembah man baNa, tetap ernalem ku IA. Cidahken keleng ate, megenggeng, dingen lemah lembut. Usahakenlah ertina lit tetap i bas proses si terus-menerus ndalanken singena ate Dibata alu perayaken gelah si terulin banci ilakoken. Ndahiken dahin Dibata alu tetap erpala-pala (berjuang) ndalanken kai singena ateNa labo erpalas kai singena ate manusia. Meritaken kata Dibata alu kata situhu-tuhu labo alu kata-kata si erbanca kalak senang alu tujun dat duit. Suruh-suruhen tetap ernalem ku Dibata, la ernalem man dirina jine, man kalak si deban ntah pe ernalem man duit. Ncidahken kekelengen, megenggeng, dingen lemah lembut. Alu bage la ndabuh ku bas sikap petua – tuaken dingen pebeluh-beluhken.
- Erlumbalah asa gegehndu i bas perlumban kiniteken, guna ndatken kegeluhen situhu-tuhu man gunandu. Iumpamaken Paulus bagi kalak singikuti perlumban, lit si man ayaken eme hasil terbaik, juara ras hadiah. Bage pei bas perdalanen kiniteken lit si man ayaken eme nggeluh bagi si singena ate Dibata. Si e arus ilumbaken teptep wari asa gegeh si lit, alu bage lit ulih simehuli.
- Ikutkenlah pedah-pedah dingen jaga gelah tetap bersih dingen la ceda, seh ku warina Tuhanta Jesus Kristus reh peduakaliken. Pedah Dibata eme pengajaren si tuhu-tuhu erguna nambahi pemeteh ras pengangkan kerna si benar ras si payo i bas nggeluh. Ngikutken pedah Dibata ertina nggit erdahin i teruh kuasa ntah pe otoritas undang-undang Dibata guna ndalanken si ngena ateNa. Pedah Dibata erguna njaga geluh tetap bersih dingen la ceda seh ku wari Tuhanta Jesus reh peduakaliken
Erlumbalah asa gegehndu enda me tema renungen PJJ nta sekalenda. Arah tema enda ibabai kita ku bas sada pengertin gelah mengayak kita ndahiken dahin pelayanen alu talenta ras potensi si lit i bas kita (Sumber Daya Manusia/SDM) si lit bas kita. SDM banci sekalak perencana, pemikir, penggerak, banci ka keterampilen, kepentaren erdahin ras ketutusen ngelai. Pengembangen SDM eme kesempaten siilakoken gereja guna mperlengkapi ngawan perpulungen i bas pengembangen potensi-potensi si lit, umpamana alu erbahan pelatihan keahlian (Skill Training): rende ermusik, jadi Moderator PJJ ras si debanna, pelatihan ulang (Retraining) guna mpebagesi pemeteh i bas ngelai alu ngikuti tahapen-tahapen pelatihan, kreativitas (Creativity Training) guna ngembangken kreativitas pelayanan ras si debanna, erbahan lokakarya (workshop), seminar ras si debanna.
Erlumbalah asa gegehndu ertina nggit kita mereken dirinta guna ngelai Tuhan, tambah warina tambah-tambah kengasupen, kesetian, ras kinijingkaten. Si dahiken dahin Tuhan alu pusuh meciho ngelai Tuhan labo gelah ianggap kita si beluhna, labo guna ndarami keuntungen, ntah dat pujin. Tuhan nggo ngelai kita ras masu-masu geluhta emaka tetap siikutken pengajaren Tuhan alu njaga dirinta tetap nggeluh bagi singena ateNa. Terpujilah Tuhan. Amin
EVALUASI:
Kai dage enggo si ban dukungenta man Permatata i bas HUT na?
DISKUSI
- Erpalasken ayat 11, kai nge si arus ilumbaken asa gegeh rikutken renungen PJJ nta sekalenda?
- Turiken “sumber daya” si lit i bas dirindu dingen e atendu ipakeken guna ndahiken dahin pelayanen.
AKSI:
Sada bulan erlajar rende banci Vocal Solo/Vocal Group/Koor guna
itampilken i bas kebaktin minggu.
USULEN LAGU:
- KEE. 221 – Pesikaplah Ukurta
- KEE. 255 – Talenta
- KEE. 420 – Asa Gegeh Ras Kengasupen
- KEE. 327 – Tuhan Dibata Si Nemani
TOPIK PERTOTON SYAFAAT
- Gelah ngawan perpulungen tetap ngikutken pengajaren si benar
ras ndalanken singena ate Dibata - Gelah ngawan perpulungen muat bagin mereken SDM si lit bas
dirina guna ngelai Tuhan - Siturah bas perpulungen
Pdt. Karvintaria br Ginting, S.Th., M.M.