Si Man Ogen
Filipi 3: 17 – 21
Nasihat-nasihat kepada jemaat
3:17 Saudara-saudara, ikutilah teladanku dan perhatikanlah mereka, yang hidup sama seperti kami yang menjadi teladanmu.
3:18 Karena, seperti yang telah kerap kali kukatakan kepadamu, dan yang kunyatakan pula sekarang sambil menangis, banyak orang yang hidup sebagai seteru salib Kristus.
3:19 Kesudahan mereka ialah kebinasaan, Tuhan mereka ialah perut mereka, kemuliaan mereka ialah aib mereka, pikiran mereka semata-mata tertuju kepada perkara duniawi.
3:20 Karena kewargaan kita adalah di dalam sorga, dan dari situ juga kita menantikan Tuhan Yesus Kristus sebagai Juruselamat,
3:21 yang akan mengubah tubuh kita yang hina ini, sehingga serupa dengan tubuh-Nya yang mulia, menurut kuasa-Nya yang dapat menaklukkan segala sesuatu kepada diri-Nya.3:17 O, senina-senina tetaplah usih aku. Enggo itamaken kami kalak si man usihenndu, e maka perdiatekenlah kalak si enggo ngikutken usihen e.
3:18 Enggo megati si enda kukataken man bandu, janah genduari kuulihi alu iluh mambur: nterem kalak si kegeluhenna erbahanca ia perimbang ras kayu persilang Kristus.
3:19 Kalak si bage lawesna la banci lang kempak kebenen, sabap dibatana, e me peraten kulana. Megah iakapna i bas si patut iakapna mela, janah si iukurina kerna barang doni ngenca.
3:20 Tapi kita, warga Surga kap. Genduari alu ate metedeh sitimai kerehen si Engkelini kita i Surga nari, e me Tuhanta Jesus Kristus.
3:21 IsalihkenNa me pagi kulanta si kote dingen si ermasap-masap enda, jadi bali ras kulaNa si mulia. Si e banci ilakokenNa erkiteken i bas IA lit kuasa guna ngelakoken si e kerina.
“KITA WARGA SURGA KAP”
TUJUN: Gelah Moria:
- Meteh jaminen keselamaten si ipadanken Dibata.
- Nuduhken ulih keselamaten arah perbahanen.
METODE PA: Ceramah entah Diskusi
Kata Penaruh.
Surat Pilipi salah sada surat si mejile isina i bas Rasul Paulus nari. Mejile ikataken erkiteken isina teridah uga rembakna si nuratken surat enda ras si ngalokenca. Emaka teridah isina mpeturah kemalemen ate man kalak si ngogesa erkiteken tergejap keleng ate Dibata si mpersadakenca subuk rasul ras perpulungen. Surat enda pe nuratken pengataken bujur Paulus man perpulungen Pilipi si enggo piga-piga kali ngirimken penampat man Paulus i bas ia ndahiken dahin meritaken Berita Si Meriah bage pe tupung ia ipenjaraken. Megah iakap Paulus nandangi perpulungen enda erkiteken enggo teridah buah kinitekenna arah perbahanen i bas ia enggo muat bagin nampati dahin Rasul Paulus. Janah sada bagin isi suratna enda eme ngataken maka kalak si tek eme “warga surga” kap. Uga kin maksud Paulus i jenda? Mari radu ras kita ngargari Kata Dibata enda.
Mpebagesi Pengangkan Kerna Ogen.
I bas bindu 3 enda enggo leben ituriken Paulus uga ndube tutusna atena ndalanken Undang-Undang Tuhan (Torat). Ikatakenna pe maka ia termasuk golongen Parisi i bas ndalanken Undang-Undang. Parisi sada aliren si lit kenca mulih i pembuangen Babil nari. Parisi ertina kalak si nerapken bana. Si enda banci jadi erkiteken tutusna atena mpelajari Torat suari ras berngi. Tapi i bas jaman Jesus enggo teremen kalak Parisi enda pekulah-kulah ndalankenca. Tapi Paulus labo bage. Teridah maka perban tutusna nge atena ndalanken Undang-Undang enda maka igasgasina Gereja kalak si tek man Jesus. Tapi penandaina kerna Jesus ngubah kerina kegeluhen Paulus. Perukuren, pusuh peraten, lagu langkah ras perayaken geluhna. Si enda pe iturikenna i bas ayat 10, “Sada ngenca sura-surangku e me gelah kutandai Kristus dingen kugejap kuasa kekekenNa janah ikut aku ngenanami kiniseranNa, dingen bali ras IA i bas kematenNa.” Ertina maka penandai bage pe persadanna ras Jesus nari ngenca si pentingna jadi tujun kegeluhenna. Kai si ndube iagahkenna enggo ipedirepna sampah ngenca kerina (Junani: Skubala = kotoren rubia-rubia). Sabap bodoh iakapna mulihi man bana nginget masa si nggo lewat erkiteken i bas Jesus jumpa ia perkuah ate ras kemalemen ate si tuhu-tuhu.
Pengalamen si enda me maka nina Paulus man perpulungen Pilipi: “O, senina-senina tetaplah usih aku. Enggo itamaken kami kalak si man usihenndu, emaka perdiatekenlah kalak si enggo ngikutken usihen e.” Pang ia ngataken “usihlah aku”. Si enda labo erkiteken maka ia enggo serta, tapi erkiteken tujun geluhna enggo pasti. Janah kerina si erdahin Tuhan si lit i Pilipi pe jadi usihen man perpulungen e.
I bas dampar si deban maka idah Paulus enterem denga kalak si langa ngaloken Jesus jadi juruselamatna “Perimbang kegeluhenna ras kayu persilang.” Man kalak si bage ceda ate Paulus natapsa. Ipakena bahasana i jenda pe nina “ku ulihi alu iluh mambur.” Kecedan ate sekalak persuruhen Dibata eme tupung idahna ngawan perpulungen la ia nggeluh erpalasken Berita Si Meriah. Engkai? Sabap ieteh Paulus maka perlawes kegeluhen kalak si bage rupa eme ku bas kebenen si rasa lalap. Kalak si bage terjeng ngikutken peraten daging kula. Peraten kulana enda me jadi dibatana. Si enda me kelompok-kelompok si mbabai papak kegeluhen perpulungen (bdk. Plp. 3:2). Jenari nina Paulus: “Tapi kita, warga Surga kap. Genduari alu ate metedeh si timai kerehen si Engkelini kita i Surga nari, e me Tuhanta Jesus Kristus.” Teridah bedana si mbabai kalak papak, la ernalem man Jesus igelari Paulus eme biang (ay.2). Tapi kalak si tek man Jesus eme “warga surga.” Ertina kalak si tek man Jesus ndatken kegeluhen si rasa lalap. Istilah kinirajan surga megati ipake i bas kitab Matius (bdk. Mat. 5:3). Kinirajan surga nuduhken kinirajan Dibata si rasa lalap, kiniarajan si la ermasap masap. Bagin pendungi bahan PA enda, nina Paulus “IsalihkenNa me pagi kulanta si kote dingen si ermasap-masap enda, jadi bali ras kulaNa si mulia. Si e banci ilakokenNa erkiteken i bas IA lit kuasa guna ngelakoken si e kerina.” Pengajaren enda cukup gedang ituriken Paulus i bas 1 Korinti 15. I bas kerehen Jesus mulihken ku doni enda maka kalak si tek man baNa terkelin me pagi. Keterkelinen e pe teridah pagi maka isalihken Jesus me pagi kulanta si ermasap-masap enda ku bas kula si la ermasap-masap. Ertina maka kalak si tek ndatken kegeluhen si tuhu- tuhu si la erkeri-kerin (bdk. Joh. 3:16).
Pengkenaina.
Kita warga surga kap. Enda ngataken kepastin keselamaten i bas kinitekenta man Jesus. Ndube iakap Paulus maka banci ia ndatken keselamaten arah ngikutken Undang-Undang (Hukum Torat). Kepeken labo banci kalak ndatken kegeluhen si tuhu-tuhu adi la kin arah perkuah ate ras kiniteken man Jesus Kristus, Emaka Paulus nuriken man perpulungen Pilipi i jenda gelah ngusih la ras kalak si geluhna radu bali ras Paulus. Eme ngusih kegeluhen Paulus si igeluhkenna erpalasken kiniteken man Jesus lanai arah ndalanken Undang – Undang (bdk. Gal 2:9-10). Ieteh Paulus alu tangkas maka Jesus me Juruselamat man doni enda. Emaka la ia erleja-leja nuriken Berita St Meriah ku kerina bangsa. Ulih keselamaten si idatken arah perkuah ate Dibata teridah arah kegeluhen si teptep wari. Tuhu labo kita iselamatken arah perbahanenta (bdk. Ep. 2:8-10) tapi ulih keselamaten arah perkuah ate teridah arah perubahen perayaken nggeluh bagi Paulus. Perpulungen enggo encidahken buah keselamaten e arah mediate ia ras muat bagin i bas dahin Berita Si Meriah. Kuga nge kita banci nuduhken maka kita kalak si enggo iselamatken? Tentu teridah arah kerina dampar geluhta. Umpamana gelgel pe lit kita mere guna kalak si deban, tentu genduari kita jadi kalak si melumbar mere bagi kegeluhen perpulungen Pilipi (bdk. Plp. 4:16). Kalak si enggo jadi warga surga maka tupung ia i doni enda denga sebage warga negara (kinirajan doni) enggo teridah biak kinirajan surga e arah kerina dampar kegeluhenna. Biak kinirajan maba ngaruh uga kita ndalani kegeluhen i doni enda. Perayakenta pe lanai medoni, tapi uga maka ermulia Dibata arah kerina dampar kegeluhenta.
Diskusi:
- Engkai maka pang Paulus ngataken maka kita warga kinirajan surga kap? Turiken arah Pilipi 3 enda!
- Kai nge tandana kita enggo iselamatken arah Jesus Kristus?
Pdt Yunus Bangun M.Th
