BERITAKENLAH SITUHU DINGEN ERGUNA
(TI Ras Etika)
Kuan-kuanen 6: 12 – 15
6:12 Tak bergunalah dan jahatlah orang yang hidup dengan mulut serong,
6:13 yang mengedipkan matanya, yang bermain kaki dan menunjuk-nunjuk dengan jari,
6:14 yang hatinya mengandung tipu muslihat, yang senantiasa merencanakan kejahatan, dan yang menimbulkan pertengkaran.
6:15 Itulah sebabnya ia ditimpa kebinasaan dengan tiba-tiba, sesaat saja ia diremukkan tanpa dapat dipulihkan lagi.
Perkembangen teknologi informasi (TI) i bas paksa enda seh kal majuna ras lanai terambati, kemajun e erdampak / berpengaruh ku kerina dampar kegeluhen manusia, termasuk hubungen sosial masyarakat ras gereja.
I bas penerapen teknologi informasi, melala hal-hal si erguna si banci ipake kalak Kristen ras gereja guna ndukung pelayanen ras kegiatenta, sabab teknologi e ertujun guna nampati kegeluhen manusia, misalna: kejadin/berita-berita banci sialoken bage pe sipeseh secara praktis ras cepat.
Selain sisi positif lit ka nge sisi negatipna contohna: melala beredar berita-berita si la terpertanggung-jawabken/hoaks, bage pe banci jadi sarana perbahanen si la mehuli contoh: mengganggu orang yang lemah (Bullying), ras si debanna. Enda banci mpeturah, persoalen/perselisihen ras kerugin secara material bage pe keretaken ras konflik hubungan sosial i bas masyarakat bage pe sapih-sapih perpulungen. Emaka kerina warga gereja ras masyarakat perlu megermet ras pentar i bas makeken teknologi informasi, ras tetap berupaya menciptaken budaya ras etika si payo si banci jadi usihen man kalak si deban.
Kitab Kuan-kuanen eme salah sada kitab si nuriken pengajaren ras pedah erpalasken kepentaren Dibata, pengajaren enda harus sidalanken segelah banci jumpa kemalemen ate dingen kesangapen. Kuan-kuanen 6:12 – 15, eme bagin pedah Raja Salomo man bangsa Israel bage pe man banta i bas jaman enda khususna man generasi nguda, segelah nandai biak-biak si la payo i bas manusia ras tetap metenget nandangi perbahanen kalak jahat si ersura-sura ngerehken kecedaan man kalak bage pe man dirina sendiri.
Kalak jahat i bas ogenta enda, i bas kuan-kuanen 6 enda ngerana kerna biak kalak si nguda si pentar e me ertanggungjawab nandangi kegeluhen sesama, emaka la banci lang ia pe harus jadi jelma si mejingkat erdahin. Manusia si nggeluh la banci perkisat (bdk. 6:11).
Ola min ban kisatta erdahin, silakoken dalan si la ngena ate Dibata contohna eme i bas ayat 12-15 enda guna ndatken keuntungen simbelin. Padahal kerina e lit ukumenna man banta. Menjingkat erdahin, ula ngelakoken dalan si la mehuli seh maka kita ngelakoken kejahaten. Tapi biakta arus erkualitas eme jelma si tutus ras nggit erlajar guna kemajun. Jelma si setia i bas kerina proses. Ertina arus ijemba perpulungen gelah mbelin lalap sura-surana guna erlajar termasuk erlajar kerna TI enda. Gunana eme gelah ia la banci itokoh-tokohi kalak jahat, janah pe gelah reh ngasupna ia ngelakoken si mehuli man enterem jelma. Emaka perpulungen anus metenget nandangi biak-biak kalak jahat eme : pet kal meritaken berita si la tuhu, nipu kalak, erbahan rencana jahat, ija pa pe erbahan perubaten.
Kemajun TI (Teknologi Informasi) i bas jaman enda pe memungkinken jadi kesempaten/peluang/sarana si ipake kalak jahat (biasana make akun palsu) guna ndalanken kejahatenna ras kepentingenna ras kelompokna eme ncedaken keharmonisen i bas masyarakat bage pe i bas gereja, misalna: Erbahan berita hoaks (berita si la payo/menyesatkan), memposting propaganda, provokasi, fitnah, nebu-nebu ras si debanna. Biak-biak sibagenda la ngena ate Tuhan/ertentangen ras biak-biak Dibata. Enda kerina tuhu-tuhu jadi ancamen i bas hubungenta si sempabu i bas masyarakat. Si enda kerina la sentudu ras ajaren orat nggeluh i bas kinitekenta.
Gereja ras kalak Kristen harus encidahken cara-cara si payo i bas makeken TI ras mediate nandangi dampak negatif TI, janah enda pe jadi salah sada tantangen gereja ras kalak Kristen guna maba pembaharuan ras mpekena-kenasa, sabab enda pe salah sada pemicu bencana sosial. Uga caranta guna ncegah dampak negatip kemajun IPTEK khususna TI enda:
a. Pentar makeken Media TI (HP & Komputer). Kita harus pentar ras ertanggungjawab i bas makekenca. Postinglah kerna si erguna, inspiratif ras si positif man kalak si deban.
b. Ula minter tek nandangi berita-berita si masuk arah sosmed (FB, WA, Twitter ras si debanna). Darami lebe informasi pembanding arah link si debanna.
c. Ola bagiken/share berita si lenga terteki sumberna ras kebenarenna.
d. Erbahan geraken “Lawan Hoax”.
Dibata mereken pemeteh (IPTEK) man manusia ras ipakeken guna kiniulin doni enda ras peningkaten kualitas kegeluhenta bage pe mendukung ras meningkaten pelayanen Gereja guna ngerehken kemalemen ate man banta bage pe man kalak si deban terlebih- lebih mpermuliaken Tuhan Dibata. Emaka kalak Kristen tetap ertanggungjawab guna njagai segelah IPTEK tetap sendalanen ras peraten Tuhan.
Perlu itambah pengajuk gelah perpulungen nggit alu saber ras ketekunen mpelajari kemajuan TI enda, sabab megati umur si enggo gedang tempa-tempa jadi alangen guna erlajar, bage pe sikap anti-teknologi erkiteken kita terlalu ipengaruhi dampak negatif penggunaan TI, misalna banci menyebabken gangguan jiwa ras si debanna. Ula kita la mediate nandangi kemajuan TI, tapi mari sipelajari gelah ula kita menukah itebu-tebu kalak, sieteh ngatur bana guna engkurangi kena ulih si la uli TI enda, janah si pentingna banci e sipergunaken pe guna nampati kalak si deban alu mbagiken informasi si mehuli.
Kegeluhen kalak Kristen harus jadi pasu-pasu man doni enda (bdk. Rm. 12:2), termasuk i bas makeken teknologi, emaka selaku pengguna media informasi harus megermet ras pentar i bas makekenca, Etika Kristen ras kata Dibata sibahan jadi palas i bas makeken media teknologi informasi. Kita arus makeken teknologi khususna TI guna jadi sarana ngerehken kemalemen ate man kalak si deban. Emaka kita arus encidahken cara-cara si payo i bas makeken teknologi ras meritaken si tuhu-tuhu ras erguna man doni enda.
EVALUASI :
Enggo me sibenaken ertoto sope ndahiken kerina dahinta?
DISKUSI
- Turiken kai-kai saja media TI si banci sipake guna mendukung
pelayanen gerejanta! - Uga carana segelah banci sipake TI guna nehken berita situhu
ras erguna!
AKSI :
Tetap sibahan status/postingen i bas FB, WA, Twitter (Medsos) kerna
berita-berita si tuhu ras erguna man kalak si deban, secara rutin.
USULEN LAGU :
- KEE. 323 – Sura-sura Daging Lawanlah
- KEE. 257 – Siberitaken Berita Si Meriah
- KEE. 255 – Talenta
- KEE. 290 – Labo Erkiteken Beluhku
TOPIK PERTOTON SYAFAAT :
- Notoken ngawan perpulungen segelah pentar ras megermet makeken TI.
- Notoken ngawan perpulungen gelah ngasup makeken TI guna nehken berita si tuhu ras erguna.
- Notoken kalak si la ertanggungjawab segelah robah i bas sura-sura jahat.
- Notoken ngawan perpulungen segelah pang ngelawan berita hoax.
- Siturah i bas perpulungen.
Renungen Perpulungen Jabu-Jabu Tahun 2020
Pdt. Togu Persadaan Munthe, S.Th., M.M.