Ogen: Pengerana 5: 18 – 20
Tema: “Ngenanami Ulih Pendahin”
Tujun: Gelah Mamre
1. Meteh erdahin ras ngenanami ulih pendahin eme bagin perdalanen kegeluhenta
2. Tetap tutus erdahin ras ngataken bujur ibas ulih pendahin si ibereken Dibata
Metode : Evaluasi (melalui Lembaran Evaluasi Kerja)
5:18 (5-17) Lihatlah, yang kuanggap baik dan tepat ialah, kalau orang makan minum dan bersenang-senang dalam segala usaha yang dilakukan dengan jerih payah di bawah matahari selama hidup yang pendek, yang dikaruniakan Allah kepadanya, sebab itulah bahagiannya. 5:19 (5-18) Setiap orang yang dikaruniai Allah kekayaan dan harta benda dan kuasa untuk menikmatinya, untuk menerima bahagiannya, dan untuk bersukacita dalam jerih payahnya–juga itupun karunia Allah. 5:20 (5-19) Tidak sering ia mengingat umurnya, karena Allah membiarkan dia sibuk dengan kesenangan hatinya.
KATA PENARUH
Hampir setengah i bas waktu kegeluhenta sipakeken guna erdahin, janah erdahin e sendiri pe jadi kegiaten si la erpeltep-peltep silakoken. Erkiteken si e me maka lit ka nge kita nggejapken maka keleng ateta dahinta, tetap kita terjemba lako ndahiken pendahin e alu dem tanggungjabab bage pe la persoalen siakap gia pe mbue tantangen i bas ndahiken pendahin e. Kalak si bagenda e me sekalak si erngena ate nandangi pendahinna dingen dahin siidahikenna pe banci nge inikmatina ntah pe ertutus ate ia bas ndahiken pendahinna
I bas ndahiken pendahinta tentu si gejapken lit kap telu (3) alasenta maka sidahiken alu mehuli e me
- Arah pendahin e sipermuliaken me Dibata
- Ulih pendahin e banci ncukupken keperlun jabu-jabunta
- Ndahikenca alu cara (reputasi) si mehuli, sue ras si ngena ate Tuhan.
Alu bage, la lit sada pe alasen si erbahanca kita la erdahin ntah pe mekisat erdahin.
Sendalanen ras si e, Samuel H. Tirtamihardha nuratkenca i bas bukuna si erjudul Inspirasi 5 Menit (tuliusan Malcolm Gladwell; 2012:50-51) bahwa : Keberhasilan itu memerlukan kerja keras. Orang harus mencapai suatu batasan 10.000 jam ( atau sekitar 417 hari) dalam bidang yang digelutinya untuk menjadi piawai. Ertina, dikune ateta banci ndahiken pendahinta e alu mehuli dingen beluh (ahli), la banci lang arus kap situtusi ndahikenca dingen iperluken waktu si cukup nggedang bas erbahan evaluasi ntah pe pehulikenca.
URAIAN
Salah sada siituriken i bas Kitab Pengerana enda isina kerna kuga gendekna kegeluhen manusia e, janah dem ka alu pertentangen, kiniladilen ras si debanna mesera diakap guna ndatkencca, Erkiteken si e me maka igejapkenna maka bas kegeluhen manusia e mbue erbage perbeben si man alanken bage pe, ketidakadilen ras erbage rusia kegeluhen si mesera siakap lako ngantusisa. Tapi,gia pe bage, penulis Kitab enda mereken telah-telah maka kerina min manusia e tetap tutus lako erdahin bage pe makeken kerina paksa siibereken Dibata e lako ngenanami pemereNa.
Si enda sendalanen kap ras ayat 18 bas ogen PA, ija nina : “E maka kueteh maka la lit terulin man banta seakatan minem dingen manken ulih pendahin dingen ngenanami ulihta latih kidekah geluhta si gendek si ibereken Dibata man banta. E me sikerajangenta”.
Erti si banci si buat e me:
- Bas kegeluhen manusia si gendek enda perlu kita ngenanami (menikmati) sa rikutken pemere Dibata e, subuk bas bentuk inemen ras pangan bekas pemasu-masun Dibata. Enda kap sada bagin ulih pendahin bekas pemasu-masun Tuhan e janah si e pe banci silakoken erkiteken iberekenNa kesempaten man banta (bdk.Pengerana 2:3, 10, 24)
- Bas kegeluhen si gendek e (bdk. Masmur 90:10) si jadi sikerajangenta e me ngenanami ulihta latih. Adi bage, adi enggo me si eteh maka si jadi sikerajangenta eme ngenanami ulihta latih, madin nge si pesikap ndahikenca alu mehuli.
Tentu, la banci terjeng ngenanami ulih latih saja. Rikutken ayat 19 ikataken bahwa adi sekalak ngaloken kebayaken dingen erta i bas Dibata nari, janah ibereNa ia ngenanami kebayakenna e, arus ia ngataken bujur janah ermeriah ukur ngenanami ulihna latih. Ngataken bujur erkiteken pendahin si idahiken e lit ulihna. Kebayaken dingen erta e i bas Dibata nari kap janah iberekenNa rikutken ulih pendahinta sue ras sura-sura dingen kekelengenNa man banta. Erkiteken si e kerina pemere Dibata kap, emaka arus ipakeken sue ras si ngena ate Dibata ras guna kemulian Dibata. Bicara pe ulih pendahin e sipakeken guna ngelitken keperlunta tapi si e pe tujunna guna kemulian Dibata dingen kiniulinta. Bage pe, tek kita maka Dibata si namaken pe kalak si man sampatennta arah ulih pendahin ta e.
Bas ngelakoken si e kerina, Dibata si ndemi pusuhta alu keriahen, gelan ola ateta ngukurkenca kerna uga gendekna geluh enda (ay 20). Erkiteken banci kita ngenanami keriahen bas Dibata nari emaka kita pe perlu ka nge makeken kerina kesempaten lako mabai keriahen ka man kalak si deban. I bas keriahen ukurta erkiteken pemasu-masun Tuhan e si gejapken pe maka lit kap bagin si jadi keriahen kalak si deban. E maka, arus tetap siukurken kuga carana maka ulih pendahinta e pe banci inanami kalak si deban, khususna erguna man dahin-dahin Tuhan ntah pe dahin-dahin gereja.
Erbage-bage kap pemere Dibata man manusia, janah la terjeng materi ntah pe duit saja tapi pe kesehaten, keriahen ukur, kejuah-juahen bage pe kedamen geluh rikutken pemakennta ulih pendahinta e. Janah, labo lit dalanna kita meganjang ukur bas ngaloken berita erkiteken ulih pendahinta e sebab merupaken ulih pencarinta ndube. Tetap tutus erdahin ras ngataken bujur ibas ulih pendahin si ibereken Dibata.
Kerina enda silakoken erkiteken enggo tergejap kal man banta kuga pentingna kita ndalanken kata Dibata bagi si tersurat bas Kejadin 1:26, 28. lje ikataken bahwa manusia ndatken kuasa bas Dibata nari lako jadi aron Dibata (“teman sekerja Allah”) guna ngusahi ras mpekena-kena doni enda. Manusia e teruhen asangken Dibata ngenca ntah pe i bas bahasa Indonesia ikataken “hampir sama seperti Allah” (bdk. Masmur 8:6) janah manusia ndatken pendahin desken sekalak manager si ndatken kengasupen bas Dibata nari guna nepa arah si enggo lit jadi barang si mbaru lit. I bas si e, si gejapken maka kita itepa Dibata itengah-tengah kalak si deban emaka kalak si deban e pe jadi temanta ka lako ndahiken usaha pencarin sue ras gegeh kengasupenta sekalak-sekalak.
APLIKASI
Rikutken Garis Besar Pelayanan (GBP) GBKP 2016 – 2020 enggo isuratken maka tujun program ras tujun tahun pelayanen 2019 e me:
Meningkatkan jiwa kewirausahaan (enterpreneurship) warga GBKP dalam bidangekonomi, serta kepedulian terhadap kesehatan dan lingkungan tiap kegiatan. Menumbuhkan dan menggali bakat-bakat baru dan mengembangkan bakat-bakat yang sudah ada pada jemaat dalam bekerja (berproduksi) secara kreatif, berani menghadapi tantangan dan resiko dari setiap kegiatan.
Arah keterangen enda maka ibahan pe ije kerna penekanen penting si arus iperdiateken ras ilakoken bas 3 inganen itengah-tengah gerejanta, e me :
(1) Sinode : Ngelakoken kegiaten percontohen bas erwirausaha arah erbage- bage pendahin, atan pe bas dampar pertanian organic, industry kreatif si efektif njemba (menstimulasi) ngawan perpulungen erproduksi rikutken pendahinna.
(2) Klasis Ras-ras Sinode (Moderamen GBKP) ngelakoken kegiaten percontohen erwirausaha bas Klasis.
(3) Runggun Njemba ngawan ni perpulungen si lit kengasupenna (potensial) lako muat bagin bas erwirausaha
Si enda enggo idalanken bas tahun si lewat dingen mehuli pe dikune genduari ilakoken evaluasi ntah pe si pepayo ras-ras guna banci si dat pembelajaren si mehuli dingen jadi penjemba ka man banta lako erwirausaha ku siterulin bas tahun enda bage pe seterusna.
Rikutken 3 bagin ingan enda, tek kita maka lit nge kerina kelebihen ras kekurangen si idatken kita. Tapi, bas kerina bagin enggo me lit kegiaten-kegiaten siilakoken kita sebagai wujud pendahin gereja muat bagin bas nikapken perekonomian perpulungen.
Erkiteken si e maka MAMRE GBKP iarapken :
1. Meteh erdahin ras ngenanami ulih pendahin eme bagin perdalanen kegeluhenta sebab arah erdahin me kita maka banci ndatken ulih si mehuli dingen ulihna e banci pe si pakeken guna mendukung kerina keperlun kegeluhenta. Dibata enggo nepa kerinana tuhu-tuhu mehuli (bdk. Kej. 1:31) e maka teklah kita perulihen si mehuli pe banci nge jadi sikerajangenta.
2. Tetap tutus erdahin ras ngataken bujur i bas ulih pendahin si ibereken Dibata MAMRE GBKP e me persadan perbapan Gereja nta, perbapan si erkiniteken dingen kesikelna e me banci Erdiate ras Erpemere. Maka reh ngasupna kita ncidahken biak-biak mediate dingen mere tentu arus lit si man berenkenta, salah sadana e me arah ulih pendahinta. Erkiteken si e situtusilah erdahin emaka i dat ulina guna alatta lako ngataken bujur man Dibata.
Guna si e mari si evaluasi kerna usaha pencarin ras pendahinta sedekah enda siilakoken kita sedekah enda.
LEMBAR EVALUASI KERJA
Sekalak si beluh bas bangunen mindoken man tuanna gelah min ia ngadi bas dahinna nari erkiteken ia enggo metua. Tapi erkiteken mejile pendahinna e maka ipindoken tuanna gelah min erdahin ia guna ndungi sada proyek bangunen nari. Bagem, idahiken bapa e pendahinna alu mehuli dingen dem tanggungjabab. Kenca dung proyek ndai, e maka ipindokenna sekali nari kai si enggo pernah ibelaskenna. Alu pusuh si mberat isehken tuanna pemindon bapa e tapi alu sada syarat:
Bahanndu sada narilah gia bangunen rumah semejile-mejilena ia ngasup erbahanca. Erkiteken enggo niakap bapa e pertakin bas tuanna nari, emaka ibangunna me bas pemindon tuanna e. Tapi, ipertakikenna ka tuanna janah nina bas ukurna: “Kubanan lah asal enggo dung, gelah ola kari isuruh tuan e ka aku mulihken …”
Kenca dung bangunen e, e maka nina tuan ndai man bapa e : Erkiteken sedekah enda kam ndahiken dahinndu alu mehuli, e maka bas palas keriahen ukur dingen guna kemulian Tuhan, ku bereken rumah si mbaru bangunndu e jadi sikerajangenndu” Tangis kal bapa si beluh bangunen e………
Bagem, bas kita enggo ngelakoken usaha pencarinta bage pe pendahinta sedekah enda, mari dari si gargari guna si bahan evaluasi entah pe pembaharuan alu cara sederhana :
1) Kai kin jenis usaha pencarin ntah pe pendahinta ?_______________________________________________________________________
2) Engkai maka jenis usaha ntah pe pendahin si e si dahiken genduari ?_______________________________________________________________________
3) lja kin ingan usaha ntah pe pendahinta e ?_______________________________________________________________________
4) Katawari kin waktuna kita rusur ndahiken usaha nta pe pendahinta e ?_______________________________________________________________________
5) Ise kin sedekah enda si lebih mbue erperan bas ndahiken usaha ntah pe pendahinta e ?_______________________________________________________________________
6) Uga nge sedekah enda kita ndahiken usaha ntah pe pendahinta e bage pe makeken ulihna?
a) Kai kira-kira kekurangenta ?
b) Kai kira-kira kelebihenta ?
c) Kuga nge siakap sedekah enda ulih siidatken kita ?
d) Kuga nge kita makaken ulih na ?
USULEN ENDE-ENDEN :
1. KEE GBKP No. 282:1,2;
2. KEE GBKP No. 286:2,4;
3. KEE GBKP No. 331:1,2;
4. KEE GBKP No. 334:1-2
Pdt. Agustinus Ginting Manik, M.Th
GBKP Rg. Polonia Medan