ARUS MPERSEMBAHKEN SI MEJILENA
(Persembahen)
Imamat 1:1–3:17
Korban bakaran
1:1 TUHAN memanggil Musa dan berfirman kepadanya dari dalam Kemah Pertemuan:
1:2 “Berbicaralah kepada orang Israel dan katakan kepada mereka: Apabila seseorang di antaramu hendak mempersembahkan persembahan kepada TUHAN, haruslah persembahanmu yang kamu persembahkan itu dari ternak, yakni dari lembu sapi atau dari kambing domba.
1:3 Jikalau persembahannya merupakan korban bakaran dari lembu, haruslah ia mempersembahkan seekor jantan yang tidak bercela. Ia harus membawanya ke pintu Kemah Pertemuan, supaya TUHAN berkenan akan dia.
I bas ndalani kegeluhen i doni enda, tentu lit kerina aturenna. Lit aturen erlalu lintas, lit aturen i bas pendahin, lit aturen i bas jabu ras si debanna. Ertina maka ija pe kita lit nge aturen si man dalanenken. Bage pe nembah ku Dibata, tentu lit nge peraturen simanpatuhen. Sabab arah peraturen e kin erbahanca maka teratur. Bage me Dibata ngaturken kegeluhen bangsaNa mereken peraturen guna i patuhi. Secara umum kitab Imamat enda nuriken kerna aturen-aturen ersembah, Peraturen e mencakup dua dampar eme, peraturen uga nehken persembahen ras uga peraturen i bas
peribadahen.
Nehken persembahen ertina reh ndeheri (menghampiri) Tuhan. Kalak si nehken persembahen eme si reh ndahi Dibata guna ngataken bujur man Tuhan, nggejapken kerina pasu-pasu Tuhan, ncidahken ulih kiniteken. Persembahen eme tanda keleng ate man Dibata. Sabab kalak si enggo nggejapken keleng ate Dibata maka icidahkenna keleng atena man Tuhan arah mereken persembahenna alu ermeriah ukur.
I bas oratenta enda nuriken uga Dibata ndilo Musa ku bas Kemah Perjumpan. Dibata mereken aturen i bas nehken persembahen. I bas nehken persembahene labo kerina terpuk rubia-rubia si ipersembahken. Tapi rubia e eme: lembu, biri-biri ntah pe kambing. Sabab rubia-rubia enda ncidahken kinihagan. Ertina maka mehaga si isembah e. Bage pe i bas nehkenca labo banci mekarus, labo asal enggo lit saja, tapi simejilena. Persembahen si ipersembahken tuhu-tuhu pilihen, ipilihi si mehulina. Adi lembu kin persembahen e, e ibuat jenggina, “Lembu jantan yang tidak bercela”. Lembu si la ercinengga (la lit cacatna). Ngkai maka bage? Adi si mejilena iberekenna e tandana maka ia mehamat dingen keleng kel atena Dibata. Adi mekarus, e tanda kinilahamaten man Dibata. Sabab arah persembahen si isehken teridah ukur si merekenca.
Persembahen si mejilena tentu ialoken Dibata. Sabab lit nge persembahen si la ialoken Tuhan. Si enda teridah arah persembahen Kain ras Abil (bdk. Kej. 4:3-6). Abil nehken persembahenna alu muat si mejilena, Kain mereken persembahenna alu mekarus. Emaka persembahen Abil nge si laloken Tuhan, sabab ngena ate Tuhan persembahen Abil. Teridah i bas Abil nehken persembahenna lit ije keleng ate man Dibata ras pusuh si bersih.
I bas mereken persembahan lit piga-piga hal si jadi perenungen
man banta:
- I bas mereken persembahen ilakoken min alu ukur meriah, ola
alu terpaksa (2 Kor. 10:2). - Nehken persembahen labo mengenai untung rugi. Sabab banci
saja lit perukuren rugi iakap i bas nehken persembahen.
Ingetlah uga Tuhan enggo engkelengi dingen masu-masu
kegeluhenta. - I bas nehken persembahen berekenlah si mejilena. Sabab e
tanda kita mehamat man Tuhan. Hamatilah Tuhan arah
persembahen si mehuli, ola mekarus. - Palas i bas nehken persembahen eme keleng ate ras
pengataken bujur. - Nehken persembahen eme pesenangken ukur Dibata.
I bas ersembah man Dibata tentu arus silakoken alu mehuli. Kalak si tutus ersembah man Tuhan la banci lang maka tutus ka atena nehken persembahenna. Dingen tutus pe atena mereken dirina guna ipake Tuhan jadi perkakasNa sabab eme persembahen si nggeluh.
Uga nge sikapta ersembah sedekah enda? Enggo nge tuhu-tuhu si pesikap persembahenta si mehulina man Tuhan? Entah kin mekarus kita i bas nehken persembahen man Tuhan. Merekensa asal enggo saja, ntah deba erkiteken terpaksa.
Persembahen eme buah kiniteken i bas kita kalak Kristen, Adi sigejapken maka Dibata enggo masu-masu kita maka tentu ergiah – giah ukurta guna nehken persembahenta man Dibata. La kita mekarus, janah tentu si sikapken si mejilena. Maka si pemena lebe si persembahken man Dibata eme pusuhta. Adi pusuhta enggo si persembahken man Tuhan tentuna persembahen-persembahen si deban, subuk duit, waktu, ras kerina si lit i bas kita enggo ngasup kita nehkenca alu ermeriah ukur.
Tentu i bas enda ibabal pe gerejanta guna banci terbuka (transparan) i bas keuangen. Mengelola persembahen e, mpergunakensa i bas kebenaren dingen si ngena ate Tuhan. Gereja arus ncidahken keuangen gereja e man ngawan ni perpulungen. Ola sempat gereja salah mpergunaken keuangen gereja. Sabab i bas persembahen-persembahen si isehken ku gereja adi la ieteh kuja perlawesna tentu sie erbahanca ngawan perpulungen lanai tek. Janah banci saja jadi mekisat kedungenna nehken persembahen. Alu bage jelaslah siban “pembukuan keuangen” i bas gerejata.
EVALUASI :
Uga ulih perenungenta sada minggu enda, lit nge turah biak meteruk ukur i bas geluhta?
DISKUSI :
- Kai nge palasta nehken persembahenta sedekah enda?
- Kai nge sibahan guna ningkatken kualitas persembahenta?
AKSI :
Erlajar kita maka sope wari minggu sisikapken persembahenta ras
isi jabuta, Ula muat gereja kita nukari duit kolekte.
USULEN LAGU
- KEE. 348: (1,3) Ersembah perlu ibas doni enda
- KEE. 302: (1-2) Nginget perkuah Dibata si mbelin
- KEE. 450: (1-4) Endesken kami man banNdu
- KEE. 413: (1-3) Kawali perpulungenNdu Tuhan
TOPIK PERTOTON SYAFAAT:
- Ngawan perpulungen ipasu-pasu Tuhan i bas pendahin.
- Ngawan perpulungen ersembah dingen nehken persembahen alu mereken si mejilena.
- Si turah i bas perpulungen.
Pdt. Nopritawati br Sembiring, S.Th.