METERUK UKUR BIAK GELUHTA
(Biak Kalak Si Tek)
1 Petrus 5: 5 – 6
5:5 Demikian jugalah kamu, hai orang-orang muda, tunduklah kepada orang-orang yang tua. Dan kamu semua, rendahkanlah dirimu seorang terhadap yang lain, sebab: “Allah menentang orang yang congkak, tetapi mengasihani orang yang rendah hati.”
5:6 Karena itu rendahkanlah dirimu di bawah tangan Tuhan yang kuat, supaya kamu ditinggikan-Nya pada waktunya.
Kalak si biakna meteruk ukur eme kalak si sedar kerna kecibalna bas doni enda. Si jadi palas pengangkan ras kiniteken maka manusia banci meteruk ukur i adep-adepen Dibata eme:
- Manusia eme tinepa Dibata, itepa i bas abu taneh ras Dibata kap si mereken kesah maka manusia nggeluh.
- Kerina sinasa lit Dibata kap sinjadikenca, simadasa ras simerekenca man manusia.
- Manusia banci ersura-sura tapi Dibata kap erbahan keputusenna,
Alu pengangkan ras kiniteken enda maka manusia labo lit dalanna sombong, megombang, tual, meganjang ukur ras petua-tuaken. Sabab sedar ia kerna gegeh ras kengasupenna si ersibar. Bagi turi-turin manusia majekken Menara Babil, nina manusia “Sibahanlah sada kuta ras menara, tampukna seh ku langit, gelah arah e terberita gelarta, janah la kita merap i babo doni enda.” Kai si jadi? Sura-sura manusia ndai la erkesehen i bahan Dibata, ipecah Dibata cakap manusia ndai ras ikerapkenna manusia ku belang-belang doni (bdk. Kej. 11:19).
Dibata la erngena ate nandangi manusia si meganjang ukur. Man bangsa Israel pe rulih-ulih ipersingeti Dibata “jaga maka ola meganjang ukurndu, jenari ilupakenndu TUHAN Dibatandu si enggo mulahi kam i Mesir nari sanga kam jadi budak mbarenda”. Sura-sura Dibata segelah bangsa Israel sedar maka erkite-kiteken pasu-pasu Dibata nge maka kegeluhenna sangap. Segelah bangsa Israel ndigan pe ola rukur maka kinibayakenna e, e me erkiteken kuasa ras gegehna jine, tapi pemere Dibata. Alu bage maka bangsa Israel la banci ersembah man dibata-dibata si deban. Tapi nembah man Dibata Jahwe sinisembah Abraham, Isak ras Jakup saja (bdk.UI. 8:14-20).
I bas Padan Si Mbaru pe tuhu-tuhu teridah arah orat geluh Jesus si meteruk ukur. Pengajaren siisehken Jesus:
- Ise atendu jadi si mbelinna, ia arus ngelai nandangi kam kerina; janah ise atendu jadi peminpin, ia arus jadi suruh-suruhenndu kerina, bagi Anak Manusia si isuruh Dibata, reh labo guna ielai tapi guna ngelai, janah iendeskenNa kesahNa guna nebusi nterem jelma” (Mat. 20:26-28).
- Tupung Jesus bengket ku Jerusalem, iersakna Kelede “Katakenlah man Kuta Sion, genduari reh Rajandu ndahi kam, meteruk ukurNa iersakNa kelede, anak kelede singuda denga” (Mat. 21:5).
- Jesus murihi nahe ajar-ajarNa, si jadi tujun Jesus eme segelah ajar-ajar ngusih ras nerusken dahin si enggo idahiken Jesus. Nina Jesus “Dage adi Aku, Guru dingen Tuhanndu enggo murihi nahendu, patut pe maka kam siburih-burihen nahe. Enggo Kubahan si man usihenndu gelah banci ibahanndu bagi si enggo Kubahan man bandu e” (Joh. 13:1-20).
Pengajaren ras orat geluh Jesus enda me si jadi palas ras si man usihen kalak Kristen i bas geluhna. Petrus selaku rasul Kristus nehken suratna, i bas penaruh isingetkenna “Surat enda man anak-anak Dibata si enggo ipilih, e me kalak perlajang si merap i belang-belang propinsi Pontus, Galati, Kapadokia, Asia ras Bitinia. Kam enggo ipilih rikutken sura-sura Dibata Bapa, janah ijadiken KesahNa jadi anak-anakNa si badia, gelah kam ngikutken Jesus Kristus” (1 Pet. 1:1-2). Perpulungen paksa si e iayak-ayak ras ngenanami kiniseran erkiteken kinitekenna man Jesus. Kiniseran siinanami perpulungen paksa si e eme percuban situjunna guna ncidahken ntah kiniteken kalak Kristen e tuhu-tuhu ntah lang. Emas si banci ceda e pe isepuh alu api, apai denga ka kiniteken si ndauh ergan asangken emas e. Kiniteken kalak Kristen arus isepuh gelah emurnina. Kenca bage maka i bas wari e pagi, sanga kerehen Jesus Kristus ku doni enda, ialoken kalak sierkiniteken pujin, kemulian, dingen kehamaten.
Petrus nehken persinget man pertua-pertua perpulungen, em kalak si enggo muat bagin i has ngepkep ras dahin nehken Berita Si Meriah. Perpulungen e desken rarasen biri-biri Dibata, emaka arus teridah kiniraturen, kehamaten, kiniteruken ukur, sisampat-sampaten ras kepatuhen man Dibata i has rarasen biri-biri Dibata e. Man kalak si nguda itegasken Petrus ”Bage pe kam si nguda denga, patuhiah kam nandangi kalak si metua. Alu meteruk ukur erbentingkibullah kam kerina guna sisampat-sampaten.” I bas perpulungen, erbage-bage kalak si lit ije rikutken umur. ljenda me perlu kiniraturen ras kehamaten si perlu icidahken. Man kalak si nguda arus encidahken kepatuhen ras kehamaten man kalak si enggo metua ntah si ituaken (pengepkep) i bas perpulungen e. Si perlu ilumbaken eme biak meteruk ukur alu erbenting kibul i bas sisampat-sampaten. Erbenting kibul ertina, katawari paksa pe ersikap ras nggit muat bagin guna nehken penampat. Jadi lanai lit i je biak nimbak, sipandang-pandangen, sipandang-punjuten ras kiniganjangen ukur. Kerina ngusih kempak Jesus si patuh man Dibata sinuruh IA ras alu dem kiniteruken ukur nehken kekelengenNa man doni enda. Kalak Kristen pe arus bage, mpeteruk bana iteruh tan Dibata si erkuasa, gelah i has paksa si payo, ipeganjangkenNa. Lit kap pengajaren Jesus ”lse si peganjangken bana, ipeteruk Dibata me, janah ise si peteruk bana, ipeganjangken Dibata me la” (Mat. 23:12).
I tengah-tengah kegeluhen kalak Karo ilumbaken kel biak nggeluh meteruk ukur icidahken arah pengerana ras perbahanen man sangkep nggeluh. Mehamat erkalimbubu, medes ersenina/sembuyak ras metami er anak beru. Kalak Karo pe i bas peradatenna kerina ibenai alu runggu, ertina maka teptep dahin peradaten e dahin ras-ras (sangkep geluh). Enda pe encidahken biak si meteruk ukur, la erbana-bana ras la mpejang-jang bagi ate: ate ntah sura-surana saja. I bas dahin-dahin peradaten subuk kerja meriah ntah ceda ate, kalak singuda me siperlebena muat bagin. Umpamana nai i bas ndarami bulung-bulung ras rudang-rudang ku mbal-mbai ntah kerangen man tambar, kiranting, majekken lape-lape, muat umbut, ertenah ras erlegi ras si debanna. Orangtua (si enggo metua) erjaga-jaga ras ngembar-ngembari i rumah ntah jambur. I bas kalak Karo pe nai-naí nari enggo ilakoken nini-nininta biak erbenting kibul i bas sisampat-sampaten si man usihenta eme ngeripe, Kinikerin ras kiniseran si lit irasken sangkep nggeluh guna ndungisa. Kerina sangkep nggeluh erbentingkibul dikune lit sekalak i bas sangkep geluhna e i derpa kiniseran.
EVALUASI :
Uga pendalankenta kerna ngelitken alat musik/musik digital GBKP guna PJJ ta?
DISKUSI :
- Kai-kai saja siarus silakoken maka meteruk ukur jadi biak geluhta?
- Turiken pengangkandu kerna pengajaren enda “Alu meteruk ukur erbentingkibullah kam kerina guna sisampat-sampaten”!
AKSI :
Sekalak-sekalak erbahan renungen pribadi. I bas perenungen e ngenehen kempak dirina jine, enggo nge lit biakku meteruk ukur ras erbentingkibul guna sisampat-sampaten sedekah enda? Adi enggo tetap lakoken ras adi lenga guna iperobahi ku siterulin.
USULEN LAGU:
- KEE GBKP No. 234:1,4,5
- KEE GBKP No. 292:1-3
- KEE GBKP No. 290:1-3
- KEE GBKP No. 272:1-
Pdt. DR. Kalvinsius Jawak