NEHKEN KEKELENGEN ARAH BUDAYA
Johanes 19:38-42
Yesus dikuburkan
19:38 Sesudah itu Yusuf dari Arimatea–ia murid Yesus, tetapi sembunyi-sembunyi karena takut kepada orang-orang Yahudi–meminta kepada Pilatus, supaya ia diperbolehkan menurunkan mayat Yesus. Dan Pilatus meluluskan permintaannya itu. Lalu datanglah ia dan menurunkan mayat itu. 19:39 Juga Nikodemus datang ke situ. Dialah yang mula-mula datang waktu malam kepada Yesus. Ia membawa campuran minyak mur dengan minyak gaharu, kira-kira lima puluh kati beratnya. 19:40 Mereka mengambil mayat Yesus, mengapaninya dengan kain lenan dan membubuhinya dengan rempah-rempah menurut adat orang Yahudi bila menguburkan mayat. 19:41 Dekat tempat di mana Yesus disalibkan ada suatu taman dan dalam taman itu ada suatu kubur baru yang di dalamnya belum pernah dimakamkan seseorang. 19:42 Karena hari itu hari persiapan orang Yahudi, sedang kubur itu tidak jauh letaknya, maka mereka meletakkan mayat Yesus ke situ.
I bas paksa kita erceda ate tuhu-tuhu mbelin kel ngaruhna jadi pengapul man banta di kune lit kalak nehken penampat. Bagi kecibal ajar-ajar Jesus ras sangkep geluh Jesus, menaken kin Jesus i tangkap, iadili, ipakuken seh mate tuhu-tuhu si enda jadi perbeben ras kecedan ate si mesangat. I bas Jesus enggo mate i kayu persilang teridah me kalak si nehken kekelengen man Jesus ras keluargaNa, eme: Jusup kalak Arimatea, asalna i kuta Arimatea i taneh Judea nari. Si Jusup, e me kalak si enggo tek man Jesus, tapi la terang-terangen sabap mbiar ia kalak Jahudi si erkuasa. la kalak bujur dingen ihamati kalak si nimai kerehen Kinirajan Dibata. Aminna gia anggota Sidang Mahkamah Agama, tapi ia la setuju keputusen ras tindaken Mahkamah e. Lawes ia ngadap man Pilatus guna mindo mait Jesus man Pilatus gelah banci min ibuatna mait Jesus. Pemindon Jusup enda ibere Pilatus. Nikodemus, sekalak peminpin agama kalak Jahudi, ia kalak Parisi. Nikodemus nggo pernah reh ndahi Jesus paksa berngi, ercakap-cakap ras Jesus ras ndatken pengangkan si mbaru arah pengajaren Jesus (Joh. 3:1-21). Nikodemus nehken kekelengenna alu ikut pe ngelegi mait Jesus e. Ibabana kira-kira telu puluh kilo minak mur si isinggur ras minak gaharu. Minak Mur ras gaharu minak si meherga, semal i tamaken i bas penguburen raja-raja.
Jusup kalak Arimatea ras Nikodemus nehken kekelengen sue ras kinilitenna. Isehkenna kehamaten i bas penguburen Jesus. Semalna paksa si e, adi lit kalak si mate iukum i kayu persilang (ukumen mate) maka maitna ipeturut i datas kayu persilang ntah ikuburken ipersada i bas sada ingan ras kalak penjahat. Mait Jesus la ndekah i datas kayu persilang. Erkiteken wari kematen Jesus e me wari persikapen guna wari Sabat kalak Jahudi (wari enggo ben), kalak Jahudi enggo ersikap ngalo-ngalo wari Sabat. I bas wari Sabat wari si pepituken e me sada wari pengadi-ngadin si man persembahenken man TUHAN saja. I bas wari e, ise pe la banci erdahin. Jusup kalak Arimatea ras Nikodemus eme kalak si patuh i bas agama, emaka minter ilakokenna penguburen Jesus. I bas pengidah kalak enda duana maka Jesus labo ersalah, emaka la patut Jesus ipeseri ras penjahat. Man Jesus arus isehken kehamaten rikutken adat penguburen kalak Jahudi. Emaka inganNa i kuburken pe i bas taman, kuburen pe si lenga perneh ipake, mait Jesus ibalutina alu kain putih (dagangen mbentar simeherga) janah itamakenna pe rempah-rempah rikutken adat penguburen kalak Jahudi. Ulih perbahanen Jusup kalak Arimatea ras Nikodemus enda tuhu-tuhu mereken serpang pulah ras pengapul man ajar-ajar Jes sangkep geluh Jesus. Paksa si e idah Maria Magdalena ras Maria nande Joses kerina siilakoken guna penguburen Jesus. Kenca bage mulih ia ku rumah nikapken rempah-rempah si merim ras minak wangi guna mait Jesus (Luk. 23:55-56).
Arah kai sinilakoken Jusup kalak Arimatea ras Nikodemus enda banci mpersingeti kita mulihi ras jadi penjemba man banta segelah mediate ras kepate nandangi kalak si deban. Terlebih-lebih i bas litna kiniseran ntah kecedan ate si nderpa geluhna. Kasa gegeh ras kengasupenta lit si sehken penampatta guna mpenahangi, ngapuli ras mulahisa i bas kecedan atena nari. I bas kesemalen budaya kalak Karo pe, dikune lit kepaten maka kerina sangkep nggeluh rikut pe teman meriah/sada kesain muat bagin i bas ngelayasi kerna peradaten ras penguburen. lakoken runggu, icakapken kerna wari penguburen, ingan pulung, utang adat, inganna ikuburken, ertenah/erlegi/undangen, perpan sindahikenca dahin e. Labo anak kuta e saja siirungguken tapi dikune lit kalak tandang-tandang pe ipekena-kena, sabab ndube enggo me lit sangkepna geluh i bas kuta e. Kerina muat bagin, seh banci erlayas kerina. Emaka arah nggitna kerina muat bagin i bas nehken kekelengen maka terapul me keluarga si erceda ate. Terlebih-lebih kalimbubu si mada dareh ras si erkimbang, ersada arihna guna nehken penayeb. Kalimbubu si mada dareh ras si erkimbang nehken kekelengen man anak beruna si kepaten alu maba beras, manuk, ras amak. Beras ras manuk iendesken man anak beru si kepaten guna itanggerken gelah ipan jabu si kepaten. Amak, adi nai ope lenga lit peti, semal mait e ibaluti alu amak, Perban serana geluh sikepaten, amak pe la terlitken. Bage me sangkep nggeluh muat bagin segelah metunggung ras erlayas kerina. Tentuna mbue denga keperlun-keperlun i bas kerja ceda ate enda, tapi kerina banci idungi arah litna sangkep nggeluh muat bagin i bas nehken kekelengen.
Rikutken kesemalen selaku kita kalak Karo, nininta si arah lebe enggo nadingken siman usihen ras siman dalanenken i bas orat geluh sikeleng-kelengen. Lit kata pengajuk si mpegegehi persadan i bas kalak Karo “kuga beratna pe dahin e, adi irasken dung nge” ertina kai gia soal, dahin, perbeben ras si debanna adi irasken ndahikenca maka kedungenna erlayas. Arah pengajaren e, teridah maka labo petembil adat kalak karo ras pengajaren Kristus. Kinitekenta teridah arah ndalanken kekelengen man sangkep nggeluh ras sekelewet. I bas kalak Karo si enda teridah:
- Biak runggu: kalak Karo i bas menaken sada-sada dahin ntah lit soal, si pemenana ilakoken eme runggu. Sangkep nggeluh ngerungguken (arih-arih) guna muat serpang pulah ras ngelayasi dahin ntah soal si lit. Arah si enda teridah tuhu biakkalak Karo nggit arih-arih, nggeluh ersada, gotong royong. La lit siganjang teruken ras la lit si mpejang-jang sura-surana.
- Ngeripe: eme salah sada bukti ate keleng i bas sangkep nggeluh kalak Karo, dikune lit keluarga i bas sangkep nggeluh ndatken kiniseran (khususna kerna perduiten) maka sangkep nggeluh alu utang/pengkeri-kerin e. Si enda banci si pakeken i bas erdiakonia i tengah-tengah perpulungenta.
Mari sibuat baginta i bas nehken kekelengen man sekelewetta, terlebih-lebih man kalak si paksana iderpa kiniseran. Kuga gia serana baban geluh temanta, adi nggit kita muat bagin tentuna jadi menahang. I bas budaya Karo iajarken man banta guna nggeluh sikeleng-kelengen. Pedah Jesus pe “Kubereken man bandu pedah si ngeripe/ibagiken guna rasken nebusi mbaru, e me: Sikeleng-kelengenlah kam. Bagi Aku enggo engkelengi kam, kam pe min arus sikeleng-kelengen. Adi sikeleng-kelengen kam, kerina kalak meteh maka kam ajar-ajarKu” (Joh. 13:34-35).
EVALUASİ :
Enggo me ilitken PA gabungen kategorial kerna encakapken TI?
DISKUSI:
- Kai nge sierbahanca maka Jusup kalak Arimatea ras Nikodemus nggit nehken kekelengen sue ras kinilitenna i bas penguburen Jesus?
- Turiken kesemalen-kesemalen i bas budaya Karo si encidahken kekelengen!
Pdt. DR. Kalvinsius Jawak
Pepulung penampat i bas PJJ sektorta 1 Kg beras/Rp 10.000 si jadi “Geraken Nehken Kekelengen guna nampati pendanaan program Komisi HIV/AIDS. Kenca enggo ipepulung, isehken man Bendehara Runggun guna isetorken man Bendehara Klasis, Bendehara Klasis netorkenca man Bendehara Moderamen.
USULEN LAGU
- KEE GBKP No. 177:1,2
- KEE GBKP No. 281:1-3
- KEE GBKP No. 257:1,6
- KEE GBKP No. 402:1-3
TOPIK PERTOTON SYAFAAT :
- Gelah reh ngasupna anggota perpulungen nehken kekelengen man sekelewetna.
- Gelah ngawan perpulungen jadi kalak si erbudaya ras erkiniteken i bas nehken kekelengen.
- Si turah i bas perpulungen.
Pdt. DR. Kalvinsius Jawak