UJILAH LEBE, CIKEP SI MEHULI
(TI Ulihna)
1 Tesalonika 5:19-24
5:19 Janganlah padamkan Roh,
5:20 dan janganlah anggap rendah nubuat-nubuat.
5:21 Ujilah segala sesuatu dan peganglah yang baik.
5:22 Jauhkanlah dirimu dari segala jenis kejahatan.
5:23. Semoga Allah damai sejahtera menguduskan kamu seluruhnya dan semoga roh, jiwa dan tubuhmu terpelihara sempurna dengan tak bercacat pada kedatangan Yesus Kristus, Tuhan kita.
5:24 Ia yang memanggil kamu adalah setia, Ia juga akan menggenapinya.
Negarata Indonesia emekap negara si berkembang alu presentase penggunaan Teknologi Informasi si cukup tinggi. Perkembangan teknologi turah arah dorongen manusia si atena engembangken pemikirenna. Pengguna Teknologi Informasi si melalana emekap anak si nguda, kenca sie orang tua paruh baya. Teknologi Informasi usur jadi ingan/alat guna mengekspresiken diri. Piga-piga contoh Teknologi Informasi eme: penggunaan Media Sosial/Media Informasi Digital (Youtube, Facebook,Twitter,Instagram,WhatsApp, Line, Telegram, Web Side ras si debanna). Melala simehuli si datken kita arah Teknologi Informasi enda, umpamana: informasi arah ingan si deban nari pedas sialoken, pedas sieteh masalah kai si terjadi i doni enda, engkurangi pemanasen global erkiteken pemaken kertas reh urakna. Teknologi Informasi enda pe banci jadi dalan nehken Berita si Meriah (mpeseh Kata Dibata) man kerina jelma, la lit ije batas ruang ras waktu.
Paulus i bas jamanna, make surat nehken Berita si Meriah man perpulungen-perpulungen. Surat paksa si e teknologi si mehuli ibas nehken informasi man kalak si deban. Arah suratna, Paulus nehken pedah man perpulungen Tesalonika, nina, “Kai pe ujilah Jebe; cikep si mehuli.” Pedah enda ipeseh Paulus man perpulungen gelah ersikap ngalo-ngalo kerehen Tuhan Jesus mulihken. Pedah enda erbahanca situasi perpulungen kurang mehuli, sabab lit piga-piga perpulungen e lanai ndahiken dahinna, nimai saja, la ngelakoken kai pe. Persoalen si deban emekap, kearun ate perpulungen kerna kalak si mate ope denga Tuhan Jesus reh mulihken. Tambah si e, rehka nabi-nabi perguak si atena ncedai kiniteken perpulungen, erbahanca monce-once kinitekenna. Emaka arah suratna, Rasul Paulus mereken pedah, mpetetap ukur perpulungen Tesalonika. Ula murah ipengaruhi pengajaren si papaksierbahanca sirang ras Tuhan Jesus. Si arus ilakoken perpulungen, eme: ertotolah katawari paksa pe (ay. 17), kataken bujur man Dibata i bas si kugapana pe (ay. 18), ola ambati pendahin Kesah Si Badia (ay. 19), ola anggap enteng nandangi berita kerna sura-sura Dibata (ay. 20). Janah kai pe ujilah lebe; cikep si mehuli, silahken kerina si jahat (ay. 21-22). Janah Dibata tetap mereken kemalemen ate, erbahanca kita badia i bas kai pe, janah IA siengkawali kita, seh Jesus reh mulihken. Kesetiaan Dibata e erbahanca kita serta (ay.23-24).
I bas kegeluhenta, katawari paksa pe kita iperhadapken ku bas pilihen-pilihen. Bebas kita memilih, tapi ola min asal pilih. Harus lit pertimbangen, arus iuji lebe maka sipilih janah sicikep. Sabab pengujin eme sada perbahanen si mabai kita ku bas kiniteken. Sura-suranta si mehuli janah teruji min ateta sicikep. Umpamana adi sieteh ateta emas e murni entah lang, perlu isepuh lebe alu nutungsa, seh ngasa teridah emas e murni. Bage me pe i bas kita erbahan pilihen-pilihen guna sicikep i bas kegeluhenta, arus iuji lebe. Rikut pe perkembangen teknologi si tuhu-tuhu canggih i bas paksa gundari. Segelah ula salah pilih, Kata Dibata min jadi sukat-sukat i bas nguji kai pe. Seh maka banci si dat janah si cikep si mehulina.
Tahun 2020 tema tahun pelayanan gerejata GBKP eme: “meningkatkan kemampuan warga GBKP dalam pengelolaan dalaminformasi dan keterampilan penggunaan Teknologi Informasi (TI)”. Jaman gundari enda reh majuna, teridah arah teknologi informasi si canggih. Amin bage gia lit nge tantangen-tantangen si turah arah Teknologi Informasi enda, umpamana: “terkikis” ketedehen ate ku perpulungen/jumpa secara langsung, urakna pengangkan anak si nguda kerna orat nggeluh seh maka teridah enggo kurang kehamatenna man kalak si tuan asa ia subuk i bas pengerana entah i bas perbahanen sabab kerina banci arah media sosial. Tambah sie arah penggunaan Teknologi Informasi enda, mawen-mawen kalak singuda enda akapna ia enggo jagon asangken orangtuana bage pe si tuan asa ia. Tantangen si deban, eme melala jelma reh beluhna nebu-nebu. Banci saja posisina i rumah denga, tapi katakenna sue ras keperlunna ras si debanna.
Temata i bas PJ ta sendah: Ujilah Lebe, Cikep Si Mehuli. Teknologi Informasi tuhu erguna adi sipakeken alu mehuli. Kuga cara nguiisa Sipemena, i bas makeken Teknologi Informasi siperdiateken erguna nge e ku bas kemuliaan Dibata (1 Kor. 10:23)? Adi lalan ku si la ngena ate Dibata ola padah sipakeken. Sipeduaken, Teknologi Informasi banci min mbangun sada Komunitas (perpulungen) jadi sada persadan si nggeluh (Joh. 15:1-17). Inti persadan emekap nggeluh i bas Kristus, ngkelengi kalak si deban, erdahin guna Kinirajan Dibata i doni enda. Emaka adina Teknologi Informasi e mabai kita ngukuri dirinta ras keperlunta saja (individualis), ola pedah sipakeken. Sipeteluken, Teknologi Informasi ula jadi berhala si mbaru (Mat. 28:16-20). Teknologi labo tujun tapi alat i bas pelayanan. Jadi, ula min kita reh ku Gereja perban canggihna Teknologi Informasi si ipake i bas Gereja e, tapi sinenlah Kata Dibata siipeseh alu alat sicanggih sierbahanca tambah semangatta mbegiken kata Dibata e, reh pedasna siangka kerna kata e, semangat kita i bas ndalankenca ras mpeseh Kata Dibata e ku sekelewetta. Emaka guna nguji kai si reh man banta e, la banci lang Kata Dibata tetap jadi sukat-sukatna. Jadikenlah Teknologi Informasi nampati kita ras perpulungen majekken kula Kristus I doni enda. Reh paguhna kiniteken perpulungen arah pelayanen gereja si mehuli.
EVALUASI :
lit nge aksi si ban guna ndukung pelayanen KAKR i bas gerejanta?
DISKUSI :
- Sue ras temata: Ujilah Lebe, Cikep si Mehuli (1 Tes. 5:21) kai banci silakoken i bas ndalanken tahun tema GBKP 2020 eme kerna pemaken Teknologi Informasi enda?
- Turiken pengalamenndu i bas makeken Teknologi Informasi sedekah enda! Subuk positif entah negatif.
AKSI:
Asa bancina mari sibahan PA bersama alu erbahan ceramah kerna pemaken Teknologi Informasi. PA bersama silakoken ras kerina Kategorial (Mamre, Moria, PERMATA, Saitun, KA/KR atau Remaja) janah siundang pembicara siberpengalamen i bas si e!
USULEN LAGU:
1. KEE GBKP No. 338:1,3
2. KEE GBKP No. 392:1-3
3. KEE GBKP No. 290:1
4. KEE GBKP No. 200:1-2
TOPIK PERTOTÓN SYAFAAT :
- Notoken segelah perpulungen khusuna kalak singuda denga banci makeken Teknologi Informasi alu payo.
- Notoken segelah “Gereja” reh beluhna mpergunaken Teknologi Informasi guna jadi alat mpeseh Kata Dibata guna kemuliaan gelar Tuhan.
Pdt. Mira Mutianta Br. Sinulingga, S.Th.