IPEKEKE RAS KRISTUS
(PASKAH/HUT KAKR 130 TAHUN)
Kolose 3:1-4
3:1 Karena itu, kalau kamu dibangkitkan bersama dengan Kristus, carilah perkara yang di atas, di mana Kristus ada, duduk di sebelah kanan Allah.
3:2 Pikirkanlah perkara yang di atas, bukan yang di bumi.
3:3 Sebab kamu telah mati dan hidupmu tersembunyi bersama dengan Kristus di dalam Allah.
3:4 Apabila Kristus, yang adalah hidup kita, menyatakan diri kelak, kamupun akan menyatakan diri bersama dengan Dia dalam kemuliaan.
Seumpama lit sada barang, enggo ceda, lanai terpake janah iambekken. Emaka lit sekalak jelma si mbuatsa, janah idaur ulangna, emaka jadi sada barang si mbaru ras banci ipake guna fungsi si mbaru. Penungkunenna, sikerajangen ise nge barang enda? Janah seri denga nge cara kerjana ras si mbarenda adi enggo idaur ulang? Barang e sikerajangen simpekenasa, janah cara kerjana lanai bo bagi si enggona erkiteken enggo idaur ulang. Bage me gambaren kegeluhenta i bas Kristus. Kita enggo ceda erkiteken dosa-dosanta, janah kecedan e maba kita kempak kegeluhen si labo lit gunana. Tapi erkiteken kelengNa ate Dibata man banta, aminna kerina manusia enggo erdosa janah enggo ndauh sirang ras sura-sura Dibata si mejile, tapi arah pemere Dibata erpalasken lias ateNa, kerina manusia irembakken Dibata kempak diriNa, arah penebusen si ibahan Kristus Jesus (Rm. 3:23-34). Enda ngatakenca maka kalak si tek eme sikerajangen Dibata, janah kegeluhenna ipake guna mpermuliaken Dibata.
Surat Kolose itulisken Paulus man perpulungen Kolose, erkiteken ieteh Paulus maka lit guru-guru perguak nehken pengajaren si papak i bas perpulungen e. Pengajaren e ngataken guna nandai Dibata arus nembah man kesah-kesah ras kuasa-kuasa si lit I awang-awang. Manusia arus patuh nandangi adat sunat ras adat peraturen-peraturen si deban (bdk. Kol. 2:11, 16-18). Emaka ipersingeti Paulus perpulungen Kolose kerna pengajaren si benar. Sipemena, kerna status ntah identitasna si mbaru i bas Kristus “kam enggo ipekeke Dibata ras Kristus” (ay. 1). Sindube enggo ceda, lanai lit gunana, lanai terpake erkiteken dosa, enggo ipekeke ras Kristus. Enggo idaur ulang jadi sikerajangen Kristus. Adi ndube caranta rukur, caranta ngerana, caranta nggeluh male, ceda ras encedaken, kenca idaur ulang, ipekeke ras Kristus, kerinana ipelimbarui jadi mehuli ras maba kiniulin. Sipeduaken, kerna fokus simbaru i bas status si mbaru “bulatkenlah ukurndu nandangi erta-erta surga, labo nandangi perkara-perkara doni” (ay.2). Kai kin erta-erta surga? Eme pemere sibereken Dibata nandangi kalak sindalanken sura-suraNa, kalak si enggo ipelimbarui Dibata, perayaken geluhna labo terjeng si i bas doni ngenca, tapi kempak si ngena ate Dibata. Carana eme lanai nggeluh bagi ate-ateta, rikutken cocok ras la cocok siakap saja, tapi sibere perukurenta teptep wari ipelimbaru Dibata. Sipeteluken, njagai persadan, kerina perpulungen arus njagai persadaan perpulungen si erpalas ku bas kiniteken, pengarapen ras kekelengen.
Ikawitken ku bas perayan Paskah, kita enggo ipekeke i bas Kristus. Kita enggo ipekeke eme sada tanda maka Dibata si sembah kita e tuhu-tuhu nggeluh janah mereken kegeluhen si mbaru man banta. I bas Padan si Ndekah, paskah iertiken sebage peristiwa kebebasen si ibereken Dibata man kalak Israel i bas perbudaken Mesir nari. Dibata erkeleng ate man bangsaNa emaka ipulahiNa i bas kiniseran nari. IbabaiNa janah ipekena-kenaNa pe bangsaNa i bas nadingken Mesir kempak taneh siipadankenNa. Bage pe seh asa genduari Dibata tetap mabai ras mpekena-kena kegeluhenta, gelah ulanai mulihi itaban dosa, tapi ndatken kegeluhen situhu-tuhu si enggo ipadanken Dibata.
I bas tanggal 18 April 2020 enda pe, siperingeti kerna Hari Ulang tahun KAKR GBKP si pe 130 tahunken. Selaku kalak si enggo ngaloken kegeluhen i bas Kristus, lalap ermetedeh ate njagai persadan, atan pe persadan anak KAKR. Banci sibayangken, adi la siperdiateken KAKR-ta, uga nge kira-kira kecibal gerejanta 30 tahunku lebe enda? Ise nge pagi jadi penerusta? Tapi penungkunen terbagesen :
- Enggo nge lit Gedung KAKR ta ingan anakta reh ndahi Tuhan?
- Adi enggo lit gedungna, enggo nge cukup fasilitas simemadai ibas gedung KAKRTA? (kipas angin/AC, alat peraga, alat musik, infokus ras si debanna).
- Enggo nge pernah silitken snack man anak-anakta ibas kebaktianna?
- Enggo nge sidukung program-program KAKR siibahan guruna?
- Enggo nge lit perhatinta secara khusus nandangi guru-guru KAKR si ngajari anak-anakta? (Kerna kesejahteranna, kerna pembinaanna, kerna notoken ia subuk si sekolah, sindarami dahin, sindarami teman geluh, si enggo erkeluarga).
Dibatanta ncidahken kekelengenNa man banta alu nebusi dosa dosanta. Mereken kegeluhen simbaru man banta alu cara mpekeke kita ras Kristus. Marilah sicidahken ka kekelengenta man KAKRta alu tole nambahi perhatinta nandangi kai siiperlukenna.
EVALUASI:
Ma ikut nge kita muat bagin i bas Kebaktin Kamis Si Badia, Jumat Si Mbelin, Sabtu Pengarapen ras Paskah si lewat?
DISKUSI
1. Turiken pengangkanndu kerna kam enggo ipekeke ras Kristus?
2. Kai-kai saja nge si perlu silakoken guna kiniulin KAKR I bas runggunta?
AKSI:
Bahanlah pengakunta teptep jabu (ikordinir i bas PJJ) guna nampati pelayanen KAKR rikutken keperlun i bas runggunta.
USULEN LAGU
- KEE GBKP No. 399:1,3
- KEE GBKP No. 463:1-3
- KEE GBKP No. 281:1,3
- KEE GBKP No. 194:1,3
Pdt. Ribka Mayasari br Tarigan, S.Th.