“Teridah min Sinalsal Kinibujuren Ukurndu”
Kuan-kuanen/Amsal 4: 20 – 27
(4:20) Hai anakku, perhatikanlah perkataanku, arahkanlah telingamu kepada ucapanku;
(4:21) janganlah semuanya itu menjauh dari matamu, simpanlah itu di lubuk hatimu.
(4:22) Karena itulah yang menjadi kehidupan bagi mereka yang mendapatkannya dan kesembuhan bagi seluruh tubuh mereka.
(4:23) Jagalah hatimu dengan segala kewaspadaan, karena dari situlah terpancar kehidupan.
(4:24) Buanglah mulut serong dari padamu dan jauhkanlah bibir yang dolak-dalik dari padamu.
(4:25) Biarlah matamu memandang terus ke depan dan tatapan matamu tetap ke muka.
(4:26) Tempuhlah jalan yang rata dan hendaklah tetap segala jalanmu.
(4:27) Janganlah menyimpang ke kanan atau ke kiri, jauhkanlah kakimu dari kejahatan.
I. KATA PERLEBE
Tandana sekalak jelma ikataken erkiniteken tentu teridah arah ulih perbahanenna. Ulih kinitekenna e labo kepe terjeng bas dirina saja ngenca, tapi pe teridah ka i bas perbahanenna kempak sekelewetna. Ulih kiniteken e teridah ras erbuah i bas perbahanen si ilakoken manusia. Teridah i bas hubungenna ras kalak si deban, teridah i bas ketutusenna ndahiken dahinna bage pe teridah ka pe arah perukurenna si dem alu kiniulin. Erkiteken si e teridah maka ulih kiniteken e mereken dampak positif kempak sekelewetna. E maka kalak si erkiniteken semalna teridah ka me i bas ia kiniulin-kiniulin. Kiniulin-kiniulin si ilakokenna e banci min igejapken kalak si deban. Biak si bagenda me si arus ituduhken kalak si ngaku tek man Kristus. Kinitekenna man Kristus e la terjeng dirina saja ngenca. Tapi kiniteken e erbuahken perbahanen si mehuli kempak sekelewetna.
II. ISI
Kai kin erkiniteken e? I bas invocatio ituriken maka erkiniteken ertina tek nandangi kai si iarapken kita, tek kerna si la idah (Heb. 11:1). Lit dua kata kunci si itekanken, eme tek nandangi si iarapken ras tek nandangi si la idah. Si iarapken manusia i bas kegeluhenna eme padan Dibata lako nehken keterkelinen man manusia. Kalak si erkiniteken tek ia maka padan Dibata e pasti isehkenna man manusia si nggit ngalokenca. E maka aminna pe langa idah paksa gundari, langa banci ijemak ntah pe langa teridah alu mata labo berarti maka si e la lit. Adi menurut penulis kitab Heber, kalak tetap i bas pengarapenna nandangi si langa idahna, eme kalak si erkiniteken. Si e tujunna eme guna ndatken keterkelinen. Aminna pe la iidahna alu tangkas, tapi tek ia maka keterkelinen e banci jadi sikerajangenna. Eme tanda kalak si nggeluh erkiniteken man Dibata.
Ulih kiniteken si bage me si isaksiken sekalak diberu si enggo ndekah kal sakit (bdk. Mrk. 5:25-34). I bas perbebenna kerna pinakit, enggo melala kal ilakokenna upaya guna nambari pinakitna. Tapi pinakit e pe lalap la malem, dingen reh kelekna pe. Situasi si e tentu maba kearun ate kal man bana. Janah erkiteken pinakit lalap la malem, enggo turah pe keputus-asaan man bana. I bas perukuren si bage, idahina Jesus alu sada kiniteken maka adi jemakna uis Jesus pasti nge pinakitna e malem (Mrk. 5:28). Teridah kal ije kuga tetapna ras paguhna kiniteken diberu e. Seh maka turah kiniteken i bas ia adi njemak uis Jesus saja pe banci malem pinakitna. Erkiteken kiniteken si bage me maka nina Jesus: ”kinitekenndu nelamatken kam.”
Enda me tanda kalak si erkiniteken e. Tek ia maka Jesus dem alu kuasa si banci mereken keselamaten man kalak si erkiniteken alu erbage-bage cara. Turi-turin enda mpetangkas maka kiniteken e eme tek nandangi kuasa si la idah, tek i bas pengarapen pe. Em tanda kiniteken (spiritualitas) si lit i bas sekalak diberu e, si kedungenna maba keterkelinen ku bas kegeluhenna.
Kuga maka banci terbentuk kiniteken e? Sada si penting kerna palas erkiniteken si isingetken i bas kitab Kuan-kuanen 4:20-27, e me kap Kata Dibata. Kata Dibata arus jadi palas kegeluhen ras kiniteken manusia. Adi Kata Dibata si jadi palas kegeluhen ras kiniteken, tentu Kata Dibata ka si erkuasa i bas pusuh kalak si erkiniteken. Kata Dibata me si ngaturken manusia ngelakoken perbahanen si mehuli e. E maka nina i bas Kuan- kuanen 4:23; ”perukurenndu kap si mabai dalan kegeluhenndu”. Ertina maka kerina si ilakoken manusia i bas geluhna igerakken perukurenna. I bas bukuna, Risnawaty Sinulingga ngataken maka: i bas kalak Israel kuno lit pengangkan maka pusuh e seri ras perukuren. Pusuh eme salah sada organ si penting man manusia si nentuken perbahanen geluh manusia. I bas pusuh e lit perukuren ”intelektual” ras ”emosional” manusia. I bas pusuh e me pengajaren e ijaga dingen iukuri. E maka kalak si perukurenna ikuasai Kata Dibata, tentu kerina perbahanen si ilakokenna pe pasti ka nge ikuasai Kata Dibata. Ije me pembentuken kiniteken (spiritualitas) kalak Kristen. Kuga ia nuanken Kata Dibata e banci ringan ras erkuasa i bas perbahanen si ilakokenna.
Ulih kalak si pusuhna ikuasai Kata Dibata teridah ka me arah biak geluhna, umpamana: lanai ia melasken kata si la payo, la ibelaskenna kata guak bage pe ranan si erbahanca kalak papak. Ertina tanda kalak si erkiniteken e teridah arah pengeranana si dem alu kiniulin ras kebujuren. Janah kalak si nggeluh i bas kiniteken, ngasup pe ia ertimbang kerna si mehuli i bas geluhna. Ipakekenna kebenaren Dibata ringan i bas pusuhna lako nuriken kebenaren Dibata man doni enda. Alu bage, kinibujuren ukur ras perbahanen si mehuli kempak sekelewetna jadi biak kegeluhen si teridah i bas kalak si erkiniteken.
III. PENGKENAINA
Kinibujuren min arusna enggo jadi orat geluhta selaku kalak si erkiniteken. Sabab enggo ibereken Dibata biak-biak kinibujuren e ringan i bas kalak si erkiniteken. E maka teridah min i bas kita biak-biak si mehuli si rehna i bas perukuren si mehuli nari ka. Gelah arah perukuren ras perbahanen si mehuli e, kalak si deban pe ngasup nggejapkensa keleng ate Kristus man bana. Selaku kalak si erkiniteken ngasup min kita nuduhken maka keleng ate Kristus kap si erdahin i bas kegeluhenta. Alu bage teridah i bas hubungenta ras kalak si deban. Perbahanen-perbahanen si mehuli kap si lakoken man kalak si deban. Enda min ulih kinitekenta sebage ngawan perpulungen GBKP si mperingeti Jubilium 130 tahun GBKP (18 April 2020). Teridah min kinitekenta arah sinalsal kinibujuren-kinibujuren silakoken kita bas kegeluhenta.