JABU NEPA ORAT GELUH PERMATA
(HARI ULANG TAHUN PERMATA GBKP)
EFESUS 6:1-4
Taat dan kasih6:1 Hai anak-anak, taatilah orang tuamu di dalam Tuhan, karena haruslah demikian.
6:2 Hormatilah ayahmu dan ibumu–ini adalah suatu perintah yang penting, seperti yang nyata dari janji ini:
6:3 supaya kamu berbahagia dan panjang umurmu di bumi.
6:4 Dan kamu, bapa-bapa, janganlah bangkitkan amarah di dalam hati anak-anakmu, tetapi didiklah mereka di dalam ajaran dan nasihat Tuhan.
Sekalak pandita gereja baptis si tergelar, Kenneth L. Chafini bas bukuna si berjudul, “Is there a family in the house?” (Apakah ada keluarga di dalam rumah?) mere gambaren kerna arti jabu. Ikatakenna maka jabu e me kap ingan ertumbuh, subuk secara pemeteh, akal budi, hubungen sosial, kekelengen bagepe penandai kerna Dibata. Jabu e me kap pusat pengembangen pemeteh guna mengembangken talenta si lit, rikut pe jadi ingan guna erlajar kerna hal-hal si mehuli. Janah jabu eme kap ingan si paling nyaman guna ngalaken kerina permasalahen kegeluhen. Ertina, jabu e me inti guna nepa orat geluh anak, janah Permata (anak singuda) me bagin ibas jabu e. Orat geluh anak ipengaruhi pengajaren ibas jabu. Orang tua berperan aktif ibas pembentuken karakter anak, janah ertanggung jawab guna mendukung anak e segelah sukses ibas pendidiken, hubungen ibas masyarakat, bagepe kiniteken si paguh man Dibata.
Rasul Paulus ngajarken perpulungen i Efesus,eme man kerina orang tua bagepe anak-anak guna meteh kuga kearusen geluh sekalak si enggo nandai Dibata. Tentu saja teridah ras tergejap ibas kegeluhenna sehari-hari. Kuga hubungenna ras Dibata,kuga interaksina nandangi sapih-sapih manusia, bagepe interaksi nandangi anggota ibas jabu e.
Rasul Paulus ngingetken, maka sada kewajiban anak harus patuh man orangtuana (ayat 1). Mpehaga nande bapa e me pedah si pemena arah Dibata si la banci itawar-tawar (ayat 2). Orang tua e me kap wakil Dibata i doni enda. Kai siniajarken orangtua e me guna kiniulin anak. Tujun pengajaren orangtua eme gelah kerina anak, termasuk Permata meteh mehuli, mbiar man Dibata janah pe sukses ibas kegeluhenna.
Kepeken ulih dikune anak ngikut ajar orangtua, labo saja erbahanca orat geluh anak e mehuli, tapi pe erbahanca mejuah-juah, janah ndekah geluh i doni enda “panjang umur” (ayat 3). Enda ngatakenca maka pasu-pasu orangtua e tuhu mbisa. Janah patuh man orangtua e me bukti kekelengen ras kepatuhenna nandangi Dibata.
Labo terjang man anak, Rasul Paulus pe ngingetken orang tua maka orang tua rutang guna mereken si terbaik man anak. Orang tua sebagai “guru” segelah mehuli lagu langkah anak e. Nina Rasul Paulus “Ola pesega-sega anakndu si erbahanca ia merawa. Tapi ibas mbelin-belin ia ajari dingen tegu-tegulah ia bagi singena ate Dibata” (ayat 4). Enda ertina maka orang tua harus ngasuhi ras ndidik anak sue ras kata Dibata. E ertina maka anak bagepe orangtua masing-masing harus nehken tanggung jawabna, situjunna eme gelah tercipta kedamen ibas jabu bagepe kemuliaan gelar Tuhan.
Kinata si terjadi genduari melala kal anak si mbelin ibas jabu si enggo ceda, si usur igelari broken home (rumah tangga rusak). Bapa ras nande sibuk ibas aktifitasna sekalak-sekalak, antara bapa ras nande pe lanai lit komunikasi, apai ka ras anak-anak. Jam tunduh pe enggo berbeda-beda, mawen-mawen bapa ras nande pisah ranjang (la ras tunduh) perban lit dahin harus idahiken seh mbages berngi i ruangen masing-masing. Kuga nari ningen man ras-ras, apai ka saat teduh entah pe ertoto ras-ras. Ertoto sekalak-sekalak pe usuren lupa.
Rikut ras kecibal rumah tangga si bagenda, tentu saja anak e pe enggo milih kesibukkenna sendiri. Anak ndarami teman si banci mbegiken keluh kesahna. Anak ndarami ingan si banci erbahanca tenang ukur a. Jore adina reh ia ku rumah pandita, pertua/diaken, entah ku gereja, bagepe dahina ingan-ingan si banci ertoto i je. Tapi si terjadi, dahina teman si erbahanca lalar, lanai meteh mehuli. Dahina ingan sierbahanca ia meteh minemen beralkohol janahna mabuk. Ku kafe ia jumpa ka ras teman si ngajari ia make narkoba. Tambah si e, si jadi kebiarenta ibas kurangna kepedulin orangtua nandangi perkembangen anak, bagepe adi la mengontrol pergaulen anak, maka banci terjadi penyimpangan orientasi seks anak. Tujun anak mungkin saja pertama-tama terjeng segelah lit kalak siengkelengi ia, si mperdiateken ia, singaloken ia uga litna. La persoalan akapna teman singkelngi ia maba ia dabuh kubas dosa. Piah dungna sesama jenis kelamin pe banci singenan, janah lakokenna hubungen sinjuruken gelar Tuhan. Enda me kerina perbahanen-perbahanen si menyimpang terjadi ibas anak dikune seisi jabu e la mbiar man Tuhan, seisi jabu e la nehi tugas tanggung jawabna masing-masing sue ras teks oratenta ndai.
Rikut ras HUT Permata GBKP tanggal 12 September 2018 enda, si pe 70 tahunken. Ija lembaga kategorial Permata terbentuk ibas tanggal 12 September 1948 silewat alu semangat juang, kebersamaan ras mbiar man Dibata. Maka ibas tambahna umur kategorial Permata enda, ola min hanya umur si tambah, tapi tole reh jorena Permata ibas kerina dampar kegeluhenna. Tentu saja jore ibas orat geluh, jore ibas pendidiken, jore ibas pendahin, jore ibas ndarami teman nggeluh, ras si paling penting me reh jorena kinitekenna man Dibata. Kerina enda banci tersehi labo terjeng cukup Permata si berperan ije, tapi pe sangat ibutuhken peran orangtua guba ngakarken, mendukung ras notoken anak-anak ibas jabu, termasuk me Permata. Orang tua mereken waktu si erkualitas man anakna. Paling tidak lit sada kali man ras-ras ibas jabu. Adina anak merantau perban sekolah atau erdahin, tetap kontrol arah komunikasi telepon atau media sidebanna. Janah pe selaku orang tua, perlu meteh ise nge teman bergaul anak teptep wari. Sebab, selain jadi pengasuh, orangtua berperan jadi teman terbaik man anak-anak. Tetap siinget maka jabu, eme ingan simehulina guna nepa orat geluh Permata jadi mehuli.
EVALUASI
Uga pendalankenta kerna aksinta ibas minggu si lewat, kai tantangen janah kai ulihna man banta?
DISKUSI
- Sue ras teks renungenta Efesus 6:1-4 ndai, enggo me silakoken tugasta selaku orangtua bagepe selaku anak?Turiken kai nge ndia si enggo ilakokendu!
- Menurutndu kai nge perbahanen-perbahanen si salah (si menyimpang) si melala kel genduari ilakoken anak. Janah kai nge kira-kira banci si bahan guna ngatasisa?
AKSI
Ibas HUT PERMATA si pe 70 tahunken enda, bahanlah aksi pekeke semangat Permata erkiniteken
USULEN LAGU
- KEE GBKP NO: 124:2,3
- KEE GBKP NO: 331:1-3
- KEE GBKP NO: 374:1,2
- KEE GBKP NO: 359