Bahan PJJ 10-16 JUNI 2018

August 7, 2018 Writer-1 PJJ Sektor, Sektor Betlehem, Sektor Filipi, Sektor Galilea, Sektor Hermon, Sektor Kana, Sektor Korinti, Sektor Roma, Sektor Yerusalem, Uncategorized 0

PERSEMBAHEN SI MEHULINA

(KEJADIAN 4:3-7, IBRANI 11:4)

Kai bedana persembahen Kain ras Abil? Pustaka si Badia ngataken, Kain mempersembahken sada bagin ulih jumana. La kita jumpa keterangen tambahen kerna persembahen enda. Abil pe erbahan persembahen man Tuhan. Ijenda lit keterangen tambahen kerna persembahenna. Ipersembahkenna anak biri-biri si pemena tubuh. Anak biri-biri si pemena enda enggo nuduhken simehulina. Kedungenna kenca enggo enggo i ban Tuhan undang-undang ersembah man Tuhan man asakai sintua kerina sikerangen Tuhan (Keluaren 13:2). La terjeng bage si ilakoken Abil. Ibas anak biri-biri simehulina si ipersembahkenna. Emaka ngenan ate Tuhan man Abil ras persembahenna. Persembahen Kain la ialoken Dibata.

Penulis Heber ngataken, “ Erkiteken kiniteken Abil man Dibata maka ipersembahkenna man Dibata persembahan si ulin asangken persembahen Kain. Perbahan ia tek, dat pujin ia ibas Dibata nari maka ia kalak bujur, sabab ialoken Dibata persembahenna. “Arah enda banci si idah pelajaren maka “kalak si mere lenga tentu erkeleng ate. Kalak si erkeleng ate enggo tentu nggit ras meriah akapna mere. Kalak si mere persembahen lenga tentu erkiniteken tapi kalak si erkiniteken tentu mere persembahen.” Janah persembahen kalak si erkiniteken la menggo. La mekarus. Si mehulina bagi persembahen si Abil.

Teptep tahun silakoken me Kerja Rani. Megati nungkun perpulungen, kai bedana Kerja Rani ras Perpuluhen. Sada dampar si mbedaken Kerja Rani ras Perpuluhen eme jiwana(roh entah semangatna). Persepuluhen jiwana (roh entah semangatna) eme tanggung jawabta nandangi kerina biaya pelayanen gerejanta. Kerja Rani jiwana (roh entah semangatna) eme pengataken bujur man Tuhan ibas kita nggejapken pemerena arah ulih pendahinta sekalak-sekalak. Janah ibas minggu-minggu enda bakal si lakoken Kerja Rani ibas gerejanta. Entah pe sue ras waktu si enggo i tetapken runggunta. Ibas kita mereken ulih kerja rani siberekenlah simehulina man Dibata.

Ibas gerejanta genduari i samping persembahenta teptep minggu,persepuluhen ras kerja rani me si nampati kerina biaya pelayanen gerejanta. Janah piga-piga paksa pepudi enda enggo reh mbarna perdalinen kerja rani ibas runggun-runggun gerejanta. Enggo reh lalana runggun erbahan pesta ras lelang-lelang ibas mpepulung ulih kerja raninta. Enda sada si menarik erkiteken enggo iban suasana bagi kerjata kalak karo. Subuk arah paken, luah perpulungen, man ras-ras, kerina encidahken keriahen ukur. Ulihna ras penggunaana pe tentu sipakeken erpalasken kiniteken man Dibata ras aturen gerejanta. Malah lit klasis ibas gerejanta, ulih kerja rani enda me nutupi kekurangen biaya pelayanenna. Tentu meriah ukur Dibata natapsa adi kerina kita muat bagin erpalasken kiniteken ras pemere Dibata man banta sekalak-sekalak.

Evaluasi:

Uga kerna aksita minggu si lewar, terdalanken kita nge?

Diskusi:

  1. Kai si akap pertimbangen si utama ibas Dibata ngaloken entah lang persembahenta?

  2. Kai banci tole si ban i bas runggunta gelah reh teridahna ketulusen ateta ngendesken Kerja Raninta man Dibata?

Aksi:

Banlah persiapan kerja raninta simehulina subuk kebaktinna bage pe perayanna.

Usulen Lagu:

  1. KEE GBKP NO: 263:1-2

  2. KEE GBKP NO: 408:1-3

  3. KEE GBKP NO: 395:1-2

  4. KEE GBKP NO: 381:1-2

Topik Pertoton Syafaat

  1. Kerna pelaksanaan Kerja Ranj ibas Runggunta

  2. Kerna Pendahin ngawan perpulungen gelah i pasu-pasu Tuhan

  3. Si turah ibas perpulungen

Pdt. Yunus Bangun, M.Th

Post Views: 258