MOMOKENLAH KINIULIN DIBATA
(HUT SAITUN)
(MASMUR 52:10-11)
Enggo iban gelar Kategorial Lansia genduari eme Saitun. Saitun eme jenia batang kayu si meherga ras penting man kalak Jahudi ras Palestina, seh asa genduari. Adi lit kalak ku Jerusalem paksa genduari, salah sada luahna biasana eme minak Saitun. Kesempaten enda pe sipake tole petandaken gelar Saitun, e gelah banci ras-ras kita ngergai Kategori Saitun si erulang tahun bulan enda.
Kai kin kiniergan ras pentingna Batang Saitun ibas kalak Jahudi? Batang Saitun banci kataken la mate-mate, sebab adi itabah pe ia reh tunasna si mbaru. Erdandanken sie maka ipake jadi gambaren pasu-pasu orangtua ku sinusurna (Mazmur 28:3). Gambaren enda pe si ituriken ibas ayat 10 “Tetap meratah bulungna si Turah Rumah Dibata.” Rumah Dibata maksudna eme rumah Pertoton. Janah asa genduari lit Rumah Pertoton i Israel sibpelihara gereja Katolik, si nerusken tradisi enda. Adi kita kuje maka si idah batang Saitun ndai si la pernah mate janah bulungna tetap meratah. Enda maksudna nuriken kerna kegeluhen pertendin. Maka kalak si ernalem man Keleng Ate Tuhan, ia ras sinusurna tetap ndatken pasu-pasu Tuhan. Pasu-pasu Tuhan ijenda eme kegeluhen si mehuli, kegeluhen si ernalem ate.
Janari kenca metua batang Saitun ndai ibuat me minakna. Minak Saitun melala kal gunana, eme jadi tambar. Seh asa genduari kalak Jahudi jarang kena kolesterol sebab ia make minak enda. Ibas ia nggoreng ikan tah daging pe ipakena minak Saitun. Janah kerina tambar i Israel menam bahanna salah sada eme minak Saitun (Lukas 10:34). Erdandanken sie maka penting ras erguna kal minak Saitun ibas kalak Jahudi. Minak Saitun pe ipake jadi minak penerang ibas Kemah Si Badia (Keluaren 27:20). Emaka terang Kemah Si Badia si jadi ingan perjumpan Musa ras Dibata ibas perdalanen Mesir nari ku Kanan.
Bage me gamabaren kalak si ernalem man keleng ate Tuhan si tetap. Ia mehaga erkiteken segedang geluhna ernalem ia man Tuhan. Kinihaganna labo ibas buena ertana tapi ibas penalemenna si tetap man Dibata. Erdandanken sie maka lit pengalamenna nggeluh ras Tuhan. Pengalamen geluh enda me simomokenna man kerina perpulungen. Ersaksi ia kerna penemani Tuhan segedang kegeluhenna. Jenari kerina sinusurna pe mehamat man banna sebab jadi usihen kal ibas ia rukur, ngerana ras perbahanenna. Ibas kesusahen rntaj kepiceten rukur kata-kata ras pengeranana jadi tambar. Ibas perukuren sigelap kehadiren Saitun jadi terang si erbahanca erlayas perukuren.
Bage me ibas kuta bulan enda mperingeti ulang tahun Saitun itengah-tengah gerejanta. Saitun eme kemegahanta ras-ras. Ia banci jadi Saitun e pe nggo meriah siakap. Terakap kal kehadiren Saitun subuk ibas jabu bege pe ibas gerejanta. Erdandanken sie maka tetap totota ras pengarapenta kerina orangtuanta enda banci bagi gelarna Saitub. Jadi ulu pasu-pasu man kerina sinursur, jadi tambar ibas pengerana ras perbahanenna, jadi terang simaba ukur erlayas ibas ukur picet dingen serbut.
Man banta anak ras kerina kempu radu ras perpulungen gelah tetapka siperdiateken orangtuanta. Uga maka ia pe tetap semangat ibas dalani kegeluhenna amin gia daging enggo reh tuana. La ia kulcipen anem mata enggo reh selengna, pemegi enggo reh kurangna. La ia mekut-kut anem gia lit si si la bagi ukurna. Tapi, tetap ukut ras pusuhna nepet ku Dibata. La ia surut pengarapen ras kinitekenna tetap gara. Tetap ia ermomo ras erberita. Enda me Saitun GBKP Si Malem enda. Selamat Ulang Tahun Saitun, tetap ernalem kam man Dibata.
EVALUASI
Uga kerna aksi PJJ nta si lewat?
DISKUSI
-
Lit nge siakap reh tambahna kehadiren orangtuanta Zaitun ibas kerina kegiatan ibas perubahen gelarna ku Saitun?
-
Kai nge banci siban gelah malem ate orangtuata Saitun ibas wari-wari kegeluhenna
AKSI
Bahanlah sada aksi ibas Ulang Tahun orangtuata Saitun si mbaba keriahen ras kemalemen atena nggeluh. Banci secara pribadi entah pe radu ras kategorial tah perpulungen. Mehuli la padah icakapken i lebe-lebena.
USULEN LAGU
-
KEE GBKP NO: 205:1-2
-
KEE GBKP NO: 296:1-3
-
KEE GBKP NO: 285:1-2
-
KEE GBKP NO: 282:1-3
TOPIK DOA SYAFAAT
-
Notoken kerina Saitun bagepe Pengurus Saitun ibas kerina wilayah GBKP
-
Notoken anak melumang ras jabu si la kuh ibas wilayah pelayanen GBKP
-
Siturah ibas perpulungen.
Pdt. Yunus Bangun, M.Th