Anak Dibata Nggo Nusur Ku Doni
( Lukas 2 : 8 – 14 )
Gembala-gembala
2:8 Di daerah itu ada gembala-gembala yang tinggal di padang menjaga kawanan ternak mereka pada waktu malam.
2:9 Tiba-tiba berdirilah seorang malaikat Tuhan di dekat mereka dan kemuliaan Tuhan bersinar meliputi mereka dan mereka sangat ketakutan.
2:10 Lalu kata malaikat itu kepada mereka: “Jangan takut, sebab sesungguhnya aku memberitakan kepadamu kesukaan besar untuk seluruh bangsa:
2:11 Hari ini telah lahir bagimu Juruselamat, yaitu Kristus, Tuhan, di kota Daud.
2:12 Dan inilah tandanya bagimu: Kamu akan menjumpai seorang bayi dibungkus dengan lampin dan terbaring di dalam palungan.”
2:13 Dan tiba-tiba tampaklah bersama-sama dengan malaikat itu sejumlah besar bala tentara sorga yang memuji Allah, katanya:
2:14 “Kemuliaan bagi Allah di tempat yang mahatinggi dan damai sejahtera di bumi di antara manusia yang berkenan kepada-Nya.”
Ibas Padan Si Ndekah biasana Malekat Tuhan encidahken bana man kalak si terpilih e me nabi-nabi, sada-sadai. Tapi sekali enda sanga ketubuhen Tuhan Jesus, malekat Tuhan encidahken bana man sada kelompok permakan si sederhana ras musil. Permakanpermakan enda sangana njaga biri-birina ibas berngi i tengah mbalmbal. Permakan-permakan enda me sipemenana singaloken berita ketubuhen Tuhan Jesus langsung ibas malekat Tuhan nari. Ibas masyarakat Jahudi ibas paksa enda, status permakan ianggap si “paling rendah”. Menurut kalak Parisi, permakan ianggap sebage pinangko ras penipu, kalak kasar si la nandai Undang-Undang. Permakan labo ianggap sah jadi saksi ibas pengadilen. Tapi man permakan si meteruk enda si sangana njaga biri-birina i mbal-mbal me ketubuhen Jesus Kristus iberitaken Tuhan. Ibabo mbal-mbal si si enda ka me nai Daud mpermakani biri-biri bapana, bagepe iteruh bintang-bintang si seri ka me malekat-malekat Tuhan ibas berngi e reh man permakan-permakan.
“Rempat tedis sekalak malekat Tuhan ilebe-lebe permakan ndai, janah terang si rehna i bas Tuhan nari ersinalsal ku sekelewetna. Mbiarkal permakan-permakan e.” Terang e la saja nerangi malekat si reh e, tapi nerangi kerina permakan-permakan e. Berngi si gelap e berubah jadi terang bagi suari. Emaka reaksi si pemena ibas permakan nari e me “mbiar”. Tapi terang ras malekat e reh ibas tujun “bersahabat”, labo gelah permakan-permakan e mbiar. Emaka malekat e ngerana man bana: “Ola mbiar, sabab aku maba Berita Si Meriah, si mereken keriahen si mbelin man kerina manusia”. Malekat Tuhan e reh labo ngadili ras mereken ukumen, tapi erberita kerna keriahen man kerina manusia. La perlu mbiar. Inti Padan Si Mbaru ibas Jesus Kristus e me kap “keriahen si mbelin”. Man kerina manusia ertina maka Jesus Kristus si tubuh e bersifat universal, IA man bangsa tertentu saja (Israel) Ia reh, tapi man kerina manusia apai pe la erndobah. Keriahen si mbelin e enggo igenepi: “Sendah i Kuta Daud enggo tubuh Juruselamat man bandu, e me Kristus Tuhan”. Juruselamat si enggo kin lit ope doni enda itepaNa, reh ku doni si bersifat “ruang dan waktu”, si ermasap-masap enda. “Sendah” ertina maka ketubuhen Jesus Kristus e lit ibas sejarah doni enda. Jesus Kristus tubuh ku bas sejarah doni si ermasap-masap, amin pe IA abadi sifatna. Juruselamat e reh la mungkin ibas doni nari sebab doni enda tinepa si lit ujungna. Juruselamat e reh ibas Surga sibersifat “abadi” nari. Kristus Tuhan si tubuh e, ertina “si iminaki” (cakap Ibrani: Messias) si reh ibas Tuhan nari. Messias si nai nari itima-timai kalak Yahudi e, enggo reh (tubuh) i Kuta Daud. Secara manusia Jesus e me kesusuren Daud janah tubuh i kutaNa jine, sabab Ia situbuh e Raja kap. KetubuhenNa i Kuta Daud enggo pe nggenepi nubuat nabinabi (Miha 5:2 “O Betlehem i Eprata, aminna i Juda kam kuta si kitikna, tapi i bas kam nari Kupekeke sekalak si ngerajai Israel, si asalna i bas adi-adi nari, i bas paksa si nuria nari”).
Iterusken malekat e: “Si jadi tanda kari man bandu e me: idapetindu kari anak-anak ibaluti alu uis, medem i bas pelangkah”. Kune (bicara la min ndai) malaikat Tuhan si reh alu terang Surga erberita kerna ketubuhen Juruselamat e, entah labo min ndai banci tek permakan-permakan e. Sabab inganNa tubuh pe ingan si paling sederhana, kandang asuhen. Ibaluti alu uis medem ibas pelangkah. Manusia si musilna pe i doni enda labo tubuh i kandang asuhen janah medem ibas pelangkah (ingan pangan asuh-asuhen). Tapi perban malekat Tuhan rikut ras terangNa siersinalsal ngatakenca, mis tek permakan-permakan e. “Kontras” kal antara si erberita reh alu kemulian ras si man beritanken si tubuh i kandang asuhen ras medem i bas pelangkah.
Kenca bage : Rempet teridah nterem malekat Surga tedis ras malekat si ndai dingen rende muji Dibata.. La sada malaikat si sekalak ndai ngenca erberita, tapi reh tole nterem alu rende. Berita Natal pertama e iberitaken nterem malekat alu ende-enden pujin man Dibata. Permakan singaloken berita ras megiken ende-enden enda jadi tuhu-tuhu tek. Peristiwa i mbal-mbal Efrata e me Natal sipemena. Kotbah si pemena kerna Berita Ketubuhen Juruselamat langsung malekat Tuhan mberitakenca, bagepe iumputi alu Endeenden Natal sipemena si iendeken enterem malekat. Simegi-megi sipemena e me permakan. Permakan si ipeteruk manusia ipehaga Tuhan sebage kalak sipemena ngaloken Berita Keselamaten e. Kai isi lagu Natal pemena si iendeken malaikat-malaikat e? “Terpujilah Dibata i bas Surga si meganjangna. Janah dame i doni man manusia si ngena ateNa”. Arah ketubuhen Tuhan Jesus, Tuhan sini Surga si Mulia ibukaken man manusia. Kerna si e patut Tuhan ipuji. Arah ketubuhen Tuhan Jesus enggo reh dame e (Jesus sendiri kap dame e) ku doni enda, sindameken manusia si perdosa ras Dibata. Jesus Kristus e me Raja Dame kap. Man manusia si ngena ateNa, ertina Raja Dame e enggo reh man manusia si perdosa erkiteken keleng ateNa. KerehenNa “inisiatif Tuhan” jine erpalasken kekelengenNa. Labo perban kiniulin manusia maka ngena ateNa, tap perban keleng ateNa nandangi tinepaNa jine. La ngasup tinepaNa manusia nelamatken dirina, emaka iberekenNa Juruselamat gelah arah Jesus Kristus kita kerina banci iselamatken.
Kotbah (Berita Keriahen si Mbelin) Natal bagepe Endeenden Natal sipemena si isehken malaikat-malaikat i mbal-mbal Efrata nai, terus ikotbahken ras iendeken tiap tahun enggo lebih 2000 tahun dekahna. Enda ilakoken gerejaNa terus-menerus seh pagi Tuhan Jesus reh pedua kaliken. Lanai ndekah, tahun enda pe sirayaken ka me Natal ibas perpulungenta, Runggunta, bagepe irayaken kerina kalak si tek i babo doni enda. Raja Dame enggo reh ku tengah-tengahta guna mperdameken kita si perdosa enda ras Dibata si mulia. Tentu erkiteken si e kita pe rutang erbahan perdamen ras temanta manusia, ras temanta entah kade-kadeta si sangana la sitabehen ras kita. Dame Natal min engkuasai pusuh ras ukurta ibas ngalo-ngalo Natal ibas tahun enda pe
EVALUASI :
Uga kerna aksi PJJ si lewat ?
DISKUSI :
- Kai ertina ende-enden malekat: “Dame i doni man manusia si ngena ateNa”?
- Engkai maka megati mesera siakap erdame ras temanta? Kai si jadi penghambat ibas dirinta ibas muat inisiatif guna erdame? Kai banci sibahan lako naluken penghambat enda, gengsi umpamana?
AKSI :
Arih-arih ibas jabu bage pe PJJ, kai si payo silakoken sebage persiapen Natal tahun 2017 enda.
USULEN LAGU :
| 1. | KEE GBKP NO: 140: 1 , 3 |
| 2. | KEE GBKP NO: 136: 1 , 2 |
| 3. | KEE GBKP NO: 136: 3 |
| 4. | KEE GBKP NO: 212: 1 , 5 |
TOPIK PERTOTON SYAFAAT :
- Gelah warga GBKP erdame ras ise pe bas kegeluhenna.
- Persikapen Natal ibas kerina wilayah pelayanen GBKP erdalan alu mehuli.
- Siturah ibas perpulungen.