Kemalemen Ate Orangtua
( Masmur 37 : 23 – 26 )
37:23 TUHAN menetapkan langkah-langkah orang yang hidupnya berkenan kepada-Nya;
37:24 apabila ia jatuh, tidaklah sampai tergeletak, sebab TUHAN menopang tangannya.
37:25 Dahulu aku muda, sekarang telah menjadi tua, tetapi tidak pernah kulihat orang benar ditinggalkan, atau anak cucunya meminta-minta roti;
37:26 tiap hari ia menaruh belas kasihan dan memberi pinjaman, dan anak cucunya menjadi berkat.
Sada artikel menarik kerna 10 tips/ cara ndampingi orangtua lanjut usia, emekap:
1. Mabai orangtua tetap paguh erkiniteken (ertoto, ku gereja).
2. Ertukar peran. Nginget maka nai waktu kita kitik denga, orang tuanta alu saber tetap ngarak-ngarak kita. Emaka gundari masana kita si ngarak-ngarak orang tua alu saber ibas ia ndalani masa tuana.
3. Tulus iklas ngaloken kekurangenna.
Masa tua eme masa ije reh urakna pengenen mata, pembeginna, gegehna rikut kesabarenna pe. Ije me peran selaku anak la mesukah merawa tapi memaklumi ia sepenuhna dingen ngarak-ngaraksa ibas kerina situasi ras keadanna.
4. Ngerana dingen ngerawat alu lemah lembut.
5. Ndampingi ia olahraga (senam).
6. Nikapken pangan sehat sue ras kondisi ntah mungkin lit pe pantangen pinakitna.
7. Ndampingi ia ndalanken hobby, kai si iakapna meriah (ku taman, ku tiga).
8. Rutin mereksaken kesehatenna.
9. Erlajar kerna orangtua arah buku, internet.
10. Rusur melasken kata “keleng ateku (kami) kam….” Erbanca malem atena.
Ibas ndampingi orang tua lansia (lanjut usia) mbue nge tantangenna. Kerna orang tua dem alu pengalamen nggeluh (kebiasaan si ilakokenna) mekatep ia la ngaloken kai kata anakanak ras kempuna. Tempa-tempa e jadi hal si mbaru iakapna guna idalanken. Orang tua eme sekalak si nggelem prinsip teguh itengah-tengah kekoten daging kulana.
Oratenta Masmur Daud enda nuriken kerna pengalamen kegeluhenna ras Tuhan. Eme kalak si tetap ngandalkan Tuhan, erpengendes dingen erpengarapen kempak Tuhan. Umur si terus ertambah eme tanda keleng ate Tuhan. Nandakenca maka reh tuana sekalak orang tua ijadiken Dibata ia usihen man anak kempuna. Pengalamen pemasmur maka pernah nge ia “guling” iderpa perbeben geluh, tapi Dibata ka nge si “mpetedissa” ulihi, enda me pengalamenna nggeluh maka ku Dibata saja ia erpengendes. Ietehna, iingetna dingen igejapkenna mulai kitikkitikna nari seh gundari enggo metua maka ia la itadingken Tuhan janah igejapkenna maka pengarak-ngarak, pasu-pasu Tuhan seh ku anak-anak ras kempuna. Bage me pe pengalamen nggeluh orang tua lansia, maka banci jadi rusur nge ia kote iderpa perbeben nggeluh, tapi tetap nge isampati Dibata ia. La ipediatna ia kote dingen putus asa. Tentu enda jadi gelemenna ndalani kegeluhen alu tetap ukur. Kinitekenna paguh ibahan pengalamen kegeluhenna ras Dibata. Janah enda me si iturikenna man anakanak ras kempuna gelah kerina paguh erkiniteken man Dibata, eme sura-surana. Adi bage “uga carana anak ras kempuna erbanca malem ate orang tua si enggo lansia enda?”
Pengalamen Lansia si tutus erkiniteken man Tuhan:
“Jabu anak-anakna dame (ergan asa erta dingen duit si melala) bagepe kiniteken anak-anakna tutus ka min ku gereja, ku Perpulungen Jabu-jabu. Bagepe kempu-kempuna pe jadi kalak si tutus erkiniteken. Mejingkat ku PA Remaja, PA Permata”. Enda kemalemen ate man orang tua si enggo lansia. Labo terjeng pemere nakan, gulen, roti, sen, gawah-gawah ras sidebanna .
Kemalemen ate orang tua ibahan anak-anakna:
Ibas adat (budaya Karo), maka lit nge tradisi mereken ciken, tuk-tuk bagepe nambari uis. Enda situhuna tanda anak-anak nehken kehamaten man orang tua. Biasana umur orang tua e 60 tahun ku das, anakna pe enggo buen erjabu. Ersada me arih naka-anakna guna nehken kehamaten man orang tuana, biasana alu mpepulung anak beru lako ncakapken dingen nikapken kai si perlu. Adi ngasup anak-anak e ipepulungna kerina kade-kade tapi adi lang cukup sangkep nggeluh ras perpulungen saja.
Kegeluhen orang tuanta Lansia bas gereja bagepe bas masyarakat terus itingkatken perhatinna. Ibas gerejanta GBKP alu njadiken Lansia sada kategorial, maka tole banci ibereken perhatin khusus man bana janah erbanca orang tua Lansia kreatif ibas masa tuana. Secara masyarakat ibahan me perayaan HUT (Hari Ulang Tahun) Lansia internasional ibas tanggal 1 Oktober teptep tahunna.
Emaka mari tetap sibereken perhatin man orang tuanta si enggo Lansia
EVALUASI :
Uga kerna aksi PJJ silewat ?
DISKUSI :
1. Turiken uga pengalamen Daud ibas ndalani kegeluhenna alu tetap erpengendes man Dibata?
2. Uga pengalamenta ibas ngarak-ngarak orangtua Lansia? ( ndauh entah ndeher ras kita orang tuanta e entah pe si tading ras orang tua Lansia).
3. Kai dage enggo si ban ras terus si ban man orang tuanta Lansia secara kiniteken ?
USULEN LAGU :
1. KEE GBKP NO : 181: 1-2
2. KEE GBKP NO : 443: 1-3
3. KEE GBKP NO : 316: 1-3
4. KEE GBKP NO : 368: 1-3
5. KEE GBKP 212: 1, 4, 5
TOPIK PERTOTON SYAFAAT :
1. Gelah orangtua Lansia sehat-sehat dingen reh paguhna erkiniteken man Tuhan.
2. Gelahna kerina anak-anak ras kempu mabai kemalemen ate man orangtua si Lansia ibas pengerana, perbahanen/ sikapna.
3. Siturah ibas perpulungen.
Pdt. Kristiani Br Tarigan, M.Th