Ulih Judi Eme Kemusilen
( I Timotius 6 : 7 – 10 )
6:7 Sebab kita tidak membawa sesuatu apa ke dalam dunia dan kitapun tidak dapat membawa apa-apa ke luar.
6:8 Asal ada makanan dan pakaian, cukuplah.
6:9 Tetapi mereka yang ingin kaya terjatuh ke dalam pencobaan, ke dalam jerat dan ke dalam berbagai-bagai nafsu yang hampa dan yang mencelakakan, yang menenggelamkan manusia ke dalam keruntuhan dan kebinasaan.
6:10 Karena akar segala kejahatan ialah cinta uang. Sebab oleh memburu uanglah beberapa orang telah menyimpang dari iman dan menyiksa dirinya dengan berbagai-bagai duka.
Alu kata gendek, Judi banci iertiken eme “upaya untuk mempertaruhkan uang dalam usaha untuk melipatgandakan uang untuk sesuatu yang kemungkinannya kecil”. Arah pengertin enda maka judi fokusna eme guna “mencintai uang” bagepe “menggoda” sekalak jelma gelah pedas jadi kalak bayak. Tapi situhuna “Ulih Judi Eme Kemusilen” eme tema bahan renungen Perpulungen Jabu-Jabunta sekali enda alu tujun gelah ngasup kita ngelawan praktek perjudin bas kegeluhenta janah tetap sidalanken kegeluhen si ngena ate Dibata.
Timotius eme kalak Kristen singuda denga, asalna i Asia kitik nari, nandena kalak Jahudi, gelarna Eunike, ras bapana kalak Junani. Timotius jadi teman ras si nampati pelayanen Rasul Paulus ibas mpebelangken Berita Si Meriah. Selaku teman sada dahin, ipersingeti Paulus Timotius arah suratna kerna piga – piga hal: Si pemena eme kerna pertenget nandangi pengajaren si papak ibas perpulungen. Sebab lit Pengajaren si erpalas kubas perukuren kalak Jahudi ras lit pengajaren si erpalas kubas perukuren kalak si labo Jahudi.
Sipeduaken eme keterangen uga ngaturken kiniraturen ibas perpulungen ibas kebaktin, rikut ras sarat-sarat si arus lit ibas pemimpin perpulungen bagepe kalak si nampati ibas perpulungen, sipeteluken eme mereken kata persinget man Timotius uga arusna jadi persuruhen Kristus si mehuli ras kerna tanggungjawabna nandangi erbage-bage golongen kalak si tek.
Sebage pemimpin perpulungen persuruhen Kristus, ipersingeti Paulus Timotius gelah metenget kerna pengajaren si la tuhu ras kinibayaken si tuhu-tuhu rikutken bahan renungenta sekali enda. Ayat 10, “sebab merangap nandangi duit eme sumber kerina kejahaten”. Enggo lit piga-piga kalak si merangap nandangi duit, lanai tetap i bas kiniteken janah gulut ukurna ibahan erbage-bage kecedaan ate. Ituriken Rasul Paulus ka maka kalak si ersura-sura bayak ndabuh me ku bas percuban janah bene me ibahan erbagebage sura-sura si bodoh dingen jahat, si erbahanca kalak gelap dingen kernep (ayat 9). Labo sibaba kai pe bas doni enda nari bagepe labo si baba kai pe ndarat i doni enda nari (ayat 7,8). Antusenna arah penuriken Rasul Paulus enda eme, gelah ula lit biak merangap i bas dirinta janah tetap min kita ngataken bujur ibas kai si lit bas kegeluhenta kita. Selaku kalak Kristen arus situlak praktek perjudin bas kegeluhenta si mpeturah biak merangap nandangi duit. Sebab merangap nandangi duit banci erbahan kita ndabuh kubas percuban ras bene ibahan erbage-bage sura-sura si bodoh dingen jahat, si erbahanca kita gedap dingen kernep. Si tolak ras sihindarilah kerina bentuk ras jenis perjudin ibas kegeluhenta. Termasuk perjudin si ialoken ibas kegiaten Gerejawi umpama i Retreat, Kebaktian Lapangen ras sidebanna. Tetaplah kita nggeluh bagi si isura – suraken Dibata.
EVALUASI :
Uga kerna aksinta ibas PJJ silewat ?
DISKUSI :
1. Kai nge maksudna merangap nandangi diut eme ulu kerina kejahaten ikaitken ras perjudin ? Turikenlah !
2. Selaku kalak Kristen, kai nge tetap si lakoken gelah ngasup nulak kerina jenis perjudin ibas kegeluhennta? Turiken!
USULEN LAGU :
1. KEE GBKP NO : 323 : 1, 2
2. KEE GBKP NO : 323 : 3
3. KEE GBKP NO : 302 : 1, 2
4. KEE GBKP NO : 281 : 1, 2
AKSI :
Sada minggu enda silakoken praktek kegeluhen si labo merugiken kalak sideban.
TOPIK PERTOTON SYAFAAT :
1. Notoken gelah ngawan ni perpulungen bagepe serayan GBKP ibas kerina wilayah pelayanen nulak kerina bentuk ras jenis perjudin bas kutana.
2. Notoken gelah ngawan ni perpulungen bagepe serayan GBKP labo merangap nandangi duit bas kegeluhenta si tep-tep wari.
3. Notoken gelah ngawan ni perpulungen bagepe serayan GBKP nggeluh ibas kecukupen si ibereken Dibata man bana.
4. Si turah ibas perpulungen.
Pdt. Prananta Jaya Manik, S.Th MM