Persadaan Si Mpeturah Kemalemen Ate
(Perbahanen Rasul-Rasul 2 : 43 – 47)
2:43 Maka ketakutanlah mereka semua, sedang rasul-rasul itu mengadakan banyak mujizat dan tanda.
2:44 Dan semua orang yang telah menjadi percaya tetap bersatu, dan segala kepunyaan mereka adalah kepunyaan bersama,
2:45 dan selalu ada dari mereka yang menjual harta miliknya, lalu membagi-bagikannya kepada semua orang sesuai dengan keperluan masing-masing.
2:46 Dengan bertekun dan dengan sehati mereka berkumpul tiap-tiap hari dalam Bait Allah. Mereka memecahkan roti di rumah masing-masing secara bergilir dan makan bersama-sama dengan gembira dan dengan tulus hati,
2:47 sambil memuji Allah. Dan mereka disukai semua orang. Dan tiap-tiap hari Tuhan menambah jumlah mereka dengan orang yang diselamatkan.
Persadan i tengah-tengah kalak si tek man Jesus i bas perpulungen si pemena (gereja mula-mula) tuhu-tuhu mpeturah kemalemen ate. Kemalemen ate e teridah arah:
•Melala tanda-tanda sengget ras kejadin-kejadin si mejin ibahan rasul-rasul. Kiningasupen si lit i bas rasul-rasul rehna i bas Kesah Si Badia nari. Tanda-tanda sengget ras perbahanen si mejin e bali pe ras si enggo perneh ilakoken Jesus (mpepalem kalak sakit, mpelawes setan, ras sedebanna). Arah kejadin si e maka kerina kalak erkemalangen man Dibata.
• Kerina kalak si enggo tek man Jesus e tetap pulung ras-ras janah kai si lit i bas ia ipakena ras-ras. Kegeluhen perpulungen si pemena enda la lit biakna nggeluh erbanabana, tapi tangkas teridah kiniersadaan i bas kecibal si kugapana pe. Kinilitenna i pakekenna ras-ras. Idayakenna taneh ras erta-ertana janah duitna ibagi-bagikenna sue ras keperlun sekalak-sekalak. Ras-ras ia kerina man i bas rumahna alu meriah dingen ukur meteruk. Persadan perpulungen lit i bas susah ras senang. Kerina anggota perpulungen muat bagin, labo lit si jadi penonton tapi kerina jadi pemain. Kerina daten bagin ngelai ras ielai, mere ras ibere.
•Alu ersada ukur tep-tep wari ia pulung i bas Rumah Pertoton. Teridah ketutusen i bas ertoto, muji Dibata ras ngaloken pengajaren i bas rasul-rasul nari kerna Kata Dibata i bas Rumah Pertoton.
•Si jadi ulih kecibal perpulungen enda eme kerina kalak erngena ate man perpulungen e. Tep-tep wari itambahi Tuhan ku perpulungen e kalak si iselamatkenNa.
Persadaan perpulungen si pemena enda tuhu-tuhu i bas kerina dampar geluhna encidahken kekelengen si la ertak-tak, la ersyarat ras kai-kai saja pe si ilakokenna e me guna kiniulin perpulungen. Lit anggota perpulungen e si lebih i bas ia, tapi la ibelinkenna. Lit anggota perpulungen si kurang i bas ia, tapi la imorahi. Kelebihen e iraskenna ras kekurangen si lit iraskenna lako nutupisa.
GBKP eme persadan warga gereja si niarapken mpeturah kemalemen ate nandangi kerina anggota ngawan ni perpulungen bagepe maba kejuah-juahen man doni enda. GBKP nggo netapken sistem i bas ngaturken dahin-dahin gereja eme sistem presbiterial sinodal. I bas sistem enda teridah :
• La lit si ganjang teruken subuk i bas serayan (Pandita, Pertua ras Diaken) bagepe ngawan ni perpulungen. Kerina serayan bagepe anggota ngawan si ikut muat bagin i bas dahin-dahin pelayanen gereja irakut i bas kiniersadaan si la terpesirang (kolektif-kolegial).
•I bas tep-tep wilayah (Perminggun, Perpulungen, Runggun, Klasis ras Sinode) i pilih serayan si ngaturken dahin-dahin gereja. I bas ndahiken dahin-dahin gereja erpalas ku bas kai-kai saja si enggo jadi keputusen i bas sidang Sinode, Klasis ras Runggun.
•Kai-kai saja pe si lenga semal i lakoken i bas GBKP, adi lit sura-sura segelah ilakoken maka kerina arus i cakapken ras iputusken i bas sidang.
•GBKP alu sistem presbiterial sinodal iarapken maka semangat anggota ngawan ni perpulungen desken perpulungen si pemena (Perbahanen Rasul-Rasul 2:43-47). Tep-tep ngawan ni perpulungen sepengodak, sepengole, sepenggejapen, sikeleng-kelengen, sisampat-sampaten ras ndauh i bas perukuren erbana-bana. I tengah-tengah gereja, kerina persadaan Kategorial (Lansia. Mamre, Moria, Permata ras KAKR), runggun-runggun si lit (si mbelin ntah si kitik, i kuta ntah i kota) ersada i bas ndahiken dahin-dahin gereja. Alu kiniersadan sinodal teridah maka dikune lit persoalen/ perbeben si mberat i bas sada perminggun / perpulungen/ runggun adi irasken maka menahang kedungenna. Bage pe i bas kerina unit-unit GBKP teridah desken sada aron i bas ndahiken dahin-dahin gereja. Kerina muat bagin, la mpejang-jang program unitna/seksina saja.
•Persadan GBKP alu sistem prebiterial sinodal enda iarapken segelah jadi persadan si mpeturah kemalemen ate.
Kai si teridah i bas orat nggeluh perpulungen si pemena bagepe i bas sistem presbiterial sinodal GBKP, i bas orat nggeluh kalak Karo pe nai-nai nari nggo lit kiniersadan i bas ndungi sadasada dahin si la erkedungen. Kalak Karo nai-nai nari semal kel ngelakoken ‘ngeripe’. Ngeripe eme salah sada bukti ate keleng i bas sangkep nggeluh kalak Karo, dikune lit keluarga i bas sangkep nggeluh ndatken kiniseran (khususna kerna perduiten) maka sangkep nggeluh alu ngeripe/ibagiken guna i rasken nebusi utang/pengkeri-kerin e. Tentuna kesemalen enda pe banci jadi kebayaken nandangi gereja lako mpeturah semangat ngawan ni perpulungen segelah persadanta i bas GBKP enda mpeturah kemalemen ate.
EVALUASI :
Uga aksinta ibas Minggu silewat ?
DISKUSI :
1. Kai-kai saja si erbahanca maka kerina kalak erngena ate man perpulungen si pemena (Perbahanen Rasul-Rasul 2:43-47) ?
2. Kai-kai saja iakapndu si perlu silakoken i bas PJJ sektor/perpulungenta maka persadanta mpeturah kemalemen ate?
AKSI :
Arihken i bas sektorta guna nehken penampat nandangi anggota sektorta (adi lit) ntah pe kalak si deban si i bas paksa enda lit i bas kiniseran.
USULEN LAGU :
1. KEE GBKP NO: 209: 1 ,3, 4
2. KEE GBKP NO: 281:1-3
3. KEE GBKP NO: 396:1,2
4. KEE GBKP NO: 256:1,4
TOPIK PERTOTON SYAFAAT :
1. Segelah kerina serayan (Pandita, Pertua ras Diaken) ras anggota ngawan ni perpulungen si nggo muat bagin ibas Moderamen, Klasis, Runggun, Perpulungen, Perminggun, PJJ Sektor, Pengurus Kategorial, seksi ras unit ibas GBKP ersada ibas ndahiken dahin-dahin gereja alu kolektifkolegial.
2. Reh ngasupna GBKP ibas persadanna mpeturah kemalemen ate nandangi ngawan ni perpulungen bagepe kalak si deban.
3. Si turah i bas perpulungen.
Pdt. DR Kalvinisius Jawak