Enggo Kuangka Perbahanen Dibata Arah Sekelewetku
( Masmur 66 : 1 – 9 )
66:1 Untuk pemimpin biduan. Nyanyian Mazmur. Bersorak-sorailah bagi Allah, hai seluruh bumi,
66:2 mazmurkanlah kemuliaan nama-Nya, muliakanlah Dia dengan puji-pujian!
66:3 Katakanlah kepada Allah: “Betapa dahsyatnya segala pekerjaan-Mu; oleh sebab kekuatan-Mu yang besar musuh-Mu tunduk menjilat kepada-Mu.
66:4 Seluruh bumi sujud menyembah kepada-Mu, dan bermazmur bagi-Mu, memazmurkan nama-Mu.”
66:5 Pergilah dan lihatlah pekerjaan-pekerjaan Allah; Ia dahsyat dalam perbuatan-Nya terhadap manusia:
66:6 Ia mengubah laut menjadi tanah kering, dan orang-orang itu berjalan kaki menyeberangi sungai. Oleh sebab itu kita bersukacita karena Dia,
66:7 yang memerintah dengan perkasa untuk selama-lamanya, yang mata-Nya mengawasi bangsa-bangsa. Pemberontak-pemberontak tidak dapat meninggikan diri.
66:8 Pujilah Allah kami, hai bangsa-bangsa, dan perdengarkanlah puji-pujian kepada-Nya!
66:9 Ia mempertahankan jiwa kami di dalam hidup dan tidak membiarkan kaki kami goyah.
Arah kai pe manusia banci erlajar ibas kegeluhenna, la terjeng ndatken pemeteh arah pendidiken si “formal”, tapi “non formal” pe banci manusia ndatken pemeteh terlebih arah sekelewetna. Subuk arah “makluk mati” bagepe “makluk hidup”, ijapa nari pe kita banci erlajar janah ngidah kuasa ras kemulian Tuhan. Sie me ngataken kita erteologi arah sekelwetta, erlajar kerna Dibata ras KuasaNa arah kai si lit isekelewetta. Umpamana kai si jadi arah deleng Sinabun, si seh ngasa genduari lalap la ngadi erupsi, ise pe la ngasup mprediksisa, la ngasup ngangkaisa, arah sie kita erlajar maka Dibatanta e la terjului kuasa ras kemulianNa, uga pe hebatna manusia, tetap lebih hebat Tuhanta. Labo terjeng ibas hal si mbelin ngenca manusia banci erlajar, ibas si kitik nari pe banci nge kita erlajar, erlajar arah perkis, “o pemalas, erlajar lah arah perkis”, engkai maka isuruh erlajar arah perkis ? Perkis si kitik tapi sihamaten pekepar, enggo isikapkenna panganna guna masa perudan ibas lubangna, gelah adi lanai banci ia ndarat, lanai ia kelihen, la isia-siakenna waktuna tapi ipakena waktuna guna masa depanna. Kai si jadi isekelewetta banci dalanta erlajar nandai kuasa ras kemulian Tuhan ibas kegeluhenta.
Masmur enda eme masmur puji-pujin ibas perpulungen nari nginget kerna perbahanen Dibata si mbelin i bas paksa si enggo lewat man Musa ras bangsaNa (Keluaren 34:10) Pendahin Tuhan mawen man kebiaren, mbisa ras patut man pujin sabab la pernah banci ilakoken manusia. Emaka nehenlah kuasa ras kemulian Tuhan si enggo pernah jadi, ibas sejarah keselamaten bangsa Israel menaken i taneh Mesir nari’ lawit pe banci jadi taneh kerah, bangsaNa ngepar ras pulah ibas perbudaken nari, lit pe sura-sura manusia meneken manusia la terjului kuasa Dibata, bangsa Israel menang ras ndatken taneh perjanjin. Ibas kemenangen e kerina manusia isuruh ersembah ras mpermuliaken gelar Tuhan. Bagi kai sienggo pernah iidah bangsa Israel nai ras genduari, pujilah Tuhan. Erkiteken Tuhan tetap hadir ibas kerina dampar kegeluhen manusia, maka patut kita mpermuliaken Tuhan ibas kegeluhenta, sabab eme ulu keriahenta. Janah Ia tetap erkuasa seh rasa lalap, la lit limit, batas kuasa Tuhan e ibas kegeluhen manusia, seh rasa lalap, la lit ukuren ras batasen waktu si itentuken, si pasti tetap seh rasa lalap. Emaka iajuk me manusia muji Tuhan la terjeng tupung meriah, tapi ibas kerina dampar kegeluhen, la ersung-sung tapi tetap segedang kegeluhenta meriah ntah susah.
Ibas pembebasen si enggo ibereken Tuhan man BangsaNa ibereken Dibata kebebasen si mbaru, janah enda me dalanna maka bangsa Israel muji Tuhan. Seh ngasa genduari pe kita itengah kegeluhenta muji Tuhan erkiteken enggo ka melala siidah ras erlajar kita arah sekelewetta, maka labo kita pernah itadingken Dibata arah erbage-bage situasi kegeluhen sinanami kita ibas kegeluhenta, subuk arah pinakit si ngerimrim, masalah siman alanken, kekerasen, perbeben ibas keluarga, ekonomi, pesekolahken anak-anakta, mbelin nge siman alanken ibas kegeluhenta. Uga dage kita tetap nggejapken maka Tuhan la pernah nadingken kita ibas perbebenta e, kuasa ras kemulian Tuhan banci pe si gejapken arah pinakit sinderpa kita, arah perbeben ras masalah si man alanken ibas kegeluhenta. Arah sie kerina kita erlajar, sekolah ras iproses gelah reh gegehna. Bagi batang kayu si isuan I darat rumah, tep-tep wari ia kena angin meter, kena udan meder, kena las matawari , emaka uratna pe megegeh, seh maka paguh, tapi adi batang kayu siisuan ibas rumah, la kena las matawari, la kena angin meter ras udan meder, maka perturahna pe banci kudas saja, uratna la megegeh, emaka adi irintakken pe banci minter terintak. Bageme pe kegeluhenta enda reh buena tantangen ras masalah siman alanken ibas kegeluhenta, erbahansa kita pe reh gegehna, kiniteken ras pengarapenta erbahansa kita menang. Kita banci tetap erlajar arah kerina tinepa Dibata i sekelewetta, gelah lebih mbages sitandai kuasa ras kemulian Tuhan ibas kegeluhenta.
EVALUASI :
Uga kerna aksi PJJnta minggu si lewat? Litnge kita ertoto ngataken bujur ibas pendahin perBerita Si meriah?
DISKUSI :
1. Arah kai saja nge banci kita erlajar kerna kuasa ras kemulian Tuhan si lit i sekelewetta ? Turiken
2. Pernah nge lit pengalamenta kita erlajar kerna kuasa Tuhan arah pinakit, perbeben ras masalah si nderpa kita bas kegeluhenta ?
AKSI :
Sidahilah temanta, adi lit masalahna, perbeben, pinakit, si enggo ndekah la reh ku perpulungen, sidata ibas sektorta, gelah banci sidahi ras sipegegehi ia ras keluargana.
USULEN LAGU :
1. KEE GBKP NO : 300 : 1-2
2. KEE GBKP NO : 249 : 1-2
3. KEE GBKP NO : 255:1-3
4. KEE GBKP NO : 286 : 1-2
TOPIK PERTOTON SYAFAAT :
1. Temanta si sanga ngalaken perbeben, masalah entah pe pinakit ibas kegeluhenna.
2. Temanta si kena dampak erupsi deleng Sinabun.
3. Si turah ibas perpulungen.
Pdt. Natalidna Br Tarigan, M.Th