Ras Kristus kita Menang
( I Korinti 15 : 53 – 58 )
15:53 Karena yang dapat binasa ini harus mengenakan yang tidak dapat binasa, dan yang dapat mati ini harus mengenakan yang tidak dapat mati.
15:54 Dan sesudah yang dapat binasa ini mengenakan yang tidak dapat binasa dan yang dapat mati ini mengenakan yang tidak dapat mati, maka akan genaplah firman Tuhan yang tertulis: “Maut telah ditelan dalam kemenangan.
15:55 Hai maut di manakah kemenanganmu? Hai maut, di manakah sengatmu?”
15:56 Sengat maut ialah dosa dan kuasa dosa ialah hukum Taurat.
15:57 Tetapi syukur kepada Allah, yang telah memberikan kepada kita kemenangan oleh Yesus Kristus, Tuhan kita.
15:58 Karena itu, saudara-saudaraku yang kekasih, berdirilah teguh, jangan goyah, dan giatlah selalu dalam pekerjaan Tuhan! Sebab kamu tahu, bahwa dalam persekutuan dengan Tuhan jerih payahmu tidak sia-sia.
Sikataken bujur man Dibata erkiteken perkuah ras lias ateNa saja maka kita nggo ndatken kemenangenta arah AnakNa si Tonggal, Jesus Kristus sienggo memenangken kita arah peristiwa Paskah. Sienda kerina banci jadi kubas kegeluhenta selaku kalak si erkiniteken man BaNa erkiteken keleng ateNa si icidahken ras siilakokenNa man banta. Enda labo erkiteken gegehta manusia si terbatas sipatna. Tapi sienda kerina banci jadi erkiteken labo ate Dibata kita guna ndatken ukumen tapi guna ngaloken keterkelinen iba IA nari. Arah Kata Dibata sijadi bahan renungenta sekali enda, ras- ras kita ngerenungkenca temata eme “Ras Kristus Kita Menang”.
Rasul Paulus ibas suratna man perpulungen i Korinti sijadi bahan renungenta enda mereken penegasen man ngawan ni perpulungen tupung si e kerna kekeken kula. Erkiteken lit ka “ pengajar-pengajar palsu” singajarkenka maka labo lit dalanna kalak si enggo mate banci keke mulihi. Pengajaren enda mpeturah kiniteken ngawan ni perpulungen “terombang ambing”. Emaka guna ngelawan “pengajar- pengajar palsu ” tupung sie, itulisken Rasul Paulus suratna enda. Ituriken Rasul Paulus kerna Kristus si enggo keke ibas si mate nari ras sie mereken pengertin maka kalak si tek man baNa bakal ngaloken kekeken. Ibas ayat 53 itegasken Rasul Paulus maka labo pagi kerina kita mate, tapi kerina pagi kita iobah ibas ayat 54 ras ayat 55 itegasken Rasul Paulus “Kematen enggo itelen kemenangen enggo seh. O kematen, ija kemenangendu ? O kematen, ija bisandu ?”
Bisa kematen e me dosa, janah dosa ergegeh erkiteken undangundang (ayat 56). Tapi bujur ninta man Dibata simereken kemenangen man banta arah Tuhanta Jesus Kristus (ayat 57). Arah kemenangen sienggo ibereken Tuhanta Jesus Kristus e ipersingeti Rasul Paulus ngawan ni perpulungen i Korinti gelah tetap ukurna, ola mbewat – mbewat. Mejingkat rusur ibas ndahiken dahin Tuhan sabab labo percuma dahin si idahiken ibas Tuhan.
Kematen eme upah dosa. Tapi erkiteken Tuhan Jesus Kristus enggo keke ibas simate nari maka enda mereken penegasen maka kemenangen nandangi kematen bas Tuhan Jesus Kristus ngenca. Emaka adi Tuhan Jesus Kristus sienggo memenangken kita ibas kuasa dosa ras kematen maka tetaplah sicidahken biak kalak sienggo ngaloken kemenangen e me tetap ukur, labo mbewatmbewat ras mejingkat ibas ndahiken dahin Tuhan. Paskah si irayaken kita labo terjeng “perayaan formalitas” saja si tiap tahun irayaken kita tapi tetap ngasup kita ncidahken bas kegeluhenta maka kita enggo imenangken Tuhan Jesus Kristus. “Selamat Paskah”.
EVALUASI :
Uga kerna aksinta ibas PJJ silewat ? Lit kita sireh ibas kebaktin Sabtu Pengarapen?
DISKUSI :
1. Kai nge pengertinna rikutken bahan renungenta sekali enda “ kematen enggo itelen, kemenangen enggo seh. O kematen, i ja kemenangenndu? O kematen ija bisandu ”? Turikenlah !
2. Kai nge si arus tetap ilakoken kalak Kristen ibas ia enggo ngerayaken Paskah bas kegeluhenna si tep-tep wari ? Turikenlah !
3. Kai nge komitmenta man Tuhan Jesus Kristus ibas kita ngerayaken Paskah ibas tahun enda ? Turikenlah !
AKSI :
Sirancang ras silakoken subuk ibas jabu ntah pe sektorta aksi Paskah si banci ilakoken bas tahun enda.
TOPIK PERTOTON SYAFAAT:
1. Ngataken bujur man Dibata ibas kemenangen sienggo iberekenNa arah kita ngerayaken Paskah ibas tahun enda.
2. Gelah ngawan ni perpulungen bagepe serayan GBKP ibas kerina wilayah pelayanen tetap ngasup ncidahken arah kegeluhenna si tep-tep wari maka enggo imenangken Tuhan Jesus Kristus.
3. Siturah Ibas perpulungen.
USULEN LAGU :
1. KEE GBKP NO : 218 : 1, 3, 4
2. KEE GBKP NO : 166 : 1, 2 , 3
3. KEE GBKP NO : 207 : 1, 3, 4
4. KEE GBKP NO : 212: 1 , 5
Pdt. Prananta Jaya Manik, STh MM