Enggo Kuangka Perbahanen Dibata
( II Korinti 12 : 7 – 10 )
7 Dan supaya aku jangan meninggikan diri karena penyataan-penyataan yang luar biasa itu, maka aku diberi suatu duri di dalam dagingku, yaitu seorang utusan Iblis untuk menggocoh aku, supaya aku jangan meninggikan diri.
8 Tentang hal itu aku sudah tiga kali berseru kepada Tuhan, supaya utusan Iblis itu mundur dari padaku.
9 Tetapi jawab Tuhan kepadaku: “Cukuplah kasih karunia-Ku bagimu, sebab justru dalam kelemahanlah kuasa-Ku menjadi sempurna.” Sebab itu terlebih suka aku bermegah atas kelemahanku, supaya kuasa Kristus turun menaungi aku.
10 Karena itu aku senang dan rela di dalam kelemahan, di dalam siksaan, di dalam kesukaran, di dalam penganiayaan dan kesesakan oleh karena Kristus. Sebab jika aku lemah, maka aku kuat.
Dikune si pepayo lebe kai sini isuratken i bas Pengerana 3:14 maka banci siangkai maka kerina perbahanen Dibata i bas kegeluhenta tujunna eme ‘…. gelah malang kita man baNa”. Janah, tujun enda isuratken kenca ituriken maka kerina si nasa lit ibas pertibi enda jadi ibas paksana (ayat 1 – 12) . Emaka itutupna alu ngataken “Si jadi genduari bage pe si jadi pagi, nai pe enggo me jadi. Dibata nge si njadikenca kasa kai si enggo jadi janah jadi ka pagi mulihi”. Banci ikataken, kerina perbahanen Dibata ibas kegeluhenta sekalak-sekalak, subuk bagi ukurta ntah la bagi ukurta, desken sada pengulangen saja nge. Susah – senang, sehat – sakit, riah ukur – ceda ate, merupaken bagin si memang enggo lit ibas kegeluhen manusia e mbarenda nari. Si perlu jadi perenungenta eme kuga kita ngangkai erti arah kerina keadan nggeluh si lit ibas kita e.
Rikutken bahan ogen PJJnta Minggu enda, iajuk kita guna ngerenungken kerna pengalamen geluhta i bas kita ngenanami sakit pinakit bage pe perbeben si inanami kita. Kejadin e banci saja si nanami i bas paksa si enggo lewat tapi pe banci ka si nanami denga seh paksa genduari enda pe. Berkaiten ras sie, kata sini ipake Paulus ibas suratna enda eme ‘ibereken duri i bas dagingku’. Mbue hal banci sipahami arah kata enda sabab memang labo denga ipahami kal kai kin maksud Paulus alu kata ‘duri i bas daging’ e.
Gelah reh tangkasna pengangkan erti kata e, mehuli nge dikune sirenungken piga-piga erti kata si kemungkinen lit berhubungen ras kata ‘duri’ sini imaksudken Paulus e, eme :
1) Percuban-percuban pertendin (“rohani”) si reh nderpa kita lako ncubai kegeluhen kinitekenta segelah kita ragu ras la ertanggungjabab ibas kegeluhen pelayanenta (pandangen
Calvin).
2) Kerina perlawanen ras penganiayan si man alanken i bas kita ndalanken tugas ras tanggungjababta selaku kalak si erkiniteken (pandangen Luther).
3) Kerina percuban si reh nderpa daging kulanta si nuatena erbahanca kita kote ras nadingken pendahin ras pelayanenta.
4) Banci pe iertiken kerna kekurangen si lit ibas daging kulanta
5) Lit na pinakit ibas daging kulanta si banci erbahanca mberat, latih dingen mesui siakap ngenanamisa. Bage pe banci ka turah ciga ate kalak man banta erkiteken pinakit si lit ibas kita. Kerina e banci saja lit ibas kita tapi iarapken kal gelah kita saber ibas ngalakenca sebab Tuhan Dibatanta pe si tuhuna iidahna nge kerna perbebenta e tapi pasti tetap nge iberekenNa gegeh man banta guna ngalakenca. Sie kerina tujunna pe gelah ola meganjang ukurta.
Si penting eme kuga kita tetap ertoto man Dibata ibas kerina keadan geluhta sabab arah pertotonta gegehta tetap ipelimbaruiNa. Sie pe teridah nge ibas pengalamen geluh Paulus, maka kenca ia ertoto telu kali maka ipedauh min “duri” e ibas dirina nari, labo “duri”e ipedauhna tapi si ibereken Dibata eme gegeh guna ngalakenca. Bagem cara Dibatanta erdahin ibas kerina keadan geluhta. Mungkin saja perbeben si inanami kita la pernah ngadi. Langa dung sada enggo reh ka perbeben si debanna ka. Langa pe kita megegeh enggo reh ka percuban nderpa kita. Banci pe si bandingken arah kegeluhen Jop rikutken si tersurat ibas Kitab Jop.
Ibas kerina keadaan geluhta, nina Dibata man banta : “Cukup kal lias ateKu man bandu; sabab gegehKu serta kap i bas gegeh si kurang”. Arah kata si melias enda, subuk Paulus bage pe kita kerina i bas paksa si genduari enda, ipegegehi kap. Lias ate Tuhan ertina eme ‘kehadiran, kemurahan dan kuasa Tuhan’ si jadi gegehta si reh i Surga nari lako mpengasup kita ngalaken kerina keadaan ibas kegeluhenta (bdk. Pilipi 4:13). Pertotonta ialoi Dibata alu mereken lias ateNa man banta dingen lias ateNa e erbahanca serta gegehta itengah-tengah perdalanen kegeluhenta tep-tep wari.
Kidekah kita ngerembakken dirinta ku Dibata keriahen ukurta pasti tetap lit amin gia sekali gegehta kurang, kita igombang-gombangi kalak si deban, kepiceten reh nderpa kita, isiksa kalak kita subuk secara kula bage pe perukuren, rikut pe kesusahen jadi ayam-ayam kegeluhenta (bdk. Masmur 90:10). Siperiahken ukurta eme Tuhanta Jesus Kristus e si enggo leben ngenanami erbage-bage kiniseran seh mate pe.
Ibas Minggu-Minggu Passion enda pe, iajuk kita lako nungtungken kerina perbebenta, keadaan geluhta, sura-suranta bage pe pingko-pingko nta man Tuhan. Tek kita maka kerina perbahanen Dibata ibas kegeluhenta nuduhken kerna kekelengenNa man banta. Labo perbahan la keleng ate Dibata maka lit si la bagi ukurta ibas kegeluhenta. Pengalamen ibas paksa sakit jadi pembelajaren si mehuli man banta guna ngidah kuga ergana kesehaten e. Pengalamen nggeluh ibas paksa kebenen sekalak sini ikelengi kita (kematen) erbahanca meherga siakap kegeluhen e. Pengalamen nggeluh ibas usaha pencarin si kurang mehuli ulihna, hubungen kekeluargan si ceda, pertemanen ras sada perpulungen bage pe sada dahin ntah pe jiran tetangga si kurang mehuli erbahanca si eteh uga pentingna kita ncibalken dirinta ras kerina pendahinta e sentudu ras si ngena ate Dibata. Tapi sada hal si perlu tetap sipeturah ibas kegeluhenta maka “pasti lit sura-sura Dibata si mehuli arah kerina situasi kegeluhenta”.
Nina pe ibas Jeremia 29 : 11, “Aku ngenca meteh surasurangKu nandangi kam, e me gelah kam senang labo gelah cilaka. RencanangKu e me mereken wari si pepagi bagi si iarapkenndu”. Memang Dibata ngenca metehsa kai sura-suraNa nandangi kita arah kerina perbahanenNa tapi si ngapuli dingen mpegegehi kita ikatakenNa maka rencanaNa eme mereken wari si pepagi bagi si iarapken kita. Emaka ola bene pengarapenta ibas kerina keadan geluhta. Tetaplah kita megenggeng dingen ngataken bujur man Dibata. Kelengilah dirinta, jabunta, temanta manusia, gereja Tuhan, bangsa ras Negara nta bage pe doni enda maka arah kerina perbahanen Dibata e tetap mabai kita kempak keterkelinen.
EVALUASI :
Uga kerna aksi ibas PJJ nta Minggu si lewat ?
DISKUSI :
1. Rikutken bahan renungen PJJ nta sendah, isehken man banta lima hal si banci si ertiken kerna kata “duri” ibas daging e, janah salah sadana eme kerna “pinakit”. Menurutndu, kuga nge si bahan carana maka banci teraloken kita maka “pinakit” e banci jadi dalanta guna tole ngerembakken dirinta man Dibata ?
2. Banci si gejapken maka labo mehuli dikune lit teman ta ibas paksa pinakiten ntah pe perbeben nggeluh iuru-uru (diejek). Kai nge si arus ilakokenndu dikune situasi si bage terjadi nandangi temanta ?
AKSI :
Kerina perbahanen Dibata man banta ilakokenNa ibas lias ras keleng ateNa. Tatap ku temanndu si kundul arah kawes ras kemuhenndu, jenari salami lah ia alu ngataken : “Lias ate Tuhan erbahanca kam megegeh”.
TOPIK PERTOTON SYAFAAT :
1) Dibata si mpegegehi si lit ibas perbeben.
2) Dibata si mpengasup kita guna ngangkai perbahanenNa.
3) Ngawan ni perpulungenta si enggo ndekah sakit. 4) Suturah ibas perpulungen.
USULEN LAGU :
1. KEE GBKP NO: 335 : 1, 3, 4
2. KEE GBKP NO : 401 : 1
3. KEE GBKP NO : 462 : 1 –
4. KEE GBKP NO : 201 : 1, 4