Komitmenku Reh Ku Perpulungen
( Heber 10 : 22 – 25 )
Ibas PJJ-ta wari enda, “fokus” percakapenta e me mengevaluasi “komitmen” ras semangatta bersekutu kidekah tahun 2016 si jadi penjemba man banta gelah muat bagin ibas dahin-dahin gereja i bas tahun 2017, umpamana: reh ku Kebaktin Minggu, PJJ, PA, Retreat, Kebaktin Padang ras sidebanna. Erbagebage hal si erbanca kita la reh bage pe reh ku perpulungen.
- Alasen la reh ku perpulungen:
- Melala kesibuken. E maka siakap madin ndungi dahinta asangken reh ku PJJ entah Kebaktin Minggu.
- Perban la ibegiken katana. Enda jadi alasenna pangen la padah pulung, lawes me ia ku kede si lit kalak megiken cakapna.
- Mbuesa iakapna “kutipen” sanga PJJ/PA. La ia reh pulung guna “menghindari kutipen”.
La ia reh ku gereja sabab iakapna gedangsa kotbah entah la menarik kotbahna (la bagi ukurna isi kotbah). - Mela ia adi idah kalak ku gereja. Mbiar ia isaling-saling temanna: “Adi ku gereja kam silih, uga pa pe udan nari nge sekali enda”. Gelah ula isaling-saling kalak, madin iakapna la ku gereja.
- Ras sidebanna.
- Motivasi kita reh ku perpulungen:
- Si gejap maka Dibata enggo nebusi geluhta. E maka reh kita ku gereja bage pe ku erpulungen sebage tanda mpehaga ras mpermuliaken Dibata. Alu bage, geluhta tetap i isi alu Kata Dibata si nggeluh.
- Lit iakapna si “kurang” ibas geluhna adi la ia reh ku gereja entah perpulungen. Istilah Karo: kena la seh adi la ikut pulung.
- Meherga iakapna temanna sada perpulungen e. E maka tedeh atena rusur pulung ras jumpa sada ras sidebanna.
- Reh ku Kebaktin ras PJJ jadi “tambar” iakapna. Ngaloken Kata Dibata ras muji Tuhan radu ras teman sada perpulungen, nambahi gegehna iakapna ndalani wari warina.
Ras sidebanna.
Tentu, banci denga si tambahi ras si kurangi kai si jadi alasenta la reh ku perpulungen ras kai ka si njemba kita reh ku perpulungen. Ibas bagin evaluasi ras diskusi, i je banci kita kari ercakap terdauhen kai kin ndia sebabna kita la reh ras reh ku perpulungen. I bas bahan PJJ-ta, ituriken me kai si jadi palasta reh ku perpulungen (bersekutu), e me:
- Kematen Jesus i kayu persilang si erbanca kita banci bengket ku ingan Sibadiana kal (ayat 19).
- Enggo italangi Jesus man banta sada dalan si mbaru e me kap arah kulaNa (ayat 20).
- Jesus kap Imam si Mbelinta ibas perpulungen e (ayat 21).
- Si gejap kita ersalah, e maka sirembakken dirinta ras sideheri IA, sabab Jesus ngenca si ngasup mbersihken pusuhta (ayat 22).
- Dibata setia ibas padanNa, e maka tetaplah si gelem pengarapenta man Tuhan (ayat 23).
- Gelah kita si sampat-sampaten, si keleng-kelengen ras ngasup kita ndalanken si mehuli (ayat 24).
- Kai pe perbebenta, ula kita la reh ku perpulungen. Ula sirangi perpulungen. (ayat 25a).
- Si iah-iahen kita sada ras sidebanna gelah ula sada pe tading temanta jumpa ras Tuhan. Sabab wari Tuhan reh me (ayat 25b).
Alu bage enggo si idah maka melala tuhu ulih si banci si aloken subuk man banta bage pe man temanta sada perpulungen tupung kita reh ku kebaktin Minggu, PJJ, PA ras dahin-dahin gereja si debanna. Ibas perpulungen e me kita banci ras-ras si ajar-ajaren (belajar bersama) gelah lebih si tandai Tuhan, si angka kai surasura Tuhan, sesama kita pe siangkan sada ras sidebanna. Arah kita rusur jumpa, ngasup kita nandai temanta, alu bage turah me ukur si tedehen jumpa ibas perpulungen ni Tuhan. I bas kita jumpa e, tep-tep anggota perpulungen reh alu “motivasi” : mpehaga Tuhan; mpermuliaken Tuhan; muji Tuhan; ngaloken Kata Dibata; mbagiken pengalamen jumpa ras Tuhan; mpegegehi teman; mpeteguhi persadan; si erga-ergan sabab kita kerina seri erganta I lebe-lebe Tuhan; meteh kai perkembangen perpulungenta ras muat bagin ibas mpekena-kena perpulungen e. Nina Barclay maka kita selaku kalak Kristen, geluhta labo terjeng guna dirinta saja tapi pe guna kalak sideban. Tugasta e me guna saling memberi dorongan, jadi teladan ras membangkitkan semangat. Tambah si e nina: “Seringkali sepatah kata pujian atau terima kasih atau penghargaan atau sambutan gembira telah dapat menguatkan seseorang.”
Bayangken, apai nge ulin: arah kata si belaskenndu reh tambahna gegeh temanta asangken arah kata si belaskendu lanai kalak banci medem ras lanai pet man. Enggo ndai si idah maka Jesus ngendesken geluhna jadi dalan si mbaru, e me dalan ku kegeluhen, Jesus enggo mperdameken kita si erdosa ras Dibata si Mulia. Cara nggeluh Jesus e me jadi usihenta, ikutenta gelah arah kata ras perbahanenta i idah ras igejapken kerina anggota perpulungen e dalan ku keselamaten. Ula min arah kata ras perbahanenta “gelap” pengidah temanta ras lanai ietehna dalan man tepeten, sigel ukurna ras ndauh ia ibas Dibata nari. Lang gia, adi pulung iakapndu anak-anak Tuhan ibas sada perpulungen, me oratna nge min turah si mehuli, persadan reh teguhna, meriah ukurta si keleng-kelengen ras si sampat-sampaten?
Mari si jadiken PJJ/Sektor, Runggunta wadah inganta pulung jadi sada ingan (“komunitas”) si kelengkelengen atau komunitas kasih. Ibas inganta pulung, reh nahangna iakap temanta arah pengerana ras perbahanenta. Tersampat iakapna ia, lit idahna serpang pulah tupung lit perbebenna, meriah ukurna mulih kenca arah perjumpan-perjumpan si lit ibas gerejanta. Sikap odakna e mulih, cirem ia, siul-siul ia mulih janahna njemak Pustaka Si Badia. Em si perlu si ciptaken ras-ras ibas masing-masing Runggunta, PJJ/Sektorta, Klasista ras ibas GBKP si malem enda, alu bage lit lalap ulih (luah) tep-tep kita pulung. Kerinalah kita muji Tuhan gelah malem ateta.
EVALUASI:
Uga nge sedekah enda semangatta guna ngikuti dahin-dahin gerejanta? Ras uga ka iakapndu si mehulina ibas tahun 2017 enda? Ras uga aksinta ibas PJJ Minggu silewat ?
DISKUSI:
- Adi ibas bahan PJJ-ta enggo terang kai si jadi palasta reh ku perpulungen. Turiken dage kai ibahanndu sedekah enda si jadi palasndu reh ku perpulungen ras uga ka seharusna?
- Turiken dage perukuren si kuga nge arusna lit ibas pusuhta gelah banci persadanta tuhu-tuhu nyata ibas tindaken?
- Suasana persadan (“persekutuan”) si uga nge si iarapkenndu gelah banci nteguh persadanta ras lit ulihta tiap ngikuti dahin-dahin gereja (misalna: Kebaktin Minggu, PJJ, PA, Retreat, Janji Iman/lelang-lelang )?
AKSI:
Bahanlah aksi nyata ibas PJJ/Sektorndu ibas ncidahken kiniersadan si paguh sada ras sidebanna.
USULEN LAGU:
- KEE GBKP NO: 163:1,2
- KEE GBKP NO: 209:1-5
- KEE GBKP NO: 205:1,2,5
- KEE GBKP NO: 381:1-4
TOPIK PERTOTON SYAFAAT :
1. Kiniersdaan itengah – tengah ngawan ni perpulungen.
2. Pengungsi Sinabung ras daerah si terkena bencana.
3. Siturah ibas perpulungen.
Pdt. Jekson Barus, M.Th