NGGELUH TAMA PUJIN MAN KEMULIAN DIBATA
Epesus 1:7-12
(Rangkaian Paskah)
MODEL PJJ: PUJI-PUJIAN
KATA PERLEBE :
“Kehidupan akan terus berputar” enda me sada peribahasa si mekatep ibegi i bas kegeluhenta bagepe i bas cakap jelma si nterem. Arah kalimat enda mereken pengertin man banta gelahna ula isia-siaken kegeluhenta enda, alu bage arus si isi alu erbage-bage perbahanen si mehuli dingen si lit ertina. Perputaren si lit i bas doni enda e me bagin i bas kegeluhenta manusia dingen tole i bas perputaren kegeluhen manusia e banci siidah uga manusia e mpertahanken identitasna selaku kalak si tek man Tuhan ntah lang, ngasup mpertahanken gagasen ras pikirenna ntah lang, bahken lit ka ngenanami kegagalen dingen lanai ncidahken kemulian Dibata i bas geluhna erkiteken perputaren geluh enda. Ertina ise pe la banci netapkenca maka kecibal geluhna gundari enda tetap seri ras si pepagi ntah pe tetap bagi ukur ras sura-sura, erkiteken enda me maka selaku kalak si erkiniteken arus tetap ernalem man Dibata dingen mindo gegeh gelah ngasup ndalani kegeluhen enda dingen tetap ngasup nuduhken kemulian Dibata.
Erkiteken bagenda me kecibal manusia i doni enda la terlepas arah perputaren geluh, janah enda ngkenai kerina manusia dingen la erpilihen ise pe ia, e maka arus kita sedar maka kita enda e me tinepa Dibata dingen kita meherga i lebe-lebeNa erkiteken kita enggo itebusNa i bas dosa-dosanta nari. E maka responta kerna perbahanenNa si mbelin e arus sicidahken cara nggeluh singena ateNa arah perbahanen, pengerana ras perukurenta, alu bage geluhta tama pujin man gelar Tuhan.
ISI :
Kitab Epesus enda itulisken Paulus man perpulungen Epesus, banci siidah kejelasenna i bas Epesus 1:1 “Surat enda i bas aku nari, Paulus si enggo jadi Rasul Kristus Jesus rikutken peraten Dibata” alu tujun gelahna perpulungen tuhu-tuhu nandai Dibata alu payo arah perbahanenNa si mbelin e me alu nebusi dingen ngalemi dosa manusia. I bas kitab Epesus enda ijelasken Paulus maka perpulungen e enggo ngaloken penebusen i bas Jesus nari arah darehNa. Enda me perbahanen si mbelinna kal i bas nuduhken keleng ate Dibata man manusia, khususna kalak si tek man Jesus. Erkiteken sie ka me maka Paulus nekanken man perpulungen gelah nuduhken meteruk ukur, setia dingen dem pengataken bujur. Alu litna sikap enda bicara lit pe perputaren geluh manusia lanai lit man kebiaren dingen tetap ngasup nuduhken identitas selaku kalak Kristen dingen arah geluhta tetap termulia gelar Dibata.
I bas ayat 7a “Sebab erkiteken Kristus enggo kita itebusi, e me dosa-dosanta enggo ialemi Dibata.” Paulus njelasken maka ope denga manusia e itebus, manusia e iteruh kuasa dosa, tapi kenca itebusi maka manusia lanai jadi budak dosa tapi enggo jadi sikerajangen Dibata. E maka respon manusia kerna sie icidahkenna arah pertobatenna dingen ndalanken kai singena ate Dibata. Kieser mengatakan “Sikap tobat adalah sikap yang utama bagi orang yang berdosa. Hidup baru yang telah dialaminya telah membawa hidupnya ke dalam persekutuan dengan Allah. Dengan tobat orang mengarahkan pandangan kepada Allah, penyelamat orang berdosa. Tobat berarti mencari Allah di tengah-tengah segala kehancuran dan kegelapan”. Arah pendapatna enda banci jadi refleksi man banta maka pertobaten e mabai kita bengket kubas persadan kalak si erkiniteken dingen tanda pengendesen geluhta secara totalitas man Dibata sabab i bas situasi kehancuren ras kegelapen pe tetap kita ndarami IA.
Penebusen dosa si ilakoken Dibata man manusia e me sikap ras inisiatif Dibata jine man manusia, janah penebusen si maksudken ijenda e me keselamaten dingen pasu-pasu si enggo ialoken manusia e. Keselamaten labo secara pribadi saja si enggo ialoken, tapi pe ras isi jabunta pe enggo itebus dingen iselamatken Dibata. E maka i bas sie kerina lit nge rencana Dibata si mehuli man pribadi bagepe man isi jabunta sekalak-sekalak e me ipilihNa pribadinta ras jabunta jadi alatNa guna naksiken kekelengenNa man kerina manusia. Tole Paulus ngatakenca sendalanen ras sie i bas kita bagepe jabunta enggo ipilihNa jadi saksi ras perkakasNa, pilihen Dibata si seh banta ula sianggap e “Hadiah” man dirinta saja tapi e me anugerah si arus si pakai guna kemuliaan Dibata. Keselamaten dingen pasu-pasu si enggo sialoken kita sipeseh ka man kalak sideban gelahna ia pe ngaloken keselamaten ras pasu-pasu Dibata. Alu bage turah me kiniteken kalak sideban man Jesus dingen kerinana si lit banci ipersada i bas gelar Jesus Kristus sebab e me rencana Dibata i bas IA nehken kekelengenNa e, ayat 10 “Rencana Dibata si isehkenNa kenca seh paksana e, eme guna mpersadaken kerina sinasa lit, subuk i surga bagepe si i doni, gelah Kristus jadi kepalana”. Ipersadaken kerina i bas Kristus enda banci jadi adi kita lebe si enggo tek man Kristus ersada arih ras ersada ukur kenca sie si peseh ka man kalak sideban, kedungenna ersada kerina nembah dingen muji gelar Dibata i bas reh erkebaktin, alu bage sekaligus terjadi peningkaten iman ras peningkaten jemaat i bas erkebaktin. Abineno ngatakenca “Di dalam ibadah juga merupakan suatu pertemuan antara Allah dan manusia. Allah berfirman dan jemaat mendengar, Allah memberi dan jemaat menerima serta mengucab syukur, Allah mengampuni dan jemaat memuji nama-Nya”. I bas penjelasen enda ngatakenca maka kalak si reh nembah muji gelar Dibata mpeturah kiniteken sabab ije igejabkenna jumpa ras Dibata sekaligus ngaloken kataNa ras pasu-pasuNa, e maka kita lebe si ikut beribadah si pemenana kal turah kinitekenta dingen si pemenana erpengarapen man Dibata, sue isingetken i bas ayat 12 “Janah gelah kita, kalak si pemenana erpengarapen man Kristus, nggeluh tama pujin man kemulian Dibata”.
PENGKENAINA :
I bas kiniersadanta selaku perpulungen oratna e me nuduhkenca sada sura-suranta gelah termulia gelar Dibata, dingen i bas kiniersadanta nuduhken maka radu ras mpeteguhi kinitekenta man Dibata teridah arah saling sipersingeten ras siajaren sada ras sidebanna dingen saling mendukung ras memotivasi. Enda sue ras sura-sura dingen rencana Dibata, bagepe sendalanen ras Misi GBKP poin a: “Menumbuhkembangkan Spiritualitas jemaat berbasis Alkitab”. Menumbuhkembangkan ertina alu ras-ras turah i bas kiniteken dingen la terjeng turah tapi banci berkembang ertina tergejab bagepe lit ngaruhna man jelma si nterem la terjeng bas kita saja ngenca, dingen kerina pengajaren e ipeseh alu dasar Alkitab contoh: BGA (Baca Gali Alkitab) secara Kategorial, Kelompok Baca Alkitab secara Kategorial. Janah banci jadi k ape silakoken i bas rangkaian Paskah i bas kegiaten pemberian sembako man sekitar gereja. Alu bage enggo sue ras tema PJJ nta sekalenda e me geluhta nambah pujin man gelar Dibata, gelar Dibatalah termulia i bas kita ndalanken singena ateNa labo gelar manusia.
DISKUSI RAS AKSI:
- Erpalasken teks Perpulungen Jabu-jabunta wari enda, kai nge dasarna kita jadi perkakas Dibata guna ersaksi man jelma si nterem kerna kekelengenNa?
- Cuba sidiskusiken ras kai aksinta secara Keluarga, Runggun ntah Sektor guna meningkatken kiniteken berbasis Alkitab!
USULEN ENDE-ENDEN: :
- KEE GBKP No. 424:1,2 = https://www.youtube.com/watch?v=LyHdP4iCMQs
- KEE GBKP No. 41 = https://www.youtube.com/watch?v=MupAqkdGPXw
- KEE GBKP No. 278:1,2= https://www.youtube.com/watch?v=PvB5iscbMQc
- KEE GBKP No. 204:1-2= https://www.youtube.com/watch?v=h0y8xMxkWBM
DAFTAR PUSTAKA :
- Bernhard Kieser, Moral Dasar, Kaitan Iman Dan Perbuatan, Yogyakarta: Kanisius, 1994
- L. Ch. Abineno, Tafsiran Alkitab, Surat Efesus, Jakarta: BPK-Gunung Mulia, 2009
- L. Ch. Abineno, Gereja dan Ibadah Dan Ibadah Gereja, Jakarta: BPK-Gunung Mulia
Pdt Julianus Barus M.Th
HP/WA: 082274482111