ITAMBAHI ALU BIAK SI MEHULI
Pilipi 1:9-11
(HUT Persekutuan Kategorial)
1:9 Dan inilah doaku, semoga kasihmu makin melimpah dalam pengetahuan yang benar dan dalam segala macam pengertian, 1:10 sehingga kamu dapat memilih apa yang baik, supaya kamu suci dan tak bercacat menjelang hari Kristus, 1:11 penuh dengan buah kebenaran yang dikerjakan oleh Yesus Kristus untuk memuliakan dan memuji Allah.
MODEL PJJ: PARTISIPATIF
KATA PERLEBE :
Kerina paksa ras kecibal kegeluhenta e me kesempaten guna jadi pasu-pasu man kalak si deban. Tupung Paulus enggo ngendesken geluhna man pelayanen Berita Si Meriah tetap ia erberita dingen manteki perpulungen perpulungen khususna la man kalak Jahudi. Paulus majekken palas teologi kerna erbage-bage dampar guna njabab penungkunen ras situasi si jadi i bas kegeluhen perpulungen, amin la sitik perbeben si ialakenna subuk i bas aron Berita Si Meriah ntah pe kalak si deban nari. Surat man perpulungen Pilipi, enda mbages kal ertina sabab isuratkenna paksa ia ringan i bas penjara. Tupung Paulus i bas penjara melala waktu man bana guna rukur kerna perbahanen Dibata rikut kerina dampar kegeluhen dingen mere pergegeh man kalak si deban.
ISI :
Bahan renungenta enda nuriken uga Paulus tetap nggeluh i bas pertoton. Pertoton Paulus e me guna kerina kalak sierkiniteken gelah tetap paguh nggeluh i bas kinitekenna. Iarapkenna i bas pertotonna gelah perpulungen e ertambah-tambah i bas:
- Keleng ate, silit ras turah i bas pusuh manusia khususna kalak si erkiniteken arus kepe erpalasken pemeteh ku bas Pustaka si Badia.
- Pemeteh situhu-tuhu, si imaksud labo terjeng pemeteh intelektual tapi pe pemeteh ras penandai kerna Dibata, kegeluhen pertendin. Guna nggeluh bagi siiarapken Paulus tentuna arus nggeluh i bas persadan, kepatuhen man Dibata dingen nggeluh alu ndeher ras Dibata.
- Pengangkan si serta, tentuna idatken arah ngantusi sura-sura Dibata, ngguru ku kata Dibata, alu bage kai si mehuli ras la payo enggo iangkai alu mbages.
Arah sienda ieteh perpulungen e milih si mehulina. Lanai papak ibabai pengajar-pengajar sierbage kecibalna. Jadi kalak si bersih la erpandangen i bas kerehen Jesus mulihken i bas paksana. Amin langa ieteh ndigan paksana tapi arus tetap ersikap i bas kegeluhen si mehuli. Paulus mbentengi perpulungen la saja alu pedah-pedah tapi pe ertoto guna ia kerina.
Kegeluhen kalak si enggo itebus Kristus itambahi alu biak-biak si mehuli. Jesus ngkuhi kegeluhen kalak sitek alu kerina biak si lit i bas diriNa. Sabab kalak si ngikutken IA nggeluh alu ngusih biak (karakter) si lit i bas Ia. Kerina si ibereken Dibata e tujunna e me guna kemulian Dibata.
Salah sada dalan guna mpebelin biak si mehuli e me arah pengajaren gereja ras Pustaka si Badia. Perpulungen GBKP ringan i bas sada kiniersadaan si ibahan rikutken umur bagepe jenis kelamin. Kebaktian anak ras remaja (KAKR) radu tubuh sehna Berita Si Meriah ku kalak Karo ras (ulang tahun GBKP) e me tanggal 18 April 1890, Persadan man anak gerejanta (PERMATA) tubuh radu ras perjuangan kenca kemerdekaan e me i bas tanggal 12 September 1948, kategorial diberu (Moria) i bas tanggal 16 Oktober 1957, kategorial perbapan (Mamre) i bas tanggal 26 Agustus 1995. Bagepe kategorial lanjut usia (Saitun) i bas tanggal 15 April 2015 kenca i bas sidang sinode GBKP si pe 35ken bengket ku bidang koinonia, ija sope sie saitun bengket ku bidang diakonia.
Arah persadan enda iarapken kerina tahapen umur rikut ras kategorial na kerina banci i elai radu ras Tuhan dingen ‘bertumbuh bersama’ i bas pengajaren si payo. Alu bage wari ku wari banci reh ulina i bas kerina dampar kegeluhen dingen jadi pasu-pasu nandangi doni enda dingen terpuji me Dibata.
PENGKENAINA :
Dikune kerina kategorial enda erdalan alu mehuli ngasup bekerjasama/berkolaborasi, tentu ngasup mpeturah kualitas kiniteken ngawan ni perpulungen. I bas kiniersadaan kategorial si lit, terbangun pe kiniersadaan arih itengah-tengah jabu antara bapa, nande, anak rikut nini tudung ras nini bulang.
Mbelin kal arapen Gerejanta nandangi kategorial enda kerina, pertumbuhen kiniteken, kiniersadan ras pelayanen gereja mbue kal si banci ilakoken. Kai sibanci ibahan jadi program bersama, la terjeng maba ras nikapken roti i bas perayaan HUT Persekutuan Kategorial si deban, gelah mpebelin ras nambahi biak si mehuli i bas perpulungenta. La banci erdalan sisada kategorial enda, sabab kerina unsur ersada i bas jabu: bapa, nande anak-anak rikut ras nini bagepe kempuna. Kerina erkawiten i bas sangkep geluh, ija la banci lang lit kawitenna e maka arus mpebelin biak si mediate. Sendalanen ras si e i bas reh belinna keleng ate, pemeteh ras pengangkan kerna Kata Dibata. Alu bage radu ras sikuning-kuningen gelah radu megersing. Sitoto-toton gelah la sada pe si kote ras mbole. Sisampat-sampaten gelah radu paguh ras megegeh. Meriah kerina terpuji gelar Dibata.
ISKUSI :
- Rikutken pertoton rasul Paulus bas ogenta nandangi perpulungen Pilipi, kuga nge ndia kecibalna i bas perpulungenta genduari?
- Kuga sedekah enda sinergitas pelayanen arah program i bas kerina kategorial silit i bas runggunta? Kai sibanci si lakoken i bas wari sireh enda?
Pdt. Suenita Br Sinulingga, M.Th
HP/WA: 081397380916