Radu Nampati ibas Nehken Keleng Ate

Teks : 1 Korinti 16: 10 – 14

Beberapa pemberitahuan

16: 10 – 14

10 Jika Timotius datang kepadamu, usahakanlah supaya ia berada di tengah-tengah kamu tanpa takut, sebab ia mengerjakan pekerjaan Tuhan, sama seperti aku. 11 Jadi, janganlah ada orang yang menganggapnya rendah! Tetapi tolonglah dia, supaya ia melanjutkan perjalanannya dengan selamat, agar ia datang kembali kepadaku, sebab aku di sini menunggu kedatangannya bersama-sama dengan saudara-saudara yang lain. 12 Tentang saudara Apolos: telah berulang-ulang aku mendesaknya untuk bersama-sama dengan saudara-saudara lain mengunjungi kamu, tetapi ia sama sekali tidak mau datang sekarang. Kalau ada kesempatan baik nanti, ia akan datang. 13 Berjaga-jagalah! Berdirilah dengan teguh dalam iman! Bersikaplah sebagai laki-laki! Dan tetap kuat! 14 Lakukanlah segala pekerjaanmu dalam kasih!

Tema : Radu nampati ibas nehken keleng ate

Tujuan : Gelah Mamre:

1) Meteh maka nggeluh erkiniteken man Dibata arus tetap saling nampati

2) Ngasup tetap nggeluh sisampat sampaten ibas ncidahken keleng ate bagepe naluken perbeben geluh.

I. KATA PENARUH

Awal mula pergeraken kekristenan iminati enterem jelma paksa? Sekalak Prof. Wismoady Wahono, ngataken i bas bukuna “salah sada daya tarik kekristenan paksa sie eme nggeluh alu prinsip sisampat-sampaten, prinsip si deban eme si megegeh nampati si kurang megegeh bage pe saling menghargai antara sada ras si debanna alu la memandang status sosial si berbeda.” Prinsip si bage me jadi sada prinsip nggeluh si niarapken nterem jelma ras jadi ciri-ciri kekristenan paksa sie (band. Perb 2: 43-47). i erbahanca kekristenan berkembang ku belang-belang doni. Bahan tema mamrenta i bas minggu enda ngingetken tole man banta, uga kin arusna biak nggeluh si sampat-sampaten selaku anak Dibata bagi motto mamre, “mamre mediate mamre mediate”.

II. URAIAN TEKS

Surat 1 Korinti eme surat si langsung itulisken Paulus man perpulungen Kristen si lit i kota Korinti. Kota enda eme ibu kota propinsi Akhaya si cukup strategis erkiteken kota Pelabuhan, emaka kota enda tergolong kota majemuk alu erbage-bage latar belakang sosial, budaya, agama ras suku. Arah erbage-bage latar belakang e pe banci erbahanca turah persoalen-persoalen. Janah bas kota e pe cukup berkembang biak nggeluh erbana-bana. Erkiteken kota Korinti termasuk kota si strategis. erbahanca lit semangat guna meritaken berita si meriah, termasuk Paulus ras teman-temanna. Erpalasken Perb. 18: 1-10 ituriken maka tupung Paulus erberita si meriah i kota Korinti, lit piga-piga temanna raduken ras ia paksa sie eme Silas, Timotius, Priskila ras Aquila. Sada setengah tahun dekahna Paulus tading i kota Korinti (Perb. 18: 11), emaka kenca bage berkat ia ku Yerusalem, Antiokia, Galatia ras tading selama 2 tahun i kota Efesus (Perb. 18: 18-23). Kenca Paulus nadingken kota Korinti, lit sekalak perberita si beluh ngerana ras mbue pemetehna kerna Pustaka si Badia eme Apolos, ia erberita i wilayah kota Korinti (Perb 18: 24-28). Erpalasken 1 Korinti 3: 1-23 mereken gambaren man banta, maka i bas persadan kalak Kristen enggo mengalami perpecahen alu erban belat-belat kelompok Paulus ras kelompok Apolos. Sie erbahanca maka persadan kalak Kristen enggo erbelat-belat ras erbahanca enggo kurang gegehna ras semangatna guna sisampat-sampaten. Tambah sie pe lit ka persoalen-persoalen/perdebaten si turah itengah-tengah perpulungen, eme lagu langkah la mehuli/seksualitas (pasal 5-6), kerna perjabun (pasal 7), kerna pangan (pasal 8), kerna diberu nutup takal sanga kebaktin (pasal 11), kerna pemere Kesah Si Badia (pasal 12) ras kerna kekeken Yesus (pasal 15.). Persoalen si cukup kompleks enda erbahanca ersuruh ukur Paulus guna ngelayasisa, ija posisi Paulus paksa sie i Efesus. Alu pengarapen segelah lalit kesalahpahamen kerna teologi-teologi Kristen rikutken tetap njaga kiniersadan i bas perpulungen Tuhan, janah pe tetap nteguh ncibalken biak sisampat-sampaten.

Khusus pasal 16, eme bagian penutup suratna, alu tole ngingetken kerna komitmen perpulungen Korinti guna nggit muat bagin i bas nampati perpulungen si deban, secara khusus perpulungen Yerusalem. Erpalasken surat Paulus si peduaken ku kalak Kristen i Korinti, bas pasal 8-9 mereken informasi man banta, maka situhuna perpulungen Korinti enda enggo pernah lit komitmenna guna nampati perpulungen i bas kota si deban eme perpulungen i Makedoni. Artina maka perpulungen enda igambarkan salah sada perpulungen si melumbar guna dahin Dibata, lit ukur ersuruh guna nampati. Tapi erkiteken perbeben ntah pe persoalen si turah i bas perpulungen, em salah sada erbahanca lanai ersada arih ras enggo mulai surut semangat kebersamaan guna nampati rikut pe enggo mulai teridah nggeluh erbana-bana. Tole nina Paulus maka langsung atena reh ku Korinti guna jumpa ras perpulungen, tapi atena isiari lebe Makedoni maka ia ku Korinti (ayat 5-6). Kerincuhen Paulus jumpa ras perpulungen e pe mereken infomasi man banta maka cukup terkesan kel Paulus kidekah ia ras perpulungen Korinti. Sope seh ia ku Korinti, enggo iaturken Paulus maka Timotius singgah i Korinti sope nerusken perdalanenna ku ingan si deban. Emaka guna ngalo-ngalo Timotius, ras mendukung pelayanenna, lit pemindon Paulus eme: Alo-alo Timotius gelah ola metumbur iakapna (10), ras Ola mekarus nandangi ia (11). Arah dua kalimat enda teridah maka i bas nampati dahin-dahin Berita Si Meriah e tetap ijaga prinsip kekeluargaan ras saling mpehaga, bage pe ola min mekarus nandangi dahin-dahin Dibata. Harapen Paulus selanjutna eme segelah perpulungen Kristen tetap metenget nandangi situasi sekitar segelah ola ndabuh ku bas kegeluhen si la ngena ate Dibata. Erjaga-jagalah ras megenggenglah eme dua kata pertenget arah Paulus segelah kai pe siibahanna e erpalasken ate keleng.

III. PENGKENAINA

Kedamen pusuh mbelin kel ngaruhna ku bas ukur ersuruh guna nampati. Bage me teridah arah perpulungen Korinti, pengaruh lingkungen, persoalen i bas perpulungen erbahan kondisi pusuhna si la dame ras erbahan urak semangatna guna nampati. Enggo pangen kapna ngukuri dirina saja. Arah kata Dibata siitulisken Paulus enda mulihken guna memotivasi perpulungen. Maka i bas Dibata mpetandaken diriNa bas rupa Yesus Kristus ngatakenca Dibata mereken ruang relasi antara IA ras kita manusia. Alu bage maka, kita pe arus ngasup mereken ruang relasi antara kita ras temanta manusia. Alu mereken ruang relasi antara kita ras temanta, tentu lit persoalen, perbedaan pendapat, ras cara pandang si berbeda. Tapi, si la banci ilupaken kita eme sada sudut bas ncidahken keleng ate. Keleng ateta e teridah arah kita saling nuduhken tanggung jawab radu mendukung, radu memotivasi, radu mediate ras radu nampati asa gegeh si lit. Bage me siniarapken Paulus man kalak Kristen si lit Korinti paksa sie, bage pe arapen Dibata man banta i bas kesempaten enda. Prinsip si deban si perlu igelem ibas ncidahken keleng ate guna nampati eme prinsip kekeluargaan bage pe saling mpehaga sada ras si debanna. Lit sada kuan-kuan ibas kalak karo nina “bagi keleng ate anak beru, page ibas lebeng pe ikurkur” si ertina eme tetap mperjuangken keleng ate aminna ibas situasi si mberat ras situasi si la payo.

IV. DISKUSI-AKSI

1 “Alo-alo Timotius gelah ola metumbur iakapna ras ola mekarus nandangi ia, eme kata si ibelasken Paulus ibas ayat 10 ras 11. Turikenlah tujun kata-kata Paulus enda.

2 Bahanlah aksi nyata guna nampati kalak si deban (si kekurangen) i bas wilayah inganta tading. Banci ilakoken secara pribadi ntah pe secara kelompok.

Usulen Lagu

1) KEE GBKP No. 59: 1-2;

2) KEE GBKP No. 177: 1-2;

3) KEE GBKP No. 381: 2

4) KEE GBKP No. 254: 1-.. (persembahen)

Pdt. Irwanta Tarigan, S.Th.

HP: 0852 6145 8488