Kepatuhen Maba Kiniraturen Ras Kejuah-juahen
Teks : Keluaren 15: 22 – 27
Keluaran 15: 22 – 27
Di Mara dan di Elim
15:22 Musa menyuruh orang Israel berangkat dari Laut Teberau, lalu mereka pergi ke padang gurun Syur; tiga hari lamanya mereka berjalan di padang gurun itu dengan tidak mendapat air. 15:23 Sampailah mereka ke Mara, tetapi mereka tidak dapat meminum air yang di Mara itu, karena pahit rasanya. Itulah sebabnya dinamai orang tempat itu Mara. 15:24 Lalu bersungut-sungutlah bangsa itu kepada Musa, kata mereka: “Apakah yang akan kami minum?” 15:25 Musa berseru-seru kepada TUHAN, dan TUHAN menunjukkan kepadanya sepotong kayu; Musa melemparkan kayu itu ke dalam air; lalu air itu menjadi manis. Di sanalah diberikan TUHAN ketetapan-ketetapan dan peraturan-peraturan kepada mereka dan di sanalah TUHAN mencoba mereka, 15:26 firman-Nya: “Jika kamu sungguh-sungguh mendengarkan suara TUHAN, Allahmu, dan melakukan apa yang benar di mata-Nya, dan memasang telingamu kepada perintah-perintah-Nya dan tetap mengikuti segala ketetapan-Nya, maka Aku tidak akan menimpakan kepadamu penyakit manapun, yang telah Kutimpakan kepada orang Mesir; sebab Aku Tuhanlah yang menyembuhkan engkau.” 15:27 Sesudah itu sampailah mereka di Elim; di sana ada dua belas mata air dan tujuh puluh pohon korma, lalu berkemahlah mereka di sana di tepi air itu.
Tema : Kepatuhen maba kiniraturen ras kejuah-juahen.
Tujuan : Gelah Mamre:
1) Meteh maka kepatuhen penting kal ilebe lebe Dibata.
2) Ncidahken sikap patuh dingen nggejapken ulih simehuli arah kai siilakokenna
I. KATA PENARUH
Ditrick Bonhoffer ngatakenca nina Patuh ertina “melakukan apa yg diperintahkan tanpa bertanya”. Patuh, taat nadangi perintah, gia labagi ukur. Guna nuriken kerna kepatuhen, banci teridah contohna ibas Abram idilo Tuhan ibas kuta Urkasdim nari, tadingken kutandu kade kadendu lawes kam ku ingan si kutuduhken bandu pagi. Aku njadiken kam jadi kalak bayak namura, kesusurenndu enterem, gelarndu termurmur. Kai si ikataken Dibata enda sulit kal ngalokenca, sebab bertolak belakang ras keadaan Abram si umurna enggo 75 tahun, ndeharana 65 tahun, janjiken Tuhan kesusuren nterem.
Bagepe Janjiken Tuhan bana bayak namura tapi tadingken erta bapa. Janjiken Tuhan ka gelar termurmur tapi tadingken kuta. Kerina e susah kal ngalokenca. Tapi Abram patuh man Dibata, modalna berkat eme kiniteken. Adi Dibata nuruhsa pasti babaiNa ku si jore. Emaka berkat ia, tadingkenna kuta bapana, lawes ia ku ingan silanga jelas bana. Enda me gambaren patuh man Dibata. Kenca piga piga dekah sada sadai isehken Tuhan janjiNa. Si lamungkin rikutken pikiren manusia, kerina jadi ibahan Dibata. Abraham reh jorena, bayak namura, enterem kesusurenna, termurmur gelarna. Kepatuhen man Dibata maba kejuah-juahen ras kesangapen.
II. URAIAN TEKS
Bangsa Israil berkat Mesir nari tercatat 600.000 kalak dilaki mbelin saja, langa ikira anak anak ras diberu (Kel. 12: 37). Adi iperkiraken mungkin saja lit teremna 1.500.000 kalak. Tentu ngaturken jelma sibage teremna labo murah. Tapi Musa selaku pemimpin utama, ipercayaken Tuhan mabaisa ndarat i Mesir nari. Dibata tentu labo mpediat Musa sisada mimpinsa, pasti nge ikut Tuhan campur tangan ibas mabai jelma si enterem enda ndarat ibas taneh perbudaken nari.
Ibas perdalanen labo ateta mamang rusur terjadi masalah, terutama kerna pangan inemen silabo kal ipersiapken ibas perberkat nari. Si e erbahnca kalak sienterem jungut jungut. Jumpa lau tapi la terinem erkiteken pagit nanamna. Jungut jungut kalak Israil man Tuhan, sasaren si langsung kena junguti tentu Musa selaku pemimpin siteridah. Musa ngalaken masalah e, labo isinikkenna, labo emosi, labo iatasina alu gegeh ras pemetehna saja, tapi ngadu ia man Dibata. Sue ras janji Tuhan man
bana Aku ras kam, emaka sikugapana pe iendesken Musa man Dibata. Tuhu nyata kuasa Dibata, Ibereken Dibata jalan keluar alu nuduhken sepotong kayu guna itamaken ku lau e. Enda me sebagai tanda pemeliharaan Tuhan lit, sepotong kayu pe banci pakai Tuhan mengubah lau sipagit nanamna jadi lau sintabeh nginemsa. Peristiwa enda sebagai tanda Dibata erdahin itengah tengah bangsaNa.
Selaku pemimpin si militan, labo pemeteh ras gegehna saja asamkenna guna mimpin jelma sibage teremna. Persoalen sinihadaina alu mberat, ipersukutina Dibata, emaka lit rusur jalan keluar ibahan Dibata si erbahanca Musa lajuru ibas perdalanen e. Musa sebagai pemimpin si iangkat Dibata langsung, laterlepas ibas hambaten ras tantangen. Tapi kai gia bentuk tantangen e labo ia cari alasen guna mundur, tapi ia cari solusi guna mengatasi tantangen. Tantangen sinihadapi Musa ipindona peran serta Tuhan guna ngatasi masalah.
Ibas perdalanen Israil, Tuhan mereken undang-undang guna ipedomani, gelah kerina banci idalani ratur sue ras sura sura Dibata. Arah Undang undang e banci teridah kalak sipatuh ras kalak si lapatuh. Kalak Israil iuji ngayak ija kesetianna ras kepatuhenna man Dibata.
Nina Tuhan adi patuh kam dingen erkemalangen man bangku, bagepe ikutkenndu kerina si Kupedahken, maka lakam kena penakit bagi inanami kalak Mesir, tapi ku pasu pasu kam alu mereken kejuah juahen.
Bagepe arah undang undang sini bereken Dibata man kalak Israil berfungsi guna nuduhken dalin, gelah tetap erdalan ibas dalan kebenaren Dibata. Dingen jadi persinget gelah ula mengandalken gegeh ras pemeteh ibas ndalani dalan siman bentasen. Ibas perdalanenen seterusna Tuhan nuduhken ingan simehuli man kalak Israil guna erkemah i Elim. Ije lit 12 sumbul lau ras 70 batang kurma.
Arah pengalamen Israil enda ngajari kalak si tek gelah ngakui bahwa umat Tuhan labo ijamin geluhna tetap ibas suasana dalan senang, tapi banci saja jumpa dalan si susah, sipagit, tapi lit kange sintebu arah litna reh pangan leto ras manna dingen lau lakurang kurang. Ibas perdalanen bangsa Tuhan jelas teridah penemani Dibata ibas sikugapana pe alu ncidahken tanda tiang api tupung berngi ras tiang embun tupung suari. Enda sebagai tanda jaminen suari berngi Dibata labo nadingken bangsaNa.
Tapi sura sura Dibata kuga gia sekali dalan siman bentasen tetap erdalan ibas undang undang Tuhan, tetap mengandalken Dibata, dingen tetap setia man Tuhan. Sitetap setia ibas dalan kebenaren ujungna eme kejuah-juahen ras keselamaten. Tapi kune nilah ibas dalan kebenaren nari,ndarat ibas undang undang nari, konskwensina eme ukumen, labo seh ku taneh perpadanen.
III. PENGKENAINA
Selaku kita warga Negara tentu lit nge Undang undang si arus sipatuhi. Ise singelanggar undang undang lit akibatna, minimal labo tenang. Adi kune mekelek undang undang e ilanggar banci jadi ipenjaraken (kiniseran). Adi kune undang undang e ipatuhi, sitik mbuena minter dat ulihna eme ketenangen ras kemalemen ate. Sada contoh sisederhana: Kalak simengendarai kendaraanna ku tengah kota, arus inget lit rambu rambu dalan siman patuhen, lit kelengkapen alat kendaraan siarus I lengkapi. Lit ka administrasi siarus ipenuhi misalna STNK, SIM. Adi kerina enggo lengkap labo lit ilanggar, pasti tenang kita mengendarai kendaraanta. Tapi dikune labo lengkap, SIM lalit tah STNK tading, Ketenangenta pasti tercuri ibas kita maba kendaran, banci saja grogi kita maba kendaraan bancika tertabrak rumah kalak, kune jumpa polisi.
Bagem pentingna erdalan ibas undang undang simpeturah ketenangen. Pelanggaren undang undang mpeturah kecemasen. Undang undang doni enda pe lit minter akibatna banta, apai denga melanggar undang undang Tuhan, tentu minter kita kebenen kedamen ras kebahagian. Ula kita ngelakoken pelanggaran undang undang Negara, make narkoba, judi, pergaulen bebas, perselingkuhen, mabuk mabuk, illegal loging, korupsi, rsdna gelah tenang kita nggeluh idoni enda.
Kai sierbahanca kita lanai tenang ula kal silakoken. Sebalikna patuhi lah Undang Undang simpeturah kedamaian, kebahagian, ketenangen ras kejuah-juahen, sebagai warga Negara sipatuhi undang undang negaranta. Selaku warga gereja sipatuhi aturen gerejanta. Selaku warga kerajan Surga sipatuhi kuga arusna nggeluh sebagai ahli waris kerajan surga.
IV. DISKUSI
1. Oge mulihi ayat 26. Kai nge hubungenna kepatuhen ras kiniraturen bagepe kejuah-juahen si ijanjiken Dibata?
2. Ngkai maka bangsa Dibata pe rusur ngenanami kegeluhen si pagit? Lange ndia ngasup Dibata erbahanca si ntebuna saja inanami anak anakNa? Turiken pengangkanndu!
Usulen Lagu:
1) KEE GBKP No. 182: 1,2 https://www.youtube.com/watch?v=u_MNUsMo7q0
2) KEE GBKP No. 202: 1,5 https://www.youtube.com/watch?v=EQOdR1sBTbg
3) KEE GBKP No. 320: 1,2 https://www.youtube.com/watch?v=Jg1CTStZ0zc
4) KEE GBKP No. 201: 1-.. (persembahen) https://www.youtube.com/watch?v=cofplVBG0sw
Pdt. Diman Ginting, MA.
HP: 0812 6350 496