SIAJAR-AJAREN ALU KEPENTAREN
Kolose 3:16-17
(Musyawarah Warga Sidi Runggun)
3:16 Hendaklah perkataan Kristus diam dengan segala kekayaannya di antara kamu, sehingga kamu dengan segala hikmat mengajar dan menegur seorang akan yang lain dan sambil menyanyikan mazmur, dan puji-pujian dan nyanyian rohani, kamu mengucap syukur kepada Allah di dalam hatimu. 3:17 Dan segala sesuatu yang kamu lakukan dengan perkataan atau perbuatan, lakukanlah semuanya itu dalam nama Tuhan Yesus, sambil mengucap syukur oleh Dia kepada Allah, Bapa kita.
MODEL PJJ: KESAKSIAN
KATA PERLEBE
I bas gerejanta enggo iaturken maka setiap tahun simelawenna bulan Maret ilakoken me Musyawarah Warga Sidi Runggun (Tata Gereja GBKP Pasal 164). Musyawarah warga sidi runggun e me sarana gelah kerina ngawan perpulungen banci berpartisipasi mereken masuken kerna perdalinen gerejanta subuk si enggo lepas bagepe ku lebe maka arah si e teridah pertumbuhen, kemajun ras buah pelayanen gereja Tuhan reh ulina. Sue ras sistem penataan organisasi gerejanta e me presbiterial sinodal maka kerina keputusen i bas gerejanta i buat i bas persidangen Majelis. Aminna i bas Musyawarah warga sidi runggun enda labo muat keputusen tapi masuken masuken si lit tuhu-tuhu penting dingen meherga. Majelis Runggun saja (Pdt, Pt ras Dk) lako cukup erban keputusen ras tindak lanjut arah program ras kegiaten i tengah-tengah gerejanta. Kini ersadaan runggun kerja sama runggun ngawan perpulungen tuhu-tuhu iperluken.
ISI
Aminna labo Paulus simajekken perpulungen Kolose tapi Paulus ermediate nandangi kegeluhen perpulungen i Kolose. Paulus erban surat man perpulungen Kolose gelah tetap geluh bagi singena ate Tuhan aminna paksa si e perpulungen sangana ngalaken mbue pengajaran sipapak si berkembang i kota Kolose.
Arah suratna enda Paulus ningetken maka erkiteken kalak sitek enggo ngaloken Kristus janah ersada ras Kristus maka genduari kalak si tek i gelari manusia si mbaru, Anak- anak Dibata. Tentu arah status enda arusna teridah min cara nggeluh, pengkebet ras perukurenna lanai seri ras kalak sideban si lenga nggeluh ersada ras Kristus. Kalak si enggo ersada ras Kristus maka kerina dampar kegeluhenna enggo erpalasken alu ndarami ras ndalanken bagi singena ate Kristus. Piga-piga si isingetken i bas Kolose 3:12-17 si itadingken sabab la ngena ate Kristus, e me: merawa, ngamuk, segat ate, cekurak, cakap melket, pergelut, perguak. Jenari adi kita enggo ersada ras Kristus maka teridah min arah kegeluhenta (baca: paken) e me: ate perkuah, mehuli, rukur meteruk, lemah lembut, saber, si alem-alemen salah, sikeleng-kelengen, ras geluh i bas dame. Kerina siajarken Kristus enda me siarusna enggo lit i bas pusuh peraten perpulungen sabab kita enggo ersada ras Kristus.
Adi kata Kristus enda enggo nggeluh i bas kita selaku pribadi bagepe i bas persadanta selaku anak-anak Tuhan maka teridah ije kegeluhen siajar-ajaren, tetap kita ngataken bujur man Tuhan janah arah kerina kecibal geluhta terpuji ras ermulia gelar Tuhan. Kita si enggo nggeluh ersada ras Kristus lanai nggeluh ngikutken sura-sura kedagingenta. Kerina perbahanenta ras pengeranta rehna i bas Kristus nari, janah Ia ka singajarisa ras guna Ia ka kerina si idahiken kita. Alu bage arah kerina kecibal kegeluhenta teridah kesaksin kerna Kristus si enggo nelamatken kerina kalak perdosa.
PENGKENAINA
Keterlibaten ngawan perpulungen i bas ngukuri ras ndahiken dahin dahin gereja Tuhan seh kal pentingna. Erbuena si ikut muat bagin maka reh ngasupna gereja turah, dingen erbuah. Partisipasi perpulungen i bas kegeluhen gereja banci icidahken arah kegeluhenta sekalak sekalak subuk itengah-tengah jabu, masyarakat, gereja ras pendahinta. Kata Kristus e teridah kin jadi usihen ku sekelewetta. I bas gereja si erbage bage kecibal ngawan perpulungenta sicidahken min kita sada persadan siajar-ajaren, ulanai min lit kalak si ngukuri dirina saja ngenca maka ulanai lit kalak simaksaken sura-surana si arus ibegiken. Perlu ikembangken sada percakapen siterbuka, berdialog ras saling menghargai. Tentu la seri gegehta e maka rutang si megegeh nandangi si la megegeh. Si paling penting e me kai pe siilakoken subuk arah pengerana ras perbahanen kerina e tertuju guna ndalanken singena ate Tuhan Jesus ras terpuji gelar Tuhan Jesus saja. Adi kerina enda enggo sidalanken, tuhu banci teridah GBKP aron Dibata, jadi pasu-pasu man isi doni enda, sue ras visi GBKP “GBKP Aron Dibata Jadi Pasu-Pasu Man Isi Doni”
DISKUSI :
- Kai ertina kata Kristus si dem alu kebayaken nggeluh i bas pusuh peratenndu?
- I bas kita ngelakoken musyawarah ngawan i runggunta, kai nge si arus silakoken gelah teridah pengerana ras perbahanenta jadi pasu-pasu man kerina kalak?
USULEN ENDE-ENDEN:
- KEE GBKP No. 209:1, 4 https://www.youtube.com/watch?v=CW_YNHCWKR0
- KEE GBKP No. 249:1, 5 https://www.youtube.com/watch?v=JDmwjwQyr34
- KEE GBKP No. 381:1- https://www.youtube.com/watch?v=PXegIPBQnCU
- KEE GBKP No. 68:1, 3 https://www.youtube.com/watch?v=J7L2J2z_Xns
Pdt. Rehpelita Ginting, S.Th, M.Min
HP/WA: 08129391004