BULATKEN UKUR ERBAHAN PERDAMEN
Masmur 34:12-15
(Sasaran Pelayanan GBKP tahun 2025 poin III: Konflik Lokal di Selesaikan Secara Lokal)
12 Marilah anak-anak, dengarkanlah aku, takut akan Tuhan akan kuajarkan kepadamu!13 Siapakah orang yang menyukai hidup, yang mengingini umur panjang untuk menikmati yang baik?14 Jagalah lidahmu terhadap yang jahat dan bibirmu terhadap ucapan-ucapan yang menipu;15 jauhilah yang jahat dan lakukanlah yang baik, carilah perdamaian dan berusahalah mendapatkannya!
MODEL PJJ: BUDAYA
KATA PERLEBE :
Kerina manusia ersura-sura gelah geluhna dem keriahen ras kesangapen, tapi kinatana labo kerina banci ngenanamisa, termasuk kalak Kristen pe megati lanai ngenanami keriahen ras kesangapen e. Salah sada penyebab kita kebenen keriahen ras kesangapen nggeluh e me turahna ‘konflik’ ntah pe pertentangen siterjadi antara 2 ntah lebih pihak si umumna jadi erkiteken sumber daya, kepentingen, struktur, nilai-nilai (budaya, prinsip ras keyakinan) si pelain-lain ntah pe erkiteken informasi si la payo apaika relasi si la mehuli, ras sidebanna. Kai dage si arus silakoken gelah konflik enda la erbahanca kita kebenen keriahen ras kesangapen?
ISI :
I bas ogenta enda e me Masmur Daud, pemasmur ngajari kita kerna cara mpermuliaken Tuhan, gelah gedang umur bagepe gelah ngenanami keriahen ras kesangapen. Sabab enterem erpengakap la sangap nggeluh, si erbahanca turah kekecewan man Tuhan, lanai lit semangat, susah akap nggeluh, jenari sician-cianen ras mpeturah perubaten, e maka kendelen ate si engkuasai kegeluhen. Tujun Pemasmur nehken pengajaren enda, gelah kerina erkemalangen man Tuhan, sabab erkemalangen man Tuhan erbahansa malem ate ndalani kegeluhen, alu cara:
- Ola belasken kata-kata jahat: Kata-kata/Pengerana iumpamaken bagi dilah, aminna kitik gia dilah e, mbelin ngaruhna kerna si mehuli ras si la mehuli, sada kuta banci sikap ntah ceda. Adi kata-kata jahat tentuna encedai diri ras kalak sideban janah banci mpeturah perubaten.
- Ola Erbual: Erbual banci njadiken papak ras guntar subuk jabu, keluarga, kuta, sektor, runggun ras sidebanna.
- Tadingken kejahaten: Setiap perbahanen kejahaten e me biak-biak dosa sierbahan keguluten, kesusahen bagepe perubaten.
- Lakoken si mehuli: Perbahanen si mehuli e me perbahanen si bagi sura-sura Dibata, ija lit perbahanen si mehuli, ije lit kiniulin, kesenangen, kesangapen ras kemalemen ate.
- Bulatken ukur erbahan perdamen: Kalimat enda biakna perentah gelah idalanken. Perdamen simaksudken enda e me:
- Erdame ras Dibata: Lit hubungen si mehuli ras Dibata.
- Erdame ras teman manusia: Sikeleng-kelengen alu la lit perubaten.
Alu Kata Dibata e, kita ibabai nggargari pusuhta si mpeturah kesedaren dirinta maka alu mpermuliaken Tuhan-nadingken kejahaten ras ngelakoken si mehuli kepe kita ndatken keriahen ras kesangapen nggeluh (Bdk. Masmur 1:1-2).
PENGKENAINA :
- I bas budaya Karo, salah sada si man kemelanken e me rubat, sabab alu perubaten teridah maka lanai teridah biak mehamat, erkeleng ate ras buni-buni pe banci teridah. Erkiteken sie adi lit perubaten mis nge lit “inisiatif” (anak beru) guna ndameken ntah purpursagekenca. Jenari adi nggo ngerana kalimbubuna minter nge surut ukur si rubat e. Jenari i bas kiniteken pe kalak rubat (berkonflik) e me tanda-tanda kurang dewasa i bas ngaloken ras ngelola perbedaan (bdk. Sasaran Pelayanenta tahun enda).
- Konflik pe berdampak man pribadi si terlibat bas konflik mpeturah ate ceda/kitik ukur simerugiken subuk kesehaten tendi ras kula, ncedai hubungen ras pribadi si deban, ras sidebanna. Konflik pe ncedai jabu seh maka melala anak-anak jadi korban konflik orangtua; sangkep nggeluh pe banci si tembehen apai ka adi berlaku biak “si tungkat-tungkat galuhna”. Bage pe persadanta i bas Gereja si oratna meriah, akibat konflik bas Gereja pe lanai iakap meriah. Apaika adi konflik internal bas Runggun la terdungi seh maka isehken ka ku Klasis ras Moderamen erbahansa mbue kal ‘energi’ pemimpin gerejanta terkuras i bas ndungi konflik padahal energina arusna ipakeken guna pengembangen pelayanen Gerejanta.
- Kalak si nggit erkonflik biasana pusuhna pe dem alu konflik, la lit dame, benar akapna bana dingen meganjang ukurna, la ngasup ngaloken kalak i bas kekurangen dingen kelemahenna. Kalak sibage cenderung ‘melukai’ kalak si deban subuk alu kata ras/ntah perbahanenna. E maka labo ia ngasup erdame subuk ras dirina bagepe ras kalak si deban, apai ka guna maba dame man sekelewetna, tentu labo ia ngasup.
- Tapi kalak sipusuhna dame erkiteken ia sedar nggo leben ngaloken perdamen ras Dibata arah kematen ras kekeken Tuhan Jesus, ia tetap erjuang mpermuliaken Tuhan alu nadingken kejahaten ras ngelakoken si mehuli, dingen bulat kal ukurna erbahan perdamen. Kunci sukses erbahan perdamen e me keleng ate si mpengasup kita ngalemi. Bagi perbahanen Dibata nehken keleng ateNa si mbelin alu nggalari utang dosanta alu lunas i kayu persilang, bagem pe oratna kita mpermuliaken Tuhan alu nggit ngalemi salah kalak si deban, arah kita nggit ngalemi em tandana kita anak-anak Dibata si maba dame man doni enda.
- Konflik i Runggun/sektorta banci saja jadi sabab kinata perbedan pandangen/perspektif antara sada ras si debanna. Janah arah perbedaan prespektif mbelin kal ngaruhna mpeturah konflik. Saja, kedewasanta i bas ngaloken perbedaan sumber daya, nilai-nilai, kepentingen, relasi, struktur bagepe informasi ras kesiapen para pihak ncakapkenca (mediasi) e me pintu awal turahna perdamen diantara para pihak si berkonflik. Pentingna Sidang Majelis Runggun (SMR) sebage sarana mpersada pengidah ras pengangkan seh turah kiniersadaan arih guna erdame perlu kal iberdayaken ras ibudayaken. Alu tujun mpermuliaken Tuhan, ras ndatken kedamen ras kemalemen ate. E maka marilah sibulatken ukurta kerina erbahan perdamen.
DISKUSI:
- Turikenlah antusen tema: bulatken ukur erbahan perdamen!
- Turiken pengalamenndu i bas ndalanken tema PJJ enda. Kai ulihna?
USULEN ENDE-ENDEN:
- KEE GBKP 63:1,5 https://www.youtube.com/watch?v=pNKHgsD55gc
- KEE GBKP 59:1 https://www.youtube.com/watch?v=egEKy53QGVg
- KEE GBKP 281:1-2 https://www.youtube.com/watch?v=zHW25Y9Rbzk
- KEE GBKP 270:1,3 https://www.youtube.com/watch?v=5fIrm4LpneU
Pdt. Mestika N. Ginting, S.Th. M.Psi
HP/WA: 081375139574