Bahan PJJ 16-22 Februari 2025

February 17, 2025 Writer-1 Sektor Betlehem, Sektor Filipi, Sektor Galilea, Sektor Hermon, Sektor Kana, Sektor Korinti, Sektor Roma, Sektor Yerusalem 0

KEP-KEP ALU MEHULI

1 Timotius 6:20-21

(Pengurus PJJ “Pemilihen, Kalak Si Jadi Pengurus”)

6:20 Hai Timotius, peliharalah apa yang telah dipercayakan kepadamu. Hindarilah omongan yang kosong dan yang tidak suci dan pertentangan-pertentangan yang berasal dari apa yang disebut pengetahuan, 6:21 karena ada beberapa orang yang mengajarkannya dan dengan demikian telah menyimpang dari iman. Kasih karunia menyertai kamu!

 

MODEL PJJ: KESAKSIAN

 KATA PERLEBE :

Dahin ngurus labo menukah, sabab si man urusen e labo barang mati tapi siman urusenta i bas gereja GBKP enda e me jelma sierbage bage kal biakna, e maka labo menukah. Adi kita ngasup jadi pengurus arus ka nge kita megenggeng ras la mekarus i bas ndahiken dahin Tuhan.  Perlu kal kesetiaan i bas ndahiken dahin selaku pengurus PJJ sabab dahin e dahin Dibata siilakoken kita itengah gerejaNa. Gelah perpulungen e la murde tapi erdalan kerina alu mehuli kenca kita ipilihNa jadi singurusi perpulungenNa.

Lit kuan kuan Karo ngatakensa: “la pernah rugi erbahan si mehuli man kalak si deban”. Iman milik pribadi buah dari iman milik orang lain” kiniteken e kita punana tapi ulih kinitekenta e, e me ernanam geluhta man kalak si deban.

 ISI :

Timotius selaku kalak si nguda denga tetap erpenggurun man Rasul Paulus selaku bapa rohanina. Janah selaku bapa rohani ipersingetina Timotius gelah tutus ndahiken dahin Tuhan “kepkeplah alu mehuli kai si enggo iendesken jadi tanggung jababndu”ija tanggung jabab e, e me:

  • Ngajarken pengajaren si mehuli, gelah sinilakoken perpulungen e pe mehuli
  • Ula ernalem man gegeh ras erta, janah ula meganjang ukur, tapi ernalemlah man Dibata alu bulat ukur.
  • Meriahlah ukur perpulungen e guna mere, janah bayak pe i bas perbahanen simehuli.
  • Tadingkenlah percakapen percakapen si la erguna si la ngena ate Dibata
  • Ola nggit ersoal kerna perkara-perkara si niakap kalak e “pemeteh” tapi situhuna labo. Kai sinitekanken Paulus nandangi Timotius enda gelah kerina perpulungen e la ceda erkiteken lit pengajaren si la payo i bas paksa Timotius ngelai i tengah tengah perpulungen. Kata enda me kata pendungi sibelasken Paulus man Timotius guna njagai kai si enggo ipercayaken man bana. Ngelakoken kerina alu tutus, pengajaren payo e arus i jaga, ras tetap iberitaken, ipeseh alu tegas ras jelas dingen tetap setia ngelakokenca.

Kesetian siniarapken Paulus nandangi Timotius e me mejelimet, pang nehken kebenaren anem gia ia nguda denga, ras tetap konsisten. Perintah Paulus kerna kesetian e me tetap nandai ras ngangkai kai si enggo ipercayaken man bana e me kerna tanggung jabab njagai pengajaren ras pang nuriangi guru-guru perguak sinehken pengajaren si la payo.

Tadingkenlah percakapen si la erguna si la erpemeteh, gelah min Timotius metenget nandangi kalak si ngataken dirina benar tapi situhuna labo payo perbahanenna e. Si enda ngataken maka Timotius arus tuhu tuhu nuriangi percakapen si la erguna ras sierlawanen (la lit nilaina), ija kalak si mentingken pendapatna gelah ndatken pengakun bas perpulungen e nari. Jadi Paulus mpersingeti Timotius gelah tetap pang, ras jadi teladan kinitekan man perpulungen anem gia ia nguda denga. Adi lit kalak si nundalken Tuhan ras nilah i bas kinitekenna nari e jadi erkiteken nggo peltep hubungenna ras Tuhan, peltep arapenna ku Tuhan seh maka lanai diatena mbangunca mulihi, kerah me ia dungna itundalkenna Tuhan i bas kegeluhenna.

I bas ndahiken dahin Tuhan e Timotius tetap ipegegehi maka Tuhan tetap sinjagai ras engkawali ia i bas kesetianna ndahiken dahin Tuhan. Jadi kata perpudi sinipeseh Paulus enda man Timotius gelah tetap kesetianna man Tuhan i bas ngelai perpulungen ntah kai pe siman alanken i bas paksa sie.

 PENGKENAINA :

Seh ka me kita i bas pemilihen pengurus perpulungen jabu-jabu, ija kita selaku aron Dibata ndahiken dahin Tuhan i tengah-tengah sektorta. Setia ras la mekarus dingen tutus ate ndahiken dahin Tuhan. Pengurus perpulungen jabu jabu e me singaturken dahin pelayenen i bas sektor, perlu kinipangen i bas nuriangi si la payo, erbahan program i bas sektor, jadi utusen guna musyawarah sidi warga runggun, bagepe aktif ras kreatif i bas ngaturken dahin-dahin ras program pelayanen. Kesetian i bas ndahiken dahin Tuhan la terjeng ikut perpulungen tapi pe arus ia muat bagin jadi teladan i bas ngurusi erta-erta Tuhan si meherga e me perpulungenNa. Adi pengurus si tutus ndahiken dahin Tuhan pasti ulihna pe reh teremna kalak si reh ku perpulungen, seh maka teridah me lias ate Dibata i bas persadaan e. Ndele ukurna la reh ku perpulungen erkiteken nggo meriah iakapna reh ku perpulungen. Lit lalap datna nanamna, Berita Si Meriah e erbahanca meriah ukurna reh perpulungen jabu jabu. Tentu keriahen ukur nari nge siturah i bas perpulungen e janah tuhu tuhu igejapkenna lias ate Dibata i bas kegeluhenna. Adi kalak si nggeluh i bas lias ate Dibata tentu kegeluhenna pe lit bedana ras kalak si la nggejapken lias ate Dibata. Tema PJJ ta ngiahken kita “Kep-Kep Alu Mehuli “ertina la kita setengah ukur i bas ngelai, tetap ergiah giah katawari paksa pe. Sigejapken lalap jadi sada tanggung jabab i bas ngelai la sitanggungi janah tetap sibereken simehulina guna kemulian man Tuhan. Gelah kena ku bas Misi GBKP point C e me: “memperkuat semangat Gotong royong antar sesama jemaat dan masyarakat” arah terpilihna pengurus PJJ i bas sektor tentu lit ije kerja sama subuk pengurus PJJ ras Pertua Diaken radu ras ngelakoken pelayanen la ngenca i bas sektor tapi seh ku darat e me man masyarakat si lit i sekelewatna. Radu ras perpulungen kerina “bergandengan tangan” sabab perpulungen, pengurus ras Pertua Diaken e me sira si ernanam man kalak si lit i doni enda.

 DISKUSI :

  1. Kai nge tujun rasul Paulus nulisken suratna man Timotius? Turiken!
  2. Kai nge igejapkenndu selaku perpulungen adi pengurus PJJ e sikap, pang, kreatif ras tutus ndahiken dahin Tuhan. Kai si perlu sipekena i bas sektorta dahin pengurus PJJ?

 

USULEN ENDE-ENDEN: :

 

 Pdt. Natallidna Tarigan, M.Th

HP/WA: 085297075555

Post Views: 2,215