Ngaturken si ertugas ras perlengkapen guna kiniraturen kebaktin
II. Kebaktin
1. Kata Penaruh
Mejuah-juah man banta kerina perpulungen ni Tuhan Jesus si enggo ersada selaku keluarga Dibata i bas Gereja Batak Karo Protestan. Sikataken bujur man Tuhan sabap kita tetap mejuah-juah dingen banci ka si umputi kiniersadanta i bas perpulungen alu ngelakoken Pekan Kebaktin Penatalayanen GBKP tahun 2025. Tema Umum Pekan Kebaktin Penatalayanen tahun 2025 enda e me erbahan perdamen. Perayaken tema enda e me segelah kerina anggota GBKP jadi pelaku perdamen. Palasna e me erdandanken Dibata pe nggit erdame ras kita manusia e maka IjadikenNa manusia jadi temanNa. Enda me isehken man banta i bas paksa enda. Dame e tuhu-tuhu mehuli. Si bengketi kebaktin enda alu pengarapen segelah Dibata tetap reh mpegegehi ras masu-masu kita.
(Tupung rende iendesken perlengkapen kebaktin man si maba kebaktin)
Puji Dibata e, Raja mbelin si mulia
Kita kerina erjimpuh ertoto ku IA
Pulunglah min! Rende ersurak me kin
K’rina me kam manusia
Puji Dibata e, si ngrajaisa kerina
E maka kerajang jelma mehuli jadina
Rajanta e, numpak ginemgemNa nge
Em peraten bagidina
3. Votum, Salam, Invocatio
L: Pekan Kebaktin Penatalayanen wari pemena enda ibenaken i bas gelar Dibata Bapa sinjadiken manusia jadi temanNa, i bas gelar AnakNa Jesus Kristus si jadi teman manusia, ras i bas gelar Kesah Si Badia singajari ras simpegegehi manusia jadi teman Dibata.
Perkuah ate Tuhan Jesus Kristus, kekelengen Dibata Bapa ras kerembaken Kesah Si Badia ras kita (kam) kerina gelah. Amin
L: Sabab bage pengkelengi Dibata doni enda, e maka iberekenNa AnakNa Sitonggal, gelah ola bene ise pe si tek man Bana, tapi gelah dat kegeluhen si tuhu-tuhu si la erkeri-kerin (Joh. 3:16). Meriah ukurta ngaloken perbahanen Dibata, e maka mari si puji Ia alu radu ras kita ngendeken
Mari min dage tangtangi, Kam Tuhan mulahisa Aku pe, aku pe,
Pulahi min aku pe
— Perpulungen tedis —
6. Kata Dibata Kerna KininggitenNa Ersada Ras Manusia
L :Tole nina TUHAN, “Marilah maka si dungi cakapta enda. Kam enggo erkubang-kubang ibahan dosa, tapi kuperidi kam maka bersih bagi salju. Aminna gia erkiteken dosandu kam enggo mbiring bagi tengguang, mulihi kam jadi mbentar bagi kapas (Jes. 1:18).
P: Malem tuhu ate kami Tuhan i bas kam nggit ngalemi dosa kami si erbahanca kami banci ersada ras Tuhan ulu kegeluhen.
L: Meriah ukurta enggo ialemi Dibata salah dosanta si erbahan kita banci ersada ras Ia. Si puji Ia alu rendeKEE No. 21: 1, 2
Bena-benana nari Dibata nepa manusia maka ijadikenNa manusia jadi temanNa (bdk. Kej. 1:26-28). Erdandanken si e maka Dibata mereken kempak manusia biak-biak lako banci nandai Dibata (Genduari Sijadikenlah manusia si sentudu ras tempasTa, si menam seri ras Kita), segelah banci meteh sura-sura Dibata dingen pe banci erbahan hubungen ras Dibata. Alu litna kata nandai ras hubungen enda encidahken maka Dibata njadiken manusia jadi temanNa i tengah-tengah doni enda.
Erkawiten ras si e maka tupung manusia ndabuh ku bas dosa erkiteken ilanggarna perentah Dibata maka Dibata tetap encidahken perkuah ateNa. Enda tangkas teridah i bas perpadanen Dibata ras Nuah kenca jadi banjir si mbelin i bas Dibata nasapken kerina manusia seyakatan Nuah ras keluargana. Perpadanen e, e me nina Dibata: “Ndigan pe lanai Kubahan kelenglengen ndemi doni. Genduari erpadan Aku, ndigan pe lanai kam Kutembehi; lanai kam Kuukum, lanai Kurawai.” Arah perpadanen Dibata enda teridah maka sekali ngenca e me tupung paksa Nuah nggeluh lit jadi banjir si mbelin e me ukumen Dibata kempak manusia i bas manusia enggo mbau lagu langkahna. Terdauhen teridah keleng ate Dibata maka niNa: “Bicara deleng-deleng miser gia, uruk-uruk pe mundu-undu, tapi keleng ateKu tetap la miser i bas kam nari, janah padan dame si Kubahan lalap paguh la mundu-undu.” Bage nina TUHAN si ngkelengi kam tetap”. Keleng ate Dibata e me tetap. Di kune kai pe jadi i bas doni enda maka keleng ate Dibata tetap kempak manusia. Enda nuriken maka ndauh belinen keleng ate Dibata asangken pernembeh ateNa. Sabab bage pengkelengi Dibata doni enda, e maka iberekenNa AnakNa Sitonggal, gelah ola bene ise pe si tek man Bana, tapi gelah dat kegeluhen si tuhu-tuhu si la erkeri-kerin (Joh. 3:16). Keleng ate Dibata (anugerah) ibereken Dibata kempak doni alu nuruh AnakNa Si Tonggal ku doni enda jadi seri ras manusia jadi kahul kempak manusia.
Tangkas maka i bas keleng ateNa me Dibata erdahin mereken keterkelinen kempak doni enda alu mereken AnakNa Sitonggal e me Jesus Kristus. Dage, bagi nai dosa erkuasa desken sekalak raja si maba manusia ku bas kematen, bage me pe lias ate Dibata genduari enggo erkuasa desken sekalak raja si ngerembakken manusia kempak Dibata, janah mabai kita ku bas kegeluhen si tuhu-tuhu si rasa lalap arah Jesus Kristus Tuhanta (Rom. 5:21). Upah dosa siilakoken manusia erkiteken ngelanggar perentah Dibata la ngadi terjeng je tapi i bas lias Dibata iberekenNa kegeluhen si ialoken manusia alu kiniteken man Dibata.
Pengangkan si tersinget enda me pe isehken rasul Paulus kempak perpulungen i Korinti si megati denga lit pengangkanna maka manusia terkelin erkiteken perbahanenna labo erkiteken perkuah ate Dibata. Erdandanken perpulungen i Korinti enterem kalak pentar e maka megati otakna (kepentaren doni) dominan ibandingken pusuh (kepentaren surga). E maka la teralokenna Kristus mate guna manusia sabab e la logika iakapna. Perukuren si bage me ilayasi Paulus i bas suratna kempak perpulungen e.
Paulus nuriken maka manusia enggo erdame ras Dibata i bas Kristus. Sekalak manusia e me Kristus enggo mate guna kerina manusia (bdk. 2 Kor. 6:15). Perdamen Dibata ras manusia si ilakoken Kristus maba piga-piga perubahen i bas manusia e me:
– Pengergan
Adi manusia enggo erdame ras Dibata maka ia enggo ngasup ngidah ras ngaloken Kristus sebage Pribadi si badia, dem lias ate, erkuasa, ernanam kempak manusia i bas kegeluhen, kematen ras kekekenNa bage pe ermulia i bas kinirajan surga. Adi ope lit perdamen e manusia khususna rasul Paulus ngidah maka kai si ilakoken Kristus e sia-sia dingen kebodohen sabab tek ia maka keselamaten lit i bas Undang-undang Taurat labo i bas Kristus. Kerinana e berubah kenca Paulus erdame ras Dibata.
– Male jadi mbaru
Ope lit perdamen Dibata ras manusia maka manusia e me tinepa si male si ertina ikuasai dosa dingen nggeluh i bas awih-awih kematen. Tapi status e berubah kenca Kristus ndameken Dibata ras manusia. Manusia si enggo nggeluh i bas i bas Kristus jadi tinepa si mbaru dingen nggeluh i bas awih-awih kegeluhen. Dingen ialoken kegeluhen e i bas kiniteken man Dibata.
– Imbang jadi teman
Status manusia pe berubah arah imbang Dibata jadi temanNa kenca Kristus erbahan perdamen antara Dibata ras manusia. Gelgel nari ope lit perdamen e maka manusia nggeluh ikuasai dosa, kematen dingen iblis e me penguasa kegelapen. Tapi kenca lit perdamen e, maka manusia enggo iteruh lias ate Dibata, kegeluhen ras Dibata e me penguasa kegeluhen. Manusia si enggo erdame ras Dibata enggo jadi teman Dibata.
Enda me berita perdamen si enggo iendesken Dibata man rasul Paulus ras teman-temanna. Berita si arus ka isehken kempak kerina jelma manusia segelah banci nggeluh i bas perdamen ras Dibata.
Perdamen si ilakoken Kristus situhuna cukup guna kerina manusia i bas doni enda tapi kalak si tek man Dibata ngenca singalokenca. Ertina keleng ate Dibata i bas Kristus arus ialoken alu tek man baNa. Jenari iumputi alu kegeluhen si mehuli singena ate Dibata.
Tema Pekan Kebaktin Penatalayanen wari pemena enda e me: Dibata njadiken manusia jadi temanNa. Arti kata teman secara harpiah adalah orang yang kita kenal dan saling berhubungan satu dengan lainnya. Hubungan disini dalam arti positip. Teman adalah orang yang selalu mengerti akan diri orang lain. Bukan hanya dalam suka namun dalam dukapun seorang teman berusaha untuk menghiburnya. Selalu peduli akan temannya dan saling membantu satu dengan lainnya (https://www.kompasiana.com/7 September 2024).
Dibata njadiken manusia jadi temanNa situhuna ertina lebih mbages ibandingken si tersinget i datas. Dibata tuhu-tuhu nandai manusia erkiteken Ia me si nepa manusia. Dingen ietehNa erbahan hubungen ras manusia kenca manusia ndabuh ku bas dosa e me alu erbahan perdamen. I bas kinatana pe maka Dibata tetap nampati ras mpegegehi manusia. Alu penjelasen enda tangkas kal maka pelin-pelin si mehuli jadi man manusia kenca Kristus ndameken Dibata ras manusia. Dibata ndameken diriNa ras manusia erdandanken Dibata e, e me dame. E maka ersura-sura Ia tetap i bas doni enda khususna i bas kegeluhen manusia lit dame. Dame si mabai lit hubungen si mehuli sapih-sapih manusia, manusia ras tinepa Dibata si deban bage pe manusia ras Dibata. Litna dame enda peturah kinijuah-juahen i tengah-tengah doni enda bage pe ermulia gelar Dibata.
Rikutken si e oratna dame jadi perayaken kerina manusia. Amin gia isedari labo murah njadiken doni enda tuhu-tuhu dame sabab lit ambaten-ambaten si man bentasen. Lit manusia si meganjang ukur, manusia si egois, manusia si hedonis, manusia si rangap ras si debanna. Tapi i bas Pekan Kebaktin Penatalayanen wari pemena enda iajuk kita tandana kita enggo erdame ras Dibata maka kita jadi teman Dibata maba dingen peturah dame itengah-tengah doni enda. Alu kengasupenta si pelain-lain e jadi kebayaken si peturah kininggiten ersada ras kerina manusia alu belas-belas: keperluken kerina temanku manusia. Selamat jadi teman Dibata si maba dame.
Soli Deo Gloria.
—- Perpulungen tedis —-
9. Pengakun Kiniteken
—- Perpulungen kundul —-
10. Persembahen
a. Seh paksana kita ngataken bujur man Dibata arah persembahenta. Kata Dibata si jadi palas man banta e mekap: ”O senina- seninangku, nginget perkuah ate Dibata si mbelin si isehkenNa man banta, kupindo man bandu: Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata sue ras biakndu selaku mahluk si rukur” (Rom. 12:1).
b. Tupung kita ngendesken persembahen pengataken bujurta man Tuhan, ras kita Rende
Bujur ningkami ka, Man baNdu o, Bapa, Si mulia
Si mere dalan e, Arah anakNdu e, Ku surga e
Bahanlah min tetap, Kam kukelengi kap, Rasa lalap
Senang geluhku e, ‘Di tanNdu negu pe, Ku surga e
Tergejap me tuhu, Penegu-neguNdu, Senang aku
Mejuah-juah me, Ras isi jabu pe, LiasNdu nge
c. Pertoton Persembahen ras Sapaat (ibabai Pengurus PJJ).
– Kerna persembahen
– Gelah kerina anggota perpulungen GBKP tetap nggeluh ersada ras Dibata.
– Gelah kerina anggota perpulungen GBKP ngasup ndalanken sasaren pelayanen GBKP tahun 2025 e me dewasa menerima perbedaan.
– Kerna jabu kundulen wari enda ras wari pepagi
– Kerna si turah i bas perpulungen
—- Perpulungen tedis —-
11. Tekad: Tetap Jadi Teman Dibata
L: Dibata njadiken manusia jadi temanNa i bas njaga dingen ngusahai doni enda.
P: Erpadan aku Tuhan tetap nggeluh i bas si ngena ateNdu gelah metunggung aku jadi temanNdu njaga dingen ngusahai doni enda.
L: Dibata i bas perkuah ateNa enggo erdame ras manusia segelah metunggung kita jadi temanNa.
P: Erpadan aku Tuhan tetap ngergai perkuah ateNdu njadiken kami manusia jadi temanNdu alu kami nggeluh i bas dame. Dame diringku, dame ras Dibata, dame ras teman manusia bage pe dame ras kerina tinepa Dibata. Amin.
