LITURGI RAS RENUNGEN
PEKAN KEBAKTIN PENATALAYANEN
WARI PEEMPATKEN, RABU 22 JANUARI 2025
Ngaturken si ertugas ras perlengkapen kebaktin
Kata Penaruh
Mejuah-juah man banta kerina senina dingen turang kekelengen Tuhanta Jesus Kristus. Si kataken mejuah-juah janah sisalamen kita ras teman si lit i bas kemuhen ras kawesta. Perpulungen Tuhan Jesus Kristus arus nggeluh sempabu sabab kekelengen ras pasu-pasu Dibata siteptep wari sialoken ras sinanami. Amin la seri kerina kecibal geluhta, perbeben ras keriahen sisangana sinanami tapi banci kita sada ras si debanna sikeleng-kelengen, sisampatsampaten. Jadi teman dingen erteman ras kerina kalak khususna kita i bas perpulungen enda. Bengket kita ku bas pekan kebaktin penatalayanen enda alu maba pusuh si dame dingen nggit erdame ras si e pe. Sibengketi kebaktinta alu ngadap ku Dibata arah pertotonta.
Ertoto
Rende KEE No. 319:1-2
https://www.youtube.com/watch?v=WbeyF6brUIU
1) Sada soranta muji Dibatanta, IA jine sinjayam keg’luhenta
Lalap IA ‘ngkelengi tinepaNa, Maler me kap tetap pasu-pasuNa
2) Sada soranta muji Dibatanta, S’lamat kita ban perkuah ateNa
AlokenNa kita jadi anakNa, Maler me kap tetap pasu-pasuNa
VOTUM, SALAM RAS INVOCATIO
L: I bas gelar Dibata Bapa sinepa langit ras doni, i bas gelar Jesus Kristus si enggo mperdameken Dibata ras manusia, ras i bas gelar Kesah Si Badia si jadi temanta i bas ndalani kegeluhen i doni enda. Perkuah ate Tuhan Jesus Kristus, kekelengen Dibata Bapa ras kerembaken Kesah Si Badia ras kita (kam) kerina gelah. Amin
P: Amin, Amin, Amin (iendeken)
https://youtu.be/yA6EoOVKrAU
L: Adi merawa kam, ula seh erdosa. Janah ula simpan rawandu seh ben wari (Ep. 4:26)
Erpalasken kata Dibata enda sipuji IA arah KEE No. 201:1,4
https://www.youtube.com/watch?v=29qxmvbp-c4
1) Malem ate tuhu-tuhu, Siernalem man baNdu
Kam Dibata si ‘njadiken, langit ras doni enda
Sal-saliNdu pusuh kami, Maka t’rangNdu tergejap
Kalak si tek la kap bene, ‘Ban kelengNdu e tetap
4) Aloken Kamlah o, Bapa, Kuendesken geluhku
KesahNdu min ngajarisa, Lah kuteh nembah baNdu
Pasu-pasu min kerina, Daging, ukur, tendingku
Gelah arah tan ras kata, kupuji gelarNdu
MANUSIA ITEPA NGGELUH ERTEMAN
L: Sanga Dibata njadiken manusia, ikatakenNa maka la mehuli manusia nggeluh sisada-sada, e maka ijadiken Dibata teman si
cocok man bana.
P: Bage me manusia nggeluh erteman subuk teman geluh, teman senina, teman meriah bage pe i bas kesusahen.
L: Nina Dibata man manusia i bas ndalani kegeluhenna “kelengilah temanndu manusia bagi kam ngkelengi badanndu”
P: Sikeleng-kelengenlah kami bagi ersenina. Silebe-lebenlah kami bas mpehaga teman
L: Sikataken bujur man Dibata si enggo mereken teman man banta dingen jadi teman i bas kegeluhenta enda, arah KEE No. 71:1
https://www.youtube.com/watch?v=AzAxheJsv-w
Teman si sada perukur, si ndarami senang je
Ku bas Jesus legi ukur, maka jumpa dame e
IA kapen ikutenta, kita kap ngawanNa e
Tuhan Jesus kap Gurunta, kita ajar-ajarNa e
KURANG PENTAR I BAS ERTEMAN (Pengakun Dosa)
L: I bas geluhta enda, perlu kal kita lit temanta, e maka erteman kita. Tapi megati jadi, mesera kal kita jumpa teman si setia, sepenggejapen, la saja teman tawa tapi pe jadi teman tangis. Si renungken, enggo nge kita jadi teman si setia nandangi kalak si deban?
…..paksa teneng….
L: Si inget ka, teman si setia nge sedekah enda teman-temanta? Banci saja pernah luka pusuhta erkiteken ia, alemi ia, totoken ia….
P: Alemi kami Tuhan, langa kami jadi teman si setia, megati kami ngukuri diri kami saja, ula Kam ertaktak kerna kelasetian kami…
L: Sidahi Dibata siakuken salah lepakta alu rende arah KEE No. 182:1
https://www.youtube.com/watch?v=u_MNUsMo7q0
(Iulihi 2 kali)
O, Tuhan Kam tetap, tedehku man baNdu
Arapku lalap Kam, nemani geluhku
Reff. O, Tuhan rasa lalap, geluhku temani
Ola tadingken aku, ras Kam tetap
NGASUP NGALOKEN KALAK SI DEBAN (Pengalemi Dosa)
L: Dibata la pernah naktaki salah lepakta, kekurangenta, man kalak si nggo ngaku dingen erkadiola isehkenNa pedah i bas Roma 15:7
‘Bagi Kristus enggo ngaloken kam, kam pe alokenlah temanndu sapih-sapih kam gelah terpuji Dibata’.
Erpalasken kata enda, sipuji Dibata arah KEE No. 200:1,3
https://www.youtube.com/watch?v=KptMruJqW4c
1) O, Tuhan babai min, dalanku ‘bas doni
Labuh ras la kesah gegehku
SoraNdu terbegi, man bangku nemani
Lalap Kam, me ku ban temanku
3) O, Tuhan bengketi, Pusuhku min gelah
Maka kualoken KataNdu
PedahNdu lalap min, Kugelem la pulah
Lalap Kam, me ku ban temanku
NGOGE KATA DIBATA SIPEMENA Matius 5:21-26 (Sekalak Saitun)
L: Ketuahen kalak simegiken kata Dibata dingen simakekenca i bas
geluhna siteptep wari, haleluya
P: Haleluya, Haleluya, Haleluya (iendeken)
https://youtu.be/OBGCk3-5jX8
Kotbah : Kejadin 26:26-33
Tema : Tetap Erteman
KATA PENARUH
Pernah nge kita sikitiken ukur? Pernah nge kita rubat? Kerina manusia tinepa Dibata pernah nge ngenanami : kitik ukur, megelut, ernembeh ate seh maka la siangkan dingen rubati. Engkai maka enda jadi? Tentuna kai sijadi ras sinanami la bagi ukurta. Enda kerina lit hubungenna ras kalak si deban: ndehara ntah perbulangen (teman nggeluh), seninanta, teman erdahin, sibalengen, ras si debanna. Kerina enda kalak sindeher ras kita. Erbage hal sierbahanca kita la siangkan. Erlajar kita arah pekan kebaktin penatalayananta tahun enda salah sada ulih kinierbagen tinepa Dibata banci mpereh konflik. Konflik reh i bas Bahasa Inggris nari e me conflict ertina pertentangen ntah pe perselisihen. Enda biasana jadi erkiteken biak teptep jelma si pelain-lain. I bas sejarah kegeluhen rikut i bas Pustaka Si Badia enda banci jadi e maka erlajar kita arah teks renungenta dingen kuga ka cara ndungisa.
ISI
Isak ipasu-pasu Dibata i bas kerina siilakokenna amin situasi paksa e sangana kelihen. Guna bertahan nggeluh paksa e, Isak njumpai raja Abimelek raja kalak Pilisti i Gerar, merdang ia janah erlipat ganda ulih siialokenna, bayak kal ia melala asuh-asuhenna. Cian ate kalak Pilisti ia, itutupina telagah si ikali Isak janah ipelawes Abimelek ia. Perukuren sibagenda rupa erbahan pertemanen sedekah enda ceda. Lit piga-piga kali jadi perubaten seh maka piga-piga kali ka ikalina telagah janah ibahanna gelar sumur ‘permusuhen’ ras ‘kebebasen’ (Kej. 26:1-25). Kenca kerina kejadin e reh ka me Abimelek rikut ras penasehat bage pe panglimana ndahi Isak. Arah percakapenna teridah maka lit piga-piga dampar si perlu sipelajari ras siusih i bas ia nari.
• Enggo isedari Raja Abimelek kai sijadi sedekah enda maka labo tertebeng pasu-pasu Dibata man Isak. Janah labo lit untungna ngasuhi cian ate, labo ingan ras sumur nentuken kebayaken rikut kesangapenna. Kerina e pelin-pelin pasu-pasu Dibata, labo terambati rejeki siialoken Isak ras isi jabuna.
• Kerehenna maba dame, mindo ia gelah erbahan perpadanen alu bage la ibahan Isak kejahaten kai pe man bana janah ia pe erpadan lanai erbahan si jahat nari man Isak ras keluargana. Ertina, iakui raja kerna gegeh ras kuasa si Isak, situhuna mbiar ia iganggu e maka ilebeina ernegoisasi. Bagi nina belas-belas ija Isak la mbalas kejahaten siibahan kalak Pilisti alu kejahaten e maka ernanam geluhna man kalak e, robah ia erbahan jahat ras reh ia maba dame.
• Perjumpan la perlu mediator (penengah ntah pe juru dame), bias dua pihak e ersada arih, sura-sura Abimelek ralo i bas Isak, meriah ukurna e maka ibahanna pesta (ijamuna) temuena si enggo jera erbahan jahat. Konflik si turah ndube enggo sai. Sada-sadai ia melasken padanna sue ras sienggo isepakati idungi alu ersumpah.
• Kenca sie maka ikataken Isak mejuah-juah i bas ia mpeberkat raja Abimelek rikut ras rombongenna. Sirang ia tapi tetap erteman (Ind. Mereka meninggalkan dia dengan damai). Ertina lanai rubat tapi erdame, ipulihken pertemanenna, sisalamen.
• Jumpa ka Isak ras lau i bas telagah siikali suruh-suruhenna. Sumur epe jadi peringet-ingeten kerna kejadin si reh man bana, rikut ras bage igejabna mbelin pasu-pasu Dibata, ijapa pe ikalina dem lau pasu-pasu man bana. Ibahanna gelarna Berseba si dungna jadi kuta ingan tading man nterem jelma.
Abimelek ras rayatna sedekah enda si cari masalah, si ercian ate, sinutupi sumur, simpelawes Isak (sumber konflik). Erkiteken megermet ia nandangi kerina proses sijadi la ia mela reh ngelakoken perdamen ras Isak. Igejabna, labo lit sitik pe untungna rubati ras kalak si ipasu-pasu Dibata. Ia jine menakenca perselisihen e, ia ka ndungisa.
Bage me kepe perdamen e iadepen Dibata, Dibata ngena atena perdamen e maka IA jine reh guna mperdameken diriNa ras manusia i bas Jesus Kristus. I bas kitab Matius 5:21-26, bagin kotbah i datas uruk, Jesus mpersingeti kalak sinterem gelah ula ernembeh ate ras merawa nandangi seninana, kalak sibage iadili pagin. E maka ula terudu nehken persembahen tapi i bas pusuh nembeh ate. La ate Dibata ngena persembahen si ibaba man baNa alu pusuh si gara.
Erdamelah lebe ras salih-sapih manusia (teman manusia, senina ras si debanna) maka reh ndahi Dibata alu maba persembahen. Ula kal simpan rawa i bas pusuhta, labo pusuhta ngenca gara tapi kalak si deban pe banci banna meseng. Perlu kal idungi i bas pusuh ras kalak si deban.
PENGKENAINA
Kalak Karo istimewa kal i bas make kata teman. Teman tawa, teman tangis ras teman rubat. Kepe kalak sindeher ras kita nge maka banci erkonflik, sabab lit kepentingen si berbeda. Teman meriah ka nge banci jadi teman rubat, bagi nina ende-enden Perbunga dap-dap, adi rubat ras teman meriah rahasia mudah teridah.
I bas erbage konflik sijadi i bas kegeluhenta banci saja nge buen si la terdungi ntah pe la terdameken. Nina kuan-kuan orangtuanta nai, adi banci kita jadi benang penjarumi min, mpersadaken amin mesui icucuk jarum kita madin e asangken bagi gunting, mejile perdalenna tapi mpesirang kepe. E maka perlu kal kepe kita erlajar cara ntah pe usaha ndungi konflik alu mehuli (managemen konflik). Perlu kal kita erlajar meteruk ukur (la egois, erpengakap ia si benarna) kalak si meteruk ukurna nge maka nggit ‘nuruk’, subuk si iperdameken ntah pe mperdameken. Perlu rembang tengah rukur dingen kerehenta banci mpedameken, alu la ngkapiti ntah rayo-ayo.
Bage me peran gereja i bas kegeluhen enda, gereja e me juru dame, ngajarken perdamen, bagi Kristus si jadi kelang-kelang Dibata ras manusia. Gereja: serayan ras perpulungen kalak sienggo itebus e maka enggo ngasup ngampar bana seh maka beluh mperdameken kalak si erkonflik erkiteken erbage hal sue ras kepentingenna.
Alu bage kita tetap banci erteman ras isepe; ras jadi teman man ise pe. Abimelek enggo mpeturah ukur (inisiatif) guna erdame, adi lit temanta rubat peturahlah ukur sibage. Banci saja kita perlu kalak si deban si mperdameken kita (mediator), subuk i bas sangkep geluhta banci saja kalimbubu, anak beru ntah temanta sendalanen si ergailah e. Nina Jesus ‘kam teman-temanku adi ilakokenndu katangku’ (Joh 15:14). Jadilah teman man kalak si deban, bagi nina belas-belas ‘sada imbang mbuesa dingen seribu teman kurangsa’. Imbang si pertemani dingen teman si kelengi.
PENGAKUN KINITEKEN (Perp. Tedis)
PERSEMBAHEN (Perp. Kundul)
L: Kata Dibata sijadi palas i bas kita maba persembahen, nina i bas
Masmur 50:23 ‘ Ngataken bujur e me persembahen si pehagaken
Aku janah si patuh ngikutken Aku tentu Kukelini’
Tupung sipepulung persembahenta sipuji Tuhan arah KEE No. 16:1
https://www.youtube.com/watch?v=s_QRuj4XGAg
I bas Kam Tuhan nari, Si bangku k’rina e
NgaruhNdu genduari, NgaruhNdu pagi pe
‘Di celus me naheku, Keleng ateNdu kap
Tundalen seh matengku, Kam saja si tetap
PERTOTON PERSEMBAHEN RAS SAPAAT
• Persembahen
• Gelah ngawan perpulungen ngasup ngaloken teman sada ras si debanna
• Gelah ngawan perpulungen nggit erdame ras mperdameken kalak si deban
• Kerna jabu kundulen sendah ras sipagi bage pe siturah i bas
perpulungen
TEKAD
L: Enggo siidah kegeluhen siiarapken DIbata, erdame, erteman ras ngaloken kalak si deban uga ia litna
P: Ajari ras pengasup aku Tuhan jadi teman man ise pe alu nggit erdame. Sabab Kam me temanku si nemani dingen mpengasup aku.
L: Sipuji Tuhan alu ngakuken maka IA me temanta arah KEE No. 188:1
https://www.youtube.com/watch?v=s_kIBpVSCug
O, Dibata Kam temanku, lalap bas geluhku e
ApuliNdu kap pusuhku, sampatiNdu aku pe
Reff : Tetap kal ukurku e, Kam Dibata temanku
Sedekah geluhku e
PERTOTON TUHAN
PEMASU-MASUN
L :Teruskenlah ndalani kegeluhenta (ndu) alu tetap setia i bas padanta (ndu), nggeluh erteman, erdame ras ise pe. Ipengasup Dibata kita (kam) alu pasu-pasuNa. Alokenlah pemasu-masun idur Dibata nari ‘Dibata si mada perkuah ate, sienggo nenahken kam (kita) ku kemulianNa si rasa lalap i bas Kristus, njadiken kam (kita) serta, tetap, megegeh dingen paguh. Ia nge simada kuasa she rasa lalap.’ Amin
P: Amin, Amin, Amin (iendeken)
https://youtu.be/jYVMNmtzf68
DISKUSI
1. Rikutken pengangkan ras penggejapenta, sue ras ogenta, kai nge siturah i bas ukur Abimelek maka nggit ia ndahi (erdame) Isak?
2. Mari si gargari erbage konflik si pernah sinanami bage pe siidah ras sibegi, sijadiken contoh, situriken apai siterdungi dingen apai sila terdungi! Turiken sebab-sebabna?
Pdt. Suenita br Sinulingga, M.Th.