Lalit Simetahat I Bas Dibata

Teks       : Lukas 1:26-38

Tema     : Lalit Simetahat I Bas Dibata

Tujun     : Gelah Mamre:

• Meteh kuasa Dibata erdahin i bas Maria ras Elisabet.
• Ngendesken dirina sepenuhna man Tuhan i bas kerina dampar kegeluhenna

 Lukas 1: 26 – 38

Pemberitahuan tentang kelahiran Yesus

1:26         Dalam bulan yang keenam Allah menyuruh malaikat Gabriel pergi ke sebuah kota di Galilea bernama Nazaret,
1:27         kepada seorang perawan yang bertunangan dengan seorang bernama Yusuf dari keluarga Daud; nama perawan itu Maria.
1:28         Ketika malaikat itu masuk ke rumah Maria, ia berkata: “Salam, hai engkau yang dikaruniai, Tuhan menyertai engkau.”
1:29         Maria terkejut mendengar perkataan itu, lalu bertanya di dalam hatinya, apakah arti salam itu.
1:30         Kata malaikat itu kepadanya: “Jangan takut, hai Maria, sebab engkau beroleh kasih karunia di hadapan Allah.
1:31         Sesungguhnya engkau akan mengandung dan akan melahirkan seorang anak laki-laki dan hendaklah engkau menamai Dia Yesus.
1:32         Ia akan menjadi besar dan akan disebut Anak Allah Yang Mahatinggi. Dan Tuhan Allah akan mengaruniakan kepada-Nya takhta Daud, bapa leluhur-Nya,
1:33         dan Ia akan menjadi raja atas kaum keturunan Yakub sampai selama-lamanya dan Kerajaan-Nya tidak akan berkesudahan.”
1:34         Kata Maria kepada malaikat itu: “Bagaimana hal itu mungkin terjadi, karena aku belum bersuami?”
1:35         Jawab malaikat itu kepadanya: “Roh Kudus akan turun atasmu dan kuasa Allah Yang Mahatinggi  akan menaungi engkau; sebab itu anak yang akan kaulahirkan itu akan disebut kudus, Anak Allah.
1:36         Dan sesungguhnya, Elisabet, sanakmu itu, iapun sedang mengandung seorang anak laki-laki pada hari tuanya dan inilah bulan yang keenam bagi dia, yang disebut mandul itu.
1:37         Sebab bagi Allah tidak ada yang mustahil.”
1:38         Kata Maria: “Sesungguhnya aku ini adalah hamba Tuhan; jadilah padaku menurut perkataanmu itu .” Lalu malaikat itu meninggalkan dia.

1. KATA PENARUH

Natal enggo jadi tradisi i bas gerejanta janah irayaken alu meriah kerna ketubuhen Tuhan Jesus Kristus. Labo i bas tanggal 25 Desember saja irayaken tapi i bas masa-masa Minggu Advent pe enggo imulai ngerayaken natal, baik i bas terpuk PJJ, Kategorial, sekolah-sekolah, merga tah i kantor, rsdna. Sebagai tanda antusias kalak Kristen ngerayaken ketubuhen Tuhan Jesus e. Umumna Gereja Roma Katolik labo nggit erbahan perayan Natal ope tanggal 25 Desember, Gereja Ortodox ras Gereja Coptic Mesir ngerayaken Natal i bas tanggal 6 Januari. Natal e irayaken alu meriah sebagai refleksi iman kalak Kristen.

Umumna i bas gerejanta GBKP, Natal irayaken radu ras hiburen tah makan bersama. Janah mbue dana ikeriken guna kesuksesan Natal e. Tempa-tempa adi la ibahan man, la iakap nanam Natal. Meriah tah sederhana silakoken Natal e sipenting Natal arusna ilakoken sebagai expresi kiniteken man Dibata siperkeleng. Dibata enggo reh i surga nari ku doni enda jadi manusia, gelah manusia si lit i bas doni enda lit dalanna pagi ku surga, enda me wujut keleng ate Dibata man doni enda.

2. PEMBAHASEN

Ketubuhen Jesus ku doni enda labo rempet terjadi. Tapi berita kerna ketubuhen e enggo leben iberitaken nabi-nabi (i nubuatken). Nubuat e la banci lang arus terjadi sebab Dibata ngatakenca arah nabi-nabi. kerna ndigan warina maka enggo jadi si e Dibata ngaturkenca. Janah kerna ketubuhen Jesus enggo inubuatken nabi Jesaya i bas Jesaya 9: 6-7. “Sekalak anak tubuh man banta, anak dilaki, ia me pagi jadi pemimpinta, ia i gelari Penampat simeganjangna, Dibata simada kuasa, Bapa sirasalalap, Raja Damai KuasaNa tetap reh belangna.” Enda ikataken i bas kitab Nabi Jesaya i bas abad pewaluhken ope Jesus Tubuh. Bagepe ija IA tubuh enggo leben inubuatken nabi Miha 5:2, Nina Tuhan: “O Betlehem i Efrata, aminna i Juda kam kuta si kitikna, tapi i bas kam nari ku pekeke sekalak singerajai Israil, si asalna i bas adi adi nari i bas paksa siuria nari”. Berarti Mikha menubuatken Jesus e sinuria nari, ope doni enda lit IA enggo lit.

Bagepe Malekat Gabriel ndahi Maria si singuda nguda denga, alu ngataken “Mejuah-juah, Tuhan kap ras kam, enggo iberekenNa pasu pasuNa simbelin man bandu”. Kata Malekat si iawali alu kata melias, ncidahken perkuah ate Dibata simbelin jadi modal pemena man Maria guna petetap ukurna. Malekat e erberita kerna rencana Dibata makeken Maria jadi alat kerehen Jesus ku doni enda, alu tanda mehuli pagi kulana. Mesera akap Maria ngaloken kejadin e, mbiar pe Maria, tapi ipetetap Malekat ukur Maria, alu ngtaken “Ola mbiar, ipupusndu pagi sekalak anak dilaki ban gelarna Jesus. Ia pagi jadi kalak simbelin, igelari pe anak Dibata simeganjangna kal, Kinirajanna la erkeri-kerin”.

“Kuga banci jadi e adi aku singuda nguda denga?” nina Maria. Jenari nina Malekat e man “Maria Kesah si Badia pagi nusur ku babondu janah kuasa Dibata ringan i bas kam, perban si e me anak ipupusndu e pagi Badia janah igelari Anak Dibata”. Kai siibelasken Maria man Malekat enda wajar kal, dingen masuk akal rikutken perasaan manusia. Tapi Malekat e mpejelassa bahwa i bas Dibata lalit simetahat.

Isingetken Malekat pe si Elisabet si ikataken kalak lanai banci mupus erkiteken enggo metua, tapi enggo 6 bulan natang tuah. Kecibal Maria ras Elisabet nuduhken bahwa i bas Dibata lalit simetahat. Si lamungkin i bas manusia i bas Dibata kai pe banci jadi. Gia kecibal Maria ras Elisabet jadi pertawaan kalak si enterem, tapi jelas arah si dua kalak enda erdabhin kuasa Dibata. Maria erpengendes man Dibata nina “Kuendesken diringku man Tuhan”. Ertina Maria berserah, tapi labo pasrah. Tek kal ia kai sikataken malekat e jadi kerina, erkiteken kuasa Dibata.

Kai si jadi i bas diri Maria jadi keriahen simbelin man bana, gia ibas sudut kemanusian Maria jadi berita miring itengah tengah masyarakat. Maria tentu sitik mbuena lit i bas korban perasaan sebab ia singuda nguda denga mehuli kulana. Tentu saja enda pe banci mengganggu hubungenna ras Jusup si sangana ia ertunangen denga. Tentu saja lit kal alasen Jusup kari nadingken Maria alu sinik sinik, tah pe banci saja Jusup ngerawai Maria alu nuduh Maria la setia, dingen nuduh Maria enggo berselingkuh.

Rencana Dibata enda labo murah akap Jusup nerimasa. Memang jadi alat Tuhan bagi Maria enda bagepe ise saja pe si ipake Tuhan jadi alatNa lit nge konsekwensina. Tapi Dibata tetap berpihak kubas kalak si setia ndalanken sura suraNa ras mereken pasu pasuNa. Malekat e pe ningetken raja Daud, si maba kemakmuren man Israil. Anak si bakal tubuh arah Maria enda lebih asa raja Daud si kuasana terbatas. Anak situbuh e pagi kuasaNa la terbatas, IA me pagi raja i bas kesusuren Jakub seh rasa lalap dingen kinirajanNa la erkeri-kerin. Berarti sinandangi reh arah Maria e, eme Tuhan raja ibabo kerina raja, si mada kuasa, ijapape dingen katawari pe.

Maria sekalak diberu si istimewa ipake Tuhan guna dalan kerehen Jesus ku doni enda. Maria patut dat kehamaten itengah tengah kerina diberu si lit ibabo doni enda. Tapi siman tengeten ola kal ndabuh kubas sikap menyembah Maria, sebab Maria manusia biasa, hanya sebagai alat i bas kerehen Jesus. Sipatut isembah hanya Jesus Tuhan si tubuh e.

3. PENGKENAINA

Natal e sirayaken ula min terjeng meriah meriah saja, tah kegiaten seremonial saja, tapi lit min Natal e maba makna si mbages kerna perbahanen Dibata simbelin si reh man manusia. Natal sikurangurangna nadingken bekas si tergejap nanamna man kalak Kristen bagepe man kalak si labo denga Kristen. Sabab Jesus si tubuh e labo guna kita saja tapi guna kerina jelma i doni enda (universal).

Natal eme mperingeti keleng ate Dibata man manusia i doni enda, sura sura Dibata I bas kita ngerayaken Natal labo dari kita untuk kita, tapi dari kita untuk orang lain. Sabab Dibata pe reh i surga nari guna doni enda. Arah natal Dibata ersura sura gelah keleng ate Dibata e seh man kerina jelma, emaka rutang si megegeh man si la megegeh alu erbahan Aksi Natal man kalak simemang geluhna i bas kondisi pra sejahtera. Arus sigejapken bahwa Dibata enggo leben ngkelengi kita, emaka kita pe rutang ngkelengi kalak sideban, enda me sinalsal terang natal. Si jadiken Natal jadi sada motivasi kuga arus ncidahken keleng ate man kalak sideban.

Dibata enggo reh alu mpeteruk baNa jadi manusia, tentu ngajari kita guna reh ermeteruk ukur, ula ka min manusia reh bagi Dibata mpeganjangken bana. Malekat mpetetap ukur Maria, emaka terjadi i bas diri Maria perubahen, i bas situasi sisulit nerima keadaan peturah ate ndele, berubah jadi Keriahen ras kemalemen ate. Kuga Mamre itengah tengah kesuliten, tek nge kita i bas kondisi sulit banci iubah Tuhan jadi simehuli, erkiteken i bas Tuhan lalit simetahat? Kai banci ibahan Mamre enda gelah jadi pasu pasu geluh Mamre man kalak sideban? Me tetap nge si inget denga nge Motto nta: Mamre Erdiate ras Erpemere? Mari dage si implementasiken arah Natalta si reh enda.

4. DISKUSI

• Oge ayat 38, turiken sikap Maria i bas erpengendes man Tuhan? Janah uga sikap Mamre sedekah enda I bas erpengendes man Tuhan? Mari si diskusiken!
• Sebage refleksi/ekpresi iman nge sibahan perayaan natalta sedekah enda? Mari si bahan Aksi Natalta si ernanam man kalak si deban i bas tahun enda.

USULEN ENDE-ENDEN

• KEE GBKP No. 217: 1,2
• KEE GBKP No. 254: 1,5
• KEE GBKP No. 241: 1,2,3
• KEE GBKP No. 343: 1,2
• KEE GBKP No. 212: 1,5

 

Pdt. Diman Ginting, MA

Hp. 0812 635 0496