Ersikap Ngalo-ngalo Kerehen Tuhan

Teks       : Maleaki 3: 1 – 5

Tema     : Ersikap Ngalo-ngalo Kerehen Tuhan

Tujun    : Gelah Mamre:

• Meteh kerna kerehen Tuhan (eskatologi)
• Nikapken dirina alu biak-biak si mehulii bas ngalo-ngalo kerehenen Tuhan

Maleaki 3: 1-5

3:1           Lihat, Aku menyuruh utusan-Ku, supaya ia mempersiapkan jalan di hadapan-Ku! Dengan mendadak Tuhan yang kamu cari itu akan masuk ke bait-Nya! Malaikat Perjanjian yang kamu kehendaki itu, sesungguhnya, Ia datang, firman TUHAN semesta alam.
3:2           Siapakah yang dapat tahan akan hari kedatangan-Nya? Dan siapakah yang dapat tetap berdiri, apabila Ia menampakkan diri? Sebab Ia seperti api tukang pemurni logam dan seperti sabun tukang penatu.
3:3           Ia akan duduk seperti orang yang memurnikan dan mentahirkan perak; dan Ia mentahirkan orang Lewi, menyucikan mereka seperti emas dan seperti perak, supaya mereka menjadi orang-orang yang mempersembahkan korban yang benar kepada TUHAN.
3:4           Maka persembahan Yehuda dan Yerusalem akan menyenangkan hati TUHAN seperti pada hari-hari dahulu kala dan seperti tahun-tahun yang sudah-sudah.
3:5           Aku akan mendekati kamu untuk menghakimi dan akan segera menjadi saksi terhadap tukang-tukang sihir, orang-orang berzinah dan orang-orang yang bersumpah dusta dan terhadap orang-orang yang menindas orang upahan, janda dan anak piatu, dan yang mendesak ke samping orang asing, dengan tidak takut kepada-Ku, firman TUHAN semesta alam.

1. KATA PENARUH

Peristiwa penabanen bangsa Israel kepeken la mereken efek jera man bangsa e. Biak-biak si mehulingolihi magem. Ukurna pe mersik denga bagi si gelgel lanai setia man Dibata. Labo man Dibata saja mobah ukurna tapi man ndehara ras keluargana pe bage. Seh maka perceraian pe reh buena terjadi. Erjabu ka ras diberu-diberu bangsa si deban si la nandai Dibata, ndehara ras anak-anakna pe itadingkenna.

Ambah si e kinilabujuren ras kinilaadilen pe reh buena terjadi. Dingen penggejapen kalak si tetap tutus ersembah pe dungna goyah. Sebab idahna tempa ipediat Dibata si e kerina maka banci bage hancurna moralitas kalak Israel tupung paksa si e. Emaka reh me jabab Dibata nandangi kerina situasi ras kecibal kegeluhen bangsa Israel erkelangken nabi Maleaki iturikenNa, nandangi reh me sekalak pertenahen/utusen lako mpersingeti kegeluhen subuk imam bagepe kaum awam si dem kemunafikan. Si terjadi paksa si e kiniteken enggo luntur, ku rumah pertoton gelah enggo saja, mere persembahen ikut pe perpuluhen enggo meros. Bagepe kebaktin-kebaktinna manai ernanam terjeng formalitas, Ngadi dingen jeralah ope Dibata reh dingen ngukumsa. Bageme isuratken bas Kitab enda kecibal bangsa Israel pasca pembuangenna (kenca pulah bas tabanen nari).

2. URAIAN TEKS

Pertenahen e sekalak nabi simbaru bagi Musa nai, bagi Elia simbaru, si ngasup mpekena-kena ukur kalak si enggo batu-batun. Tantangna si reh eme pertenahen (sekalak utusen) kedungenna Dibata jine reh alu keadilenNa lako ngelawan kinilabujuren, nambari ukur kalak si tutus dingen mereken ulih kedamen man kalak si megenggeng bas kinitekenna. E maka, pengarapen kerna masa depan si dem kiniulin eme jadi inti kitab Maleaki enda bagepe kitab Taurat ras kita nabi-nabi.

Dahin sekalak persuruhen Dibata tuhu labo menukah sebab gia mbue ancaman ia tetap harus setia bas dahin na guna:

• Ndilo kalak gelah jera dingen ngadi erban si lepak nadingken kegeluhen si dem topeng agama gelah teridah tempa bujur.
• Lako mbersihken umat si la patuh jenari bangsa ngolihi ngaloken perkuah ate Dibata.
• Mabai bangsa e ngolihi ersembah man Dibata dingen ngikutken perpaden ras Dibata alu setia dingen arah ukurna jine.

Tersurat bas ayat si pemena: “Kusuruh persuruhenKu nikapken dalan man bangKu.” Enda me respon Dibata nandangi keraguan kalak Israel e, erkelangken nabi Maleaki itandaskenNa kerna kepastian kerehen Mesias. Tapi ope IA reh, sekalak persuruhen enggo leben reh lako nikapken dalan. Enda sada nubuaten/pengenehen si dung na isehi arah Johanes Peridiken si leben erdahin ope Jesus Kristus menaken dahinna i doni enda (oge Mat. 11: 10; Mrk. 1: 2; Luk. 1: 76; 7: 27). Arah berita bas Kitab Injil reh tangkasna man banta maka Jesus Kristus me Persuruhen Dibata e (cakap Indonesia: Malaikat Perjanjian) ija kerna kerehen si pemena ras si peduaken ituriken bas teks oratenta sendah. Ayat enda tersehi i bas kerehen Kristus ngolihi lako mbersihken ras ngukum kalak Israel. IpelawesNa me kerina kalak si jahat i bas negeri e nari tapi kalak si bujur tetap bas negeri e tapi labo asal tetap ije ipelimbaruiNa pe geluhna.

Ertina lit dua rupa persuruhen Dibata e: sipemena, tugasna guna mpesikap ntah ngerentes dalan. Banci iertiken nandangi kerina nabi-nabi dingen ajar-ajarNa bagepe Jesus Kristus jine si reh alu dem keleng ate gia sesekali nuduhken ketegasen i bas mpesingeti dingen ngajarken kalak si tek man baNa. Rehna alu kesederhanaan, rupa ras uisna la mehaga, dalanna erberita pe tare ngersak kelde. Isi beritana kerna Kinirajan Dibata enggo ndeher, wari Tuhan pe enggo reh deherna. Tujunna lako ngingetken nikapken umat gelah jera dingen ngolihi nggeluh badia. Jenari, Persuruhen sipeduaken eme kerehen Jesus Kristus si peduakaliken sekali enda lanai ampun, reh alu dem kinihagan ras kemulian, ngersak kuda dingen pedang, kambing ras biri-biri ipeserap, batang si erbuah igetap dingen iambekken ku api. Kalak si mekeng, la nggit robah dingen tetap erban si jahat kernep.

3. PENGKENAINA

Mari kentisik kita erlajar kerna Eskatologi (Junani: eskhatos) eme ajaran Alkitab kerna pendungi kegeluhen manusia bas doni enda (Akhir Zaman). I bas Padan Sindekah nari ituriken maka kerna dahin-dahin bas wari si reh pagi itandai alu “Wari Ukumen” si isehken kerina nabi-nabi reh pagi paksana maka Dibata mulahi kalak si bujur dingen kalak jahat iukum me lako mpebaDiaken doni enda idur si jahat nari. Eskatologi erkawiten ras pengarapen mesianis eme kerehen sekalak Raja arah kesusuren Daud nari (Jes. 9:6-7: 11:1)

I bas Padan Simbaru (PB), eskatologi erkawiten ras kerehen sipeduakaliken Jesus Kristus (cakap Junani: parousia) eme tampuk kerina pengenehen kerina pengarapen Mesianis bas Padan Sindekah.

Kai dage ilakoken MAMRE guna ersikap bas ngalo-ngalo kerehen Tuhan eme: etika ntah pe orat nggeluh si mehuli arus tetap nggeluh. Sabab e nentuken tuhu nge kita enggo ersikap ntah lang. Ertina, kegeluhen i doni gundari tama ngaruh ku bas kecibal geluh ta pagi bas wari pendungi e. Dahin-dahin erdiakoni si ilakoken kita labo terjeng guna nehi AD/ART organisasi gereja ntah komunitas/perpulungen, labo ka guna nambahi credit point ta i lebe-lebe Dibata, tapi si e kerina ilakoken kita jadi bukti ulih keleng ate Dibata si enggo ialoken, igejapken kita arah Anak-Na, Jesus Kristus.

4. DISKUSI

• Kai pemahamanta kerna wari kerehen Tuhan e (eskatologi)? Turikenlah penggejapenta sekalak-sekalak.
• Turiken seh ja nge persikapenta nandangi Kerehen Tuhan e? Ras kai dampakna nandangi kegeluhenta Mamre.

USULEN ENDE-ENDEN

• KEE GBKP No. 270: 1-2
• KEE GBKP No. 307: 1,3
• KEE GBKP No. 334: 1-2
• KEE GBKP No. 450: 1 – (Persembahen)
• KEE GBKP No. 268: 1-3

 

Pdt. Chandra Pratama Tarigan, S.Th., M.Pd.K.
082 6296 6984