Teks : 2 Timotius 1: 3-8
Tema : Nande Si Jadi Usihen
Tujun : Gelah Mamre:
1) Ngidah kiniteken Timotius arah usihen nini ras nandena
2) Ngergaken nande (ndehara) bas jabuna
1:3 Aku mengucap syukur kepada Allah, yang kulayani dengan hati nurani yang murni seperti yang dilakukan nenek moyangku. Dan selalu aku mengingat engkau dalam permohonanku, baik siang maupun malam.
1:4 Dan apabila aku terkenang akan air matamu yang kaucurahkan, aku ingin melihat engkau kembali supaya penuhlah kesukaanku.
1:5 Sebab aku teringat akan imanmu yang tulus ikhlas, yaitu iman yang pertama-tama hidup di dalam nenekmu Lois dan di dalam ibumu Eunike dan yang aku yakin hidup juga di dalam dirimu.
1:6 Karena itulah kuperingatkan engkau untuk mengobarkan karunia Allah yang ada padamu oleh penumpangan tanganku atasmu.
1:7 Sebab Allah memberikan kepada kita bukan roh ketakutan, melainkan roh yang membangkitkan kekuatan, kasih dan ketertiban.
1:8 Jadi janganlah malu bersaksi tentang Tuhan kita dan janganlah malu karena aku, seorang hukuman karena Dia, melainkan ikutlah menderita bagi Injil-Nya oleh kekuatan Allah.
1. KATA PENARUH
Lit sada pepatah nina: “Buah jatuh tidak jauh dari pohonnya.” ertina, pertumbuhen, perkembangen ras pembentuken prilaku anak i tengah jabu mbelin kal pengaruhna arah kai si idah ras si iperdiatekenna i bas orang tua ras ise si lit isekelewetna nari. Mekatep ikataken, anak eme seorang peniru ulung. Selaku orangtua aruslah si sedari maka perbahanen ras pengerananta (positip ntah negatip), jadi model i bas pusuh anak-anakta. Terlebih Nande sidekahen ras anak, i tengah jabu tuhu-tuhu penting guna tumbuh kembang anak seh ia jadi sekalak si dewasa ras mandiri. Doni si dem alu kejahaten ras si la mehuli, labo banci mpengaruhi anak-anakta adi orang tua la erleja-leja guna mereken usihen, pengajaren ras nasehat erpalasken kata Dibata man anak-anakna.
2. URAIAN TEKS
Teks ogenta ngerana kerna surat Rasul Paulus si ngataken bujur man Dibata erdandanken kiniteken si tutus lit i bas diri Timotius. E me dalanna maka ingetna rusur si Timotius i bas totona man Tuhan, janah mesikel pe atena jumpa ras Timotius. Kiniteken si tutus si icidahken Timotius e teridah arah carana nggeluh si ndeher ras Dibata, bage pe kinigenggengenna i bas ndahiken dahin pelayanen bagi si enggo iendesken man bana.
Arah teks enda ituriken maka nini tudung Timotius si tergelar Lois, ras nandena si Eunike, enggo mereken ngaruh si positip man Timotius. Cara nggeluh, kiniteken ras pengajaren si enggo isehken tudung ras nandena mpeturah kiniteken Timotius bage pe nggeluh alu mehuli. Teridah maka Dibata enggo makeken orang-orang pilihen si setia man Tuhan guna mewariskan kiniteken si paguh man generasi-generasi berikutna. Bage ka pe kita selaku Mamre (ras Moria) i bas keluarganta ipake Dibata secara luar biasa arah totonta, arah perbahanenta, arah pengerananta, ras arah pelayanenta guna jadi contoh ras teladan kiniteken si paguh man anak-anak si nguda.
Peran sekalak nande (Moria) i tengah jabu tuhu-tuhu penting guna njaga anak-anak i bas pengaruh pengajaren si la sentudu ras kebenaren Kata Dibata. Sekalak nande si ndeher ras si mperdiateken anak-anak, tentu banci mereken pengaruh guna memperkuat banteng kiniteken ras moral anak-anak i bas ia ngalaken tantangen kebobrokan moral ras situasi doni si enggo ceda. I bas Padan si Ndekah pe lit contoh-contoh kerna peran nande nandangi anak-anakna. Umpamana, i bas Kitab i Raja-Raja 22: 41-53, Josapat, raja Juda si ringan i Jerusalem, e me sekalak raja si nggeluh sue ras kai si ikataken Tuhan. Perbahanen ras pemerentahenna icatat mehuli i lebe-lebe Dibata, bali bagi bapana si Asa si jadi raja ope ia. Seakatan bapana, gelar nandena si Asuba pe tercatat i bas Pustaka si Badia. Kerina enda ncidahken maka nandena pe ikut mereken ngaruh I bas pembentuken karakter ras kiniteken Raja Josapat. I bas bagin si deban, si idah maka Raja Ahasia, anak Ahab jadi raja Israel i Samaria. Raja Ahasia enda jahat perbahanenna i lebe-lebe TUHAN, bali ras bapana si Ahab, ras nandena si Isebel, si mabai Israel erdosa. Isembahna dingen erdahin ia guna Baal, janah bali ras bapana si jadi raja ope denga ia, ipekekena rawa TUHAN, Dibata Israel (I Raja-raja 22: 51-53).
Tuhu labo jaminen maka orang tua si tutus erkiniteken pasti rulihken anak-anak si tutus ka i bas kinitekenna man Tuhan. Umpamana, Imam Eli sekalak si tutus, tapi anak-anakna (Hopni ras Pinehas) la mehamat man Tuhan. Nabi Samuel pe sekalak si erkemalangen man Tuhan, tapi anak-anakna si Yoel ras si Abia, la nggeluh mbiar man Dibata bagi bapana. Tentu melala si jadi penyebab kerna masalah enda, tapi si pasti, bapa, terlebih nande, arus mereken waktu si cukup man anak-anakna guna mereken pengajaren si benar, mpebelin-belin alu mereken contoh simehuli, ndidik anak-anak ras ertoto kerna anak-anak.
3. PENGKENAINA:
Lit piga-piga hal si jadi kesimpulen i bas PA Mamre-ta i bas wari si endah, eme:
1) Orang tua (bapa ras nande) arus jadi teladan (usihen) si mpengaruhi biak anak-anak i bas jabu. Kiniteken ras ketutusen bapa ras nande jadi contoh si mehuli man anak-anak, emaka perlu kal itengeti.
2) Keselamaten sialoken arah lias ate Dibata. Enda pemere Dibata si mbelin ras si mehergana kal man banta selaku kalak si erkiniteken man Kristus Jesus. I bas ngaloken pemere e arus ertanggungjabab, iergaken, iajarken man anak-anak i bas jabunta. Tetap ertoto ras erpengendes man Tuhan, gelah anak-anakta ras kempu-kempunta, banci jadi kalak si erkemalangen man Tuhan. “Ajarkenlah man anak uga kearusen nggeluh, maka ikutkenna asa umurna geluh (Kuan-kuanen 22: 6)
3) Minggu enda Moria GBKP genep umurna 67 tahun, tepatna tanggal 16 Oktober. I bas umurna sibagenda rupana, mari sibereken hadiah ulang tahun man Moria, si lit i bas jabunta, gelah banci ia jadi nande ingan ertunande, jadi usihen man anak-anak, jadi penalemen man perbulangen terlebih jadi nande Si erkiniteken man Tuhan. Bage pe Moria i bas perpulungen si banci mereken dukungen ras usihen man KAKR, PERMATA ras Saitun. Jadi Moria singasup ncidahken buah kinitekenna bagi Louis ras Enike. Jadi pendidik si ngasup erbahan enterem anak-anak tek man Dibata. SELAMAT ULANG TAHUN MAN MORIA GBKP
4. DISKUSI:
1) Rikutken teks kuga nge nande si jadi usihen menurut pengakap Mamre?
2) Kai nge si ilakoken Mamre segelah Moriana jadi nande usihen?
AKSI MAMRE
Usahaken maka kita orangtua (bapa ras nande) ngelitken waktu minimal sada jam sipake guna ercakap-cakap (erdiskusi, berdialog) ras anak-anakta kerna pengalamen anak-anakta tep-tep wari: i bas pendidiken, jabu, ingan bermain, ngerana ngerana ras teman-temanna, ras kawitken pengalamen-pengalamen e ras Kata Dibata.
USULEN ENDE-ENDEN:
1) KEE GBKP No. 451: 1-2= https://www.youtube.com/watch?v=cYlzjh64EBk
2) KEE GBKP No. 372: 1-2= https://www.youtube.com/watch?v=wNdYJ1PjVSA
3) KEE GBKP No. 245: 1-3= https://www.youtube.com/watch?v=FS1iY7fp1Jc
4) KEE GBKP No. 182: 1, 3, 5= https://www.youtube.com/watch?v=u_MNUsMo7q0
5) KEE GBKP No. 270: 1, 3= https://www.youtube.com/watch?v=5fIrm4LpneU
Pdt. Litmalem br. Sinulingga, S.Th.
HP/WA, 0813 2140 7224