NGGELUH SISAMPAT-SAMPATEN

Pengerana 4: 9 – 12
4:9           Berdua lebih baik dari pada seorang diri, karena mereka menerima upah yang baik dalam jerih payah mereka.
4:10         Karena kalau mereka jatuh, yang seorang mengangkat temannya, tetapi wai orang yang jatuh, yang tidak mempunyai orang lain untuk mengangkatnya!
4:11         Juga kalau orang tidur berdua, mereka menjadi panas, tetapi bagaimana seorang saja dapat menjadi panas?
4:12         Dan bilamana seorang dapat dialahkan, dua orang akan dapat bertahan. Tali tiga lembar tak mudah diputuskan.

 

1. PERSIKAPEN
2. PERPULUNGEN JABU-JABU
3. Rende KEE No. 209:1 (ibabai nande).

Perpulungen ersadalah ngikutken pedahNa
Bas kiniteken tetaplah man Tuhan Dibata
Bas si mehuli ayaklah, sisampat-sampaten
Bage kap pedah Dibata, sikeleng-kelengen

2. Ertoto (ibabai bapa)
3. Ngoge Kata Dibata (ibabai tuan/nyonya rumah)

Teks       : Pengerana 4: 9-12

4. Nuriken Kata Dibata (ibabai Pandita/Pertua/Diaken)

Tema     : Nggeluh Sisampat-Sampaten

I bas jaman genduari enda, melala manusia nggeluh riahen akapna sisada. Tempa lanai ia perlu kalak si deban, enggo individualis. Situhuna, Dibata nepa manusia selaku makhluk sosial, ija manusia perlu penampat i bas kalak si deban nari, banci teman, keluarga bage pe masyarakat sekelewetna. Manusia perlu si sampat-sampaten sada ras si debanna gelah kegeluhen enda reh ulina.

Selaku kalak Karo, si sampat-sampaten situhuna biak kegeluhenta. Si enda si itandai alu istilah aron. Aron e me sada kebiasaan nggeluh sisampat-sampaten i bas masyarakat Karo. Istilah aron i bas cakap Karo e me sisaro-saron (saling membantu) si icidahken i bas terpuk dahin sibeligan enem seh dua puluh empat kalak i bas sada terpuk. Semalna i bas erbahan terpuk aron, beligan si dilaki ras si diberu enda itentui sue ras kebutuhen dahin. Nai, aron ndahiken labo iupahi alu sen tapi alu gegeh. Tapi, rikutken perkembangen jaman, kira-kira i bas tahun 1980 seh asa genduari, alu manjar-anjar pengertin rikut tujun aron e mulai sambar. Umpamana, aron lanai tukar gegeh tapi enggo gegeh tukar sen. Amin bage gia jiwa ntah pe biak aron e tetap nge nggeluh si sampat-sampaten.

I bas bahan PJJ-nta enda, kitab Pengerana ngajuk gelah ngangkai terbagesen erti kesalingtergantungen si mbangun kegeluhenta, e me nggeluh sisampat-sampaten. Kitab enda labo ncakapken kerna upah si melala, sabab enda labo soal ulih materi sinialoken kenca dung erdahin, tapi upah si mehulina e me i bas kita mereken kegeluhenta guna kalak si deban i bas pertemanen bage pe keluarga.

Ayat 9, nuriken kerna ulin dua kalak asangken sekalak-sekalak, sabab adi dua kalak erdahin mbelang bekasna. Ertina adi erlajar kita arah bidang pertanian (agriculture) melala hal si jadi pertimbangenta guna ndahiken dahin e umpamana kerna waktu ras musim. E maka adi sekalak saja ngenca ndahikenca tentu perlu waktu si ndekah gelah banci dung. Tapi adi dua kalak ntah lebih, waktu si ipakeken pe lebih singkat. Alu bage ulihna pe mehuli janah musimna pe la ketadingen guna nuan-nuan. Bagenda me kerja cerdas, makeken kerina alu mehuli guna ulih si mehuli.

Ayat 10-12 nuriken bing perdalanen i bas dunia kuno. Nai lit piga-piga rute perdalanen si terkenal la aman arah pengerampuk bage pe bencana alam nari. E me sababna nai, kalak enda erdalan ndauh alu errombongen. Ayat 10 nuriken ulih dikune erdalan la sisada, bicara guling lit si nampatisa. Adi nai erdalan ndauh e enterem-enterem (rombongen) tentuna i bas perdalanen rusur nge saling ningetken gelah hati-hati i bas ancaman lubang, jebaken, hewan liar, rsd. Alu bage kalak si deban pe mereken ngaruh mehuli man banta.

Ayat 11 nuriken kerna berngi paksa mbergeh. Perdalanen paksa si e perlu waktu si ndekah gelah seh ku tujun. Mawen banci erberngi i bas kerangen ras padang gurun si seh kal bergehna tupung berngi. Jubah si nai labo mekapal bagi jaket musim mbergeh si genduari, e maka i bas perdalanen paksa rombongen arus erberngi i kerangen ntah gurun pasir banci menghangatkan sada ras si debanna. Bage me tradisi tupung si e, tujunna menghangatkan kula.

Ayat 12 nuriken kerna lit perlindungan dikune lit serangen. Ertina labo soal dikune lit nerangsa adi dua kalak banci menang alu nukah, tapi lebih ku arah la nukah nalukenca. Enda reh tangkasna erkiteken idungi alu pepatah kuno i bas pendungi ayat 12 “tinali si ipiuh telu mesera ngeretapkenca” ertina bicara lit serangen, kebersamaan mpeturah gegeh/ mereken perlindungan.

Misi GBKP i bas Tata Gereja 2015-2025 Pasal 5 poin 5 halaman 19. “Memperkuat semangat gotong royong antar sesama jemaat dan masyarakat.” Arah enda banci mpetetap ukurta guna nggit nggeluhken kegeluhenta i bas biak si ertina “kerja sama.” Umpamana erbahan gotong royong bas kesain gereja ntah kutanta. Asa bancina kerinalah kita muat bagin asa ngasup ras gegehta. Ulanai kita kurang mediate bas dahin gotong royong enda. Sabab arah gotong royong kita banci jadi saksi Kristus ndalanken si mehuli sabab i je me kita sisampat-sampaten. Marilah si jaga ras si pakeken terus biak mehuli i bas mereken ngaruh mehuli man sekelewetta alu nggeluh sisampat-sampaten saling membantu, kerja sama subuk bas jabu, sektor, gereja, inganta erdahin bage pe bas masyarakat gelah kerina kita banci reh majuna.

5. Rende KEE No. 254:1 (ibabai nande)

Reff:      Isuruh Dibata sikeleng-kelengen
Sisampat-sampaten asa kengasupen
Mbue me kap tuhu si man bahanenta
Radu ras kerina kita ndahikenca

Palasta nampati em ate mekuah,
Ngusih Tuhan Jesus enggo kap nampati
Meriah ukurta, adi teman pulah
Masap kebiaren, je dat ate jadi
Reff: …

6. Nuriken Penggejapen (iaturken i bas sektor)
7. Rende KEE No. 254: 2 (ibabai bapa)

Reff:
Isuruh Dibata sikeleng-kelengen
Sisampat-sampaten asa kengasupen
Mbue me kap tuhu si man bahanenta
Radu ras kerina kita ndahikenca

Kalak si ngikutken kata Tuhan Jesus
Terangina doni ras k’rina isina
Tegulah temanta gelah ola celus
Situduhken dalin gelah ola mampa
Reff: …

8. Diskusi ras Aksi
9. Turikenlah pengangkanndu kerna ayat 12 si jadi oratenta ndai “Tinali si ipiuh telu mesera ngeretapkenca.”
10. Si jadi aksinta endekenlah ende-ende karo “Gotong royong” janah rekam jenari bagiken ku media sosialta masing-masing, gelah e jadi penginget ras penyemangat man banta ras kalak si ngidahsa.
11. Kesimpulen (ibabai Pandita/ Pertua/ Diaken).
12. Nehken Persembahen Rende KEE No. 343:1 (ibabai anak)

Pasu-pasu bas Tuhan nari, gejapken kami teptep wari
Bas paksa-paksa geluh kami, Kam me kap tetap si ngkawali

Pasu-pasu bas Tuhan nari, jadi pergegeh tendi kami
Guna ndalani wari-wari, si rehna bas Kam Tuhan nari

Reff:
Pasu-pasu dage o Tuhan
Persembahen kami anakNdu
Labo kapen enda metunggung
Persembahen si nggo pepulung
AjariNdu pe kami gelah min
Tetap ersembah baNdu Tuhan

11. Momo
12. Pertoton Persembahen ras Sapaat

• Persembahen
• Gelah kerina ngawan perpulungen banci mpeturah semangat nggeluh sisampat-sampaten.
• Kerna jabu kundulen, ingan pulung minggu si reh, si sakit, si turah bas perpulungen ras si debanna.

13. Rende KEE No. 309:1 (ibabai bapa)

Pengasup kami o Tuhan
Gelah pedahNdu banci idalanken
Em kap tendang kami bas kegeluhen
KataNdu si man gelemen

Gelah tangkas kata ras perbahanen
Ban min kami tetap bas kebujuren
SurgaNdu kap perayaken

14. Pertoton Tuhan (ibabai Pandita/Pertua/Diaken)

 

JEDA RAS PENUTUP

Pdt. Oktoria br Surbakti, M.Th.

HP/WA: 081376206662