MPERDIATEKEN RAS NGUKURI SI MEREKEN KINIULIN
Roma 15: 1-6
15:1 Kita, yang kuat, wajib menanggung kelemahan orang yang tidak kuat dan jangan kita mencari kesenangan kita sendiri.
15:2 Setiap orang di antara kita harus mencari kesenangan sesama kita demi kebaikannya untuk membangunnya.
15:3 Karena Kristus juga tidak mencari kesenangan-Nya sendiri, tetapi seperti ada tertulis: “Kata-kata cercaan mereka, yang mencerca Engkau, telah mengenai aku.”
15:4 Sebab segala sesuatu yang ditulis dahulu, telah ditulis untuk menjadi pelajaran bagi kita, supaya kita teguh berpegang pada pengharapan oleh ketekunan dan penghiburan dari Kitab Suci.
15:5 Semoga Allah, yang adalah sumber ketekunan dan penghiburan, mengaruniakan kerukunan kepada kamu, sesuai dengan kehendak Kristus Yesus,
15:6 sehingga dengan satu hati dan satu suara kamu memuliakan Allah dan Bapa Tuhan kita, Yesus Kristus.
A. PERSIKAPEN
B. PERPULUNGEN JABU-JABU
1. Rende KEE 374: 1, 2 “Jesus Ulu Kegeluhenku” (ibabai nande)
https://www.youtube.com/watch?v=ME1QzKifPBY
Jesus ulu kegeluhenku, Kam me ngenca pengendesenku
Lalap tedeh ate pusuhku, kupehaga Kam bas geluhku
Reff: O Tuhan pernehen pusuhku
Si ertedeh ate man baNdu
Ku gelem pedah ras padanNdu
Ku sembah Kam i bas geluhku
Ku sembah Tuhan penebusku, si mereken kekelengenNa
Alu tutus reh aku Tuhan, ras kerina isi jabungku Reff: …
2. Ertoto (ibabai bapa)
3. Ngoge Kata Dibata: Roma 15: 1-6 (iogeken anak)
4. Nuriken Kata Dibata ibabai Pandita/Pertua/Diaken
Tema : Mperdiateken ras Ngukuri Si Mereken Kiniulin
I bas perpulungen Roma lit kalak Jahudi bage pe kalak si labo Jahudi. Erkiteken pengaruh pengajaren ras tradisi i bas kinitekenna si ndekah, turah persoalen i bas perpulungen kalak Kristen i Roma, e me kerna pangan ras wari-wari (Rom. 14: 1-5). Lit kalak erpengakap maka pangan kai pe banci ipan (la terikat ku aturen-aturen Jahudi kerna pangan). Lit k deba gulen-gulen saja ngenca ipanna guna njagai dirina bersih i bas pangan si la bersih (najis) nari. Lit kalak sierpengakap maka wari tertentu pentingen asa wari si deban, lit ka si erpengakap seri nge kerina wari-wari e. Pengangkan si pelain-lain enda erbahanca turah benih perpecahen i bas perpulungen Roma. E maka ipersingeti Paulus perpulungen e gelah njaga kiniersadan i bas perpulungen alu siergan sada ras si debanna.
I bas Roma 15: 1-6, Paulus make dua istilah guna ncidahken situasi si lit i bas perpulungen Roma, e me “si megegeh kinitekenna” ras “si merampek kinitekenna”. Si ikataken Paulus si megegeh kinitekenna e me kalak si pusuhna nggo ngidah alu terang kerna palas kiniteken e me keselamaten i bas Kristus janah ngasup ia njaga sikap geluhna guna mereken kiniulin man kalak si deban. Si ikataken merampek kinitekenna e me kalak si lenga ngasup ngidah palas kiniteken situhuna i bas Kristus. Guna njaga kiniersadan perpulungen i bas litna pengangkan sipelain-lain enda, Paulus ngataken alu tegas maka kalak si megegeh kinitekenna arus nampati kalak si merampek kinitekenna. Arus nampati nuduhken sada perintah si tegas. I bas cakap Junani, kata siipake e me opheilo. Kata opheilo biasa ipake guna ngataken kerna utang. I bas kata opheilo enda teridah makna kearusen (kewajiban) siilakoken erkiteken alasan si nteguh misalna ketetapen hukum, tuntuten tugas, ntah pe alasen/pertimbangen tertentu. Erpalasken pengertin e, Paulus ngataken maka kalak si megegeh kinitekenna “rutang” (arus/wajib/ertanggung jawab secara moral) nampati si merampek kinitekenna. Uga carana nampatisa? Kata “nampati” enda, i bas cakap Junani ipake kata bastazo guna ngataken sada tindaken maba baban si mberat, misalna lau i bas tambe (Mrk. 14: 13), kayu persilang (Joh. 19: 17). Kata bastazo enda pe ncidahken sada sikap geluh si saber, la lit ukur guna ersaing naluken kalak si lemah, kalak si deban bagi sekalak bapa ntah nande si mperdiateken alu keleng ate. Sekalak orang tua labo idabuhkenna anakna tapi itatangna, labo ijurukenna tapi ipersingetina/iajarkenna alu saber, labo ipersilahangna/iabaikenna tapi ialokenna alu pusuh si bersih. Bagem kalak si megegeh kinitekenna nampati kalak si merampek kinitekenna. I bas ngelakoken perbahanen guna nampati enda, ipersingeti Paulus kalak si megegeh kinitekenna gelah ola ngukurken dirina saja (memegahkan diri/menjadi sombong rohani). Jesus Kristus jadi usihen. Jesus Kristus la ngukurken diriNa saja, tapi nggit IA maba baban si mberat guna mereken kiniulin man doni enda. Selaku manusia si dem lemahen, ngusih Jesus Kristus tuhu-tuhu mberat guna ilakoken. Tapi kesaksin i bas Pustaka Si Badia jadi gegeh man kerina kalak si tek maka Dibata si mereken kesabaren dingen gegeh guna ngukurken ras ndalanken si mehuli i bas persadaan selaku anak-anak Dibata.
I bas paksa enda pe kita banci ngidah kinierbagen si lit i tengah-tengah perpulungen. Adi nterem, biakna nge erbage-bage cara ngerana, pendapat, kebiasan, perukuren, kinijingkaten ras si debanna. Kinierbagen e banci mereken pengaruh ku bas kiniersadanta, tergantung uga kita ngidah ras ngaloken kinierbagen e. Kinilangasupen ngaloken kinierbagen e banci mpeturah persoalen tapi situhuna arah kinierbagen e kita erlajar guna dewasa i bas erkiniteken. Labo perlu sipersoalken (sihakimi) ise si lebih mehuli, lebih benar ntah lebih megegeh, tapi kerina kita erjuang guna mperdiateken ras ngukurken si mehuli gelah erteguhna kiniteken kerina anak-anak Dibata.
5. Rende KEE 209:1 “Perpulungen Ersadalah”
https://www.youtube.com/watch?v=CW_YNHCWKR0
Perpulungen ersadalah ngikutken pedahNa
kiniteken tetaplah man Tuhan Dibata
Bas si mehuli ayaklah sisampat-sampaten
Bage kap pedah Dibata si keleng-kelengen
6. Ngawan perpulungen nuriken penggejapen
7. Rende KEE 381: 2 “Sura-sura Jesus Bangku”
https://www.youtube.com/watch?v=PXegIPBQnCU
Sura-sura Jesus Kristus nandangi geluhku
Mpehaga turang senina si sampat-sampaten
Reff: Ersinalsal terang em sinisuraken Jesus
Ersinalsal terang ku tetap ersinalsal
8. Diskusi
• Turikenlah uga pendapatndu kerna persoalen si jadi i bas perpulungen Roma!
• Turikenlah pengalamen i bas kam encibalken diri i tengah kinierbagen i bas perpulungen!
9. Kesimpulen ibabai Pandita/Pertua/Diaken
10. Nehken Persembahen, rende KEE No. 471 “Ermengkah Ukurku”.
https://www.youtube.com/watch?v=M0fSFzco7-k
Ermengkah ukurku ras ngataken bujur Tuhan
Kelengi min aku Kam empu geluhku
Enda ngenca Tuhan persembahenku
Kerina geluhku kesah ras kulangku
La kap lit bas aku erta kebayaken
Si cukup meherga lah ku persembahken
Sada ngenca Tuhan lit pemindonku
Aloken min Tuhan persembahenku
Pakeken geluhku jadi perkakasNdu segedang geluhku
11. Pertoton Persembahen
12. Momo
13. Pertoton Sapaat idungi Pertoton Tuhan
Pdt. Sri Rejeki Ulina Br Kaban, M. Th
HP/WA: 081265824719