Kiniersadan Mpeturah Pasu-Pasu

(Kekerabaten)

Ogen            : Masmur 133: 1-3

Tema            : Kiniersadan Mpeturah Pasu-Pasu

Tujun           : Gelah Saitun:

1. Meteh kuga belinna ulih kalak si ersada perarih i bas kegeluhen.
2. Banci jadi usihen kerna kiniersadan i bas kegeluhen si teptep wari.

Metode: Diskusi

Masmur 133: 1-3

Persaudaraan yang rukun

133:1       Nyanyian ziarah Daud. Sungguh, alangkah baiknya dan indahnya, apabila saudara-saudara diam bersama dengan rukun!
133:2       Seperti minyak yang baik di atas kepala meleleh ke janggut, yang meleleh ke janggut Harun dan ke leher jubahnya.
133:3       Seperti embun gunung Hermonyang turun ke atas gunung-gunung Sion.Sebab ke sanalah TUHAN memerintahkan berkat, kehidupan untuk selama-lamanya.

BENA KATA

Lit me sada jabu, lima anakna, ersada arihna kerina. Anem pe kuta anak – anakna e pedauh –  dauh, tapi la ia lupa erdiate sada ras sidebanna. Sekali jadi, sakit me bapa bas jabu e. Minter arih kalak e kerina uga ngerawat orang tuana e. Ersada arihna, maka pegancih ia njagaisa. Rusur ia komunikasi uga maka sikap iakap orang tuana e ras banci lampas madan. Seh rujung geluh orang tuana e, tetap irawat alu mehuli. E maka malem kal ate orang tuana e. Kalak si natap – natap pe mujiken jabu e arah kai si enggo ibahan anak- anakna e.

Kisah i datas, eme sada contoh uga ulih kiniersadan arih. Ertina, kiniersadan arih e mehuli kal man kegeluhenta. Guna mpebagesi pemahamenta kerna perluna kiniersadan arih, mari kita erlajar arah bahan PA Saitun-nta sekali enda!

MPEBAGESI OGEN

1. Masmur 133 eme termasuk bilangen masmur kebijaksanan (hikmat), si ertujun ngajari jabu – (keluarga) nggeluh i bas ersada perarih (ay.1). Kuga pentingna ersada perarih bas jabu. Teringet me kiita nandangi turi – turin Abraham ras Lot (Kej.13), bage pe Esau ras Jakub (Kej.36:7), si ersoal kerna lana bias ingan ermakan man asuh – suhenna. Tapi banci idungi alu arih – arih.
2. Kiniersadan arih e igambarken:
3. Bagi minak wangi si meherga, l Timur Tengah kuno, minak wangi si icampur ras rempah-rempah biasana ipake guna: 1). Tambar mpesehat ras mperim buk ras kulit; 2). Itamaken ku takal temue si reh ku rumah, selaku kehamaten. Inget asum Jesus reh iminaki sekalak diberu alu minak si merim (Luk.7: 38); 3). Penangkuhen (penahbisen) imam i bas ia menaken pendahinna. Alu alasen enda, banci sipahami uga pentingna minak i bas kegeluhen bangsa Israel.
4. Bagi embun deleng Hermon. Embun enda eme embun si berlimpah i bas musim panas si iperluken juma ras sinuan – sinuan, maka turah ras mereken ulih si mehuli.

Alu dua gambaren e, nuriken uga pentingna kiniersadan arih bas geluh manusia

3. Kiniersadan arih mpereh pasu-pasu. Kiniersadan arih e ngena ate Tuhan. I bas Matius 18: 19, “.. Adi lit i bas kam dua kalak i doni enda ersada ukur kerna kai si ipindondu i bas pertotonndu man Dibata, tentu ibereken BapangKu si i Surga nge pemindonndu e”. Arah enda jelas, ngena ate Tuhan kiniersadan arih. I bas kiniersadan arih e, manusia nggeluh i bas peraten Tuhan. Dibata pe erpadan mereken pasu – pasuNa man sindalankenca.

PENGKENAINA

Arah bahan PA Saitun-nta wari enda, lit piga – piga hal si banci sirenungken:

1. Persadan arih (kekerabaten) penting kal i bas kegeluhen enda. Engkai?
2. Kiniersadan arih e ngena ate Tuhan. Kiniersadan e banci terjadi adi lit rawin – jemba, kiniteruken ukur ras kekelengen.
3. Kiniersadan arih mereken malala dampak si mehuli ku bas kegeluhen manusia: Bagi nina kata bijak,”Bersatu kita teguh…” Persadan arih e pe mereken keriahen ras mpengasup kita ndahiken melala hal si mehuli.
4. I bas ersada arih e pe lit padan Dibata, eme mereken pasu – pasuNa man si ndalankensa. Ertina, adi kita ersada perarih, la kurang pasu – pasu Tuhan man banta.
5. Uga maka banci kita ersada perarih?
6. Kita arus nggit nggeluh alu kepentaren i datas nari (Tuhan). Alu kepentaren e me si mabai kita bersih pusuh peraten, nggit erdame, lemah lembut, la megogo, dem perkuah ate erbuahken perbahanen si mehuli (Bdk. Jak3: 17). Kiniersadan arih si payo, palasna eme persadanta si mehuli ras Tuhan. Persadan ras Tuhan rulihken persadan si mehuli ras sapih-sapih manusia.
7. Ersada perarih e labo mesunah, sabab karina kita enggo ndabuh ku bas dosa (Rm.3: 10). Tapi persadanta ras Tuhan Jesus, Penebus dosanta e, si mpengasup kita ndalankenca (PIL 4: 13).
8. Arah bahan PA Saitun-nta sendah, enggo tangkas uga pentingna kita ersada perarih. I bas doni enda pe banci si dat nanamna, bagi cerita i bas bena kata i datas, i Surga pe kita atan. E maka lanai bo lit perdalihen man banta kerina la ndalankenca. Malem me ateta si erjuang guna ersada perarih!
9. Perlu pe si inget, “Buah labo ndauh i bas batangna nari. Adi Saitun nggeluh alu ersada perarih, mahan bana jadi usihen man kesusurenta. Alu bage, keersadan arih si dalanken kita, labo terjeng man banta saja, tapi seh pe ku kegeluhen sinursurta pe.

PERTOTON

“O Tuhan Dibata si erngena ate man kalak si ersada arih! Pengasup kami ngantusi uga pentingna ersada perarih i bas geluh kami. Je nari, sampati pe kami ndalankensa! Tek kami maka isehkenNdu pasu-pasuNdu man kalak si ndalankensa! I bas gelar Tuhan Jesus kami ertoto! Amin!”

DISKUSI

1. Arah pengalamenta, kai nge si rusur erbahanca la ersada arih? Kai akibatna?
2. Arah bahan PA Saitunta sendah, kai si banci si buat pelajaren guna ngelayasi adi lit kinilaersadan arih?

 

1. USUL ENDE-ENDEN
2. KEE No. 209: 1-2
3. KEE No. 175: 1 -3
4. KEE No. 202: 1-2
5. KEE No. 182: 1-3

 

Berkat erpagi-pagi karaben maka mulih

Seh kenca i rumah ku inem teh susu

Perlu kal kita ersada perarih

Sabap ersada perarih perehken pasu-pasu

 

Pdt. Arapen Peranginangin, MTh

HP: 082185345585