Rugi Nggeluh Adi La Jujur

Ogen            : Perb. 5: 8-11
Tema            : Rugi Nggeluh Adi La Jujur
Tujun           : Gelah Saitun:

1. Meteh maka adi nggeluh la jujur maba kinirugin man dirina jine
2. Ngasup ngajarken ras ndalanken i bas kegeluhenna kerna kejujuren

Perb. 5: 8-11

5:8 Kata Petrus kepadanya: “Katakanlah kepadaku, dengan harga sekiankah tanah itu kamu jual?” Jawab perempuan itu: “Betul sekian.”
5:9 Kata Petrus: “Mengapa kamu berdua bersepakat untuk mencobai Roh Tuhan? Lihatlah, orang-orang yang baru mengubur suamimu berdiri di depan pintu dan mereka akan mengusung engkau juga ke luar.”
5:10 Lalu rebahlah perempuan itu seketika itu juga di depan kaki Petrus dan putuslah nyawanya. Ketika orang-orang muda itu masuk, mereka mendapati dia sudah mati, lalu mereka mengusungnya ke luar dan menguburnya di samping suaminya.
5:11 Maka sangat ketakutanlah seluruh jemaat dan semua orang yang mendengar hal itu.

• BENA KATA

Secara umum kerina jelma ersura – sura nggeluh alu payo / jujur, sabap cara kegeluhen si bage tentu ngelakoken hal – hal si mehuli, berbeda ras erbual. Labo lit jelma merincuh ibuali, gia tujun erbual e guna simehuli. Erbual / la jujur dampakna tetap nge labo mehuli i bas kegeluhenta ras labo membangun persadan tapi sebalikna mpeturah perpecahen. Jujur ras erbual e me dua hal situhu – tuhu erlawanen kal. E maka selaku kita anak – anak Dibata arus tetap nggeluh alu jujur gelah tercipta ras terbangun kiniersadan i bas perpulungen. Sabap labo lit untungna nggeluh la jujur, malahen rugi sendiri.

• MPEBAGESI OGEN

Kitab Perb. Rasul-rasul nuduhken kuga perbahanen Dibata si mbelin i bas Jesus Kristus alu kuasa Kesah si Badia si erdahin nandangi rasul – rasul i bas pebelangken Berita si Meriah, bage pe i bas kegeluhen perpulungen sitang – tangna. Perb. 5: 1-11 nuriken kerna kegeluhen keluarga Ananias ras Sapira selaku salah sada anggota sitang – tangna. Perikop enda lit kaitenna ras psl 4: 32-37 si nuriken kerna cara nggeluh perpulungen e, e me nggeluh i bas ersada ukur ras ersada penggejapen sikeleng – kelengen. Selaku kula ni Kristus. Perpulungen e nggeluh la lit si kekurangen (ayat 34a) sabap si lit i bas ia e ipergunakenna ras – ras.  Padahal kegeluhen perpulungen paksa si e tuhu – tuhu melala perbeben ras kiniseran sini alamina. La saja masalah ekonomi si sulit, tapi perpulungen e pe rusur iayak – ayak erkiteken kinitekenna man Tuhan. Tapi datna kesimpulen, maka guna banci bertahan nggeluh e me ersada ukurna dingen ersada penggejapenna lako si sampat – sampaten.

Kecuali, pasutri – Ananias ras Sapira. I bas paksa perpulungen e ndayaken ertana ras ibereken man rasul – rasul, jenari ibagiken ka man perpulungen e rikutken keperlun sekalak – sekalak (psl 4: 35), Tapi keluarga Ananias ras Sapira berbeda carana rukur bage pe carana nehken penampat. Alu ersada arihna maka setengah ulih pendayan tanehna e enggo lebe ibunikenna (ayat 2). la erpengakap maka perbahannenna e banci ibenarken gia ia erbual. Engkai maka bage ibahanna, kita terjeng erpengakap nge ngenca. Rasul Petrus si ikuasai Kesah si Badia meteh kerna perbahanenna e. E maka isungkun Petrus kerna perbahanenna e, i bas ayat 3 – 4 penungkunen man Ananias ras ayat 8 – 9 penungkunen man Sapira. Petrus negasken maka mereken erta si lit guna perpulungen labo sada kearusen, ras labo ka arah tekanen perpulungen. Ulin la ndayaken jumana asangken idayaken gia tapi ibuniken sada bagin, ulin la gia mere adi pemere e labo arah ukur ersuruh, tapi guna ndatken pujin.

Ananias ras Sapira enggo ngelakoken sada perbahanen si salah ras fatal, labo arah jumlah ntah kuantitas sini berekenna tapi erkiteken la idalankenna erpalasken kiniteken, ia enggo erbual, la saja man manusia tapi erbual man Dibata (ay 4c).

Tangkas man banta kuga kedungen kegeluhen keluarga Ananias ras Sapira enda i bas ersada arihna mbuali Dibata. Banci saja berbeda turi – turinna adi salah sada mereken masuken ras persinget maka perbahanenna e dosa, bagi sini ikataken Petrus man Ananias. Tapi sayangna la bage sijadi. I bas penatap manusia maka kai sini bahanna e tuhu mehuli, tapi erbual i bas perbahanen si tempa mehuli, i bas Dibata la kap terligen. Dibata labo terbuali, kita banci nambur – namburi mata jelma si enterem, tapi i bas IA kerina jadi tangkas la lit si terbuni.

• PENGKENAINA

Arah turi – turin Ananias ras Sapira i bas bahan PA nta wari enda mereken sada pelajaren man banta, ningetken kita gelah ula ngelakoken perbahanen – perbahanen si mbuali Dibata. Kai sini lakoken Ananias ras Sapira nuduhken maka Dibata e adil alu ngukum ia si enggo ngelakoken perbahanen si la payo, Dibata la pernah kompromi nandangi dosa ras erbual.

Rasul Petrus si idemi Kesah Si Badia mpersingeti Ananias ras Sapira alu tegas, gia masa genduari lanai kita jumpa bagi ia e, tapi selaku kalak si tek arus nalangi pusuhta guna ipelimbarui alu kata Dibata i bas kegeluhenta. I bas jaman enda kita iperhadapken ku bas erbage – bage tawaren doni enda si erbahanca kita lanai jujur. Sebagai anggota perpulungen, itengah – tengah keluarga bage pe i bas masyarakat arusna kita tetap nuduhken identitasta selaku kalak sierkiniteken. Ula pediat kuasa dosa / iblis bengket ku bas pusuhta, tapi berelah maka Kesah si Badia sierkuasa mabai kita i bas ketuhu – tuhun, sabab rugi ngenca sialoken adi la jujur.

• PERTOTON

Bapa kami sini Surga ikataken kami bujur man baNdu i bas penampatNdu sitetap isehkenNdu ku bas kegeluhen kami siteptep wari. Ngaku kami o Tuhan maka i bas ngalaken erbage – bage perbeben geluh, megati kami la ngasup nggeluh alu jujur. Rusur kami ikuasai sura – sura daging kami, seh maka la dat kami kemalemen ate i bas kegeluhen enda. Mekuah min ateNdu kami o Tuhan, e maka berekenlah gegeh Kesah si Badia guna nampati kami gelah tetap kami nggeluh bagi sini surakenNdu, nggeluh alu jujur lanai kami erbual sabap i bas Tuhan la lit si terbuni. Endesken kami kerina kegeluhen kami ku bas tanNdu, pakeken geluh kami jadi perkakasNdu lako nehken kekelengenNdu. I bas gelar Tuhan Jesus isehken kami pertoton kami man baNdu Amin

• DISKUSI
  • Kai nge si banci sipelajari arah turi – turin Ananias ras Sapira i bas ogenta enda ndai?
  • Turikenlah kai – kai saja nge iakapndu si perlu ilakoken gelah ula sempat kita la jujur/ erbual!

• USULEN LAGU
  • KEE No. 182: 1-3
  • KEE No. 249: 1, 2, 5
  • KEE No. 286: 1, 4
  • KEE No. 309: 1, 2

Pdt. Kasir Purba