Terus Erdahin Segedang Geluhta

(HUT PERMATA)

Ogen            : Johanes 9: 4

Tema            : Terus Erdahin Segedang Geluhta

Tujun           : Gelah Saitun:

1. Meteh Palas Erdahin
2. Rutang Pusuhna Empersingeti Dingen Nampati Anak Singuda / Permata Gelah Tutus Erdahin

Metode      : Ngenen Ras Nuriken Gambar

Yohanes 9: 4
9:4 Kita harus mengerjakan pekerjaan Dia yang mengutus Aku, selama masih siang; akan datang malam, di mana tidak ada seorangpun yang dapat bekerja.

• BENA KATA

Erdahin labo ukumen erkiteken ngelanggar pedah Dibata (Kejadin 3: 17-19). Tapi erdahin eme kap pasu-pasu, mandat, amanat siibereken Dibata man manusia kenca enggo dung alu serta / kuh kerina ijadiken Dibata isi doni enda. Ipedahken Dibata maka “demilah doni enda, pekena – kena kerina isina ras erkuasalah …….rst (Kejadian 1: 28). Perentah Dibata man manusia gelahna banci tetap terpelihara ras ipekena – kena kerina tinepa e. Sabab kerina tinepa e saling membutuhken sada ras sidebanna. Doni enda ras kerina isina ipercayaken Tuhan man manusia gelahna tetap terpelihara keutuhen ciptaan. Labo manusia sigenduari enda ngenca pertu kerina fasilitas doni enda tapi terus nge pagi ku sinursurta, erkiteken sie me segedang – gedang geluhta arus nge kita tetap ngusahai ras njagai tinepa Dibata.

• MPEBAGESI OGEN

Tuhan Yesus kinahun geluhna ibabo doni la erngadi – ngadi mberitaken kinirajan Dibata ras kuasa keleng ateNa arah pengajaren gelahna kerina kalak tek ngakui ras ngikutken kataNa. Pengajaren siniiajarken Tuhan tuhu – tuhu la seri ras pengajaren sienggo pernah ibegiken sienterem tupung sie. Sebab menurut pengakap sinterem maka sada – sada penakit banci ngelangketi sekalak jelma e erkiteken kesalahenna sendiri entah pe erkiteken kesalahen orangtuana. Ogenta enda nuriken kerna kalak sipentang menaken kin tubuhna nari. Mekatep kal nge sisakit e i hakimi kalak alu la ngergaisa, entah pe la kalak merhat erteman ras ia erkiteken kekurangenna. Mesui kal nge ate kalak pentang sebab rusur itokohi kalak sienterem, erkiteken dosa / ukumen Dibata nge niakap erbahanca ia pentang.
Pengajaren Yesus la seri ras pengangkan kalak sienterem sebab kepe nina Yesus penakit e labo ulih entah pe upah dosa tapi gelah tangkas perkuah ate Dibata. Labo la ate Tuhan keleng kempak ia, tapi arah kalak sipentang e ipetangkas Tuhan kuasaNa gelah kalak sienterem banci ngidah maka Jesus ngasup erbahanca kalak pentang e erpengidah. Labo lit kalak ngasup erbahanca bagi siilakoken Tuhan Yesus. Tanda sengget e empetangkas Kuasa Tuhan silabo terjului ise pe, janah arah tanda sengget e erbahanca reh teremna kalak tek ras ngikutken Tuhan Jesus.
Erkiteken sie me maka pedah Tuhan Yesus, gelahna kalak si tek tetap ngergai kegeluhen alu ndahiken dahin siisuruhNa, tupung terang denga wari sebab i bas paksana reh ka me gelap, sierbahanca kalak lanai banci erdahin. Ayat enda empersingeti kalak sitek maka Tuhan me sierkuasa ngaturken wari – wari. Adi lit kesempaten erdahin dahikenlah alu tutus ras ertanggung jawab sebab lit ka nge kari paksana maka erdahin pe ateta lanai lit kesempaten dingen lanai lit kengasupen.
Adi enggo reh gelap bagi sienggo iaturken Dibata, i je me kita pekesahken. Aminna pe i bas kinatana lit nge kalak bagi Lingkaber berngi suarina ras suari berngina. Kesempaten guna banci ndahiken dahin alu erpemeteh ras ergegeh labo pagi lalap lit. Sebab kerina lit paksana, adi enggo reh paksana umur meganjang labo tersimbak, pemeteh pe kurang, gegeh pe urak, penginget pe surut. Ula ka min pagi dalih siban Tuhan erkiteken mesera siakap gundari la kita mejingkat tupung kita nguda, Sebab kai sibahan kita genduari lit nge pagi kerina ulihna kumasa sireh. Dosa kai nge sireh man bangku maka lalit ulihna kerina sikudahiken e ninta ka, entahsa pe sidarami ka salah kalak i bas kiniseranta e. Tupung lit kesempaten banci erdahin ula kisat ras dekahen ngad – ngadi (ngada – ngada) tupung nguda. Tupung produktif tutusi erdahin ras susun deba ulihna maka kenca metua lit denga modal ndalani kegeluhen. Subuk e kesehaten, serpi, pemeteh bagepe orat nggeluh.

• PENGKENGKENA NAINA

Saitun tetaplah ngajarken man anak PERMATA gelah tutus erdahin, persingetilah anak PERMATA gelah beluh ia makeken waktuna tupung nguda denga, sebab labo lit dahin simehuli si sia – sia.  Kai pe siidahiken subuk silit ulihna ras lalit ulihna secara materi, kerina lit gunana. Saitun empersingeti PERMATA maka kulanta enda irancang Tuhan guna erdahin, siperdiateken dage kalak simekisat erdahin musil ras sukah sakit. Adi lit gegeh la ipakeken iba (sisa) kap gegehta sementara lit kalak ban buena dahin siarus idahikenna piah kurang gegehna ras kurang man bana waktu si 24 jam e pe.
Seh ngayak metua nge kita tetap erdahin, kalak simejingkat ialokenna me ulihna arah kinijingkatenna, bage kape sebalikna kalak pekisat ialokenna ka me ulih kedat/ kisatna. Ajarkenlah kempunta PERMATA kerna turi – turin kiniteken ras turi – turin nggeluh, persingeti kerina PERMATA maka tupung nguda kai siidahikenna kenca metua ialokenna ulihna. Janah banci ka nge bereken pelajaren arah turi – turin kalak siperkisat tupung nguda la ipakekenna waktu alu mehuli dungna mesui kal atena sebab lalap man sampaten seh metua biakna kin ndai banci nampati arah ulih siidahikenna sanga nguda.
Siajarken terus anak PERMATA gelah turah ukur ersuruh ras biak menjingkat erdahin alu mereken usihen, umpamana: Saitun lampas medak minter rende, ertoto ras ngoge Pustaka kenca sie dahiken sibanci dahikenndu sue ras kengasupen, umpamana mateken lampu, nalangi jendela ras pintun rumah. Mere man asuh-asuhen, ngingeti kempu, nulangisa man, ngelipat baju, napui jabu, erdakan adi ngasup denga bage pe jalan pagi tah senam i bas pekarangen jabu, nggosok uis, mejingkat ridi sierbahanca sikap ras rapi lalap saitun. Ula ban enggo metua kisat ridi ras ersikap.

• PERTOTON

O Tuhan, mindo kami gelah pengasupNdu kami selaku Saitun guna tetap ngasup ngiahken anak ntah pe kempu kami PERMATA segelah tetap tutus atena i bas erdahin, keleng atena dahin si enggo iberekenNdu man bana janah arah e pe erpengarapen kami banci jadi pasu – pasu man jelma sienterem. Amin

• DISKUSI

1. Pengajaren kai nge sienggo sipeseh man kempunta sienggo Permata gelah tutus ia erdahin ras kuga siban carana gelah ibegikenna?
2. Usihen sikuga nge sienggo ilakokenndu / idahikendu sierbahanca nggit ka Permata ngusih siilakokenndu?

1. USULEN LAGU:
2. KEE No.: 68: 1,2
3. KEE No. : 75: 1,2
4. KEE No.: 108: 1-3
5. KEE No.: 212: 1,2,5

 

Pdt. S. Magdala Munte MTh.