Kemulian Man Dibata (Soli Deo Gloria)

Teks       : Roma 11: 33-36

Tema     : Kemulian Man Dibata (Soli Deo Gloria)

Tujun    : Gelah Mamre:

• Meteh kai si imaksudken Rasul Paulus kerna kemulian man Dibata ras ngangkai teologi Calvin kerna kemulian Dibata I bas ncibalken geluhna.
• Ngasup ncidahken kemulian Dibata I bas geluhna teptep wari.

Roma 11: 33 – 36

11:33       O, alangkah dalamnya kekayaan, hikmat dan pengetahuan Allah! Sungguh tak terselidiki keputusan-keputusan-Nya dan sungguh tak terselami jalan-jalan-Nya!
11:34       Sebab, siapakah yang mengetahui pikiran Tuhan? Atau siapakah yang pernah menjadi penasihat-Nya?
11:35       Atau siapakah yang pernah memberikan sesuatu kepada-Nya, sehingga Ia harus menggantikannya?
11:36       Sebab segala sesuatu adalah dari Dia, dan oleh Dia, dan kepada Dia: Bagi Dialah kemuliaan sampai selama-lamanya!

1. KATA PENARUH.

Salah sada gereja suku si ngaku beraliren Calvinis lengkap sistem presbiterial-sinodalna,² e me gerejanta GBKP, tentu GBKP ndeher ras karya-karya bagepe pemikiren-pemikiren teologis Johannes Calvin. Bicara bage pe ningen, mungkin lit denga kita si la nandaisa ise kin Johanes Calvin enda? Calvin eme tokoh besar reformasi gereja i doni enda. la tubuh i Noyon, Perancis, jadi tokoh formasi gereja i Jenewa, Swiss. Raduken Martin Luther, duana ia jadi tokoh reformator si mbelin bagepe paling berpengaruh I bas doni enda. Arah pemikirenna duana, tubuh dua aliren gereja protestan si mendominasi i doni enda, eme Lutheran ras Calvinis. Duana aliren enda menyebar luas ku belang-belang doni, khusus i Indonesia arah pendahin Badan Pekabaran Injil I bas negara Belanda ras Jerman nari. Gereja-gereja si menganut salah sada aliren enda, corak gerejana la banci la kental ras pemikiren-pemikiren teolog enda, itambahi konteks lokal, suku, budaya gereja e masing-masing. Emaka gerejanta GBKP si mengaku

² Presbiterial-Sinodal eme salah sada sistem pmerintahan gereja si rata-rata ianut Gereja-gereja beraliren Calvinis termasuk gerejanta GBKP, tapi labo sada-sadana. Lit denga sistem si deban, bagi Episkopal, Kongregasional ras sidebanna. Sistem enda menekanken keseimbangen pelayanen para presbiterna (pandita, pengajar, Pertua ras Diaken) si idalanken ras-ras khususna Ibas ndalanken keputusen persidangen lbas wilayahna masing-masing.

beraliren Calvinis, otomatis kental ras pengajaren-pengajaren Calvin I bas kegeluhen bergerejana. Ma si gejap nge?
Melala kal karya-karya ras pemikiren teologis Johanes Calvin. salah sada eme kemulian man Dibata si igelari Soli Deo Gloria. Teologi Calvin enda tuhu-tuhu terkenal, janah rusur kal ikutip kalak Kristen, apai ka i bas nutup pidato entah pe kata sambuten, secara lisan ntahpe tulisen. Aminna Calvin si mpopulerkensa, tapi labo ia si petandakensa pemena. Calvin justru mengutip i bas surat Rasul Paulus nari si ikirimkenna man perpulungen i Roma. Kai kin si i maksudken Calvin kerna Soli Deo Gloria? Ku ja nge arahen teologi enda ibabana? Kuga nge gerejanta GBKP memaknaisa? kuga ka kita Mamre nggeluhkensa subuk i bas perukuren, pengerana ras perbahanen? Enda me si jadi bahasenta i bas PA Mamrenta sendah erpalasken Roma 11:33-36.

2. URAIAN TEKS.

Nats PA Mamre minggu enda ibuat i bas Roma 11: 33-36, nuriken kerna ende-enden pujin man Dibata si isehken Rasul Paulus. Ende-enden pujin enda tergolong doksologi, ntah pe pujin man kemulian Dibata. Doksologi biasana itamaken i bas pendungi sada pujin, masmur ras sejenisna, termasuk nats enda pe. I bas nats enda, ituriken Rasul Paulus maka, “seh kal tuhu bayakna Dibata! Ise kin ngasup nerangken keputusen-keputusen Na? Ise ngasup ngikuti dalan si idalaniNa? Ise kin meteh perukuren Tuhan? Ise kin ngasup ngajarken IA? Ise kin pernah mere man baNa gelah ndatken balasen i bas IA nari? Sebab kerina si nasa lit Dibata njadikensa, janah kerina e lit erkiteken IA dingen man gunaNa. Terpujilah Dibata seh rasa lalap. Amin.”

Ungkapen isi pusuh Rasul Paulus enda, tentu luar biasa. Menam bali ras kai si i turiken Job kenca igejapna langsung uga tan Dibata  negu-negu ia mentasi kiniseran si mesangat. Aminna kerina erta-ertana si lanai tanggung lang-lang buena keri; anakna si dilaki ras si diberu mate kerina, ndehara si ikelengina nadingen ia. enterem kalak erciga ate man bana erkiteken pinakitna, ikut pe temanna tangisina ia bagi kalak jahat si kena ukumen I bas Dibata nari. Tapi kedungenna isalihken Dibata kerina jadi kemalemen ate si mbelin si lebihen asa siniarapken Job. IgantiNa si bene salu si mbaru si nilaina lebihen asa si bene ndube. Emaka Job pe nehken puji-pujinna guna kemulian Dibata erdandanken perbahan Na si mejin e. Enda ka me si ilakoken Rasul Paulus. Rasul Paulus ngejap ras ngaku maka tuhu luar biasa keleng ate Dibata I bas kegeluhenna. Kenca enggo i dalanina kegeluhenna, seh me ia ku bas kesimpulen maka, Dibata enggo nelamatken ia I bas kematen nari janah ibabana ku keselamaten e. Kai si iakapna utung nai, sia-sia iakapna gundari kerina. E maka ipujina me Dibata alu nuriken situhu-tuhu luar biasa bagi si tertulis I bas nats enda.

Arah doksologi enda, Rasul Paulus nggambarken maka Dibata e lanai bo lit kurangna, sempurna. Ise pe labo ngasup nandingi Dibata e arah sisi si apai pe. Subuk kinibayakenNa, keputusen-keputusenNa, dalinNa, perukurenNa, pengajarenNa, ras sidebanna. Alu kata sideban, dirinta nari ngenca si man siksikenta, apakah si gejap denga nge perbahanen Dibata si mejin I bas kegeluhenta? Si inget denga nge mujiken gelar Dibatanta e? Mehuli adi si inget, sebab bage kin arusna. Tapi adi lanai bo si inget, enda enggo gawat. Sebab adi la kin erkiteken pengkawali Dibata, banci lanai terdalani kita kegeluhenta. Lit ka deba iakukenna penampat Dibata e, tapi la pujikenna gelarNa, enda pe labo mehuli. Seakatan mpersingeti kita maka patut nge sipujiken Dibata erkiteken perbahanenNa si mejin bas geluhta, teks enda pe ngajarken maka anak-anak Dibata labo mujiken Dibata erkiteken penampatNa saja, tapi i bas keriahen ukurna pe pujikenna nge Dibata. Sebab e pe erkiteken pasu-pasu Dibata i bas kegeluhenta. Alu kata Si eban, i bas situasi si kugapana pe, arus sipujiken gelar Dibata. Sebab kerina si nasa lit Dibata njadikensa, janah kerina lit erkiteken IA dingen man gunaNa. Termasuk geluhta e pe guna kemulian Dibata, sabab guna si me kita itepa Dibata. Emaka terpujilah Dibata seh rasa lalap, Soli Deo Gloria.

3. PENGKENAINA

I bas kegelunta i doni enda, tentu nterem nge kalak merhat ipujiken, la terkecuali Mamre. Baik ipujiken erkiteken beluhta, bayakta, rupanta, metemuenta, mejingkatta, melumbarta mere, rajinta gereja, terlebih ngitna kita nampati kalak i bas kesusahen geluhna. Kerina biak-biak ras perbahanen si mehuli enda tentu wajar nge ndatken pujin i bas jelma si nterem nari. Tapi ma si akuken nge maka lit pe biak-biak si mehuli e i bas dirinta erkiteken pemere Dibata? Biak Dibata nge si lit I bas kita e. Leben Dibata nampati kita maka ngasup kita nampati kalak sideban. Dibata me ulu kerinana si mehuli janah i bas IA nari me si lit i bas kita e. Emaka aminna ipujiken kalak kita erkiteken ulinta, pujin e man Dibata sajalah. Gelarnalah si terpuji, labo gelarta. Banci pe sisampati kalak sideban erkiteken ipengasup Dibata nge kita, janah ngataken bujurlah kita man Dibata kerna Si e. Ola ka sitangko kemulian Dibata guna kemulianta. Enda me si jadi tema PA Mamrenta sendah “Kemulian man Dibata.”

Bagi si enggo ipeseh Rasul Paulus bas nats ogenta sendah, maka kemulian man Dibata e me sada pengakun nandangi perbahanen ras kuasa Dibata si mbelin i bas kegeluhenta. La lit dalanna kita la mujiken Dibata i bas kerina dampar kegeluhenta, subuk kita isampati ntah pe kita nampati, kerina kemulian man Dibata. Teologi Rasul Paulus enda ka me si idaur ulang Calvin alu istilah “Soli Deo Gloria” entah pe “kedolaten Dibata”. Konsep teologi enda ngakuken kedolaten Dibata nandangi kerina dampar kegeluhen kalak si tek. Kegeluhen manusia secara total guna kemulian Dibata. Kai kin tujun manusia nggeluh? Tujunna eme guna permuliaken Dibata sebab guna Si e me manusia itepa. Bahken i bas perpanna, perpinemna, perukurenna, pengeranana ras perbahanenna, kerina guna kemnulian Dibata. Enda me kemulian man Dibata i bas ingan si meganjangna. Jadi soli deo gloaria Calvin melengkapi sola gratia Luther. Kalak si tek si enggo ndatken pemere simbelin, keselamaten i bas Dibata nari, labo pasip tapi ndalanken kegeluhenna alu total guna mpermuliaken gelar Dibata.

I bas kegeluhenta selaku Mamre, ma enggo silakoken enda? I bas kerina kelebihen ras kiniulinta ngeluhta, ma gelar Dibata sipujiken? I bas penampatta, perukuren, pengerana ras perbahanenta, ma si muliaken nge Tuhanta e? Ma labo si dirinta jine sipujiken? Program beasiswa ras mottonta Mamre erpemere ras Mamre erdiate, ma guna kemulian Dibata nge kerinana? Ma siinget nge ngataken bujur

man baNa? I bas kesehatenta, kecibal geluhta, lit nakan man pangan, lau man inemen, lit rumah ingan tading, simpar rejeki, lit ndehara ras anak-anak. I bas Si enda kerina ngataken bujurlah, muliakenlah gelar Dibatanta. Janah jadilah kita tan Tuhan nehken keleng ateNa kalak i sekelewetta, gelah ia pe kerina mpermuliahken gelar Tuhan e i bas kegeluhenna. Terpujilah Dibata seh rasa lalap, Soli Deo Gloria.

4. DISKUSI

• Oge sekali nari ayat 36, kai nge si imaksudken Rasul Paulus kerna kemulian man Dibata iperhadapken ras konsep soli deo gloria Calvin?
• Kuga nge carana Mamre ncidahken kemulian Dibata i bas geluhna teptep wari, subuk I bas perukuren, pengerana bagepe perbahenna?

 

USULEN ENDE-ENDEN

• KEE GBKP No. 372: 1, 3
• KEE GBKP No. 310: 1-2
• KEE GBKP No. 358: 1 (2x)
• KEE GBKP No. 316: 1 —
• KEE GBKP No. 196: 1-2

Pdt. S. Jonathan Meliala, M.Th.

HP: 0823 6862 7220