Jadi Surat Kristus

Teks       : 2 Korinti 3: 1 – 3
Tema     : Jadi Surat Kristus
Tujun     : Gelah Mamre:

• Meteh nggeluh jadi surat Kristus rikutken teks
• Ngasup makeken Teknologi Informasi selaku surat Kristus

2 Korinti 3: 1-3
3:1 Adakah kami mulai lagi memujikan diri kami? Atau perlukah kami seperti orang-orang lain menunjukkan surat pujian kepada kamu atau dari kamu?

3:2 Kamu adalah surat pujian kami yang tertulis dalam hati kami dan yang dikenal dan yang dapat dibaca oleh semua orang.

3:3 Karena telah ternyata, bahwa kamu adalah surat Kristus, yang ditulis oleh pelayanan kami, ditulis bukan dengan tinta, tetapi dengan Roh dari Allah yang hidup, bukan pada loh-loh batu, melainkan pada loh-loh daging, yaitu di dalam hati manusia

1. KATA PENARUH

Teknologi Informasi istilah si ipake si lit kawitenna ras kai saja si nampati manusia i bas erbahan, ngubah, nimpan, mpesehsa (engkomunikasiken) ras nebarken informasi. Informasi (berita) i bas erbage-bage dampar kegeluhen manusia subuk kesehatan, ekonomi, pendidikan, pendahin, rsd. Informasi mpeseh isi berita si tuhu ras payo, erguna man si ngosesa. “Jadi Surat Kristus” e me tema PA Mamre wari enda si ertujun jemba Mamre jadi surat Kristus ras makeken IT alu payo.

2. URAIAN TEKS

Paulus mpeseh suratna man perpulungen Korinti. Kecibal perpulungen paksa si e lit ndabuh ku biak “bangga-banggaken” ras “mbanding-mbandingken” pemimpin. Lit ka si peganjangken bana “sombong” erkiteken litna pemere-pemere Dibata bas dirina. Lit muji-mujiken bana gelah teridah man kalak lit kebeluhenna. Perbahanen si bage rupana me si erbahanca turah lanai si ergan, lit si erpihak-pihak ras perpecahen. Paulus mpersingeti perpulungen Korinti gelah tetap ersada, la erpihak-pihak ras la turah perpecahen i bas persadan erkiteken biak si la payo.

Paulus nuriken uga ia i bas ndahiken dahin pelayanen, perayakenna labo guna ndatken pujin ras labo mujiken bana i bas perpulungen. Labo ia perlu surat pujin bas perpulungen nari si man ncidah-cidahenken. Paulus ngelai erpalasken igejabkenna ia enggo imenangken Kristus. Enda me si jemba Paulus naksiken Jesus bas geluhna. Selaku pelayan Paulus la mujiken bana. Paulus la perlu surat pujin si man cidahenken.

Nina Paulus,”kam kap surat kami, si tersurat i bas pusuh kami si banci ieteh dingen ioge kerina jelma”. Perpulungen e me surat Kristus si isuratkenNa arah pendahinna. Ertina arah pendahin pelayanen Paulus perpulungen naksiken Kristus bas geluhna. Perpulungen e surat si la itulis alu tinta, tapi alu kesah Dibata, la itulis i bas papan batu, tapi i bas pusuh manusia.

Perpulungen jadi surat Kristus teridah tangkas labo erkiteken lit si ngatakenca ras lit si nuratkenca. Teridah pelayanen Paulus alu litna dingen nggeluh persadan si mehuli i perpulungen Korinti. Banci i oge kalak kai si ilakoken Paulus ras perpulungen e jadi curmin si mpetandaken Kristus man nterem jelma. La itulisken tapi banci ioge kalak arah perukuren pengerana ras perbahanen si jadi kesaksin man kerina jelma

3. PENGKENAINA

Paksa enda banci jadi lit kalak Kristen tapi nggeluh la ncidahken biak pengikut Kristus. La erbahanca kalak si deban merhat (tertarik) bengket jadi kalak Kristen. “Jadi surat Kristus” si jadi tema PA mamre wari enda ngajuk kita Mamre nggeluh jadi curmin arah geluhta ngusih perbahanen Kristus. Terlebih i bas kemajun Teknologi Informasi paksa enda berita kai pe banci meter seh man nterem jelma. Teknologi Informasi banci ipakeken jadi sarana erBerita Si Meriah (ngirim renungen, lagu rohani, video rohani, rsd). Mpeseh status si mehuli labo status si naling-naling kalak, merawa-merawa, nalah-nalahken, rsd. Mpeseh status si banci nampati kalak labo status si “ncidah-ncidahken” bana (pamer) si banci mpeturah “kesombongen diri” ras “kecemburuan” man kalak si deban. Teknologi Informasi arah ertelepon, erSMS, erWA, erMesengger, erFacebook, rsd, banci ermomo kerna dahin-dahin gereja, ngiahken teman pulung PA, PJJ, gereja. Mbagiken berita lapangen kerja, mbuka usaha, persekolahen. Banci pe lako mpersadaken keluarga alu erbahan group-group persadan (komunitas) si erguna lako mpersadaken keluarga, teman meriah, gereja ras si debanna. Mamre jadi surat Kristus ncidahken biak-biak Kristus bas geluhna.

4. DISKUSI

• Rikutken bahan PA enda kai nari si perlu ilumbaken Mamre lako ncidahken nggeluh selaku surat Kristus?
• I kawitken i bas makeken Teknologi informasi, kai nari tole banci sipakeken guna si mehuli? Lakokenlah.

USULEN ENDE-ENDEN

• KEE No. 209: 1-2
• KEE No. 192: 1-2
• KEE No. 330: 1-2
• KEE No. 316: 1-(Persembahen)
• KEE No. 322: 1-2

 

Pdt. Karvintaria br. Ginting, S.Th., MM.
HP/WA: 0812 635 9640