Tutus I Bas Si Kitik

Teks       : Markus 12: 10-12

Tema     : Tutus I Bas Si Kitik

Tujun     : Gelah Mamre:

1. Meteh erti tutus I bas dahin si kitik rikutken teks.
2. Nggeluh terteki (berintegritas) I bas kai pe.

Markus 12: 10 – 12

12:10       Tidak pernahkah kamu membaca nas ini: Batu yang dibuang oleh tukang-tukang bangunan telah menjadi batu penjuru
12:11       hal itu terjadi dari pihak Tuhan, suatu perbuatan ajaib di mata kita”
12:12       Lalu mereka berusaha untuk menangkap Yesus, karena mereka tahu, bahwa merekalah yang dimaksudkan-Nya dengan perumpamaan itu. Tetapi mereka takut kepada orang banyak, jadi mereka pergi dan membiarkan Dia.

1. KATA PENARUH

Adi lit dahin si kitik guapa pe pasti lit dahin si mbelin. Adi kalak si tutus I bas dahin si mbelin, enggo nge pasti ia tutus i bas dahin si kitik? Bagepe sebalikna, adi kalak si tutus I bas dahin si kitik, enggo nge pasti ia tutus i bas dahin si mbelin? Secara umum, “Sesuatu yang besar datang dari hal-hal yang kecil”

Sekalak psikolog si tergelar Abraham Maslow ngataken: “Kita lebih dari sekedar mahluk hidup yang memiliki mulut dan perut, tetapi kita juga adalah mahluk yang bermartabat. memiliki hati nurani, maka ketika kita bekerja sebenarnya kita sedang mengaktualisasikan diri sehingga hidup ini lebih berarti dan memberi arti hidup”.

Konsep Abraham Maslow kerna kegeluhen enda sue ras pemahamen kekristenenta erkiteken kita selaku anak Dibata arus kin mengaktualisasiken diri i bas kegeluhenta sebage kalak si erdahin, erkiteken erdahin e memang kin biak, panggilen ras sebage perintah man banta (bd. Yoh 15: 17, Kej 3: 19), alu bage lalit alasenta guna la tutus i bas ndahiken dahinta. Kalak si la erdahin ia menolak biakna selaku tinepa Dibata si erdahin.

2. URAIAN TEKS

I bas pasal sebelumna nggo iturken Jesus kerna erbage-bage perumpaman. Jesus enggo encidahken uga ia reh guna maba berita keselamaten dingen  erjuang guna majekken kula ni Kristus i doni enda. Arah perumpaman siituriken Jesus i bas Markus 12: 1-12 enda tangkas ituriken Jesus perumpaman  kerna si newa kebun anggur. I bas perumpaman enda ituriken kerna uga sipuna kebun anggur mereken kesempaten man sinewa kebun anggurna. Kenca iperjumaina kebun anggurna isewakenna kebun anggur e jenari lawes me ia ku sada negeri si ndauh.
Jenari isuruhna me juak-juakna lako ndahi si newa kebun e guna mindo sikerajangenna. Tapi itangkap sinewa kebun anggur e juak-juak ndai jenari ipek-pekina, isuruhna mulih alu la maba kai pe. Kenca bage isuruh si puna kebun anggur ndai juak-juak sideban, epe ipekpekina takalna ras igombang-gombangina. Isuruhna ka juak-juak sideban, epe ibunuh sinewa kebun anggur ndai. Nterem sisuruhna pegancih-gancih ndahi si newa kebun anggur e, tapi kerina ipekpeki janah deba ibunuh.  Sekalak nari ngenca tading, eme anak si puna kebun anggur ndai. Dungna anak na e pe isuruhna ndahi sinewa kebun anggur ndai, tapi e pe ibunuhna. Emaka lawes me si puna kebun anggurna ndai ndahi sinewa kebun anggur ndai jenari ibunuhna kerina si newa kebun anggurna janah isewakenna kebun anggur e man kalak sideban.
Perumpamaan kerna sinewa kebun anggur si la meteh bujur enda nuriken kerna dosa bagepe kecedan gereja kalak Jahudi. lja kalak Jahudi la ngasup ngergaken keselamaten si enggo ibereken Dibata man baNa. Bagepe isuruh Dibata AnakNa si Tonggal guna maba berita keselamaten, epe la iergaken kalak Jahudi. Justru Anak e ibunuhna.
I bas ayat 10 tangkas ituriken maka Kristus eme batu si iambekken tukang, tapi justru batu e si jadi palas. Kalak Israel enggo nulak Jesus jadi Tuhan ras Juruselamatna, tapi arah e me tubuh gereja-gereja. Arah si e teridah uga Dibata netapken Kristus jadi raja si Mbelin. I bas buena tantangen siihadapi Jesus i bas meritaken Berita Si Meriah, Dibata tetap erdahin guna mereken kiniulin. Sebab rencana Dibata la pernah gagal. Dibata mereken jaminen si pasti man banta kerina.
Empermuliaken Kristus eme pendahin Dibata. la me si erdahin seh ku bas pusuhta. Seh makana arah kematen Jesus mabai ertangkasna penandai manusia kerna sura-sura Dibata. Kematen Jesus labo menjadi lambang kegagalan bagepe kekalahen. Tapi arah kematen Jesus teridah uga Dibata ngubahken cara pandang doni enda. Sebab Jesus ngenca ngasup keke i bas doni kematen nari. Arah kekeken Jesus e ka pe keke gereja-gereja si nggeluh. Seh makana erbuena kalak si erkiniteken dingen ngaloken Jesus jadi Tuhan ras Juruselamatna.
I bas ayat 11 ituriken kerna uga belinna perbahanen Dibata, Dibata kap si ngasup empeturah kiniteken manusia. Seh makana ngasup tetap tutus dingen setia erkiniteken man baNa aminna pe tuhu melala tantangen si man alanken.
I bas ayat 12 ituriken Jesus kerna respon pemimpin-pemimpin kalak Jahudi si ersura-sura guna ngelawan Jesus. Enda nuriken maka labo kerina manusia ngasup ngergaken karya keselamaten si enggo ibereken man bana. Alu bage tuhu penting kel ipetangkas kiniteken man Dibata. Seh makana aminna pe melala tantangan si man alanken kiniteken e la monce.

3. PENGKENAINA

Erkiniteken ras erdahin eme sada kawiten si la banci ipisahken. Sebab erdahin adi la sendalanen ras kiniteken banci mahanca kita la tutus ndahikenca. Janah banci ka pe meneken kita. Seh makana la ngasup kita ngergaken dahin-dahin si kitik e. I bas ndahiken dahinta si jadi fokus utamanta labo kerna uga buena “ulih” Si ialoken kita rikutken pendahinta. Tapi uga “pendahinta” e jadi sada proses si mahanca ertangaksna si angka kerna sura-sura Dibata. Sebab melala kalak i bas ndahiken dahinna lanai bujur. Si jadi orientasina eme kerna “keuntungen”. Piah dungna ndabuh ku bas dosa “keserakahen”. Janah la mediate kerna kalak sideban. Si terpenting man bana eme kerna dirina jine.

Mamre emekap imam itengah-tengah jabu. Tugas mamre si mbelin emekap mabai kerina seisi jabu jadi jabu si malang man Tuhan. Selaku mamre, jadilah mamre si tetap “berintegritas” i bas ndahiken dahin si enggo ibereken Dibata. Integritas e teridah arah bas uga Mamre ertanggungjabab i bas ndahiken dahinna aminna pe dahin e kitik. Ingetlah maka dahin si kitik e pe adina idahiken alu tutus pasti mereken dampak si mbelin ku bas kegeluhen mamre bagepe kempak kalak si deban. Ngataken bujurlah kita i bas keadaan siguapana pe

4. DISKUSI

• Erpalasken Markus 12: 10-12, enggo ngenda kidekah enda kita tutus i bas ndahiken dahinta?
• Kai-kai saja si erbahanca maka la kita tutus i bas ndahiken dahinta? Ras kuga searusna?

 

USULEN ENDE-ENDEN

• KEE GBKP No. 399: 1-3
• KEE GBKP No. 317: 1-2
• KEE GBKP No.255: 1-2
• KEE GBKP No. 343: 1-
• KEE GBKP No. 381: 1-3

 

Pdt. Berandes Ginting, S.Th., M.Psi.

HP/WA: 0812 6905 4130