Teks : Masmur 144: 12-15
Tema : Desken Batang Kayu Si Turah Megegeh Ras Mejile
Tujun : Gelah Mamre:
1) Meteh pengataken bujur Daud man Tuhan
2) Nehken Pengarapenna kerna PERMATA GBKP
144:12 Semoga anak-anak lelaki kita seperti tanam-tanaman yang tumbuh menjadi besar pada waktu mudanya; dan anak-anak perempuan kita seperti tiang-tiang penjuru, yang dipahat untuk bangunan istana!
144:13 Semoga gudang-gudang kita penuh, mengeluarkan beraneka ragam barang; semoga kambing domba kita menjadi beribu-ribu, berlaksa-laksa di padang-padang kita!
144:14 Semoga lembu sapi kita sarat; semoga tidak ada kegagalan dan tidak ada keguguran, dan tidak ada jeritan di lapangan-lapangan kita!
144:15 Berbahagialah bangsa yang demikian keadaannya! Berbahagialah bangsa yang Allahnya ialah TUHAN!
1. KATA PENARUH
Anak eme erta simehergana kel i bas kegeluhen ta. Kai pe si nidahiken kita kerina e tujunta guna mendukung keperlun anak., Adina guna kemajun anak, kai pe si lakoken. Sebab anak e me tumpuan harapen masa depan i bas jabu, gereja, ras bangsa. Adina ateta jabu, gereja ras bangsa megegeh ras berkembang, anak-anak arus turah megegeh ras mejile. Ise si berperan penting segelah anak e banci turah megegeh ras mejile? Salah sadana eme Mamre. Erlajar kita arah Daud sekalak Bapa si mindo perkuah ate Tuhan i bas pertotonna segelah anak-anak megegeh ras mejile i bas kegeluhenna.
2. URAIAN TEKS
Kitab Masmur e me kitab ende-enden ras pertoton i bas Pustaka Si Badia. Ende-enden ras pertoton enda kenca ipepulung ipake kalak Israel i bas kebaktinna janah kedungenna ipersada ku bas Pustaka Si Badia. Kitab Masmur enda igelari puisi keagamaan. Puisi keagamaan enda melala erbagena e me: lit ende-enden ntah pertoton kerna Dibata, pertoton mindo penampat, pertoton mindo pengkawali dingen keselamaten, ermengkah ate erkiteken pengalamen dosa, ende-enden pengataken bujur erkiteken pemasu-masun Dibata. Pertoton-pertoton enda, e me secara pribadi ntah secara nasional piga-piga nggambarken perasaan pribadi si lebih akrap, si debanna nggambarken keperlun ras penggejapen kerina bangsa Dibata.
Masmur 144 nuriken kerna pertoton pengataken bujur raja, pemimpin pasukan lsrael mindo penampat man Dibata i bas krisis nasional nari (ayat 1-8). Tapi i bas ayat 9, pemindon guna mindo penampat salih jadi pertoton pengataken bujur. Janah i bas ayat 11 eme pertoton guna kesejahteraan umat¹. Nas ogenta Masmur 144:12, nuriken kerna pertoton raja man Tuhan guna kegeluhen anak-anak, tupung anak perana: balilah min desken batang kayu si turah alu megegeh. Janah anak-anak si diberu tupung singuda-nguda: jadilah desken tiang si ihiasi i bas suki-suki istana. Ayat enda nuriken kerna pengarapen raja, lit pasu-pasu man anak-anak (anak singuda) si kin jadi arapen masa depan jabu, gereja ras bangsa. Adi si oge Masmur 127: 3-4 “situhuna, Tuhan kap si mereken anak-anak e, pasu-pasu i bas Tuhan nari kap ia. Anak dilaki si ipupus tupung kalak nguda denga, bali kap e ras anak panah i bas tan si mbisa”. Ertina pasu-pasu Tuhan e tuhu-tuhu jadi kemalemen ate man jabu, gereja ras bangsa dikune pengajaren si mehuli si enggo iajarken man anak-anak ilakokenna i bas kegeluhenna (tepat sasaren). Daud ngataken bujur man Tuhan i bas pasu-pasu si tuhu-tuhu simpar si enggo ibereken Tuhan man bana rikut pe man bangsana; baik arah sinuan-sinuan, asuh-suhen, khususna pe anak-anak si mpeturah kemalemen ate. Emaka ipeseh raja Daud pengarapenna man Tuhan i bas pertotonna: tupung anak perana, balilah min desken batang kayu si turah alu megegeh. Ertina: amin pe lit angin meter, udan meder batang kayu e la mugur-ugur. Amin pe gia sekali arus mugur-ugur, la ia seh mbulak sebab batang kayu e enggo turah alu megegeh. Kata kiasen enda nuduhken pengarapen man anak perana, tentu saja man singuda-nguda pe; segelah tetap paguh, lit jiwa pemenang, la pantang menyerah. Amin pe lit tantangen nggeluh, si la bagi ukur nderpa kegeluhen; tetap paguh sebab Dibata jadi penggurun. Rikut pe anak-anak diberu tupung singuda-nguda, jadilah desken tiang si ihiasi i bas suki-suki istana, ertina: jadi penopang, erbahanca mejile dingen malem ate sinatapsa. Ayat 13-15, pe nuriken pertoton raja man Tuhan kerna pengarapenna segelah Tuhan pe masu-masu kerina pencarinna; baik sinuan-sinuan bagepe asuh-asuhen. Enda kerina jadi erkiteken bekas pemasu-masun Tuhan. Malem me ate kalak si ernalem man Dibata i bas kegeluhenna.
¹ Dianne Bergant, Robert J. Karris, Tafsir Alkitab Perjanjian Lama: Kanisius 2022, hal. 461
3. PENGKENAINA
I bas tahun enda enggo genep umur kategorial PERMATA GBKP si pe-76 tahun ken (12 September). Bagi raja Daud si ngataken bujur man Tuhan arah pertotonna, eme kerna pasu-pasu si enggo ialokenna. Rikutpe i bas pertotonna e, iturikenna man Tuhan pengarapenna segelah Tuhan tetap masu-masu anak-anak ras kerina buatenna lit. Bage me min Mamre, i bas 76 tahun enggo seh umur kategorial PERMATA GBKP. Mari ertoto kita man Tuhan segelah kerina anak-anak (PERMATA GBKP) banci reh paguhna kinitekenna man Tuhan. PERMATA GBKP reh bancina turah megegeh, dingen erbuah, simaba kemalemen ate kalak Si enterem, baik secara pribadi selaku PERMATA GBKP bagepe secara organisasi PERMATA GBKP. Amin melala tantangen, tapi la mudah menyerah. Terus berusaha, lit jiwa pemenang ngalaken tantangen.
I bas 76 tahun enggo umur kategorial PERMATA GBKP, Mamre nuriken pengarapen-pengarapenna nandangi PERMATA GBKP segelah tetap ia turah megegeh ras mejile. Emaka tentu saja sipertama Mamre e pe arus megegeh, seh maka banci jadi usihen man PERMATA GBKP. Segelah megegeh kerina PERMATA GBKP: sitotoken ia, gelah si iah-iahen reh ku PJJ, ras kuPA, bagepe ku kebaktin Minggu. Sidukung kerina kegiaten PERMATA GBKP si maba kiniulin man anak singuda dingen jadi kemuliaan gelar Tuhan. Si dampingi baik secara pribadi selaku anak-anak i tengah jabu, rikut pe selaku anak-anak i tengah-tengah gereja. Mamre harus siap jadi orang tua rohani, si jadi teladan, si mediate, si notoken dingen simereken kebutuhen anak-anak (PERMATA GBKP). Bagi motto Mamre GBKP: “Mamre Erdiate. Mamre erpemere”. Mamre tetap jadi idola man kerina anak-anak PERMATA GBKP, Alu bage banci terarapken permata jadi generasi penerus I bas masa depan gerejanta
4. DISKUSI/ AKSI
1) Sue ras teks oratenta sendah, mari situriken pengataken bujur dingen pengarapen Daud man Tuhan!
2) Mari situriken kai pengarapen Mamre man PERMATA GBKP subuk secara pribadi selaku PERMATA GBKP bagepe organisasi. Situlisken/suratken pengarapen-pengarapen Mamre enda, si endesken man PERMATA GBKP.
3) Bahanlah aksi (si banci idalanken/ibereken) man PERMATA GBKP i bas perayaan HUT PERMATA GBKP si pe-76 tahunken i bas tahun enda!
USULAN ENDE-ENDEN
1) KEE GBKP No. 309:1,3= https://www.youtube.com/watch?v=oVgKu841LSQ&pp=ygUHa2VlIDMwOQ%3D%3D
2) KEE GBKP No. 201:1,3,4= https://www.youtube.com/watch?v=JRVOZ_09uR8&pp=ygUHa2VlIDIwMQ%3D%3D
3) KEE GBKP No. 124:3= https://www.youtube.com/watch?v=E6T9fdnMWhw&pp=ygUHa2VlIDEyNA%3D%3D
4) KEE GBKP No. 249:1, 5= https://www.youtube.com/watch?v=MOcOMsFWGDI&pp=ygUHa2VlIDI0OQ%3D%3D
5) KEE GBKP No. 270:1= https://www.youtube.com/watch?v=5fIrm4LpneU&pp=ygUHa2VlIDI3MA%3D%3D
Pdt. Mira Mutianta br. Sinulingga, S.Th.
HP/WA: 0852 6195 2107